Zenosid Blog 46 – Enn Israel ek USA Provokater ek Destrikter
03.06.2024
Lafin sa blog la, mo pu revinn lor sa konferans depres absird Prezidan Biden le 31 Me. Ladan, li dir Israel pe propoz enn nuvo lakor depe, e li ordonn Israel pu adere ar sa diyl la. Pa enn jok! Alor, li mem pa Israel ki pe fer so prop propozisyon. Netanyahu so premye repons se li dakor avek so prop propozisyon parski li permet li kontinye lager osi lontan li ule. Li pa enn jok! Parkont, li paret Biden pe asterla oblize fors lame Netanyahu. Kitfwa nu ti bizin pe dir “finalman”. Si selman nu ti pu kapav kwar Zenosid Joe.
Hamas, e medyater Katari ek Ezipsyin, ena pu pran Joe Biden oserye, byin sir. Nu osi nu bizin fer parey. Li enn kestyon ankor pli pir ki “Lager ek Lape”. Li enn kestyon aret zenosid. E kitfwa nu, tu lafors inifye kont zenosid, nu kolektivman pe koste ar aret li. Nu bizin kontinye proteste.
Les nu swiv seki inn pase dan dernye semenn pu nu resi konpran sa propozisyon sudin USA-Israel.
Palestinn Pe Brile amezir USA ek Israel Efrondre
Pu Palestinn, sa semenn pase finn enn parmi pli pir pandan tu sa lane lanfer kot “Pena so pli pir”. E purtan dan sa semenn pase la, Israel ek USA zot mem veritab perdan politikman. Netanyahu li, enn sel kut, totalman destabilize a linteryer Israel ek konpletman izole kuma enn Leta Bandi dan lemond. Dan semenn inn pase, Biden retruv li avek selman 15% elekter Demokrat sutenir so pozisyon komkwa Israel pa pe komet zenosid dan Gaza. Dan lemond kredibilite USA, deza enn navir perse, pe afebli avek sa veritab pwa lur krim kont limanite par so alye Israel.
Purtan, semenn pase nu finn temwin sa lalyans provokater ek destrikter al delavan avek masak dan Rafah. Zot pe kontinye masakre popilasyon divan lizye lemond.
Zot bonbard avek enn kriote barbar, fami Palestinyin deplase par lafors dan bann latant inprovize lor disab, e lerla get zot pe brile vivan lor lekran TV. Mansonz grosye invante par Israel lor swadizan “40 tibaba dekapite” dan atak 7 Oktob dirize par Hamas – enn mansonz ankor pe propaze e par portparol Israelyin e par portparol Amerikin, dimunn pena okenn remor enn fwa sa bann mansonz la finn demaske kuma manti – finn revinn ant nu, amezir nu tu, avek orer ek dezespwar, pe temwin enn tibaba Palestinyin reel pe dekapite avek sanfrwa par bom Amerikin large par pilot larme Israelyin.
Portparol Amerikin res indiferan mem divan enn tel masak orib? Azute usi lor la, enn tel krim osi atros ki sa, zot pa montre okenn siyn remor?
Lintansyon Zenosider
Portparol sanvergoyn Leta Amerikin, zom depi lespes imin pe efrondre, dibut laba dan sa semenn inn pase, pe begeye lor zot podyom kuma bufon lakur lerwa, zot lazu ek lamaswar klake amezir lafisel maryonet kase. Zot zistifye Biden ki ekrir laliyn ruz kont zenosid avek lank ki refase. Zot pe koste, parkont, dan sa moman mem dan zot lavi, kot kolonizater iltim, kuma karakter Kurtz ti ena pu fer fas dan liv Joseph Conrad The Heart of Darkness kan li kras parol zenosider, “Exterminn tu sa bann bitor la!”
Wadire pu pruve mo ena rezon, Nikki Haley, ex-Reprezantan USA dan Nasyon Zini, napa mwins, e li finn retir so kandidatir pu Prezidans Lamerik, napa mwins, finn ekrir lor enn bom artilri Israelyin servi pu tuy prosin zanfan dan Palestinn, li finn ekrir avek so prop plim avek so prop lame divan lapres internasyonal dan Israel semenn dernye, mo swivan: “Finish them!” [“Fini zot!”]
ICJ kapav “Al dan Lanfer”
USA ek Israel tulede finn dir Lakur Internasyonal Lazistis [International Court of Justice (ICJ)]li kapav dir seki li kontan lor Israel bizin aret so invazyon Rafah. Tulde sa leta bandi byin fupamal.
ICJ kapav “al dan lanfer”, “go to hell”, pu sit motamo Senater Amerikin sinyor Lindsey Graham so prop parol epuvantab. Sa finn swiv zis apre ICJ so zizman kler ek baynding lor invazyon Rafah bizin arete. Ala seki laparey deta Amerikin panse lor pli ot lakur dan lemond.
Samem mantalite par defo enn setler-koloni, koloni-par-kolon, kuma Israel, uswa parey kuma lafors dedrwat dan ansyin setler-koloni, USA. Se pu sa rezon la nu pe sit parol verbatim Lindsey Graham ek Nikki Haley. Samem mantalite enn lanpir setler-koloni pe-balote-lor-rebor-ekrulman. Dan sa moman, zot danzere.
Israel ek USA Servi taktik Mafya kont dirizan ICC
Sa mem de la, Israel ek USA, finn azir pli pir vizavi enn lot Lakur. Dapre USA ek Israel, manb Lakur Kriminel Internasyonal [International Criminal Court (ICC)], kapav kontinye sibir ankor atak stil-Mafya Israelyin ek Amerikin, parey kuma The Guardian ek de medya nuvel Israelyin finn devwale, dan dernye semenn.
Sa revelasyon sokan kimanyer Israel ek USA finn servi santaz kriminel kont ICC inn vinn piblik zis atan. Li enn lepok tu danze. ICC finn fek deklans prosedir pu tir enn warant internasyonal arestasyon kont Netanyahu ek Minis Defans Gallant lor sarz “faminn popilasyon sivil kuma enn zarm deger enn krim deger … intansyonelman diriz atak kont popilasyon sivil [ek] exterminasyon e/uswa asasina” (UN websayt) alor nu kapav atann taktik Mafia Israel ek USA pu akselere.
Rapel let menas a sef-prosekiter, Karim Khan, siyne par 12 Senater Amerikin, inklir Mitch McConnell limem? (Get Blog 42 ek kopi sa let la dan seksyon Documents lor nu websayt.)
Tu parmi nu avek enn sertenn laz ankor rapel kuma ziz Sid Afrikin Goldstone, ki ti prodir enn top rapor Nasyon Zini lor Israel an 2009, plitar dan enn fason dezonorab kapitile ek retrakte so rapor. Li kler zordi seki ti finn arive alepok, usi. Malgre alepok dimunn reflesi ti dute li ti enn santaz. Asterla, nu kone lor Israel so modus operandi, so metod travay.
The Guardian raporte kimanyer an 2018 sef servis sekre Israelyin ti inplik ansyin Prezidan Repiblik Demokratik Kongo, [DRC, Democratic Republic of Congo], Joseph Kabila, dan enn pyez konplex instale pu Sef Prosekiter ICC alepok, Mm Fatou Bensouda, dan Kabila so laswit lotel dan New York. Rapor lor Kabila ti deturn $138 milyon dolar e so fami ti investi dan imobilye dan Lamerik, alor sef Mossad ti kapav servi santaz pu gayn so konplisite dan instal sa pyez la. Alor, bos Mosad Yossi Cohen ti atann pare avek so anbiskad dan enn lasam atenant dan Kabila so laswit. Kabila akeyir Mm Bensouda, e lerla dimann Mm Bensouda so bann ofisye pu kit lasam. Lerla sef Mossad vinn lor Mm Bensouda, menas li ek so fami. Dapre diferan surs, Sef Mossad finn servi parol kuma “U bizin ed nu e les nu okip u. U pa pu ule rant dan zafer ki kapav konpromet u sekirite uswa sekirite u fami.” Plis Mafia ki sa, u mor.
Prezidan Donald Trump ek so Sekreter Deta Mike Pompeo ti zwenn dan latak kont ICC, anparti pu protez USA depi posib purswit lor krim deger dan Lirak ek Afganistann, anparti pu protez Israel depi investigasyon deza anklanse.
Trwa-Kar Leta asterla rekonet Palestinn
Dan sa mem semenn kan ena piblikasyon sa konportman sordid stil-mafia Israelyin ek Amerikin, kat nuvo pei finn demar prosesis pu rekonet Leta Palestinn. Sirman zot truv sa “move kote listwar” pe fixe zot dan zot figir. Lespayn, Lairland, Sloveni ek Norvez zot manb dan blok Lerop. Asterla ena trwa-kar leta manb Nasyon Zini rekonet Palestinn, setadir 146 leta lor 193 leta mam. Mauritius ti parmi premye batch leta pu rekonet Palestinn depi 1988. Alor sa laspe pu al ver enn Leta Palestinyin pe avanse for-for.
Ankor pei Zwenn dan Ka Sid Afrik kont Israel lor sarz zenosid
Anmemtan, ankor pei pe vinn azut zot pwa pu sutenir ka Sid Afrik kont zenosid par Israel divan ICJ. Semenn pase, nu truve Lamexik inn zwenn dan ka. Lezot fini zwenn inklir pei inportan kuma Lezip ki ankor tuzur dan lalyans avek Israel, Latirki enn manb LOTAN, ek Kolonbi, enn parmi gran pei dan Lamerik Latinn, ena osi pei Afrikin kuma Namibi ek Lalibi. Leta Moris bizin zwenn asterla.
Lor fron militer, Israel an difikilte
E koerans militer Hamas paret inn res intak. Apepre 10 zur desela, zot finn mem kaptir enn solda Israelyin. Sa pankor vinn kler. E IDF finn sibir lapert dan Jabalia, kot zot sipozeman fini “gayne” depi lontan. IDF finn usi sibir atak kont zot dan Rafah. Antretan, larme Hezbollah ena 100,000 roket, pe atann pu li servi zot kont Israel. Houti dan Yemen res enn menas a Israel osi lontan invazyon Gaza pe kontinye, e zot finn demontre zot ena kapasite pu avoy misil dan Israel.
Zenn ek travayer
Plis ki tu, zenn ek etidyan, travayer ek lorganizasyon, partu dan lemond pe dibut ansam avek lepep Palestinn.
Tu pe vinn ansam kont Israel ek Lamerik, apre komye lane lamas dimunn partisip dan manifestasyon, fer petisyon, planifye, aprann-informe-analize, ekrir let e mobilize an zeneral. Finalman, nu finn resi fer nu guvernman azir, e lorganizasyon internasyonal azir:
- Lakur Kriminel Internasyonal [ICC] inn deklans prosedir pu apruv warant kont Netanyahu ek so Minis Defans lor sarz krim kont limanite.
- Lakur Internasyonal Lazistis [ICJ] finn donn enn zizman baynding kont Israel, ordonn Israel pu aret so lofansiv dan Rafah, aret tuye, demanbre, detrir abitasyon kot dimunn reste, e orkestre faminn.
- Ankor plis pei dan lemond pe rekonet “Leta Palestinn”, kuma Nasyon Zini ti finn promet, an 1948.
- Lafors politik Israelyin pe klash e destabiliz Guvernman Netanyahu deza destabilize, e lekonomi Israelyin pe ekrule piktet anba.
- Zenn partu dan lemond pe leve kont investisman dan Israel, dezinvestisman kont Israel pe agrandi, travayer pe refiz fer manitansyon bom. Biden so prop staf pe demisyone ek pe fer rebelyon kont li.
- Hamas, larme Hezbollah, “guvernman” Houti, faksyon arme dan Lirak ek dan Lasiri finn zot tu anserkle Israel. Liran pe res andeor, mem kan Israel provok li pu fors lame USA pu lager kont Iran pu Israel.
Biden anons Propozisyon Lape Israel
Se dan sa kontext la ki Prezidan Biden finn fer so diskur bizar le 31 Me kot se Lamerik e non pa Israel ki vinn anonse e mo sit websayt White House: “Israel finn ofer enn nuvo propozisyon detaye” pu lape. Lerla li azute “Mo finn insiste avek lidership dan Israel pu sutenir sa diyl la, malgre tu kalite presyon ki pu ena.” Me, byin sir, etan li Israel so prop propozisyon, alor evidaman zot pu sutenir propozisyon la. Sinon, ki sa mo “propozisyon” ule dir alor?
Konteni sa propozisyon byin resanble presedan propozisyon pre-Ramadan ki ti lor latab e ki Israelyin inn rezete deza. Konsernan sa fraz bizar, enn parmi premye trwa fraz, pu ena “retre larme Israelyin depi tu landrwa abite dan Gaza”. Ki sa ule dir? Palestinyin Gaza finn expilse depi tu landrwa zot ti pe viv, alor eski sa bann landrwa la ankor konsidere kuma “landrwa avek popilasyon”? Uswa non? Li inimazinab pu enn Prezidan Amerikin vinn propoz enn tel plan deplorab.
Efektivman Biden trakase terib lor perdi eleksyon an Novam akoz so sutyin avek krim komet par Israel. Ki enn elekter Amerikin onet sipoze fer, kan li ena enn swa ant enn fuka kriminel kuma Trump ek enn Zenosid Joe? Eski kan Israelyin inn anonse zot pu fer “ankor 7 mwa lager”, sa finn enn katalizer? Israel anonse zot pu lager ziska Prezidan Biden perdi eleksyon? Zis fer kalkil aritmetik, lafin Me plis 7 mwa. Se seki Advayzer Sekirite Nasyonal Israelyin Tzachi Hanegbi finn anonse le 29 Me. De zur pli tar nu tann propozisyon Biden lor nom Israel.
Lindsey Collen, pu LALIT. Samdi 1 Zin 2024
Tradiksyon: BK avek kudme AA
