LALIT Anons so Platform ek so Kandida pu Eleksyon
11.10.2024
LALIT ti fer enn konferans-depres yer pu anons so Platform an 12 pwin pu Eleksyon Zeneral e pu introdwir so kandida.
Anture par enn duzenn manb LALIT, e dan prezans Top FM, Le Mauricien, Radio Plus, ek Radio One, enn manb ladireksyon Rada Kistnasamy ti prezide. Li ti etablir sityasyon politik – dan Repiblik Moris e osi dan lemond, e ti explike kimanyer se sa ki determinn nu Platform. Li finn sitye realite enn lager NATO kont Ikrenn – ki afekte tu pei dan lemond – osi byin ki zenosid ki Israel ek USA pe perpetre dan Gaza, e ki pe swiv par Israel-USA so bombardman lezot pei, kuma Liban. Li ti liye sityasyon internasyonal an zeneral avek sa Trete ant UK ek USA lor Chagos ek Diego Garcia. E kimanyer nu program liye tu sa realite la, avek realite ekonomik ek politik dan Repiblik Moris.
Enn lot manb ladireksyon Cindy Clelie finn introdir nu Platform an 12 pwin. Sa Platform la pu pibliye dan enn prosenn lartik, dan so totalite. Laplipar pwin dan Platform LALIT, okenn lot parti politik pu sutenir. Cindy finn explike ki sa Platform la pa sorti dan ler, me dan nu lalit, nu aksyon, e nu refleksyon. Li sorti dan nu Kongre 6-Zur, swivi par nu piblikasyon “Filozofi LALIT”, e lerla nu panfle “Stratezi LALIT”. E avan nu Platform elektoral, nu fini pibliye enn seri program lor tem spesifik, ki finn pibliye dan lapres nasyonal osi byin ki dan nu prop piblikasyon.
Lindsey Collen, osi enn manb ladireksyon, finn explik nu desizyon pu aliyn 6 kandida – 3 dan enn sirkonskripsyon lavil, No. 1 Grand Rivyer, Port Louis ek No 13 Souillac ek Riviere des Anguilles. Li finn introdir nu kandida pu eleksyon, enn par enn. Tu ti prezan, apar enn ki aktyelman dan Palestinn kot li pe dibut ansam ar fami Palestinyin ki ena pu fer fas larme lokipasyon Israel. Lefet ki enn kandida dan Palestinn aktyelman donn enn indikasyon kimanyer LALIT liye aksyon ek program. Pu ena enn lartik lor introdiksyon nu kandida pibliye dan enn lartik separe, avek plis detay. Nu pe dimann dimunn dan sa 2 sirkonskripsyon vot pu tule-trwa kandida LALIT. Nu mo-dord dan lezot sirkonskripsyon pu vinn posib kan nu fini travers Nomination Day, le 22 Oktob.
Lapres ti poz kestyon Ram Seegobin, ankor enn manb ladireksyon. Deba ti sirtu lor enn nu kandida ki aktyelman dan Palestinn, kot li pe donn kudme fami Palestinyin fer fas larme lokipasyon Israel.
Par deryer ti ena bandrol LALIT ek so sinbol, enn marto krwaze avek enn laserp pu sinboliz linite travayer lavil-lakanpayn, e sa de zuti la, zot finn re-travay pu paret kuma zanimo pu sinboliz lyin imin ar lanatir. Tu manb LALIT pe byin antuzyas pu rant dan sa kanpayn elektoral la dan sa de sirkonskripsyon la.
