Komanter LALIT lor Diskur Bidze 2024-2025
07.06.2024
Bidze Padayachy 2024 li enn bidze plito prezante pu exzizans akurterm, ki exzizans alongterm. Sa, akoz eleksyon zeneral deryer laport. Purtan, gran gran problem pei, problem ki bizin adrese alonterm. Nu pe koz kreasyon anplwa. Nu pe koz suvrennte alimanter. Nu pe koz reform agrer. Nu pe koz kontrol demokratik lor labank, lasirans. Tusala pa finn adrese. Li enn bidze san okenn profonder.
Pena veritab PLAN PU LEKONOMI. Par sa, nu ule dir, pena plan pu adres kreasyon anplwa. Sel sif ki done se 1,000 nuvo polisye, setadir enn depans lor represyon. Kote Lasante, nu pa truv rekritman dizon 1,000 nuvo infermye, 1,000 nuvo rekordz Klerk ek lezot staf. Purtan mank staf.
Diskur Bidze pa get kimanyer ogmant prodiksyon an zeneral. Se sa ki pli inportan dan enn bidze, lepok aktyel. Ki Repiblik Moris pu prodwir, pu nu tu servi, e pu nu exporte?
Pena okenn plan nonpli pu adres problem suvrennte alimanter. Purtan Minis konsede ki ena buku kriz dan lemond ki pe menas komers internasyonal e mem livrezon prodwi alimanter.
Ena plizir danze privatizasyon dan bidze. Ena konsesyon tax kot paran kapav pey mwins tax e servi larzan pu nuri lekol ek kolez prive peyan. Pareyman pu Lasante. Bidze pe agrandi som pu al sweyne dan sekter prive, dan klinik, etc.
Kote Lozman – Pena okenn gro proze pli divan (zis 2 proze mwins ki 1,000 lakaz). Purtan Rapor Odit finn dir ki demand pu lozman pre 30,000 an 2020 inn vinn pre 40,000 demand an 2023. Kote lozman, pena okenn mansyon lor kot finn arive lor ranplas lakaz lamyant. Alor, sa danze pu lasante pe persiste, bidze apre bidze. Li grav.
Rada Kistnasamy pu LALIT
