Solidarite avek Lepep Palestinn; Enn etidyan rakont lor okipasyon kanpes LSE dan Lond
19.05.2024
Nu pe pibliye temwanyaz ki enn etidyan London School of Economics (LSE) finn avoy LALIT konsernan okipasyon kanpes LSE par etidyan. Protestasyon la kont lyin ki LSE ena avek Leta Israel dan enn moman kot Israel responsab pu zenosid anver lepep Palestinn.
Temwanyaz
“Nounn koumans enn okipasion dan enn batiman LSE depi Mardi. Apepre enn 80 zelev inn pran kontrol enn parti batiman la.
Liniversite pe permet nou res la pou linstan, sou sertin kondision. Zot pann apel lapolis, ek nou pe zis bizin deal avek guard dan batiman la; bann gard ase korek antan ki dimounn, mem si zot reprezant institision la. Alor batiman la ouver, zot pe les nou rantre sorti, ek lezot zelev/profeser pe servi batiman, apart sa parti ki sou okipasion.
Pa mal zelev pe vinn tyek okipasion la toulezour, ofer zot sipor, vinn partisip a bann ti event nou pe organize.
Toulezour gramatin ek tanto ena bann meeting zeneral, dan enn tradision anarsis ki swiv inpe muvman ‘occupy’, kot zot tou koze, pran desizion lamem, ek pandan lazourne ena bann renyon ant bann pli tipti group. Mo pe trouv radikalizasion ennta zenn devan mo lizie.
Okipasion la pou evolye bien probab dan bann zour ki vini, vi ki management Liniversite pa pe aksepte nou bann demann, ek ena enn tandans radikal ase for ki alatet okipasion la.”
