REBELYON ETIDYAN LINIVERSITE dan MUVMAN ENCAMPMENT KONT ZENOSID PALESTINYIN PAR LETA ISRAEL
10.05.2024
Ena enn eskalasyon konfrontasyon depi plizir semenn aster ki protestasyon etidyan pe pran diferan form depi encampment onivo mondyal. Finn ena 129 liniversite Amerikin, 2 dan Lafrans, enn dan Litali, Irland, Laswis, Norway, 17 dan Kanada, 2 dan Lespaynn , Loaland, Danemark, Sid Afrik, Lenn, Tirki. Tinizi, Mekzik, Arzantinn. Costa Rica, Brezil, Kiba, Bangladesh, Lezip, Liban, Zordani, Kuwet, ziska Zapon, Nuvel Zeland, Peyi-Ba, 3 dan Lostrali ki finn rant dan sa muvman la. Lalit la inn vinn internasyonal. Etidyan pe proteste atraver 219 aksyon solidarite, ena plis ki 44 sayt kot finn ena represyon lapolis, plis ki 2634 arestasyon ek 31 peyi ki pe ekprim zot solidarite https://www.palestineiseverywhere.com/ avek etidyan an muvman kont zenosid dan Gaza.
Depi Mardi 7 Me, kan Israel finn kumans bombard Rafah, enn vag encampment etidyan finn kumans organize dan 12 liniversite dan Grand Bretaynn ki inklir liniversite Manchester, Warwick, Newscastle, Leeds, Sheffield, Cambridge, UCL ki inspire depi encampment solidarite Palestinn depi Lamerik. Nu rapel ki depi Oktob 2023, tule Samdi par milye dimunn finn manifeste lor simin pa zis dan Langleter me inpe partu dan Lemond. Buku inn fini vinn konsyan ki manifestasyon pa ase. Zot pe desid pu pran aksyon konkre. Etidyan organize lor kanpis pe dimann sese-lefe dan Gaza, dimann ki tu liniversite bizin kup lyen avek konpayni armaman, miltinasyonal, labank ki direkteman u indirekteman lye a sa masinn lager inperyalis. Personn pa bizin fer profi depi enn zenosid.
Avek deklin dan sistem kapitalis, etidyan denons usi lefet ki plizir liniversite lor simin fer fayit, finn ena plizir departman, kur ferme ek met travayer deor. Travayer finn milite pu dimann ogmantasyon lapey ek meyer kondisyon depi plizir lane. Etidyan ankor pe pey fre ekzorbitan pu gaynn akse a ledikasyon iniversiter ek lwaye lor kanpis. Sa muvman la pe usi dimande kot sa kas la pe ale? Uver liv kont pu zelev ek staf kapav gaynn repons. Rishi Sunak pe zwenn avek diferan vis-sanselye liniversite pu diskit lamonte seki li apel “anti-semitism” lor kanpis .
Nu rapel ki Revolisyoner Ris Vladimir Lenin, ti definir rol Leta dan “Leta ek Revolisyon” kuma enn larme zom ek fam ki mintenir reynn enn klas lor enn lot. Dan peyi ki sinbol kapitalism, Leta pe protez dominasyon klas dirizan milyarder kont lintere klas travayer ki usi inklir etidyan.
Muvman etidyan pe chalenj siport zot Leta a Israel. Etan done ki Leta Israel li enn lyen kle dan dominasyon inperyalist dan lemond, dirizan Leta Zini pe donn lord zot Leta pu servi represyon kont lamas dimunn ki pe lev zot lavwa kan pe defiye zot reynn kriyel. Pandan 7 mwa, etidyan ki finn organize dan encampment finn get Leta Israel komet zenosid an direk. Zurnalis kuraze depi Gaza finn riske zot lavi pu fer lemond kone ki zenosid pe arive dan Palestinn. Ek Leta Israel pa finn respekte okenn lalwa drwa imin, okenn lalwa internasyonal ek mem pa zizman ICJ, li sible ek servi so zarm de-pwint pu asasinn zot.
Atraver rezo sosyo. etidyan finn geet kuma Guvernman Lamerik sirtu avek konplisite lezot Leta kuma Lafrans, Langleter finn arm Israel ek furni sipor politik, diplomatik ek lozistik konplis dan zenosid Pep Palestinyin. 7 mwa ek 3 zur pli tar, Leta Israel ek so konplis fini masakre plis ki 34,904 dimunn -lamwatye ladan zanfan, 78,514 finn blese ek nepli ena rekur a lopital ki preske totalite fini kolaps. Lekip staf medikal finn res lor zot pos ziska dernye moman bonbardman ek invazyon larme IDF pu donn swin blese lager. Larme Israel pa finn ena okenn pitye, pa finn respekte lopital ek dimunn finn truv sa 2 fos kominn divan lopital dan Gaza kot finn dekuver lekor pasyan ki ti pe gaynn swin dan lopital. Sa se enn krim deger.
Zordi dimunn ki reflesi truv sa evidans ki li nepli normal pu res trankil, bizin montre seki limanite ankor ete, zot pe swazir rekur zot ena par imit kondisyon refizye Gaza dan Rafah dan zot lantant, pu ekprim ek azir an solidarite. Li enn fason pu avoy mesaz lot kote lemond pu dir Palestinyin zot sufrans usi nu sufrans, zot konba kont lokipasyon usi nu konba kont lokipasyon.
Muvman etidyan zordi pe amenn lespwar kan zot pe met lor azanda politik internasyonal ki bizin viz pu lite pu kontrol demokratik lor finansman liniversite par etidyan ek travayer, ki ena lintere pu rul liniversite dan lintere mazorite sosyete. Etidyan tusel pa pu kapav aret sa zenosid la. Klas travayer ini avek parti sosyalis revolisyoner deryer enn program revolisyoner ki pu kapav aret ek ranvers masinn deger inperyalist. Akoz sa muvman etidyan encampment pro-Palestinyin pe fer lapel pu fann encampment partu, dan tu sayt travayer, pu sutenir sa lalit la.
Epdeyt 9 Me 2024: par Cindy Clelie
