Zenosid Blog 42 – Mobilizasyon demas kont Biden pe kumans ena lefe
10.05.2024
Ekut seki Prezidan Biden so Sekreter Deta Anthony Blinken inn dir kuma inn raporte dan lagazet The Independent dan kumansman sa semenn la. Ala sitasyon dan gro tit lartik la, “Blinken blam TikTok ek Sosyalmedia akoz zot pe deranz Israel so Naratif lor Lager dan Gaza”. Blinken dir “Kifer Hamas inn disparet dan persepsyon piblik? Ena enn lof lor latab pu enn sese-lefe e lerla lemond pe irle kont Israel.”
Omwin Blinken pe realize “lemond” pe irle kont Israel. Finalman.
Me, seki li ule dir se zenosid kont popilasyon Palestinn li totalman lafot gran muv Hamas, e lemond pe “irle” ek pe blam pov tipti Israel, eternel viktim, mem kan Israel pe perpetre enn zenosid plozib, dapre ICJ. Interdiksyon TikTok pu, dapre Blinken, ede pu anpes lemond blam Israel pu so zenosid li pe perpetre! Me blam Hamas inpe feb, kuma argiman. Hamas ena minisyon fabrike alamin, li pena tenk, li pena avyon, li pena larme, li pena erfors, li pena misil telegide. Israel ena, limem li flate, larme plis sofistike dan lemond, sir-arme par USA alarezon plizyer milyar dolar par lane e sirveyans telman pwisans ki li “inprenab”.
E lerla, apre mo finn fek lir sa lartik The Independent la , literalman enn-de lertan apre li finn pibliye, Hamas inn aksepte lof lor latab atraver intermedyer depi Katar ek Lezip an prezans sef espyon USA e sef CIA William Burns.
Alor, asterla, ki exkiz USA, Misye Blinken? Nepli kapav blam Hamas asterla, pa vre? Akoz zot pa finn aksepte lof lor latab?
Israel e USA tulede inn kumans azite.
Blam Hamas nepli enn opsyon pu USA. Zame li pa ti enn opsyon, nonpli. Me asterla Blinken kone tu dimunn kone li nepli enn opsyon.
Purtan, li persiste avek zenosid? Li avek so Prezidan Biden? E ankor tuzur pena enn Rezolisyon Konsey Sekirite Nasyon Zini? Ankor tuzur pankor kup led militer ek lezot led? Tuzur pankor met sanksyon kont Israel? Ankor tuzur pena anbargo lor Israel? Ankor mam-kole avek zenosid? Ankor tuzur pe aret etidyan Amerikin ki pe opoz zenosid? Avek plis ki 2,000 arestasyon? Ankor tuzur so bann ofisye lapolis pe buskil e zet vye bonnfam anba, pu sinp rezon zot pe sey protez zot etidyan ki pe proteste kont enn zenosid avek lekel zot pa ule et konplis?
USA so rezim maryonet, Israel, li enn maryonet ki pretann li indepandan kumadir enn zar “Frankenstein” inkontrolab, lerla li vinn debit enn exkiz bidon lor kimanyer komkwa Hamas finn donn enn “risponns” e Hamas pa finn “aksepte” diyl ena lor latab. Israel inn redwir a zwe avek bann mo pu kasyet so bann krim, asterla finn al delavan e finn pran kontrol lor Rafah Crossing, limem, aret tu kamyon ki pas par sa Krosing la, e kumans bonbard Rafah pu pena ni manze, ni karbiran pu pirifye dilo kapav rant dan Gaza. Depi Dimans enn kamyon pa finn resi rantre. Depi avantyer, setadir Merkredi 6 Me, finn ena enn lord pu evakye. Larme Israel inn fors 100,000 Palestinyin dan Gaza pu deplase depi sa mem plas Israel inn deza fors zot pu ale avan. Israel pe persiste lasas-atrup popilasyon komsidire zot trupo bef. Leta Israelyin Sadik e so solda deplizanpli sadik pe par lafors fer refizye revinn refizye, re-ankor e re-re-ankor.
Trwa-kar tu lozman Palestinyin finn detrir. De-tyer tu lekol finn detrir. Tule 12 Liniversite finn detrir. Finn ena omwin 435 atak lor infrastriktir lasante uswa kont travayer lasante dan Gaza lor sa sis mwa konfli ant 7 Oktob 2023 ek kumansman Avril, WHO [World Health Organisation] pe dir. Ena zis 3 lor 36 lopital, e zot pe zis kapav ofer enn servis restrin. Tusala zot krim deger, e zot indikater enn zenosid.
Sa deplasman konstan lansanb popilasyon li, par limem, enn siyn zenosid.
Lanpler fos-kominn dan lakur Lopital Nasser ek Lopital Al Shifa ankor enn lot siyn krim deger, e prev zenosid. Parmi seki finn antere – trwa-met anba later, kan fos-kominn ti sipoze pa profon pu permet idantifye lekor apre e, kot posib, kapav fer rit mortyer selon kutim – parmi lekor detere ena zot lame atase avek menot-zip deryer zot ledo e finn fizye zot abu-portan. Ena lekor parmi ti ankor ena tib serom lopital fixe ar zot. Ena paret finn antere vivan.
Si nu extrapole depi UNICEF so sif ziska Zanvye, ena apepre 2,000 zanfan finn perdi enn uswa de lipye uswa lazam. Sa kalite ditor intansyonel konstitye enn zenosid par larme lokipasyon, Israel. Israel kuma enn puvwar lokipasyon, ena enn devwar legal pu okip popilasyon li pe okipe.
E asterla Israelyin pe inpoz enn faminn demas profon. Zanfan Palestinyin, deza pati, pe asterla expoze par enn faminn orkestre, delibere.
Finalman ZORDI [Merkredi], USA inn kumans reazir. Reuters ek Associated Press inn anons fwit dan kumansman otur enn “dele” lerla “enn sispansyon” dan livrezon bom USA ek lezot minisyon a Israel. Si fwit konfirme, finalman. Me li selma “enn sispansyon”.
Ala kimanyer Al Jazeera, sel media meynstrim fyab, rezim sa seri fwit la:
“Azans depres AFP, Associated Press ek Reuters Mardi finn raporte depi surs ofisyel anonim USA kot zot pe dir USA inn kumans ‘byin evalye tu transfer potansyel sertin kalite armaman a Israel ki kapav servi dan Rafa’ an Avril kan li pe paret Israel ti pre pu al pran enn desizyon lor atak Rafa. Alaswit sa evalyasyon la, nu finn sispann enn livrezon zarm semenn dernye. Li konsern 1,800 bom 2,000-liv (900 kilo) ek 1,700 bom 500-liv (225 kilo),’ surs ofisyel la finn dir.
“ ‘Nu sirtu fokes lor kimanyer pe servi tu sa 2,000-liv bom e so linpak zot kapav ena dan enn amenazman irbin kot ena enn popilasyon dans kuma nu finn truve dan lezot parti Gaza. Nu pankor pran enn desizyon final lor kimanyer nu pu prosede avek sa livrezon la,’ sitasyon depi seki enn ofisyel inn dir. Azans depres dir zot surs ofisyel finn koz lor kondisyon li res anonim akoz li konsern enn isyu sansib.
“Reuters raporte ena kat surs inn dir livrezon kargo, retarde pu omwin de semenn, inklir Joint Direct Attack Munitions (JDAMs)fabrike par konpayni Boeing. JDAMs zot mont enn sistem gidon presizyon lor bom, e lor Bom Ti Dyamet [An Angle:Small Diameter Bombs].
“Site depi surs ofisyel anonim, lagazet Wall Street Journal raporte boner Mardi komkwa USA finn enn retard livrezon kargo apepre 6,500 JDAMs.”
Klerman sa konbinezon lopozisyon guvernman dan lemond antye andeor lalyans Oksidantal NATO e alye militer, tu sa rapor Sekreter Deta resevwar depi anbasader Amerikin dan lemond lor kimanyer sutyin pe retresi e kondanasyon pe agrandi lor aksyon Israel, zizman Lakur Internasyonal Lazistis zize Israel pe komet enn zenosid “plozib”, lopinyon de-tyer Amerikin dapre sondaz pa dakor ek Biden so manyer pe diyl avek Israel ek Gaza, e manifestasyon agrandisan etidyan lor plis ki 200 kanpes Amerikin, e ansam avek sa priz konsyans Muvman Uvriye Amerikin, enn zean anterm so potansyel puvwar, Prezidan Biden nepli kapav kontinye furni zarm, finans e donn kuvertir diplomatik a sa zenosid la. Sa montre nu kimanyer sak presyon kamem komye tipti inportan ek fer enn diferans, e kan met tu diferan kalite presyon ansam, li kumans ena so lefe. Plis presyon vinn for, pli bon.
E rapel, pe ena presyon depi lot flan. Ena lobi biznes mondyal, inklir lobi zarm, ek lindistri liye. Lobi AIPAC (American Israel Public Affairs Committee) limem prinsipal “interferer elektoral” etranze dan USA. KretyinZionist, suvan zot anti-semitik e zot usi Zionist, reprezant enn gro blok elektoral. E asterla 12 Senater Amerikin finn ekrir enn let lor papye lantet Sena kot zot menas Lakur Internasyonal Kriminel [International Criminal Court – ICC] kont posib arestasyon Netanyahu uswa so bann akolit. (get nu Seksyon Documents pu lir let inkrwayab an format pdf ek jpg. Li zis enn paz e byin vo lapenn lir li. Let la finn pibliye par Zeteo, enn nuvo sayt nuvel dirize par zurnalist debater ek prezantater byin koni, Mehdi Hasan.)
Lindsey Collen, pu LALIT. Merkredi 8 Me 2024
Tradiksyon: BK avek kudme AA
