Zenosid Blog 56- Nomineshyenn De pandan enn Zenosid
24.10.2024
Mardi ti zur Nomineshenn. LALIT pe prezant sis kandida – trwa dan Por Lwi No. 1 ek trwa Lesid dan No. 13, Rivyer de Angi ek Suyak. Alor, nu ti dan Sant Nomineshyenn – dan sa de rezyon la, nu finn proteste kont klasifikasyon etno-relizye ki lalwa dimande par fer enn tiraz-o-sor pu swazir nu swadizan “kominote” – ek so tanto, mwa avek enn lekip sis kamarad manb LALIT, ti fer port-a-port dan Pailles. E anmemtan kan nu ti pe fer sa de kalite travay elektoral - anrezistreman formel nu kandida ek fer kanpayn dan kartye – anmemtan Israel, ki USA pe plis ki zame sutenir, pe intansifye zenosid dan Lenor Gaza. Leta Israel pe li reser leto lor furnitir manze, tuf lantre medikaman ek lenerzi, e bonbard fami antye an morso, bril zanfan vivan, inklir Sha’ban al-Dalou 19an, enn etidyan inzenyeri-softwer, ki ti deza blese, avek drip dan so lebra, finn brile vivan lor lekran divan nu. Suvan bonbard ek bril vivan dimunn ki deza refizye-deplase dan latant. Aster mem sa tigit mwayin sirviv fini disparet. Israel ek USA pe kontinye lasas dimunn, kumadir zanimo. Alor, kan mo truv enn ti kus lapusyer lor mo sali ubyin lor rebor lafnet, e trakase lor neglizans pu okip luvraz-lakaz, mo rapel fam Palestinyin ki pe masakre dan rwinn so lakaz kinn bonbarde. E mo santi laont ki pa pe fer ase pu aret zenosid kont Palestinyin.
E parski, nu, antan ki imin dan lemond, nu pa pe aret e pa pe kapav aret lalyans Israelo-Amerikin ki pe masakre dimunn aze, zom, zanfan, malad, andikape, fam, ti baba dan Palestinn, aster sa lalyans maniak ek mertriye Israel ek USA pe intansifye zot zenosid dan Wes Benk ek aster dan Liban, usi. Li vremem inpansab. Barbari Israelo-Amerikin pe kontinye mem, tortir sivil. E zot pe planifye an sekre pu atak Liran, kuma bann fwit finn montre. E ansam USA ek Israel pe anpir sa masak la. Bizin aret zot. Lavenir limanite an-ze.
E antretan, nu manb LALIT ki finn port li volonter pu donn kudme fami Palestinyin ki pe fer fas enn intansifikasyon zenosid kont zot, asterlamem pe sey truv so sime return lakaz kot nu dan Moris. Wi, li difisil pu rant dan Palestinn, li dir pu prezan laba, e li usi dir pu kit Palestinn e returne. Alor, sa de laspe nu lalit politik – eleksyon dan Moris, ek kont zenosid dan Palestinn- zot liye. Nu kamarad pu prezant enn “riport bak” kan li returne. Enn premye pu manb LALIT, ek lerla pu piblik.
E anmemtan ki eleksyon pe koste - dan USA, perpetrater zenosid akote ar Israel, ek dan Moris - anu konpar swa ki pe prezant dimunn. Dan USA, swa “prinsipal” elekter li ant enn Trump mantalman deranze, sa zom danzere, ki pa bizin dan enn pozisyon puvwar ditu, viz-a-vi enn fam ki responsab antan ki Vis Prezidan USA pu komet zenosid, e responsab pu tu masak, lafaminn, kover-ep politik, abi veto Nasyon Zini, osi byin ki buku krim deger, krim kont limanite, inklir zenosid. Ki kalite swa sistem demokrasi kapitalis pe donn Amerikin? E dan Moris, nu ena de lalyans, seki dan puvwar otur Jugnauth ek MSM, avek enn rekor servi puvwar politik pu gin ekonomik ek abi institisyon Leta dan tu sort fason, ek seki dan lopozisyon otur Ramgoolam ek Parti Travayis, ar so rekor abi tu kalite, osi byin ki memwar vif fim video biye dolar, an seri, ki pe deborde depi so kof dan so lakaz. E tulede lalyans an faver ki baz militer USA kontinye lokipasyon nu later – zot koz zis lor larzan lokasyon baz, ek lor kestyon “form”. Pena okenn kanpayn pu azir pu aret zenosid. Ni pena okenn kanpayn pu aret vann nu later, suvan later fertil, ar milyarder depi deor. Ni pena okenn kanpayn pu fors tablisman pu alwe later pu sekirite alimanter. Tulede lalyans servi e abiz siyn etno-relizye dan enn fason danzere. E tulede pe gayn akizasyon ekut-telefonik, mem espyonaz aplikasyon WhatsApp, ek sirkil rikording-odyo ilegal par “Missie Moustass” dan form enn seri tele-drama, premye lor Fesbuk, ki finn sispann tu posting, ek lerla Tik-Tok ki finn usi anlev tu posting. E Komiser Lapolis, finn expoze lor rikording-odyo, e depi lontan pe atann ki retir li depi so post, li dimunn ki ansarz pu ankete anprofonder lor la. Buku dimunn pe blam Israel, ubyin konpayni Israelyin, pu vyolasyon kominikasyon.
Alor, kuma dan LALIT, nu lye sa de nivo realite – enn zenosid ki pe kontinye e ki nu tu, antan ki imin, nu responsab, ar sityasyon politik? Manyer nu fer li se atraver nu intervansyon dan lapres andeor sant Nomineshyenn, par denons seki pe arive onivo nasyonal, osi byin ki seki pe arive onivo internasyonal, par atak seki opuvwar ek seki pe rod akapar puvwar san okenn program.
Pu konklir, mo pu partaz fiyling parkur kanpayn dan Pailles dan site Mauvillac, kot mo ti ete yer tanto avek 5 kamarad LALIT.
Kan nu ti pe marse dan enn sime, an de grup 3 manb sakenn, e kan nu ti pe kit enn trak, apre enn ti introdiksyon, ar enn misye dan laz, mo finn dimann li si mo memwar bon ki li ti enn travayer dok. Li dir, “Wi, mo konn u depi lagrev 1979, kan doker ti ini avek laburer. E mo konn Ram, u bolom. Ki so nuvel? E nu finn partaz suvenir, pandan sink minit, lor seki ti koni kuma lagrev nasyonal pli intans dan muvman lagrev. Enn konversasyon ti finn amenn enn gran plezir pu mwa, e mo ti retruv lazwa dan lizye sa travayer dok kan li finn rapel sa lepok lespwar dan lalit, enn lepok ki pu returne enn zur. E lerla li finn dimann lor nu kandida dan so sirkonskripsyon, mo finn prezant li de kandida ki ti dan nu lekip. Li ti emerveye ki zot dimunn dan klas travayer, enn kamarad dan sekter konstriksyon, Laval Yves, enn kamarad fam kontroler bis, Sarahjane Naraina, ek kamarad Rada Kistnasamy ki teknisyin IT.
Lerla, enn parmi nu sis manb dan port-a-port apel Georges finn zwenn trwa elekter dan landrwa ki konn li personelman depi letan li ti sofer Biblio-Bis Minisipal e finn dir ki zot ti pe pran liv prete pu lir depi so bis. Se kumsa ki li finn introdwir nu Platform an 12-pwin pu eleksyon, dan sa fason la. Ankor enn fwa, mo finn santi sa memwar-partaze salere.
Enn lot manb LALIT, kamarad Anne-Marie finn rekonet de fam ki suvan pran mem bis Pailles ki li, e avek ki li finn deza ena konversasyon dan lepase. Se kumsa ki zot konversasyon lor politik finn progrese dan sa lespri ge lexperyans an-komin. Mo ti usi zwenn enn kamarad fam ki mo ti kone depi Muvman Fam.
Kandida LALIT Laval Yves ti byin kontan pu zwenn enn travayer konstriksyon avek lekel li finn travay dan General Construction lor de sayt diferan, inpe lane desela. Mo finn temwayn lafeksyon dan konversasyon ki finn swiv. Pena okenn lezot parti ki ena sa kalite inplantasyon parmi lamas dimunn.
Kamarad Rada Kistnasamy, kandida dan sirkonskripsyon No.1 finn zwenn enn ansyin zelev ki ti aprann lir ek ekrir resaman dan enn kur LPT dan batiman kot kartye zeneral LALIT ete. Rada antan ki enn teknisyin IT, finn zwenn enn elekter ki travay dan sekirite IT - alor nu finn partaz, dan enn moman byin konsantre, nu refleksyon lor fwit resan ki finn ena lor espyonaz konversasyon telefonik – skandal aktyel ek revelasyon ki lapres ek bann lekip radio-tv komersyal osi byin ki lezot parti zot tu telman antuzyas pu eksit listeri parmi dimunn, osi grav ki tu sa bann size la ete: kokin data ek hoarding.
Preske tu dimunn avek ki nu finn koze, nu finn dimann zot si zot pe swiv bonbardman ek lafaminn lor lepep Palestinyin par Israel, e preske tu dimunn mo finn tande, exepte enn dimunn, finn dir “wi”, e zot kwar ki sa masak la bizin arete tutswit. Nu finn explike kifer sa nu premye pwin dan nu Platform 12-pwin, ek ki enn nu manb li lor sime pu returne apre ki li finn volonter pu al donn kudme fami ki pe sufer dan zenosid US-Israel. Sa finn introdir lyin inik nu travay pratik ek nu program.
Alor, nu pe viv anmemtan sa zenosid ki pe arive lor nu lekran divan nu lizye, e nu pa pe turn nu ledo, par zis konsantre lor “gayn vot” - me okontrer nu pe lye laspe politik vot avek evennman internasyonal ek evennman onivo nasyonal, osi byin ki problem dan landrwa.
E mo pe inyor kus lapusyer lor mo sali.
Lindsey Collen pu LALIT
Tradiksyon par AA ek CC
23-Oktob 2024.
