Seki LALIT pe fer fas - Lalyans Kapitalis otur MSM ek otur Travayis ek lezot
16.09.2024
Moris pe al ver eleksyon zeneral. E pei, kuma lemond, dan enn leta instab net. Anu sitye moman aktyel. Kumsa, nu kapav truv seki LALIT bizin gard antet kan nu pu pran desizyon dan semenn ki pe vini, sinon pli pre, lor kuma parti LALIT pu partisip dan eleksyon ki pe vini.
Kontex Mondyal
Dan preske tu pei kot ena demokrasi burzwa Oksidantal, sa sistem politik la finn vinn instab net. Sa li akoz nu dan enn moman dan listwar kot inperyalism – staz pli avanse kapitalism – pe rant dan so leral. Siklonn ki metropol inperyal pe traverse pe ris tu dan so turbiyon ver so lizye, mem ziska pei dan tu bann dernye aryerkur elwayne depi sant kuma Israel, ki pe perpetre zenosid divan lizye so zesyoner Oksidantal, e pe ris usi dan sa mem turbiyon la seki nu pe gete zordi: Repiblik Moris.
Lor fron politik partu dan lemond antye, inklir Moris, nu pe kareman fer fas tu kalite insanite politik. Sa li akoz nu pe rise dan siyaz sa kriz ekonomik ki pe rant dan so spiral desandan pandan sa lagoni dan sistem kapitalist la. Sinon, kuma nu kapav gayn dan Lamerik enn fuka kuma Donald Trump dan enn deba prezidansyel? E, si ou pa kapav mazinn ou-mem pe al vot pu enn tel fuka, kisann la ena kuma lot la dan deba prezidansyel? Kamala Harris, enn dimunn dan sa-mem ladministrasyon ki kupab perpetre zenosid kont Palestinyin divan lizye tu dimunn dan lemond. Ki kalite swa sa? E si ou panse, lasanble eli dan USA kapav kontrol brans lexekitif, bizin al re-reflesi enn ku. Tulede sanb Kongre zot kontrole par Netanyahu, kuma nu finn truve layv lor televizyon. Li tir lafisel, zot dibute, tap lame. Li larg lafisel, zot, kuma lisyin byin antrene, asize. Pareyman, kimanyer sefetil ki enn dimunn kuma Boris Johnson vinn Premye Minis Gran Bretayn? Li bizar. Kan nu pe koz maryonet, Boris Johnson li-mem sa zom ki Amerikin finn anvoye pu al eklat lakor lape ki ti deza inisyale dan Tirkiy ant Putin ek Zelensky an Avril 2022 pu aret lager? Li pa enn exzazerasyon pu dir lemond Oksidantal inn vinn fu. Dan Lind, pli gran demokrasi burzwa dan lemond, ena enn teokrasi opuvwar nepli enn Guvernman sekilye. Dan Larzantinn ena enn lot fuka ansarz enn pei kapitalis. Dan Lafrik, dimunn finn telman plin avek piyaz inperyalis Franse ek Amerikin lor zot resurs natirel ki zot pare pu mem al ziska sutenir ku-deta, mem zot pa kone kot sa pu amenn zot. Dimunn inpe partu dan lemond inn al tom dan pyez sanzman rezim atraver enn seri “revolisyon kuler” ki Leta Zini finn pilote, atraver CIA ek nuvo zarm Amerikin pu sa travay sal la apel Fon Nasyonal pu Demokrasi (National Endowment for Democracy) ki dekredibiliz demokrasi kapitalist par finans sipozeman ONG ek lagazet komersyal pu destabiliz Guvernman anplas. E tu pei dan Lerop dan dernye 10-12 banane finn rwine ekonomikman par aksyon intansyonel zot prop alye, USA. Tusala pu dir, nu viv dan enn lepok kot reyn inperyalis Oksidantal dan leral.
An paralel, e posibleman pa usi vit ki neseser, ena enn nuvo sistem milti-poler ki pe pran nesans. Sa bann pei la, zot lekonomi li kapitalist mem, me zot pa sa ansyin inperyalis Oksidantal, me enn nuvo lafors ki pankor kler ki li ete. La, la, la, dan St Petersburg, BRICS – Brezil, Larisi, Lind, Lasinn, Sid Afrik, plis 5 nuvo Leta manb – Emira Arab Ini, Letyopi, Lezip, Liran ek Larabi Saudit – finn fek fer enn reynon avek bi pu kree enn nuvo “arsitektir sekirite” pu enn lemond milti-nodal ubyin milti-poler, tandi ki BRICS pe prepar pu so gran some Oktob dan Kazan, kapital Repiblik Ris Tartarstann. Sa some Oktob la pu enn veritab tes.
Se dan sa dub realite zeopolitik – lamor lanpir inperyalist kapitalism Loksidan, enn kote, ek kumansman enn nuvo lekonomi milti-sant otur BRICS ki baze lor egalite tu nasyon e lor diplomasi – ki kapav plis konpran politik Moris zordi. Sa dub realite la li usi reflete dan latmosfer Armagedon avek menas enn dezas iminan lager NATO v. Larisi, enn lager ki kapav vinn nikleer, e osi menas kontinyasyon par Israel sa zenosid ziska Leta Israel al dan mod oto-destriksyon total.
Moris dan sa kontex internasyonal
Asterlamem, Guvernman Britanik finn nom enn ot-konseye ek negosyater politik UK, Jonathan Powell, pu vinn negosye enn lakor, sipozeman ziska lafin lane, avek Repiblik Moris apre ki Moris finn konfirm so suvrennte lor Chagos inklir Diego Garcia, ki rekonet kuma parti nu Repiblik par desizyon Lakur Internasyonal Lazistis (ICJ) an 2019 e par vot preske inanim Lasanble Zeneral Nasyon Zini zis apre. Sa top negosyater, ki finn rezud konfli Irland Dinor, finn gayn lord pu inklir USA dan so kolimater. Sa li neseser parski UK, kuma tu dimunn kone, finn kokin Chagos antye depi Moris, finn prosede, kuma zot finn planifye avan, derasinn tu Morisyen ki ti viv laba par fors, pran zot al zet zot lor ke Por Lwi, setadir pu “depeple” arsipel la net avan zot su-lwe enn parti teritwar kokin, Diego Garcia, a zot alye Lamerik, pu konstriksyon so gran baz militer, kuma nu kone. Rapel li enn baz kot manitansyon matyer nikleer, e li enn baz kot anprizonn deteni ilegalman – ki li pu renndering e tortir, ki li pu imigrasyon sanse ilegal. Asterlamem, imigran ilegal – UK-USA ki finn koloniz ilegalman Chagos inklir Diego Garcia – finn donn zot mem drwa pu anprizonn dimunn zot apel “imigran ilegal” – ki sorti depi Sri Lanka e ki, akoz zot bato ti an detres, finn al aterir laba.
E, kumadir pu met lanfaz lor sa imans siftaz dan zeo-politik– sa semenn la, apartir 16 Septam enn ka habeas corpus – kont lotorite Britanik ek Lamerik – pu pas divan lakur Britanik ki finn met dibut pu sa rezon la lor Diego Garcia. Imigran illegal Sri Lanke finn chalennj UK ek US (vre imigran illegal) pu vinn divan Lakur Siprem Britanik pu explike kifer inn gard zot prizonye. An Ziyet enn premye seans Lakur Siprem Britanik ti fixe. Me, li finn, dan enn fason inkrwayab, interdi par larme arme Leta Zini! Larme Amerikin inn gard ziz Britanik deor! Ala seki nu ule dir par “instabilite”.
Kuma eski tusala pa pu provok plis instabilite ankor? E enn sityasyon insanite politik?
Anmemtan, USA aster lamem pe ranz enn imans bennker swadizan enn “lanbasad” pu limem lor later Moris. Su-sekreter Deta Lamerik, Richard Verner, ti vinn poz premye pyer pu sa monstrosite ki pu kut enn-tyer milyar Dolar lane dernyer. Aster batiman pe monte depi later kuma enn aparisyon vizib enn menas politik reyel ki pe erize laba dan plin milye later Lil Moris.
Antretan, Moris anonse sa mwa la lor websayt Labank Moris: “Guverner Labank Moris (BOM) M. Harvesh Kumar Seegolam G.C.S.K ek Guverner Labank Lepep Lasinn (PBC) M. Pan Gongsheng finn resaman siyn enn Lakor Esanz Bilateral lor deviz (BCSA) RMB 2 milyar/Rupi 13 milyar ant sa de labank santral la”. Kominike la dir li viz “pu promuvwar komers bilateral ek investisman ant sa de peyi la.” Li pu dire 3 an avek extansyon posib atraver konsantman mityel. [RMB fer referans a lamone Lasinn]. Leta Zini pu pran sa kuma enn menas depi Moris pu partisip dan enn aksyon ki US konsider kuma blasfem: de-dolarizasyon.
E Moris, kuma tultan, res pros – ekonomikman, militerman ek sosyalman – ar Lind.
Se dan sa realite la ki eleksyon zeneral pe koste, e dan sa realite la ki LALIT pu bizin pran desizyon lor natir so partisipasyon dan eleksyon zeneral la.
Sityasyon Politik
Anu get seki apel sa de “gran lalyans” ki an konpetisyon pu pran puvwar. Nu pu kumans avek lalyans Lopozisyon parski so resan kasir finn provok enn nuvo realite pu tulede lalyans, alor li pli fasil konpran seki finn arive si nu koz lalyans Lopozisyon avan Lalyans Guvernman la.
Kan Parti Travayis ek MMM finn vinn ansam de eleksyon desela, setadir an 2014, Lalyans ti kase dan enn festin destriksyon mityel, ki ti deklanse san ki ni PT ni MMM ti ule li deklanse. Li ti orib. Me, malgre sa leson lepase la, zot finn re-zwenn ansam ankor enn fwa – sirman parski zot “pena swa” – an preparasyon pu lans enn chalennj kont Lalyans MSM kan eleksyon zeneral pe koste.
PT, MMM ek PMSD finn zwenn ansam dan enn lakor a trwa. Avan zot futi fer sa, li ti byin difisil. MMM pa ti truve kimanyer li pu alye limem avek Ramgoolam apre skandal “kofor biye”. Kimanyer sa lalyans la ti vinn posib alor? Li kirye, me se Ashok Subron ek so Rezistans ek Alternativ ki pa finn truv nanyin bizar donn zot kredibilite degos a Navin Ramgoolam, blansi li malgre tu sa biye Rupi an likid ek biye Dolar (an likid an seri) dan so lakaz, ni a Paul Berenger ki finn vann so politik lalit deklas an 1981, ni ek PMSD, ansyin parti oligarsi, ki ti kont Lindepandans. Zis avan Ashok Subron apel sa lalyans lopozisyon, li ti pe kriye “BZTD” ansam avek Bruneau Laurette lor simin dan Por Lwi. De-tut-fason, dan kumansman Subron pa ti, limem, form parti dan sa lalyans la, mem ki sete li ki finn fer apel pu li. Li ti selman, ubyin li ti pretann li ti selman, “fasilitater”. Antuka, se, kumsa ki gayn sa lalyans a-3 PT-MMM-PMSD la.
Sepandan, PMSD, olye azir kuma lakol pu tule trwa inifye, finn fini par azir lekontrer. Lalyans a- 3 finn telman vinn instab, ki PMSD finn kite, u finn met li deor – li pankor kler lakel – e PT-MMM finn reysi met lame lor sertin manb PSMD, ki finn galfat enn nuvo parti “Nouveaux Democrates”, e zot finn gard zot dan lalyans. Me PMSD, limem, finn kit lalyans. Lerla PT-MM-ND ti tuzur apel Alliance de L’Espoir. Lespwar ti dan vid.
Travayis ek MMM ti klerman sakuye kan PSMD ti kite. Me, dan LALIT, nu pa ti konpran kifer zot ti otan sakuye. Me, byin vit nu finn aprann ki pa zis PMSD ki finn kit Alliance de L’Espoir. Li paret enn seksyon dan seki LALIT apel “burzwazi istorik” – prinsipal surs finans ek baking politik pu tu parti burzwa – ti kit lalyans ansam kan PMSD kite. Paret ki mem MCB ti abandonn L’Alliance de L’Espoir. Mem lagazet L'Express finn refrwadi anver sa lalyans la. Mem-mem moman, eminans-griz Subash Gobin finn kit L’Express e aterir san-tranzisyon, kuma komantater politik lor Radyo Plis ek dan piblikasyon Le Defi. Anmemtan, Mauritius Turf Club, ki ti ansyin sinbol-mem oligarsi, finn abandon so “lopozisyon” pu vinn zwenn rezim Jugnauth, avek, kuma eklerer PMSD, ubyin petet li vis versa. Antuka, MTC lor so simin retur dan Senn-Mars, tandi ki Lee Shim, ki ti pe rul lekurs suval pandan enn-de sezon, li finn bat retret.
Tusala finn les Travayis, MMM ek so restan-PMSD apel ND plis ki sakuye.
Kan byin mazine, li pa fasil pu enn gran kapitalist ki rezone al remet plot-plot biye larzan dan lame enn Navin Ramgoolam, apre ki finn truv lom la so Rs 220 milyon pe degorze depi so kofor dan so lakaz – apre eleksyon 2014. Pa fasil nonpli pu enn gran kapitalist remet rulo biye larzan ar Bèrenger, pangar MMM kit PT pli vit ki zot panse, petet mem avan eleksyon, si lager leve ant zot. Alor, li for posib ki kan PSMD ek so Xavier Duval nepli ti prezan dan Lalyans, bakerz kapitalist pa ti ena personn ki zot ti fer konfyans pu remet larzan dute.
Ala kalite problem ki pe ronz sistem politik kapitalis muran – seki nu apel “demokrasi burzwa”. Enn form koripsyon sistemik. Omwin li vinn kler seki nu dan LALIT pe apel demokrasi “burzwa”. Dan Lamerik, lobi armaman, lobi petrol, lobi Israel, zot usi finn expoze piblikman kuma foseyer demokrasi burzwa.
Detut-fason, tusala donn enn apersi kifer Ramgoolam ek Berenger, san mansyonn Richard Duval, ki finn uver zot lebra osi larz pu akeyir Ashok Subron, inisyater lalyans. Kan li finn vinn tal lame, dimann 3 tiket, zot finn pran li pu enn sover. Ase fasilman zot finn met de tiket dan lame Subron: Enn pu li, byinsir, dan Nimero 4, enn pu Babita Thanoo, enn aktivis mwin koni, dan Nimero 8. Zot pe atann enn trwazyem tiket pu Kuggan Parapen. Me, antretan Ashok Subron, Stephan Gua ek David Sauvage dibut kot geyt sato Ramgoolam, sakenn enn sat ki’nn kokin lakrem – pu sit enn proverb Angle – e rabase lor “engouement” spektakiler lepep anfaver RA rant dan sa lalyans la. Sa term la li enn expresyon presi ki li finn servi. Diksyoner Cambridge so tradiksyon pu “engouement”, apar so sinifikasyon “etufman”, li ule dir “enn lamod (suvan tanporer)”; “gran antuzyas (me tanporer)”. Li vedir an Angle “infatuation”, ki ule dir enn lintere seksyel u romantik ki siperfisyel ek/ubyin tanporer. Lezot dan Subron so Lalyans, zot usi aster servi term “engouement” piblikman pu sutyin popiler pu sa lalyans la.
Manb ReA zot bes latet inpe lor ki zot prosin aksyon kont zot oto-klasifikasyon kominal pu ete, apartir zot apartenans ar klib PT-MMM-ND. Dan dernye 20 banane ReA so tem de-lit santral, zot rezon-det kuma parti politik ti zot refi pu klasifye zot-mem. Asterla, zot pu petet pez nene, bwar dilwil, pu fer plezir Ramgoolam ek Berenger, klasifye zotmem “under protest”. Li pa pu fasil pu Ramgoolam ek Bérenger aksepte ki zot fer tiraz-o-sor kuma kandida LALIT fer, ki zot klasifye zot-me kuma “Popilasyon Zeneral” kuma lakur Siprem finn dir LALIT bizin fer kan enn kandida inkapab klasifye limem ubyin refiz klasifye limem. Lakur finn usi dir, e Privy Kawnsil finn konfirm sa, ki se Parlman, ki eli par lepep, ki bizin tir sa klasifikasyon depi tu sfer politik usi vit ki posib, e sa inplike enn lalit politik lor terin, pa enn lalit pirman legal dan lakur. Li pa ase zis pu servi slogan ek akrobasi medyatik. Li pran pasyans, travay dir politik alabaz lor terin, li pran deba e enn konpreansyon kler lor seki an-ze reyelman ete dan Best Loser System. Li usi dimann onete inpitwayab, e pa sa kalite desepsyon ki karakteriz tu sa bann ka legal ki ReA finn mete pandan 20 banane la. Anpasan, malerezman sel zurnalis dan pei ki ti pe ekrir analiz profon ki finn expoz klerman sa diplisite repete ReA ti zurnalist Iqbal Khan ki nepli pe travay dan L’Express.
Nu dan rebor enn lalyans a 4 alor: PT-MMM-ND-ReA. Li ena enn nuvo nom. Alliance de L’Espoir finn antere. Nuvo inkarnasyon finn lev latet. “Alliance du Changement” pu ranplas li. “Changement” enn mo apropriye pu servi, parey kuma “engouement” ti apropriye. “Changement” vedir “nerport ki zafer apar seki ena”. Pena okenn indikasyon ki kalite sanzman pe koze. Pa mem enn lide vag lor kit “valeurs”.
Lalyans Guvernman
Osito ki PMSD finn andeor lalyans Lopozisyon, tu dimunn ti kone ki li pu gravit ver enn lalyans avek MSM. Ki li finn fer. Me Lalyans pankor konkretize. Ziska ler.
Me, pandan sa prosesis gravitasyon ver sa lalyans la, li pe al provok instabilite dan sa fron li pe zwenn. Anmemtan ki PMSD pe rod rantre, MSM ena de lezot alye deza anplas – Platform Militan Obeegadoo ek Muvman Patriot Ganoo – ek Muvman Liberater – Collendaveloo. Alor, la usi, ena problem. Si PMSD gayn ase tiket, sa de lezot lalyans la pa pu gayn nomb zot ule. Anmemtan, azan MSM, zot osi, zot gurman tiket, e zot pe servi sa moman la pu ogmant seki pu zot, pa diminye nomb pu zot. Aster, avek PMSD prezan, enn parti ki plis striktire ki sa de lot alye la, e li enn parti plis irbin ki bizin ena plis tiket pu pruv so valer a MSM ki plis riral. Tusala pe zenn sa 2 lezot alye MSM.
MSM – an partikilye atraver MBC-TV – finn servi lorganizasyon relizye ek grup kominalo-relizye pu sey ranforsi so baz politik. Nu finn truv reliziosite MBC, mem relizifikasyon MBC, ziska enn pwin extrem. Sertin biltin nyuz aswar preske antyerman lor rityel relizye, enn fason uswa lot. Se enn milti-kominalism ziska enn pwin danzere. MBC finn anfet abrit plas relizye dan so lakur! E lerla montre an-pratik dan so lakur. Aster Per Jocelyn Gregoire inn revinn aktiv dan e otur MSM, mem si zis “spirityelman”, kuma li dir. E seki anfet later ki pu kolektivite, pu lansanb popilasyon, MSM pe partaz sa later la ar diferan grup kominalo-relizye, e sa pe amenn konfli irasyonel, kuma u kapav atann depi sa kalite politik la. Konfli resan otur “Rann nou Later!” finn expoz absirdite sa demand la. Anmemtan, MSM finn al servi represyon vyolan kont manifestan ki pe revandik “nou” later.
Tusala pu dir ki nu lor rebor enn eleksyon zeneral, e tulede “gran lalyans” tuzur dan enn leta grav instabilite. Tulede lalyans paret kumadir pu tini zis ase letan ki neseser pu sak parti politik ladan so prop sirvi. Lerla li pu eklate. Nu pe fer fas enn long lalist lider ki anfet “zom dezespere”. Jugnauth dezespere akoz pri pe monte, zenn pena lavenir dan pei. Ramgoolam dezespere akoz limaz so “kofor” avek par santenn milyon Rupi ek biye Dolar pe turmant li. Bérenger dezespere akoz so deklin gradyel an term popilarite depi 1981 li ireversib, e so laz finn rantre. Duval so parti finn kas an de. Subron dezespere akoz li san-lavenir antan ki zom elektoralis, ki krwar dan eleksyon kuma sel stratezi, e anmemtan li ti tase pandan 20-an dan enn stratezi-legal-san-exit kot li finn refiz klasifye limem, e asterla li pu al klasifye li-mem. So sime ti enn kul-de-sak. Li ti mank kuraz politik neseser pu chalennj sistem best loser, limem, dan kad enn chalennj kont tu form kominalism institisyonalize, dan kad asontur, enn lalit kont inegalite deklas – pa zis sa refi moral pu “klasifye limem”.
Enn fwa ki eleksyon fini, buku dant nu pu realize ki ena posibilite sa de lalyans la kase, e petet enn nuvo lalyans forme apre rezilta.
Lezot parti
Ena lezot parti ki pu met kandida dan tu, ubyin dan plizir, sirkonskripsyon. E sa li pa nuvo. Me, finn ena enn diversifikasyon parmi lamas dimunn depi sa tandans 2 gran lalyans la. Ena plis dimunn ki vot ni enn, ni lot.
Linion Moris
Rama Valayden ek Nando Bodha dan Linion Moris, ki inklir 100% Citoyens, Tan Yan, Jean Claude Barbier, Sylvio Michel ek lezot, pe prepar pu met kandida partu. Zot ena enn sertin sipor avek 3 ansyin Minis, ki sakenn ena enn sertin baz politik.
Roshi Bhadain
Roshi Badain so Reform Party ki klerman ena enn lorganizasyon “elektoral”, omwin dan sertin sirkonskripsyon. Depi li finn kit MSM – kot li ti enn Minis inportan – li paret tuzur ena akse a enn kantite resurs, inklir larzan depi deor, e dimunn usi, onivo lokal, ki fer port-a-port. Zot ase organize pu ki zot ankuraz zot elekter potansyel pu al cheke ki zot nom lor Rezis Elektoral tule lane. Zot ena azan dan sirkonskripsyon ek enn sertin nomb dimunn ki swiv so rezo sosyal parmi klas ki travay dan sibersite.
Cehl Meeah
Cehl Meeah suvan pran par dan eleksyon, avan kuma Hizbullah e apre kuma Fron Solidarite Morisien, e li servi politik elektoral pu etablir enn sertin “puvwar” dan so kominote. Li paret gayn so puvwar par liye size relizye avek size politik. Li kandida dan eleksyon parsyel ki pe vini, si Lasanble Nasyonal pa disud avan. Li pu san okenn dut met kandida dan eleksyon zeneral.
Dan skandal lor Rs 6 milyon Dolar donasyon depi Larabi Saudit ki kapav porte mankan ubyin kapav pa porte mankan, e ki ni anbasader Shawkutally Soodhun ni Premye Minis Pravind Jugnauth pe vinn eklersi, Cehl Meeah finn sorti avek tu so laraz kont Soodhun. Kan u ekut li sap lor kal lor rezo sosyal, u pu ena rezon pu santi trakase. Li, kuma sertin lezot dan lopozisyon extra-parlmanter, ena kapasite inpoz bann zwe bizar lor elektora, sirtu dan sa lepok instab, inpe fuka la.
Bruneau Laurette ek Sherry Singh
Sa tandem inatandi – Laurette-Singh – finn inpe trankil tu dernyeman. Me sepandan zot reprezant enn sertin lafors politik e zot pe rod enn sistem partaz Prime Ministership antre-zot de. Sa inplike zot ena lintansyon pu met buku kandida.
Bruneau Laurette, ansyin lom for MSM ki lerla ti vinn gran lider dan plizir manifestasyon otur nofraz Wakashio – so pli gran avek 100,000 dimunn prezan dan Port Lwi – e li finn lerla vinn enn “predikater” dan enn kiksoz apel Joshua Ministries, dapre so paz Facebook. Ena sertin diferan sekt Kretyin Evanzelik avek sa nom, e zot tu paret Zionis Kretyin Nor Amerikin. Kiryezman, liv labib Joshua, li tex kle ki lextrem-drwat Israelyin, depi lepok Moshe Dayan, servi ziska zordi. Sa tex la, ansam avek liv Samyel, servi sipozeman kuma zistifikasyon pu kolonizasyon Israel e pu netwayaz etnik, mem zenosid kont Palestinyin, kot pe lasas Palestinyin depi zot later.
Sherry Singh, li, ena enn lot trazektwar. Li ti lame drwat Pravind Jugnauth, e kan li ti sef Mauritius Telecom, ansam zot finn met dibut klib MUGA desantralize, kot zenn gayn fasilite sportif. Sa donn li sertin lexperyans lor terin. Me, Singh ek Jugnauth inn gayn lager kan Singh finn ekpoz seki li apel loperasyon “sniffing” dan MT. Singh finn depi lerla sibir vanzans MSM dan form enn seri ka lakur kont li. Ena pu frod ek koripsyon. De sarz prinsipal ki finn kareman reye par mazistra.
En avant Maurice
Li vo lapenn usi mansyonn Patrick Belcourt ek so En Avant Maurice, mem si li pankor aliyn avek okenn lalyans. Li ena enn elektora inportan, si pa enn pwa politik, dan enn sirkonskripsyon, Stanley-Rose-Hill nimero 19.
LALIT
Ala, tu seki LALIT pe fer fas kan eleksyon koste.
Nu kapav pran desizyon pu aliyn kandida – mem dan sa moman bizar listwar lemond ek listwar nasyonal – ubyin nu kapav, san aliyn kandida, defann nu program, kuma nu deza pe fer, e ki ankor pe kontinye pibliye anmemtan ki nu pe finaliz li.
Pu LALIT, desizyon lor manyer partisip dan enn eleksyon, li enn desizyon taktik, pa enn kestyon stratezi. Nu pe reflesi, e nu pu pran desizyon osito tu lanze prinsipal vinn kler, e nu pu fer tu kamarad kone.
LALIT
15.09.24
