Epdeyt depi etidyan LSE apre aksyon encampment pu proteste kont investisman LSE dan konpayni Israel
25.05.2024
“Fer 10 zour depi nounn koumans okipasion enn batiman dan LSE. Nou encampment pe sirviv. Ena enn rotasion enn 50-enn zelev ki vini toulezour, ek apepre lamwatie reste aswar.
“Seki inportan pou laplipar dant nou, se bann demann ki alabaz sa encampment la. Nounn drafte sa bann demann la baze lor enn rapor ki LSE Palestine Society inn pibliye mardi dernie, apre plizir mwa resers: https://www.jewishvoiceforlabour.org.uk/article/assets-in-apartheid-lse/. Ena10 demann ki nounn avoy management LSE: https://www.instagram.com/p/C7MDcoAoMtT/?img_index=2. Divestment plis krisial ki bann lezot, ek dan sa 1 seans negosiasion ki nounn gagne avek management, se sel size ki nounn koze. Management pa ti interese pou koz nou bann demann ditou; zot bizin plis letan zonn dir – zot pe investi boukou lenerzi dan devie nou latansion avek bann problem lozistik lor batiman – atraver bann email ki zot avoye, ki parfwa kontradiktwar avek zot bann lezot email, ek atraver bann gard sekirite.
“Liniversite inn menas nou avek bann aksion disipliner apre nounn blok enn evennman liniversite ti pe organize, alor li enn risk pou pamal zelev, sirtou seki ena enn viza etidian. Nou impe bloke alor pou linstan, malgre boukou zafer pe deroule toulezour – bann lamars, bann ‘teach-ins’, bann petision ek bann let a management – nou pa pe ‘escalate’. Nou va gete si sa pou sanze dan bann zour ki vini.
“Enn lot kote, tou sa bann ti zafer nou pe organize, pe kree boukou nouvo dinamik ant bann zenn dan liniversite, boukou rankont, boukou diskision revolisioner. Bann profeser vinn fer bann klas lor palestinn dan encampment la, ansam ar bann lezot orater – Jeremy Corbyn ti vinn fer enn letour lot zour la. Toulezour enn organizasion swa enn group individiel ofer dezene swa dine, ek ena enn provision konstan tou bann lekipman ek materiel nou bizin a traver bann seki siport nou depi andeor.
“Nou format pou pran desizion ek pou tou deroulman dan kominote la se bann lasamble, toulezour normalman ena 2 gran lasanble, enn gramatin enn tanto, ek plizir tipti dan lazourne – lor sekirite, welfare, stratezi, taktik rezo sosio, bann evennman pou organize. Ant sa bann reynion la, bizin organiz encampment la so bann lozistik; manze, lekipman, netoyaz, ek osi bann relasion interpersonel – ki pe amenn konfli.
“Se enn lespas ranpli ar tansion, ant bann diverzans ideolozik ek stres lexame, ant mank somey ek bann menas management, me okipasion la pe sirviv. Ena boukou lespwar, plizir liniversite dan Rwayom Ini finn aksepte pou retir investisman, mem si li pou difisil LSE aksepte retir so bann plizir dizenn milion ki li investi dan bann konpani ki ena lien avek Israel.
“Sitiasion la pou kontign evolie, dan bon direksion mo espere.
