Nuvo Deklarasyon Beijing vinn izol Israel ankor plis
27.07.2024
14 lorganizasyon Palestinyin finn siyn enn lakor istorik pu zet baz enn guvernman interimer rekonsilyasyon nasyonal dan Palestinn.
Sa lakor la finn siyne dan Beijing le 23 Ziyet.
Dan Lakor la ena 3 demand prinsipal:
1. Enn sese lefe sutenab osi vit ki posib ki pu permet akse led imaniter.
2. Etablir enn guvernman interimer nasyonal pu Gaza e lezot teritwar okipe Palestinn pu demar rekonstriksyon irzan Gaza.
3. Lorganizasyon enn Konferans pu Lape pu ed Palestinn vinn enn ful manb Nasyon Zini e pu inplemant solisyon 2 Leta.
Ki bann pwin ki resorti dan sa text lakor ki koni aster kuma Deklarasyon Beijing?
Premyerman, li viz pu etablir enn guvernman linite nasyonal interimer dan Palestinn apre 9 mwa bonbardman ek destriksyon par larme Israel ki finn arive, kuma nu kone, avek ful baking Lamerik.
Dezyeman, li pu permet kreasyon enn lidership Palestinyin inifye. Anfet Israel finn tultan servi pretex ki Palestinyin divize, ki sanse pena okenn interlokiter pu koz lor nom tu Palestinyin. Sa lalist 14 lorganizasyon demontre sa koze Israel la li enn foste. Anplis tule 14 lorganizasyon inn rekonet OLP (Lorganizasyon pu Liberasyon Palestinn) kuma sel reprezantan lezitim lansanb popilasyon Palestinyin. An realite Israel, ek konplisite USA, finn tultan fer tu kalite manev pu diviz ladireksyon rezistans Palestinyin. Pli grav zot finn sistematikman koronp e denigre diferan dirizan e portparol Palestinyin, e kan sa pa marse, zot finn kareman asasinn zot. Lalist la li long.
Trwazyeman, lakor la pu amenn lorganizasyon eleksyon lib lor teritwar Palestinn pu elir enn Konsey Nasyonal Palestinyin (Palestinian National Council). Anfet Leta Israel finn tultan sabot tu prosesis pu instal kit form reprezantasyon demokratik dan Palestinn. Zame zot pa finn rekonet rezilta eleksyon ki Palestinyin finn organize dan Gaza kot Hamas ti eli.
Kartriyeman li inifye tu lorganisyon Palestinyin pu fer fas agresyon militer e zenosid ki Israel pe kontiyne komet dan teritwar Palestinn.
Konkretizasyon Deklarasyon Beijing, ki ti anfet kumans pran form ant Fatah ek Hamas dan Larisi an Fevriye sa lane la, li enn viktwar diplomatik pu Lasinn ki pe pozisyonn limem kuma pei ki ena plis konfyans pei Mwayin Oryan ki nerport ki lot pwisans. Rapel ki Lasinn ti inisyater enn lot lakor istorik dan sa rezyon la, ant 2 pei ki pa ti mem ena relasyon diplomatik alepok, Larabi Saudit ek Liran. Sa premye Lakor su lezid Lasinn la ti an mwa Mars. Sa lakor la pe osi vinn anplifye izolasyon politik dan lekel Israel pe retruv li apre ruling Lakur Lahay lor lokipasyon ilegal Palestinn, so lot ruling lor zenosid “plozib” dan Gaza, e apre rezolisyon Konsey Sekirite anfaver sese lefe dan Gaza, apre ki 145 pei lor 193 manb Nasyon Zini finn rekonet Palestinn kuma pei suverin.
Anmemtan sa inifikasyon lansanb lorganizasyon ek tu sa faksyon Palestinyin pu ede pu blok tu manev Israel pu sey kree enn lot striktir su so kontrol e ki pu kolabore ar lotorite Israelyin, kuma finn arive ar Lotorite Palestinyin ki ti met anplas dan kad lakor Oslo. Sa kalite striktir su titel Israel uswa Israel konzwin ar USA pa pu dan lintere lalit pu liberasyon Palestinn. Palestinn bizin guverne par Palestinyin zot mem.
Nu finn inklir pli anba lalist 14 lorganizasyon siynater Deklarasyon Beijing:
Palestinian National Liberation Movement (Fatah)
Islamic Resistance Movement (Hamas)
Popular Front for the Liberation of Palestine (PFLP)
Democratic Front for the Liberation of Palestine (DFLP)
Palestinian Islamic Jihad Movement
Palestinian People’s Party
Palestinian Popular Struggle Front
Palestinian National Initiative Movement
Popular Front for the Liberation of Palestine (General Command)
Palestinian Democratic union (FIDA)
Palestinian Liberation Front
Arab Liberation Front
Arab Palestinian Front
Vanguards of the Popular Liberation War (As-Sa’iqa Forces)
[Source for list of signatories: Chinese Foreign Ministry website]
