Zenosid Blog 47 –Enn nuvo mo an Angle – Gräuelpropaganda (prononse groyel-propagannda)*
07.06.2024
Minis Zafer Etranzer Annalena Baerbock paret finn maye dan enn flagran deli koz enn manti. Enn mansonz danzere.
Li finn dir sa mansonz premedite, lor mikro, lev so lavwa telman pu nway lavwa protestasyon dan lasal, al ziska mem akiz zot pe interonp li kan li pe koz lor enn isyu sansib vyol. Me li ti alez dan so linyorans lor isyu sansib “propagann atros” li ti pe servi kont so lennmi, “bann terorist”?
Seki li finn dir napa enn mansonz ordiner. Li form parti dan enn kanpayn Oksidantal pu fann “propagann atrosite” invante-par-Israel. Israel pe bizin sa “propagann atrosite” pu de rezon: pu deturn latansyon depi imilyasyon militer Israel le 7 Oktob; e pu zistifye zenosid Israel apre 7 Oktob e kitfwa mem predat 7 Oktob par ziska 76 banane. Malgre, pena nanye lor sa bul later pu zame kapav zistifye masak 36,439 Palestinyin e bles 82,627 kan anmemtan pe lasas popilasyon partu dan Gaza e afam zot amor, depi 7 Oktob. Alor, pe servi mansonz danzere par enn fam avek puvwar, par sa fam ki dezyem pli gran furniser zarm a Israel dan sa zenosid Israel pe komet kont lepep Palestinyin.
Nu ena pu dekonstrir sa bann mansonz enn-par-enn. Li paret pena lot sime. Nu tultan ena pu cheke pu fakt. Nu ena pu rod evidans. Nu ena pu diferansye laverite depi mansonz, seki vre e seki manti. Sirtu pandan enn zenosid.
Sa rekur a “propagann atrosite” pu zistifye zenosid return nu lor pwin depar a enn mo an Alman ki Minis Zafer Etranzer Mm Baerbock deza kone. Nu finn chek mo la, apre nu finn tann Ali Abunimah fer referans ar sa mo la lor websayt Electronic Intifada.
Mo la se “Gräuelpropaganda”. Li prononse apepre kumsa “groyel-propagannda”, mo finn ekut sa prononsyasyon lor innternet via spiyker mo kompyuter.
Sa li ti enn form propagann ki Joseph Goebbels ti responsab dan Lalmayn Nazi. Li ule dir invant atrosite pu zistifye vre atrosite u pe komet. Nazi ti invant “atrosite” Polone zis avan deklar lager. Sa mo Gräuelpropaganda zwenn sa lalist mo inporte direk dan langaz Angle akoz nu bizin li pu dekrir avek presizyon exakteman seki Minis Baerbock, e lezot lider Oksidantal kuma Joe Biden, pe fer kan zot fann sa bann mansonz la.
Minis Alman la pretann li finn “truv” vyol pe komet par enn “terorist” lor enn fim filme par terorist la limem uswa filme par enn lot “terorist”. Li finn truv sa. Me, sa vyol la pa existe lor fim. Li pa existe tukur. Sa fim invante lor sa vyol invante ti pe sipoze montre enn konbatan Hamas pe vyol enn fam Israelyin le 7 Oktob. Deklarasyon foste parey kuma Minis la pe fane samem “groyelpropaganda.”
Finn bizin enn zurnalist depi media Tirk Anadolu, pu konfront blef Minis lor so mansonz inexkizab. Zurnalist la finn poliman dimann enn portparol ograde Israelyin Lyetnan Kolonel Avichay Adraee dan enn Konferans depres plitar pu konfirm seki Minis Alman la finn dir. Portparol la finn reponn li pa kapav konfirm sa! Sa vedir li enn mansonz. Nu kapav sir si enn portparol Israelyin osi oplase kuma sa Lyetnan Kolonel la, li ti pu kriye depi lao tu lakaz si enn tel fim lor vyol ti existe. Anfet, de lezot surs plis kredib – etan done Israel pa pe permet ena okenn investigasyon depi andeor lor so seri krim deger – anfet finn truve pena enn tel fim. Zurnal plis rezonab dan lapres meynstrim Israel, Ha’aretz, pa finn truv enn sel ka vyol komet le 7 Oktob, malgre li ti pe rode mem pu enn, ankor mwins enn vyol filme. Raporter Spesyal Nasyon Zini Pramila Patten, enn Morisyin anpasan, li usi pa finn truv enn, malgre li usi ti pe rode pu enn, okur de seki limem dekrir avek presizyon kuma so non-investigasyon dan Israel lor vyolans sexyel pandan konfli arme. Li, usi, pa finn truv lexistans okenn evidans ditu, sa mem apre so lekip finn vizyonn buku-buku film. Li admet ki so “vizit ti fer swit a enn invitasyon Guvernman Israel” e paret ti finn kalkile pu servi par USA ek Israel dan Konsey Sekirite, ninport kan zot akile. Mem Mm Patten pa finn resi truv evidans.
Minis Alman Baerbock, enn “hawk”, enn marsan-lager pro-Israelyin, e li finn al Israel suvan omwin enn fwa par mwa depi 7 Oktob, ti koz sa manti la kan li pe adres enn evennman apel “Festival Demokrasi” dan kad 75em Laniverser Konstitisyon Alman post-Hitler. Sa ti arive le 26 Me, e li ti pu apropriye pu plito apel li “festival koz-manti”. Ali Abunimah depi exselan websayt investigasyon “Electronic Intifada” dir kimanyer, su presedan rezim Alman, zis avan rezim Annalena Baerbock ti pe selebre, propagann Adolf Hitler ti apel "Gräuelpropaganda" uswa “propaganda atrosite”.
Max Blumenthal, zurnalist depi media onnlayn Grayzone, enn lot websayt investigasyon inportan, dir Prezidan Biden Amerikin, usi, finn rekumans so labitid pu debit tu kalite mansonz orib ek Groyelpropagannda. Apre li finn debit enn seri alegasyon invante lor “dekapitasyon” omwin trwa fwa an piblik, asterla Max Blumenthal pe raporte lor so paz X le 20 Me kuma Prezidan Amerikin Joe Biden pretann dan so diskur pandan seremoni remet diplom dan Morehouse College komkwa li finn “truv foto [sic] [enn Palestinyin] pe atas enn mama ek enn tifi avek enn lakord, pe vers petrol lor zot, pe bril zot e gete amezir zot pe mor’. Mo finn al ekut Biden so diskur kot Morehouse lor Youtube. Enn ti resers montre sa bann “foto” li pe koze napa existe.
Seki terib ladan se sa kalite mansonz lor “foto” non-existan ena de bi interlye: pu kasyet Israel, ek Lamerik, zot defet militer imilyan le 7 Oktob, e pu “zistifye” Israel so vre masak zanfan Palestinyin ek zot fami, asterla pe viv dan latant dan Rafah, ek efektivman pe brile vivan par bom Amerikin large par Israel. Le 28 Me, 45 Palestinyin finn masakre par 2 bom Amerikin large par pilot Israelyin lor Rafah.
Anu rezim sa gräuelpropaganda Alman-USA-Israelyin, uswa propagann atrosite?
Li ti,avantu prinsipalman, enn mansonz konsernan atrosite lor tibaba.
Sa finn kalkile, planifye pu fer nu degute kan nu tann li, nu telman ankoler ki nu pa mem pran lapenn pu al fakt-chek li. Pu demanti li li usi pu tro grav.
Ti ena enn invansyon sa premye mansonz revoltan la, sa invansyon lor “40 tibaba dekapite”. Lezot media,mem ziska so BBC, plitar fann mansonz lor 20 zanfan “atase ansam ek brile”. (U pu fer remark lor sa repetisyon mo “tibaba”, e repetisyon sa fraz “atase ansam”. Lerla ti ena zistwar lor “tibaba brile dan enn fur”. Sa li kapav ti enn pirtal mansonz, uswa li ti kapav enn konfizyon otur but-but-lekor adilt brile dan enn loto pran dife kan Israel so misil dife-lanfer depi elikopter Apache lans so ripost kont konbatan Hamas ek lezot konbatan.
An realite, lalis total sekirite sosyal Israelyin tu viktim 7 Oktob inklir enn tibaba apel Millie Cohen. Li finn tuye par enn kut bal kan li ti dan lebra so mama.
E kan tu sa zistwar-tuy-tibaba finn devwale kuma invansyon orib par enn kit departman propagann, ti bizin ena nuvo zistwar pu fane, rekumanse ankor. Sa fwa la li zistwar lor enn lot size sansib.
Sann kut la lanfaz ti lor, e li ankor tuzur lor, zom Hamas finn sipozeman komet “vyol-anband” lor fam Israelyin le 7 Oktob. Sa alegasyon “vyol-anband” li konpletman fos.
Li enn fakt pena enn vyol raporte par enn sirvivan. Pena enn vyol raporte par enn temwin kredib. Pena ditu okenn evidans forennzik lor vyol.
Kifer propagann atrosite lor “tibaba” ek kifer lor “vyol-anband” ek kifer lor viktim atase ansam?
Li sirtu akoz sa trwa alegasyon fer nu revolte ek vinn irasyonel. Viktim san defans. Krim pa kapav siporte.
Sa kalite mansonz finn notwarman servi pu alimant lager dan lepase, kuma Premye Ger Mondyal, WWI, e mem avan sa, e sertennman depi sa.
Pu sa rezon la nu bizin expoz sa bann mansonz la enn-par-enn. Sinon, kan efektivman pe komet veritab atrosite, kifer nu pu krwar li? Eski Israel pa finn dekapit enn tibaba avek so bom lor Rafah? Eski nu finn deza perdi nu santiman imin divan enn tel krim atros akoz tu sa bann invansyon finn ena, kot nu finn al kwar sa bann invansyon, e lerla al dekuver nu finn kuyone par bann fos zistwar?
Nu bizin rapel ena de kiksoz pu gard antet lor vyol, sirtu dan sityasyon kolonyal. Ena vyol, limem. Samem iltim krim patriarsi. Rapel, parkont, vyol andemik, vyol plis repandi dan kontex kolonyal, komet par zom dan grup opreser kont fam dan grup oprime. E lerla ena sa linsaz ki akonpayn vyol, uswa seki akonpayn enn zistwar vyol, kan viktim enn fam dan klas opreser. Sa kalite zistwar, debus, e so bi se pu debus lor efektivman komet atrosite reel.
Propagann atrosite samem insit dimunn pu fer linsaz. E, kuma nu finn temwin, li insit dimunn pu komet zenosid. E rapel zenosid li, anplis pe komet zenosid la la, “insitasyon” zenosid atraver propagann atrosite, konstitye zenosid. Zenosid li usi “konplisite avek zenosid”, sa usi konstitye zenosid.
Alor Mm. Baerbock ek M. Biden ti pu fer byin si zot chek zot fakt avan zot anbark zotmem lor Groyelpropagannda. Zot ti kapav fer mye ankor si zot aret arm perpetrater pe komet zenosid. E aret finans zot. E aret servi veto dan Nasyon Zini pu protez zot. E aret, anmemtan zot pe fer tusala, servi taktik Mafya kont ofisye Lakur Kriminel Internasyonal.
Li enn fakt pu dir finn ena 695 sivil Israelyin tuye pandan inkirsyon dirize par Hamas dan Israel le 7 Oktob. Sa li buku. Nu pa kone si zom Hamas responsab, uswa lezot konbatan rezistans, uswa sa duzenn manb-gang parmi sa santenn Palestinyin galupe apye pu rantre, e par motosiklet atraver tu sa bann gro bres uver dan Miray Israelyin. Me lamor 700 sivil li enn gran nonb. Bizin al delavan avek investigasyon pu krim deger lor sa bann lamor la. Konbatan dirize-par-Hamas finn tuy 300 solda Israelyin e gard sekirite sa zur la, e usi sivil non-Israelyin. Nonb total mor sa zur la dapre Sekirite Sosyal e pibliye par lagazet, nom par nom, ariv 1,139. Kitfwa inpe plis ki 700 kapav et krim deger? Abe, kifer lider Israelyin, Amerikin ek Alman, pe kas zot an-kat pu fann tu sa lezot kalite zistwar-orib la? Pu kifer? Eski zot pa truv laverite ase orib pu zot? Uswa eski zot ena enn dernye volonte, pu diskredit zotmem? Uswa eski zot ule lamas dimunn dan sak pei partu telman supsonn mansonz atrosite ki zot al fini par pa kwar zenosid reel Israel pe fektivman perpetye divan zot lizye? Kan pe bril zanfan vivan? Kot finn dekapit enn tibaba? Kan enn leta orkestre enn faminn pu provok lamor enn popilasyon? Kan ansyin Zeneral ograde Giora Eiland exprim lintansyon zenosider kumsa, le 19 Novam lane dernyer: “Kominote internasyonal pe tir alarm lor katastrof imaniter ek lor danze lepidemi grav. Sa li inevitab. Lepidemi sever dan Sid Gaza pu akseler laviktwar.”
Ki dimunn kuma Joe Biden, Anthony Blinken ek Mm. Baerbock pe atann pu aret furni zarm ek aret donn baking politik pu kontinye zenosid?
Lindsey Collen pu LALIT. Mardi 4 Zin 2024
Tradiksyon: BK avek kudme AA
*NT: “gräuelpropaganda” enn nuvo mo dan langaz Kreol usi. Nu pe pronons li kuma so orizinal an Alman setadir “groyelpropagannda”
