Zenosid Blog 44 – Ki ete le 7 Oktob? So vre sinifikasyon
24.05.2024
Sa de mo dan lexpresyon “7 Oktob” finn ariv sinifye plis ki zis enn dat. Nu finn asterla abitye ar sa. Inkizisyon dan media oksidantal ek kan ena temwaynaz pandan sesyon lodyans divan Kongre Amerikin: “Eski u kondann 7 Oktob?” E si pa reponn kuma enn peroke, “Wi, mo kondann le 7 Oktob”, uswa si u sey sitye kontex sa lexpresyon “7 Oktob” dan ninport kit fason, mem si u sey return mem enn sel zur avan kuma le 6 Oktob, bliye return an 1948, u riske sibir pinisyon. Pinisyon kapav pran depi insilte u tut long program TV la ziska perdi u plas travay.
Tutfason, mo ti pu kontan atraver blog zordi pu partaz mo refleksyon lor “7 Oktob”. Mo pu sirtu get li lor trwa laspe.
Premye: Kifer Alegasyon Makab
Kan seki pwisan politikman dan Loksidan ek zot media sibaltern fer referans a “7 Oktob” pandan premye kat ubyin sink semenn apre inkirsyon andeor Gaza dan Israel, zot ti pe byin suvan fer referans a tu kalite fabrikasyon orib lor konbatan Hamas, par exanp “dekapitasyon tibaba”. Kisannla pa pu kondann “7 Oktob”, si sa ki “li” ti ete.
Get Prezidan Joe Biden. “Zame mo pa ti pu panse ki mo pu truv e gayn foto konfirme terorist pe dekapit tibaba,” li dir, (lor media NBC, 11 Oktob). Si nu swiv Biden so gramer bizar [dan version an Angle: “I never really thought that I would see and have confirmed pictures of terrorists beheading children”], li finn truv terorist pe dekapit zanfan e/uswa li finn gayn “foto konfirme kot terorist pe dekapit zanfan”, depandan kot virgil ete dan so fraz. Me zot napa existe. Ni foto ni dekapitasyon.
Kan dimann montre prev, portparol Biden sey fer koverep pu li. “De ofisye oplase so ladministrasyon dir Biden ti pe refer a rapor depi Israel lor zanfan dekapite e [zot] sit plizyer reportaz media lor dekapitasyon,” NBC ekrir. Anfet, li pa finn truv okenn denanye, me li ti pe fer referans a zis “reportaz” dan lapres puvwar lokipasyon, Israel. Sipoze nu aksepte so koreksyon, atraver so de kolaborater. Lerla nu atann gayn konfirmasyon “reportaz”. Me, tu sa “reportaz” flu zame pa finn konfirme. Sa li akoz evennman, enn uswa plizyer evennman, zame pa finn arive. Antretan, par duzenn milyon dimunn finn lir tu sa seri mansonz danzere lor sipozeman “40-tibaba dekapite”. Sa kalite propagann samem furni materyo pu fer linsaz.
Anfet, Biden pa finn ni “truv” foto, ni li pa finn gayn akse a “foto konfirme kot terorist pe dekapit zanfan”. Sa li zis enn manti li ti pe koze. Uswa, opizale, enn lapsis. Lapsis enn fwa. Li kapav arive. Me, asterla so bann kolaborater kone.
Lagazet The Washington Post repran sa zistwar sis semenn apre, dan enn lartik “Dezyem fwa Biden fer referans a sa [dekapitasyon], pandan so vizit dan Israel, so langaz ti pli pridan. Li nepli dir tibaba ti dekapite, li zis dir ti ena dekapitasyon.” Alor, li nepli tibaba dekapite, me zis “dekapitasyon” san spesifye. So bann kolaborater finn warn li, e lerla li vinn avek enn demi-koverep-demi-retrakte malonet seki li ti dir avan. Me li tuzur mintenir “dekapitasyon”. Li ule “dekapitasyon”? Li bizin “dekapitasyon”? Antuka, li paret kumsa.
The Washington Post kontinye dan so edisyon 22 Novam, purtan, lor enn trwazyem fwa kot Biden fer referans a dekapitasyon, li ankor enn fwa inn dir Hamas “ti pe dekapit tibaba”. Ki kalite Prezidan sa?
Anfet, nu inn ariv kone ti ena enn tibaba tuye sa 7 Oktob la. Trazikman, Mila Cohen tibaba 10-mwa ti fiziye kan li ti dan lebra so mama. Sa li enn krim deger. Pu ki rezon guvernman Israel e Prezidan Amerikin ule invant “atrosite” pli pir? Uswa atrosite ankor plis orib? Kifer pa zis dir laverite? Tuy sivil li enn krim deger. Alor kifer pa onet lor seki finn arive. Sa kalite mansonz lor krim li totalman inakseptab, e li danzere.
Mwa, pu kumanse, zame mo pa pu kwar nanyin seki Biden dir, ziska mo gayn prev. Si kikenn koz manti zis pu fer koverep zenosid, li finn fini kumans tus bafon lor plan moral.
Advayzer White House finn spesifikman dir prezidan pu “arete avek sa koze komkwa Hamas dekapit tibaba akoz sa seri reportaz la zot non-konfirme”, dapre lartik The Washington Post le 26 Novam 2023. Me, Biden persiste.
Kan sa rimer dekapitasyon tibaba inn kumans expoze apre premye mansonz Biden, enn nuvo mansonz inn kumans tir so vilin latet lor sipozeman “tibaba kwi dan enn fur”. Sa usi enn fabrikasyon uswa, opizale, enn erer monimantal inimazinab, kot kitfwa inplik enn evennman provoke, dan enn kont-ofansiv, par misil dife-lanfer ki repite pu bril dimunn ziska lasann.
E lerla, byin sir, kan tu mansonz lor “tuy tibaba” fini expoze kuma propagann deger bomarse kan lalist konplet tu lamor inn pibliye dan lagazet Ha’aretz, enn par enn, avek laz e plas lamor, lerla nu gayn enn lot nuvo vole alegasyon. Alegasyon orib “vyol an-band”. Sa bann mansonz la ena de “itilite”: premye se li sey “zistifye” zenosid inzistifyab komet par Israel avek so bann siporterz. (Nu pu vinn lor sa dezyem itilite pli tar dan sa blog la.)
Buku parmi zistwar fabrike lor vyol ti baze lor seri mansonz-asterla-fini expoze, ti invante par ZAKA, enn sosyete ki prepar lekor pu servis lanterman, dedrwat totalman diskredite. Tu sa zistwar fabrike nepli tini dibut kan finn analiz zot an detay. Lezot surs, kuma New York Times, finn bizin kennsel so seri anonse, kan zot zistwar asterla-notwar inn kolaps kuma enn pil mansonz. Fami enn viktim dir li pa ditu vre ki li finn vyole. Mansonz lor vyol an-band sistemik finn minisyezman demaske par tipti media dan USA, kuma Gray Zone, Electronic Intifada, The Intercept ek Mondoweiss – malgre akizasyon kriyel “zot pa pe ekut fam” kont zot par media meynstrim. Anfet, okenn fam pa finn vinn delavan avek enn temwanyaz vyol pu nu ekute. Ni pena okenn evidans forennsik vyol, lor kadav fam nonpli. Ni pena okenn temwin. Li posib, probableman finn ena ka vyol, me pena ditu okenn indikasyon lor vyol an-band uswa enn itilizasyon sistemik vyol kuma politisyin Israelyin e Amerikin ek media pe alege.
Aster, semenn pase, enn lot surs alegasyon vyol depi enn surs pli serye ki ZAKA, uswa mem pli serye ki New York Times, finn retrakte, finn met aryer lor so steytmennt presedan. “Physicians for Human Rights Israel” (PHRI), sirtu dan so dokiman “priz-pozisyon” 12-paz an Novam 2023 alege komkwa vyol finn servi kuma enn zarm deger. Asterla, PHRI finn exprim “regre” akoz zot finn pibliye temwanyaz “konteste” uswa seki “konsidere inverifyab”, dan enn adenndum a zot dokiman priz-pozisyon.“Nu regrete finn inklir zot dan nu priz-pozisyon.” Zot erer, zot dir, ti akoz “enn kantite sibstansyel linformasyon ena zordi pa ti aksesib dan moman kan sa dokiman ti pe drafte” (an Novam).
Ziska avoka Morisyin Pramila Patten, ki finn rediz Rapor UN ki LALIT e plizyer lezot finn kritike akoz li fer bann alegasyon vyol san okenn prev e kumsa li azute dan zwe propagann Israelyin, finn, limem retir li depi enn brifing Konsey Sekirite UN kot li ti sipoze “orater prinsipal”, Zedi semenn dernye, le 16 Me. The Times of Israel dan enn lartik raporte “Reprezantan spesyal UN lor vyolans sexyel dan zonn konfli Pramila Patten finn retir li depi enn sesyon Konsey Sekirite kot li ti sipoze brif manb lor pran otaz par Hamas le 7 Oktob”. Li paret li pa ti ule rant dan zwe sa lobi Israelyin-Amerikin, ki ti pus pu sa brifing Konsey Sekirite.
Alor, aster nu pe realize sa seri zistwar makab lor “vyol an-band” finn invante, parey kuma dekapitasyon tibaba e tibaba kwi dan fur zot tu ti invansyon, fabrikasyon.
Asterla finn etabli dan Israel kimanyer buku parmi lamor akoz brilir finn koze par IDF so kont-ofansiv kan servi misil dife-lanfer, e ena parmi mor par fiziyad depi tenk artilri IDF. Sif nonb lamor finn redwir par IDF depi 1,400 a 1,139. Ladan, ena otur 400 solda, ofisye lapolis e gard sekirite. Leres, 695, zot ti sivil Israelyin. Leres seki reste ti laburer migran lot pei. Tu sa lamor la indike finn ena krim deger prima facie lor enn gran lesel le 7 Oktob. Zot merit enn investigasyon e prosedir zidisyer.
Me, seki nu bizin note se ni veritab krim deger ni alegasyon orib invante tibaba dekapite e vyol an-band le 7 Oktob napa enn exkiz pu komet ankor krim deger an revans, ni, evidaman, pa enn exkiz pu komet krim zenosid. Pena okenn exkiz pu komet zenosid.
E lerla, Ki pe sey Kasyet deryer Alegasyon Orib
Alegasyon orib lor dekapitasyon tibaba, kwi tibaba dan fur, e vyol an-band fam, ena enn dezyem itilite.
Zot deform listwar 7 Oktob e lerla sa asontur deform sinifikasyon mo “7 Oktob” pu ule dir inikman krim deger inn komet, e samem tu, aret lamem. Zistwar makab par expre viz pu deturn latansyon depi sa lur defet militer Israel e so larme oto-deklare invinsib finn sibir. Alor, alegasyon orib finn invante pu de rezon: pu zistifye fitir krim inklir zenosid, e pu maske imilyasyon total Larme Lokipasyon Israelyin, Israeli Occupation Forces (IOF).
Israel desid pu kasyet defet IDF le 7 Oktob atraver pretann li ti enn lot zafer. An realite, konbatan Hamas ek lezot grup rezistans arme finn infliz enn defet sever, inatandi, san presedan, imilyan lor IDF. Tu sa vantar IDF vantar fer zot totalman onte. Sa li konpreansib. Kifer USA inklir so prezidan nek swiv kuma lake deryer sa postir absird buku pli konplike ki sa. E kifer media oksidantal santi li bizin swiv lake Biden ankor plis sokan.
Tutfason samem kifer Israelyin, politisyin dan Loksidan, e media meynstrim refiz kanaliz okenn linformasyon kot sitye kontex. Li form parti dan kasyet defet Israelyin.
Grup rezistans arme anfet briz sa Miray Israelyin invinsib otur Gaza – avek tu so arsenal kamera otomatik ek fizi otomatik ki tire lor tu seki buze - e zot finn fer bres dan 60 diferan plas. Dan SWASANT plas diferan. LALIT, avan nu ti pe dir ti fer 30 bres dan miray la, e nu ti panse li ti buku. Asterla, nu pe lir anfet ti fer bres dan 60 plas. Tu le onz baz militer instale pu vey miray kan konsantrasyon Gaza, finn vinn inservyab. Lizye ek zorey sistem inn detrir. Iron dome – sa dom proteksyon Israel kont roket – finn usi dezaktive par enn vole kut ti roket ki ti tro lur pu dom la kontrole. Hamas ek so alye finn tuy par santenn solda Israelyin – 373 solda Larme Lokipasyon Israelyin ek lezot gard sekirite – dapre sif sekirite sosyal. Zot finn usi pran solda prizonye. Ala bi militer Hamas ek lezot grup rezistans arme: pu fer bres dan miray aparteid, e pu pran otaz, pu permet zot ena enn fason pu negosye liberasyon par milye prizonye Palestinyin – preske totalite anprizone ilegalman dan prizon Israelyin – e inklir fam ek zanfan. Zot finn reysi dan zot bi militer.
E lerla, apartir kumans gayn bres dan miray, e li uver kuma enn bwat sardinn dan 60 diferan plas, tu baryer sekirite inn efrondre, seki arive se tu ek ninport kisannla anprizone dan Gaza ti kapav enn sel kut sorti!
Ena dimunn ti ule al get later zot granparan. Zot finn rantre apye galupe, par bisiklet, par motosiklet e tu finn rantre san okenn obstriksyon.
Lezot, manb aktif dan gang – parey kuma ena gang partu, Gaza, usi ena gang – ti ule al fer piyaz laba sirman. Alor, li ti vinn akse lib pu tu.
Alor, sa 7 Oktob la ti trwa zafer.
1. Li ti enn defet, de pwindevi militer, pu larme zean Israelyin. E li ti enn viktwar militer pu lafors rezistans Palestinyin. Zot stratezi militer, viktorye le 7 Oktob, ti pran nesans apre manifestasyon pasifik kont Miray ki ti atake avek vyolans par Larme Lokipasyon Israelyin. Ant Mars 2018 ek Desam 2019, muvman Gran Lamars Retur ti enn muvman demas pasifik pu sinboliz drwa retur lor later abitan Gaza ti viv avan Nakba 1948, kan ti derasinn zot par lafors ver Gaza, e anferm zot laba. Fami antye, zanfan, marsan sorbe, zenes a-bisiklet, vye bonnfam, tu zwenn dan Gran Lamars Retur. Li ti premye gran muvman demas apre instor leta desyez lor Gaza an 2005. Nu manb, Ragini Kistnasamy finn sey al Gaza dan Gaza Freedom March an 2009, me lotorite Ezipsyin inn anpes zot rantre. Alor, nu kone degre ermetik sa syez la ti ete. Ariv 7 Oktob 2023, Gaza inn su enn leta desyez pandan18 banane. Zanfan galupe sorti andeor Gaza pu rant dan Israel, ti ant laz 18-an uswa mwins, finn ne dan sa kan konsantrasyon apel Gaza.
Alor, an 2018-19, ti ena enn seri manifestasyon zwaye ek festiv avek servolan ek kalaminndas. E lerla Larme Lokipasyon Israelyin reponn par tire avek bal, minisyon reel. Pa mwins. Vinn koz lor barbari. Larme Israelyin tuy 214 Palestinyin, parmi ena 46 zanfan. Zot bles plis ki 36,000, parmi ena 800 zanfan. Larme tire lor sirtu dimunn andikape dan sez-rulant, lor ners e lor zurnalist. Tu ti target par expre.
E alor, ki Palestinyin dan Gaza ti reste pu fer?
Zom dan Hamas ek lezot grup rezistans opte, an sekre, anba nene tu kamera pe obzerv zot depi sa Miray la, pu prepare pu enn lalit arme, enn long ek dir batay kont Israelyin arme-par-Amerikin. Leta Israelyin kwar li ena total “linformasyon” atraver so espyon ek informater peye antye dan Gaza. Me, li finn dekuyone. Sa pwisan larme Israelyin, invinsib kuma li ete, finn depase ek “dezarme” par lintelizans enn band zenn-om arme avek zarm fabrike alamin, prodir dan tinel. Israelyin ti ena pu kasyet sa defet la.
Alor, pu kasyet sa laont, sa imilyasyon, sa defet militer terib IOF inn sibir, propagandist Israelyin finn swazir opsyon pu invant tu sa zistwar makab lor tibaba dekapite ek vyol an-band. Ninport kwa pu sanz size depi sa imilyasyon larme plis macho dan lemond: sa larme Israelyin.
2. Le 7 Oktob ti, anplis, de sa defet militer pu Israel, lye krim deger. Ena dimunn ki finn rantre depi Gaza finn pran prizonye san disernman, lezot finn tuy sivil indistinkteman. Tu pu bizin fer investigasyon pu kapav sitye responsabilite, e met sarz. Nu pa bizin enn long sesyon lor sa but dan “7 Oktob” akoz li seki CNN, BBC, RFI, Washington Post, The Guardian, san mansyone tu media dedrwat, finn fer sa vinn totalite sinifikasyon 7 Oktob. Li byin dokimante.
3. Le7 Oktob ti, usi, enn form “evade depi prizon” kot par milye dimunn ordiner finn travers miray kan konsantrasyon dan lekel zot ti anprizone par Israel pandan preske 20 banane. E, li ti plis ki sa. Dimunn ti, pu premye fwa dan zot lavi, si zot ti mwins ki 75-an, pu truv later, laferm e tu vilaz depi kot zot fami ti expilse par lafors an 1948. Alor, li ti enn evazyon prizon pa ordiner.
Konklizyon
Depi listwar, dat 7 Oktob 1944 li asosye avek enn lot rebelyon parmi prizonye enn lot kan konsantrasyon, mazorite parmi ti depi kominote Zwif.
Li enn sulevman kont gard Nazi dan Auschwitz-Birkenau Sonderkommando. Alor, dat 7 Oktob ti deza inportan dan listwar.“Bann Alman inn reprim sa sulevman. Preske 250 prizonye mor,” e ena gard usi inn mor. “pandan pe mat sa rebelyon la, e bann gard ti fizye enn lot 200 apre finn reprim sa mitinnri la. Plizyer zur apre, SS [para-militer Nazi] inn idantifye 4 fam prizonye kominote Zwif ki ti inplike dan furni explozif pu exploz krematwar la. Tule kat fam inn exekite” – Holocaust Encyclopedia. Anfet, seki sa kat fam la ti partisipe, se pandan plizyer mwa, zot ti pe kokin lapud kanon e amenn li andan Kan pu permet prizonye ki ti pe prepar sa plan pu eklat sa krematwar ki zot ti pe aranze atraver zot fer travo forse. Fam prizonye ti apel Rosa Robota, Ella Gertner, Ester Weisblum ek Regina Safirstein. Ti pandi zot divan lezot prizonye dan kan fam. Kan planse lesafo uver, enn fam parmi, Rosa Robota 23-an, kriye: “Res for ek kuraze!”
Alor, lepep Palestinyin swiv lor sa tras marke par sa bann prizonye kuraze avan zot.
Lindsey Collen, pu LALIT. 22 Me 2024
Tradiksyon: BK avek kudme AA
