Kontex Politik e “Lanze Politik” Eleksyon Zeneral 10 Novam
12.10.2024
Eleksyon pe derul dan enn moman kot ena enn instabilite dan sistem kapitalist, ki li o-nivo internasyonal ubyin o-nivo lokal. *
O-nivo internasyonal, ena lager Likrenn-Larisi ki pe ariv lor so 3yem lane, e li ena buku lefe lor lamas dimunn dan Likrenn, dan Larisi e mem partu dan leres lemond. Lager finn amenn ogmantasyon dan fret e sa finn amenn ogmantasyon pri drastik lor item konsomasyon debaz ki afekte travayer ek dimunn mizer partu lor nu planet.
Onivo internasyonal ena osi sa zenosid divan nu lizye, ki fini fer enn an. Leta Israel pe kontiyn masakre, aneantir, detrir lepep Palestinyin, sirtu dan Gaza, me osi dan Westbank ek Zerisalem-Es. Ena enn estimasyon dan piblikasyon medikal Britanik apel”Lancet”, ki byin syantifik dan so travay lor sif, ki nomb Palestinyin ki finn tuye, ubyin mor akoz zenosid, li fini depas 180,000. Ena plizyer fami ki finn desime konpletman. Dan Gaza, larme Israel finn detrir lopital, lekol, furnitir dilo, lakaz ek sime, e li finn fer li par expre. Li dir li ule rann Gaza invivab. LALIT pu met kestyon Palestinn lor azanda pu eleksyon.
Nu truve ki anfet se inperyalist Amerikin, guvernman USA, ki responsab, li osi. Li finans Israel. Li arm li. Li furni li bom, minisyon, tink. An realite, li dakor avek zenosid ki Israel pe perpetre. Sa-mem USA, li osi furni zarm pu Ikrenn lager kont Larisi pu li.
Sa donn enn lide sa instabilite onivo internasyonal la.
Pu liye seki pe arive onivo internasyonal, isi nu fek gayn sinyatir enn lakor politik ant guvernman MSM ek guvernman Britanik, kot Britanik pe sanse “rann” suvrennte Moris lor Diego. Anfet depi Lindepandans Moris suvrin lor Chagos. E li tuzur ena suvrennte. Me, UK pe anfet zer suvrennte Moris pu 100 an, renuvlab apre. Li fer krwar li pe koz zis Diego, pa lezot lil, me kan lir byin ki inn marke dan lakor la, li nerport ki isyu lor suvrennte ki pu afekte derulman baz la, e mem so efisyans. Onivo LALIT, nu kalifye sa lakor Pravind Jugnauth ek guvernman Angle kuma enn “vande istorik”. Sa Trete ki zot pe tripote la, li prolonz kolonizasyon Britanik, lor pa zis Diego me lor totalite Chagos. Alor li pa vre kuma Pravind Jugnauth pe dir ki sa lakor la reprezant dekolonizasyon konplet Repiblik Moris. Alor, LALIT met sa Trete la lor azanda pu eleksyon. Fode pa siyne lor baz sa bann pwin ki vann nu suvrennte.
Eleksyon ki pe vini nu truve ena 2 Blok prinsipal, enn MSM-ML-MPM-PM-PMSD ek lot la PT-MMM-ND-ReA. Anplis kote extra-parlmanter ena sirtu Linion Moris ek Reform Party.
Zot tu ena plizumwin mem politik, zot defann sistem kapitalist ki responsab pu lager, ki responsab pu lamizer ek inegalite sosyal, e zot responsab pu polisyon lor nu bul later. Zot pa pu propoz sispann Israel depi Nasyon Zini. Zot pa pu dir ferm baz militer UK-USA lor Diego.
Lor lezot tem osi, dan sa kanpayn elektoral la, nu dan LALIT nu pe demark nu-mem depi tu sa lafors politik ki ena enn vizyon demokrasi byin limite, ki get demokrasi par rapor a eleksyon sak 5 an, ubyin eleksyon minisipal avek ennde reform pu amelyor li. Pu nu, lalit politik li existe tultan – lor sayt travay, dan kartye, partu.
Ankontras avek lezot parti ek lalyans, LALIT propoz enn veritab demokrasi kot lamas dimunn partisip dan desizyon konsernan zot lavi, par exanp, kontrol uvriye dan travay. Sa vedir nu viz enn sosyete kot pena “patron” kuma nu ena zordi.
Alor nu partisipasyon dan sa kanpayn la pu demark nu depi tu sa bann lafors politik e nu pu mark nu prezans lor baz nu program ki nu finn amenn refleksyon ek aksyon lor plizyer lane. Dan 2 sirkonskripsyon, nu pe aliyn 3-3 kandida, pu ki u kapav exprim u lakorite par vot tule-trwa. Kumsa nu kumans batir enn lopozisyon depi asterla mem.
* Sa lartik la baze lor diskur prezidans Rada Kistnasamy, enn manb parmi ladireksyon LALIT, zur ki nu ti fer nu Konferans-depres pu prezant kandida ek program.
