Zenosid Blog 51 - Netanyahu antrenn lemond dan leral Israel so proze kolonyal
16.08.2024
Kot nu kuldesak Ragoo Lane zwenn ar Allee Tamarin, asterla ena enn laliyn blan penn lor enn sime fek koltare wadire karpet velur. Allee Tamarin, sime partu ranpli avek tru la depi avan lokdawn, inn vinn sirfas plis listre dan pei. Alor, dimunn pe marse tutlong sa sime velur avek zot bwat kartron kare sakenn avek so gato ron rekuver lao avek so aysing ble. Akoz sa lane la Lavyerz li enn konze piblik. E zanfan ek adilt pe amize rul zot bisiklet pran depi Labutik Deni ziska Labutik Longann, zis pu plezir profit sa sirfas velur sime la.
Antretan.
Zimaz layv sa zenosid perpetre par Israel ansam ar so bann manipilater Amerikin fors nu res konsantre lor sa orer kontinyel ankur. Li okler pu lemond temwin. Lepep Palestinyin pandan 76-an finn persekite, masakre, e lerla ankor persekisyon tutolong, ale mem san relas, me asterla pandan sa dernye 10 mwa avek lemond pe temwin. Rezistans arme Palestinyin pe resi dezwe Leta militer Israelyin sir-devlope. Zenn-om al kol bom, rekonstitye depi but-but bom Israelyin ki pa finn exploze, ar zot lame lor enn tenk, vit-vit returne. Bom la exploze. Asterla, Palestinyin gayn sutyin depi ICJ pli ot lakur Nasyon Zini, depi Lakur Kriminel Internasyonal ICC, depi preske totalite Leta Nasyon exklir klik raprose Inperyalism Oksidantal, e dan dernye 6 mwa depi enn mazorite grandisan travayer andan sak sa bann pei inperyalist la. Alye Palestinyin Hezbollah, li pa mem enn leta, ena desans pu kontinye presyon lor Israel, atak target militer avek zarm artizanal deplizanpli sofistike. Radar pa futi reper zot akoz zot fer ar papye-mache. Houthis, zot usi, servi lafors zot ena pu dibut ansam ar Lepep Palestinyin. E asterla Iran pe menas Israel.
E USA pe promet li pu “defann Israel” – mem kan li pe admet Netanyahu enn danze pu lintere Leta Amerikin, mem si USA napa ule enn lager dan Mwayen Oryan.
Israel so asasinasyon resan Lider Hamas Ismail Haniyeh li enn parmi Israel so dernye krim deger orib. Tu sa bann krim la asterla, pe kontinye ale mem ale mem otur krim zenosid kont lepep Palestinyin, asterla fors USA rant dan lozik lager. Li kumadir Leta Netanyahu ena enn rol lidership dan laparey deta USA, sa seksyon laparey deta USA kot ena sa bann votur ki pe puse pu enn lager kont Liran, e ki rule par lobi miltinasyonal zarm e miltinasyonal petrol, regrupe otur AIPAC. Nu finn truv Netanyahu zongle lafisel maryonet pu fer manb Kongre Repiblikin ek Demokrat, dibut, tap lame ek tom asize lor zot syez, e lerla re-dibut, re-tap lame ek re-plank zot dan zot syez, zot inn re-repet sa pu plis ki 50 fwa. Abe kisannla pe manipil seki pe zongle maryonet? Li pe vinn deplizanpli kler seki pe manipil zongler maryonet, Netanyahu, form parti leta USA.
Gete seki finn arive.
Israel tuy sa mem dimunn, Ismail Haniyeh, avek lekel li ti pe sipoze negosye pu enn sese-lefe. Israel finn swadizan fer enn propozisyon. Hamas finn aksepte. Lerla Israel anonse li pa dakor avek so prop propozisyon, e Israel al tuy negosyater? Ki kalite Leta ki al tuy negosyater? Israel tuy enn kikenn ki ti ansyin Premye Minis Palestinn eli. E kot zot al tuy li? Lor teritwar suverin Iranyin. Zot asasinn li, kan li dan Teheran, kuma enn diplomat, kan li ti laba, okler, pa an kasyet. Li ti prezan dan enn seremoni formel pu prestasyon serman nuvo Prezidan Iranyin. Ki kalite leta bandi ki azir kumsa? E lerla kan Iran dir li pu replike, ki mo espere Iran ena pasyans stratezik pu pa al de lavan ek replike, USA dir li pu “defann Israel.” USA finn mobiliz so bann sumarin ver Lamer Mediterane, e pe poste de port-avyon dan mem senn bann krim Israel.
Alor, USA pe kontinye mem arm Leta Israel, pu permet li kontinye:
- tuy Palestinyin – zanfan, pansyoner, mama avek baba dan lebra, zenn, fam ek zom, sofer lanbilans, ners ek dokter, profeser ek kordonye, planter legim ek butikye – me sirtu zanfan. Seki li pa tuye, swa zot mitile, orfelin, tromatize.
- detrir tu lopital, lekol, arsiv, sime, sistem makalpayn, furnitir kuran, stasyon tretman dilo, e pe dekup koridor andan Gaza, kuma zot finn fer dan West Bank.
- asasinn dimunn partu dan lemond, kuma li kontan.
- fud lalwa internasyonal, inyor ruling ICJ, inyor Rezolisyon Konsey Sekirite, e al ziska sinikman militariz Lalwa Imaniter, kuma Raporter Spesyal Nasyon Zini Francesca Albanese finn pruve. Li servi Lalwa Imaniter kuma enn pretex pu atrup-lasas Palestinyin dan Gaza depi enn but ziska lot but, wadire zot trupo zanimo, pretann pe “met zot andeor landrwa kot ena danze”.
Nu tu bizin kontinye azut nu but pu aret sa zenosid la, e pu ena enn prosesis egaliter, demokratik anmars dan totalite Palestinn istorik, kot tu dimunn ena garanti pu viv an sekirite. Finn fer li dan Sid Afrik. Kapav fer li dan Palestinn-Israel. E kumsa depi Larivyer ziska Lamer, tu dimunn pu lib.
Nu Guvernman bizin tutswit zwenn dan ka Sid Afrik divan ICJ, e anmemtan, travay onivo Linyon Afrikin, pu vinn avek enn pozisyon komin. Li pa inposib pu aret sa zenosid la. E si nu pa aret li, danze enn lager orib expoze divan nu lizye. Rapel Israel ena zarm nikleer. Kapav et li res “sekre” akoz USA kapav selman furni zarm Israel si li pretann Israel pena zarm nikleer. Me sa pa ditu ule dir sa bann zarm nikleer napa relman existe.
Alor, amezir lavi pe derule ninport kot sa nu ete, dan Ragoo Lane, mem avek enn Allee Tamarin karpet-velur, nu pa kapav anpes nu pans sime anrwinn dan Gaza ek West Bank. Bonbarde ek lerla buldoze ziska larwinn. Par expre, kuma enn parti zenosid. E lerla, sa asontur amenn lemond lor rebor enn lager nikleer. E rapel Moris nu form parti ladan. Nu pankor resi efektivman met fin lokipasyon ilegal UK-USA Diego Garcia. Alor, ena travay divan nu.
Lindsey Collen, pu LALIT. Zedi 15 Ut 2024
Tradiksyon: BK avek kudme AA
