Let depi Sant Demokrasi ek Drwa Travayer dan Palestinn

17.08.2024

Nu pe pibliye enn repons depi Sant Demokrasi ek Drwa Travayer dan Palestinn (Democracy and Workers’ Rights Center) ki swiv depi nu deklarasyon an komin an solidarite avek profeser Palestinyin inisye par Komisyon Ledikasyon LALIT. Deklarasyon an komin ki finn sinye par 5 sindika dan Moris ek Rodrig e ti pibliye lor nu websayt www.lalitmauritius.org ek lor nu paz and fb 3 Ut 2024. Deklarasyon komin la finn sirkile a sindika ek lorganizasyon onivo internasyonal.

Let ki swiv finn tradir an Kreol (let ti pibliye pli boner an versyon Angle)  

Ser ek frer,

Mersi buku pu zot solidarite avek profeser Palestinyin. Nu byen apresye. Nu santi nu mwins tusel kan nu pe fer fas seki okenn imin zame ti bizin fer fas dan lavi.

Finn ena gran pert imin ek materyel dan sekter ledikasyon, zanfan ek etidyan dan Gaza finn perdi enn lane skoler net, me ledikasyon tifi ek garson finn tultan enn priorite ek enn gran fyerte pu nu. Mem si buku klas lekol finn detrir, anmemtan ki institisyon ledikasyon tersyer, fer plizir mwa ki lekol finn vinn sant ki akeyir fami refizye, profeser pare pu rekumans zot devwar pu transmet konesans avek zanfan ek lazenes osito ki kondisyon permet. Ena etidyan liniversite finn kapav kontinye zot letid lor kur onnlaynn avek liniversite Palestinyin dan West Bank. Partu dan Gaza, ena linisyativ pu ed zanfan rekonekte avek lanseynnman, kuma nu finn fer dan Kan Lete ki nu finn organize resaman dan sant Gaza. 

Nu pu sirkil zot deklarasyon avek nu koleg sindika dan sekter ledikasyon, ek nu demann zot pu kontinye zot aksyon solidarite.

Se atraver solidarite travayer, nu kapav batir enn lemond meyer, kot nu tu egal dan drwa imin ek nu tu viv dan laliberte ek dinite. 

Kamarad nu salye zot,

Democracy and Workers’ Rights Center dan Palestinn

Websayt: https://dwrc.org

X: DWRCPalestine

FB: dwrcpalestine

(Tradiksyon an Kreol par CC)