Zenosid Blog 55- Israel intansifye so zenosid- bot solda Amerikin lor terin dan Israel
16.10.2024
Eleksyon zeneral dan Moris ubyin eleksyon prezidansyel dan Leta Zini bizin met zenosid Amerikano-Israelyin osant azanda politik. Dimunn bizin truv sa kuma enn tem programatik dan sak peyi dan lemond.
Sa zenosid la li evennman ki pu mark fitir limanite: “Ki pozisyon ou ti pran lerla?” samem kestyon ki pu dimann ou pandan buku zenerasyon.
Eski ou ti pran pozisyon, eski ou ti azir anfaver Palestinyin e asterla anfaver sivil Libane ki pe masakre andirek lor televizyon par Israel?
Kandida ki pe konteste eleksyon Prezidansyel dan Lamerik, Harris ek Trump, tulede promet pu kontinye donn ful sutyin pu arm perpetrater zenosid, kontinye met veto dan Konsey Sekirite Nasyon Zini pu pa rekonet Leta Palestinyin, tandi ki zot pe fer kumadir zot pa pe tann lavwa mazorite Pep Amerikin ki pe dimann sese-lefe ek lafin lavant zarm.
E isi, kandida ki pe konteste eleksyon pu pos Premye Minis, Jugnauth ek Ramgoolam - tulede osant enn lasenn pli tipti parti - ek Roshi Bhadain usi dayer ek ankor lezot parti politik, zot tu pretann ki zot pa bizin met zenosid lor azanda eleksyon. Zis LALIT ena kuma premye tem-de-lit lor nu Platform elektoral lor 12 Pwin, e mo site: Liber Palestinn! Bizin aret zenosid Israel kont Palestinyin! Leta Moris bizin lans prosedir pu sispann Israel depi Nasyon Zini enn fwa! Inpoz anbargo zarm kont Israel! Sa ki pu aret sa zenosid la. Sa ki pu aret lager repann dan Liban e pli lwin!”
Apartir la, kestyon ki pu dimann ou “ Kot ou ti dibute dan zenosid?” Eski ou finn lev ou lavwa? Eski ou finn partisip dan enn manifestasyon, enn veye, siyn enn petisyon, donn kudme pu organiz ou sayt travay? Ena buku posibilite aksyon kuraze usi ki kapav pran. Eski ou finn al dan Palestinn an Oktob 2024 pu dibut avek Palestinyin pu fer rapel moman zenosid finn kumanse, kuma enn manb LALIT inn fer?
Ubyin eski ou finn azir anfaver seki pe komet zenosid? Aksepte faver depi lanbasad USA? Aksepte lamone disan? So laburs? Aksepte vizit depi departman Leta? Ubyin, eski ou finn swazir pu gard silans? Uswa finn evit siyn enn petisyon? Eski ou finn plito trakase ar gayn promosyon dan travay?
Nuvo ek pli odye devlopman. Pandan ki zenosid pe agrave e etann.
Dan rezyon lenor Gaza, eliminasyon Palestinyin ki viv dan Jabala finn kumanse. Zenosid pe agrave. Larme Israelyin pe tir lor lapres par expre, viz lopital ankor, e provok lafaminn ziska lamor lor totalite popilasyon sivil, pandan ki pe bonbard zot depi lesyel. Li telman kriyel ki USA so reprezantan imoral finn bizin met Israel angard pu pa provok lafaminn sa pep la ziska lamor. Nu dir li imoral parski li furni zarm par milyar dolar anmemtan, e parski li met veto lor sak Rezolisyon Konsey Sekirite Nasyon Zini ki baynding eksepte enn ki dilye pu ki US kapav pa veto li, e lerla, apre, li deklare, par Dekre Rwayal US, ki li “pa baynding” detut fason! Dimunn ki panse li difisil pu definir “zenosid” bizin kapav google definisyon sinp dan “Konvansyon lor Prevansyon ek Pinisyon Krim Zenosid” ki kurt. Mem dimunn ki dan katriyem kapav gayn enn lide ki Konvansyon pe dir. Lerla ou kapav zize par u-mem seki tulede Israel ek USA pe fer.
Zenosid par Israel pe kontinye agrave dan Wes Benk, inklir dan Zerizalem Est usi. Li enn zenosid kont pep Palestinyin an antye. Plis li 11,000 Palestinyin finn anprizone, ubyin dan enn fason pli exak, finn pran zot an otaz. Finn kidnap zot ek sekestre zot san okenn sarz, ni okenn ka lakur.
Enn nuvo Rapor Nasyon Zini par ziz Sid Afrikin byin koni, Navi Pillay, kondann Israel pu akt zenosid, krim deger, ek krim kont limanite. Li dir, antrot, “Komisyon finn truve ki sa kalite akt persekisyon finn kontinye an detansyon dan form tortir sexyalize. Prizonye zom finn sibir atak lor zot sex ek organn reprodiktif, inklir vyolans lor zot zenital ek lanis, ek finn fors zot pu fer akt imilyan ek akt penib uswa met zot tuni kuma enn form pinisyon ou intimidasyon, avek bi pu gayn linformasyon depi zot. Prizonye zom finn sibir vyol, ki enn krim deger ek enn krim kont limanite. Sa kalite akt vyolans sexyel, ki koz sufrans fizik ek mantal sever, zot usi akt tortir”
Dan Liban asterlamem, Israel pe bonbard sivil avek mem lintansyon komet zenosid ki li finn anonse kont Pep Gaza. Zenosid pe etann dan larezyon antye. Pu tuy sipozeman enn sel zom larme Hezbollah, Israel kapav tuy 500 sivil e panse ki sa li normal ek proporsyonel. Lamerik zis surir. Antretan, ziska ler, ki li Hamas, Hezbollah, uswa larme Liran, okenn parmi zot pa finn intansyonelman sible sivil kuma enn stratezi kuma Israel fer zur apre zur.
USA finn ordonn 100 travayer Amerikin ki anplwaye par larme pu al Israel, poz zot bot lor terin, pu manye nuvo zarm ‘defansif’ li pe furni Israel apel THAAD. ( Nu met mo ‘defansif’ ant gime parski sa kalite zarm la permet Israel atak avek inpinite pei andeor so frontyer, asasinn dimunn kuma li anvi, an konesans ki lepep Amerikin pe peye pu efikasite zot defans. Alor li permet li fer “latak” par fer sanblan li pe “defann”)
Alor, USA ena lintansyon alye avek Israel ek diriz lager kont Liran, osi byin ki kont Hamas, Hezbollah, larme dan Yemenn, ek milis dan Lirak ek Lasiri ki dibut avek Pep Palestinyin – kuma nu usi nu bizin fer. E kuma dimunn ordiner partu dan lemond, deplizanpli an pli gran nomb, pe deza fer. Inkli buku parmi nu dan Moris.
Dan Moris, mem si personn pa koz uvertman an piblik anfaver Israel – exepte pu ennde lartik lagazet L’Express – ena lafors Zionist 2 plas – dan sertin but kapitalist pro-Loksidan, me zot gard zot lide zis pu zot, ek parmi bann legliz Evanzelik ki finn puse partu dan pei dan bann dernye deseni, ek zot usi, ena tandans gard zot pwindevi alinteryer zot sekt spesifik.
Okenn parti politik pa deryer Israel ek Lamerik. Sa li sir.
Me, la osi, pozisyon ki zot pran kont Israel, mem kont zenosid la, ubyin zot pozisyon kont Lamerik, mem pu arm enn zenosid, zot pozisyon anfaver lepep Palestinyin, zot tu malerezman byin tro timid. E zot tu renonse pu met size la kareman lor azanda elektoral.
Silans total Roshi Bhadain ek Bruneau Laurette lor sa size la – otan ki mo finn lir ubyin tande – fer sispekte zot. Kapav zot bann Kripto-Zionist. Nu kone Laurette, parski li kontan rakonte partu kuma li finn antrene par but pli pir Leta Israel- so lafors spesyal. Roshi Bhadain res trankil pa zis lor Israel, me mem lor lokipasyon militer kontinyel USA-UK e lor zot refi pu konplet korekteman dekolonizasyon Sagos, inkli Diego Garcia.
- Nu termine par fer lapel tu parti politik pu dibut akote lepep Palestinyin, an partikilye atraver langazman swivan:
- Nu fer lapel Leta Moris pu zwenn dan ka Sid Afrik inn mete kont Israel pu zenosid divan Lakur Internasyonal Lazistis (ICJ)
- Nu fer lapel pu enn anbargo zarm ek teknolozi lor Israel
- Nu fer lapel pu sispann Israel kuma manb Nasyon Zini e pu ki tu Leta kup zot lyin diplomatik ar Israel, ziska li aret tu zenosid, aret so sistem aparteid, e retir li depi teritwar li okipe.
Lindsey Collen pu LALIT
Tradiksyon AA ek CC.
