Rapor aksyon encampment LSE ansolidarite ar Lepep Palestinn
21.06.2024
Enn etidyan rakonte
20/06/2024
"LSE finn expilse nou depi Marshall Building Lindi, atraver enn ordenans lakour. LSE premie liniversite dan Langleter kinn reisi fer sa, mem si sa finn pran zot plis ki enn mwa. Finn enn long mwa, ek li pou pran boukou refleksion ek boukou perspektiv pou kav konpran tou seki finn deroule pandan sa mwa la. Nounn apel li LSE Liberated Zone, ek asterla ki mouvman pe kontinie andeor encampment la, li pe vinn plis evidan ki sa Liberated Zone la anfindekont se mouvman la an limem. Li bann seminar ledikasion politik ki nou organize, li bann aksion direk sertin dant nou pran, li nou stratezi lor lon term ek bann taktik nou anplwaye, li tou bann reynion ki ena toulezour. Alor se enn refleksion ankour, non pa lor landrwa la, me lor mouvman la. Enn mouvman ranpli ar kontradiksion, kontradiksion ant diferan tandans ideolozik, ant ideolozi revolisioner ek reformis, ant birokrasi ek demokrasi, ant diferan form demokrasi, ant bann irarsi rasial ek patriarkal ek enn zefor konstan pou lit kont sa bann irarsi la, ank dimounn ek zot bann konfli interpersonel.
"Kronolozi dernie semenn
"Vandredi dernie, apre preske enn mwa okipasion, LSE finn amenn nou lakour. Apre bann long long deba dan encampment, nou ti finn vote pou al lakour ek pou defann noumem, akoz ti ena enn sans konsiderab ki nou gagn sa ka la. Malerezman, ziz la finn aksepte LSE so plint kont nou antan ki bann trespassers ek finn donn liniversite enn IPO (interim posession order).
"Dimans tanto, zour eid, ver 4h, LSE finn kol sa IPO la lor bann laport nou batiman. Nou ti ena alor 24hr pou kit batiman la, avan ki LSE kav pran bann aksion legal, kouma, par exanp, apel lapolis pou met nou deor ek potansielman aret nou. Nou finn vote pou kit batiman la avan ki sa arive, akoz pa ti ena boukou zelev kinn pare pou pran sa risk la.
"Lindi, nou finn organiz enn dernie manifestasion 3.00 PM, 1-er tan avan ki nou bizin kit batiman la. Sekirite finn antour bann laport, finn blok tou lantre. 3.30, kan Jeremy Corbyn ti pe koze deor, devan enn lafoul plizir santenn dimounn, sertin dant nou ki ti res andan finn ouver an gran bann lafnet ek sa lafoul la finn fons andan. Pandan enn 20 minit, zis pou fer management per, pou montre zot ki nou kav refer li, nou finn re-anvayi Marshall Building. Boukou dimounn finn gagn bann alterkasion violan ar sekirite, ek plitar LSE finn servi sa kouma exkiz pou aret negosiasion ar nou.
"Landemin, management finn avoy nou enn email ki explike ki, akoz plizir manb zot lekip sekirite finn blese (ki fos, otan ki nou kav trouve; bann prev video anfet montre sekirite pe maltret zelev pandan sa manifestasion la), zot pe sispann tou negosiasion ar nou. Li kler ki rezon ki zot pe aret bann negosiasion se akoz nou nepli ena sa pression ki nou ti ena kan nou ti touy tou aktivite dan batiman la.
"Zordi, 3 zour apre zonn met nou deor, finn ena 2 reynion ki monn asiste – enn reynion stratezi ek enn reynion zeneral – ek toulede finn sey reponn kesion kotsa mouvman la pwale asterla. Li an evolision, me nou finn ariv konklizion ki encampment la sete enn staz spesifik, ek ki asterla nou pou bizin sanz striktir ek metod. Boukou bann working groups, ki ti pran kont bann lozistik encampment, finn vinn obsolet, alor nou pe retravay striktir mouvman la an antie pou ki tou dimounn kav investi zot lenerzi dan bann aksion ki relie avek nou stratezi ek nou bann demann.
"Mem si encampment la nepli la, lalit pou ki LSE retir so kas depi sistem aparteid Israel kontinie, ek boukou lenerzi reste pou met presion lor liniversite la.
