Zenosid Blog 43 – Kan Rezistans Palestinyin Fraktir LOTAN [NATO]
14.05.2024
Rezistans Palestinn dan totalite Palestinn, e partu atraver lemond, tu ansam finn batir ase lavaper pu eklat LOTAN an trwa diferan kan.
USA pa finn futi gard lalyans militer LOTAN kuma enn sel blok.
Lasanble Zeneral Nasyon Zini semenn dernye [Vandredi 10 Me 2024] inn vot rezolisyon lor eski pu aksepte Palestinn kuma enn leta manb dan Nasyon Zini, mem si li pu selman dan laform. Pei manb LOTAN inn vot dan trwa fason disperse. Lor 32 manb dan LOTAN, preske lamwatye inn vot WI anfaver rekonet Palestinn, byin tigit inn vot NON, e preske lamwatye inn ABSTENIR. (Sif baze lor enn kalkil rapid ki mo finn fer. Mo finn pran lalist pei zot vot dan sa trwa diferan fason la ek konpar li avek lalist pei manb dan LOTAN. Si kikenn truv kit erer, fer nu kone, e nu duble chek kalkil la!)
WI – 15 Pei LOTAN Vot PU Rekonet Palestinn
Lafrans - France
Lagres - Greece
Lapoloyn - Poland
Latirki - Turkey
Portigal - Portugal
Belzik - Belgium
Estoni - Estonia
Island - Iceland
Luxanbur - Luxembourg
Sloveni - Slovenia
Montenegro - Montenegro
Slovaki - Slovakia
Norvez -Norway
Dennmark - Denmark
Lespayn - Spain
NON – 3 Pei LOTAN Vot pu PA Rekonet Palestinn
USA - USA
Laongri - Hungary
Repiblik Chek- Czech Republic
ABSTENIR – 14 Pei LOTAN inn vot ABSTANSYON
Lalmayn - Germany
Albani - Albania
Latvya - Latvia
Kanada - Canada
Finnlenn - Finland
Krwasi - Croatia
Bilgari - Bulgaria
Litali - Italy
Litwani - Lithuania
Laoland - Netherlands
Masedoni - Macedonia
Rumani - Romania
UK - UK
Laswed - Sweden
USA retruv li izole. Zis Laongri ek Repiblik Chek inn vot parey kuma sef LOTAN, USA. USA, limem, ena puvwar diktatoryal dan LOTAN. Nu pu rapel Laongri ti enn parmi trwa pei ki ti vot ansam avek UK ek USA kont dekolonizasyon Moris setadir pu UK-USA kit Chagos, inklir Diego Garcia.
Lalyans militer AUKUS [baze lor sa trwa pei la zot nom an Angle: Australia, UK and US ]– Lostrali, UK ek USA, li usi finn fraktire apre sa vot Lasanble Zeneral Nasyon Zini. Ena zis trwa pei zot lafors militer dan sa lalyans la, e sakenn sa trwa pei dan sa lalyans la inn vot diferan lor Palestinn. Lostrali inn vot WI, UK inn ABSTENIR ek USA inn vot NON.
Ala kuma lanpir USA pe kumans destabiliz limem, amezir USA sutenir zenosid Israel kont lepep Palestinyin li pe deplizanpli expoze divan lemond antye.
Alor, presyon popiler onivo mondyal pe sutenir Palestinn, bizin kontinye apiy presyon! Nu fer nu mye pu met presyon lor nu Guvernman.
Lepep Palestinn, sirtu dan Gaza, me usi dan West Bank inklir Zerizalem, osi byin par milyon refizye andeor Palestinn, finn ase sufer. Kan mo pe ekrir, larme Israelyin pe bonbard Rafah, dan Lesid, akot sa mem larme la finn fors par santenn milye popilasyon pu sove, e pe bonbard Kan Refizye Jabalia pu enyem fwa dan Lenor. Gaza City, usi, pe bonbarde kan nu blog pe pibliye.
Bonbardman Israel bizin arete tutswit. Pilonaz bizin arete tutswit. Deplasman, e atrup ek lasas imin, bizin arete tutswit. Bizin aret tu livrezon bom ek minisyon ek avyon militer USA a Israel. Fode pa zis enn sispansyon, me bizin arete net. Faminn intansyonel orkestre par Israel kont Palestinyin bizin arete. Guvernman USA e Guvernman Lerop bizin pran kont lopinyon zot popilasyon, sirtu zenn popilasyon. Bizin boykot Israel, dezinvesti depi Israel e met sanksyon e enn anbargo lor zarm. Rezim Aparteid Israel bizin met fin a so Aparteid. Demokrasi ek egalite bizin reyne. Kolonizasyon Palestinn bizin arete e bizin ranverse. Bizin purswiv lider Israelyin divan Lakur dan Lakur Kriminel Internasyonal. Pei Eropein furniser zarm, finansman ek baking zeopolitik bizin vinn rann kont lor zot konplisite.
Guvernman Pravind Jugnauth bizin piblikman exprim sutyin avek ka Sid Afrik kont Israel lor sarz zenosid. Guvernman Moris bizin batir enn koalisyon pei Afrikin dan Linyon Afrikin pu sutenir ka Sid Afrik kont Israel lor sarz zenosid.
Lindsey Collen pu LALIT.
Dimans 12 Me 2024
Tradiksyon: BK avek kudme AA
