Zenosid blog 48 - Israel finn perdi so lager dan Gaza
20.06.2024
Kot nu ete asterla, Israel pe perdi, uswa fini perdi, so lager kont Hamas.
Israel finn anonse so bi militer an de vole: pu “liber otaz” e “aneantir Hamas”. Israel kan li finn servi mwayin militer olye liber otaz, li finn tuy plis otaz. Israel pa selman finn inkapab fini Hamas me li finn fer Hamas gayn statir militer e mem statir politik dan Palestinn, dan Lemond Arab, ek dan lemond antye. Israel finn mem perdi so bi non-avwab pu lasas, atrup ek pus tu Palestinyin uswa laplipar Palestinyin Gaza dan dezer Lezip lor frontyer Rafah. Lepep Palestinyin finn aprann sa leson la an 1948. Si zot kite, Israel zame pa pu les zot re-return lor zot later ar lekel zot byin atase.
Sa defet Israelyin dan so lager dan Gaza pa ule dir zenosid pe al arete.
Pu tuy, bles, mitil ek teroriz fam ek zanfan li pa enn stratezi militer kot kapav gayne. Li sirtu pa ditu enn stratezi militer. Li telman atros, pena parol pu kalifye sa, ki Israel pe, kan li ena rekur a enn tel stratezi militer orib, detrir limem, kuma enn leta Zwif. Israel fini perdi kan li pe atak limem. E Israel, apre li finn fini sibir enn defet, pe kontinye atak limem.
Ala seki Lloyd Austen, USA so Sekreter Deta Lager, ti ule dir kan, le 2 Desam 2023, li ti warn Israel kan li pe masakre popilasyon sivil sa pu antrenn enn defet stratezik. Se seki finn arive. Nu sit so parol exak: “Dan sa kalite lager la, sant gravite li popilasyon sivil. E si u pus zot dan lebra lennmi, u pe ranplas enn viktwar taktik par enn defet stratezik” [“In this kind of a fight, the center of gravity is the civilian population. And if you drive them into the arms of the enemy, you replace a tactical victory with a strategic defeat.”]Sel viktwar taktik Israel kapav deklare se li finn tuy, bles ek mitil fam, vye dimunn ek zanfan, fer zanfan vinn anz ek orfelin, uswa li finn anpit ek tromatiz ti zanfan. Sa li enn defet, mem depwindevi taktik. Lerla li asontur deklans oto-destriksyon, depwindevi stratezik.
Bonbardman Gaza konstitye sa destriksyon ek oto-destriksyon. Gaza deza enn geto pu enn popilasyon san enn larme san mansyone li pa mem ena enn erfors uswa enn lamarinn. Sa bonbardman li pa premye fwa, Israel pe bonbarde lor seki deza dekonb, larwinn total grava dan bonbardman avan kuma nu pe temwin lor nu lekran. Mo truv enn mama pe sey balye seki ti kitfwa so lasam dormi avek enn balye. Mo finn truv enn tipti garson avek so kaye pu fer so devwar lor enn tibut beton plat dan dekonb, enn but so lakaz bonbarde servi kuma latab. Dante so Inferno. Nef serk pese Israelyin: tuy inosan; mitil zanfan; deplasman anmas; insit zenosid atraver langaz provokan; sem konfizyon parmi dimunn avek mansonz, furbri ek pyez; detrir lopital par expre; expilse ek asasinn zurnalist ki reprezant nu lizye ek nu temwin; blok mem tuy seki pe amenn led imaniter, kan Israel pe komet enn zenosid total.
E alor li vinn responsabilite enn gran mazorite dimunn ordiner dan sak pei dan lemond pu vinn osekur Palestinyin. Tu seki, uswa preske tu, dimunn dan lemond, ti abitye sutenir Israel uswa pa ti pran pozisyon, asterla pe kumans vire kont Israel avek orer.
Biden ek Blinken Pe “Gaslight” Abazurdi Lemond
Fason Biden ek Blinken prezant zot plan-depe kuma enn “propozisyon Israelyin” e Israel, li pe piblikman dir plan la “non-vyab” ek li pe kontinye bonbard Gaza ziska lafin, li konpletman fu. Amwins zot pe gaslayt nu? Pretann par pir lafors zot pwisans militer pu dir seki zot dir li vre mem si li klerman enn foste. Apre USA finn “gaslight”nu, lerla zot dir nu, nu ena enn gro problem avek nu lizye. Zot pe sey rann nu fu. Me li tu sinpleman pa pe marse. Biden ek Blinken paret deplizanpli kuma kretin. Kretin kriyel.
Kimanyer sa kapav Israel so “plan depe” si Israel pa pe dakor avek plan la? Li lozikman inposib. Alor li bizin enn mansonz. Ninport ki zanfan 3-zan pu depiste sa. “U papa dir u u mama pu, si u dakor pu fer bon zanfan, donn u enn gato. U mama dir u zame dan so lavi li pa finn dir sa. E u papa kontinye dir u komkwa u bizin fer bon zanfan pu gard u lamwatye par sa lakor la. Selman isi, Biden ek Blinken pa pe koz gato. Zot pe koz manti pu kuver enn zenosid.
E bi enn tel mansonz li telman evidan. Bi se pu blam Hamas pu tchweri kontinyel ek masak ki Israel, alye USA, pe perpetre kont Palestinyin. Bi se pu perpetye zenosid zot pe kontiyne perpetre.
Sa ule dir sa zenosid la li enn zenosid par USA. Biden ek Blinken sarye responsabilite pu sa zenosid la. Zot pe ena pu pretann komkwa zot pe fer kiksoz, e pretann Israel pa pe komet zenosid – pa parski zot kwar sa maskarad la me parski Biden pu perdi eleksyon Novam, parski kisannla pu ule vot enn lider zenosider? Mem kan sel lot swa se Trump, ena limit kot enn imin moral kapav met so vot.
Alor, lager inn fini. Israel inn perdi. Me li pa ule met so sinyatir a enn plan-depe. Alor Israel pe refize lerla li kontinye tuy Palestinyin – dan Gaza ek dan West Bank. E USA pe kuver pu tusala atraver protez Israel, pretann Israel inn ofer enn diyl, e se Hamas ki pe refize. Hamas dan enn pozisyon difisil. Li, inpe plis saz ki enn zanfan 3-zan, kone Israel pa pe propoz okenn de naryin. Alor, aksepte propozisyon Israel li difisil. Me, zot finn kanmem aksepte pu diskit propozisyon.
Ala lor ki kalite zafer nu pe bizin ekrir!
Lindsey Collen, pu LALIT. Dimans 16 Zin 2024
Tradiksyon: BK avek kudme AA
