Zenosid Blog 52 – Ena fwa mo dimann mwa eski nu tu pa pe vinn fu
23.08.2024
Ena fwa mo dimann mwa sipa nu tu pa pe vinn fu. U mazinn u nu tu pe atann gayn nuvel depi “negosyasyon sese-lefe” depi labus enn Anthony Blinken, Sekreter Deta USA, limem li anmemtan sef “negosyasyon” e li anmemtan usi, wi u pe byin lir, sef furniser zarm a enn dan sa de la.
Sa ule dir Blinken enn parti-prenan dan sa lager la. Kimanyer nu kapav atann li kapav azir kuma sef medyater? Li donn Israel lavaler 3.8 milyar dolar sak lane anform zarm, zarm servi pu tuy Palestinyin. Anfet, premye zafer li ti oredi fer se aret furni zarm a prinsipal belizeran. Kimanyer nu kapav atann ninport kwa depi li ziska li, omwin, aret furni Israel zarm? Uswa eski nu tu pe vinn fu?
M. Blinken ek so bos Joe Biden, pa selman furni zarm a “enn sel kote”, me li sa mem kote ki pe komet zenosid, kuma deza statye “plozib” par pli ot Lakur lemond, ICJ, osi boner ki Zanvye sa lane la. E depi sa, masak Israelyin pe kontinye mem san arete. Lokipasyon Palestinn par Israel – totalite so proze – finn deklare ilegal par sa mem Lakur an Ziyet sa lane la. Purtan USA pe kontinye mem furni zarm a puvwar lokipasyon – enn larme lokipasyon ilegal – pu masakre sa mem popilasyon Israel pe okipe ilegalman? E lerla eski nu atann Blinken ek Biden pu negosye enn lakor depe? Non. Lemond ena pu byin vit truv lezot fason kimanyer kontrol Israel ek USA.
Kontinye atann kit bon nuvel depi “negosyasyon” sorti depi labus Blinken li enn parmi sinptom leral enn Israel muran, me ankor tuzur enn lafors vyolan ki pe ris USA, enn lanpir muran, me tuzur enn lanpir vyolan ater. Selman, li pu pran inpe letan pu ranvers sa lanpir la. Antretan, li pe detrir kad legal lalwa internasyonal. E pe sakrifye lepep Palestinn. Komsidire enn ritwel payin. E anmemtan, lavenir sa lantrepriz kolonyal apel Israel pe ariv so lafin. E pe pran nu, lepep lemond, pu bufon. Amwin nu kontinye azir konsyaman kont sa kalite inzistis la.
USA li furniser plis ki 65% tu zarm Israel so Larme Lokipasyon ilegal. Se samem zarm avoye par Biden ki servi pu pilone lor lepep Palestinn, kot finn tuy plis ki 40,000 selman depi Oktob lane dernyer, sirtu zanfan inklir tibaba, fam, vye dimunn, malad ek blese. Se samem zarm servi par Larme Lokipasyon Israel pu atrup-lasas popilasyon Palestinn depi enn plas a lot, tandi ki Israelyin ek USA fann zot propagann komkwa sa atrup-lasas la li pu “fer zot sorti andeor zonn danze”. Se samem zarm pe kontinye tuy e mitil zanfan, mem kan Biden ek Blinken pe rul lemond dan lafarinn, koz lor “negosyasyon lape” anmemtan zot pe vann e donn zarm perpetrater zenosid.
E Blinken ek Biden pa maynd koz manti e rann zot lekor kuyon, amezir zot pe sey kuyonn nu. An Me, Prezidan Amerikin ti anons “propozisyon Israel” pu enn sese-lefe. Sa li bizar. Kifer Biden ki vinn prezant propozisyon Israel? Purtan Biden finn fer li. Biden finn met so kredibilite anze pu nu tu temwin. Hamas finn aksepte propozisyon la.
Lerla Israel anonse li rezet propozisyon la. Eski li finn rezet propozisyon limem li finn fer?
Ankor enn fwa, eski nu tu pe vinn fu?
Asterla, sa semenn la, Blinken pe revinn prezant nuvo propozisyon Israel setadir seki Israel pa ti dakor dan so prop propozisyon inisyal.
Relman?
Blinken pa finn pip enn mo kan Israel finn al asasinn negosyater Hamas, Ismail Haniyeh. Ki sa kalite negosyasyon kan enn kote al tuy negosyater lot kote, e medyater pa dir nanye apar “Nu pu tultan defann Israel,” setadir agreser, enn orlalwa?
Dan USA ena sa kalite lidership – pa selman Blinken ek Biden, me usi mazorite manb Kongre – parski tu sa bann politisyin la finn pandan dezane, vinn maryonet rule par lafisel lobi Israelyin. Nu finn anfet truv lafisel maryonet alev kan Netanyahu ti adres sesyon konzwin Kongre Amerikin. Li ti telman grotesk li ti pu fer ninport kisannla pe gete mor ar riye – si li pa ti konsern enn zenosid ankur. E, drolman, se laba mem kot nu pwiz lespwar. Sa sityasyon la telman absird li fors laverite eklate.
Ansemoman mo pe lir liv Ilan Pappé Lobbying for Zionism on Both Sides of the Atlantic (fek pibliye) e pe konpran rasinn proze Zionist depi omilye 19em Syek, mo pe devlop sa vizyon lonterm ki permet nu travers sa lepok som la. Pappe dan enn fason metikile ek konvinkan dekrir sa raprosman e dan USA e dan UK sa diferan kuran profesi lide relizye – Zionist evanjelik Kretyin e usi Zionist Zwif – fer lalyans avek lintere ekonomik ek zeo-politik UK e usi USA dan Mwayenn Oryan, sirtu kan dekuver petrol laba e pe kumans komersyaliz loto par milyon, sirtu kan pe bizin protez Kanal Suez pu ralye Lwes avek Les, e byin sir amezir Lanpir Otoman pe kolaps, USA ek UK ti ule kontrol sa rezyon la.
Lespwar surse tultan
Listwar dan nu kote. Pa dan kurterm. E li pu sirman apre finn tortir ek tuy ankor plis Palestinyin.
Me, amezir pe ena sanzman, laverite pe expoze, dan tu so absirdite. Parey bann lanpir kuma Lanpir Otoman, e zordi Lanpir Amerikin, kan zot depas zot kapasite, zot al amar zot mem dan mansonz ek diplisite, expoze mem anfaver zenosid. E popilasyon, sirtu popilasyon zenn, ena kuraz kan zot opoz enn tel linzistis.
Mazorite Amerikin anfaver enn sese-lefe, e parmi zenn ena ankor enn pli gran mazorite. Zenn deplizanpli sutenir lakoz Palestinyin kont Aparteid kolonyal lokipasyon Israelyin. Buku finn partisip dan imans manifestasyon ek sit-inn, dan aksyon direk.
Enn mazorite popilasyon dan laplipar pei Lerop zot anfaver enn sese-lefe.
Enn imans mazorite lepep lemond viv dan bann pei ki sutenir liberte Palestinyin par enn imans mazorite dan Nasyon Zini. E zot finn fer sa depi plizyer deseni.
Konbatan Hamas ek lezot konbatan rezistans Palestinyin pe kontinye konba – mem avek zot zarm fe-mezon. Mem san enn larme, enn erfors, uswa enn lamarinn. Hezbollah, usi, promet pu lager kont Israel osi lontan zenosid kontinye. Konbatan Houthi, zot usi, finn promet pu blok pasaz navir ki pe al furni zarm a zenosid.
ICJ finn fer lalwa vinn kler. Lakur Kriminel Internasyonal finn dimann Warant Arestasyon kont lider Israelyin, ek usi kont lider Hamas.
Nu bizin kontinye mintenir presyon – kont lobi Israel, kont lobi inperyalist ki fer tu kalite travay sal – e nu kone selman nu tu nu zefor ansam ki pu kapav afebli Israel e so bann met Amerikin, e sa asontur fer Lanpir, sibir defet lerla tonbe. Me, vyolans avek lekel li pu vanze amezir li perdi ek ekrule, pu danzere pu limanite.
Lindsey Collen pu LALIT. Merkredi 21 Ut 2024
Tradiksyon: BK avek kudme AA
