REBELYON ETIDYAN LINIVERSITE DAN USA (AVEK TAYMLAYN)
07.05.2024
PROTESTASYON KONT ZENOSID PALESTINYIN PAR LETA ISRAEL
Fer 3 semenn depi ki muvman etidyan kont zenosid dan Palestinn finn leve sirtu dan Leta Zini kont Leta Israel e pe fane partu dan lemond dan Lafrans, Arzantinn, Litali, Latirki, Gran Bretayn, Finland, Irland. Seki komin anterm revandikasyon seki protestater Pro-Palestinyin finn dimann enn sese-lefe dan Gaza, de-investisman depi zot liniversite avek konpani ki liye avek Israel, ek dimann Guvernman pu pran mezir irzan ek konkre pu aret lager dan Gaza. Reaksyon represif ki finn kumanse par administrater Liniversite Columbia pu ki lapolis demantel “encampment” lor kanpis dan New York City finn fer ki solidarite ek rezistans par etidyan finn vinn enn muvman internasyonalis. Enn protestasyon imans pu denons sa lamonte ofansif leta represif Israelyin ki responsab pu asasina plis ki 34,000 Palestinyin, lamwatye ladan zanfan.
Valer dizur ena otur 140 kanpis ki pe reziste kont zenosid Leta Israel lor pep Palestinyin dan Gaza.
Reaksyon depi ladministrasyon iniversiter, Biden ek Macron, se pu reprim etidyan ki dan encampement ki pe manifeste. Guvernman inperyalis pena okenn lintansyon aret bonbardman, me okontrer permet bonbardman dan Rafah. Ladministrasyon plizir iniversite servi pretex pran mezir neseser pu protez sekirite zot kominote iniversiter pu met anplas aksyon legal, sanz regleman lor manifestasyon dan enn fason abitrer, pran aksyon disipliner kont etidyan, sirveyans pozisyon lor rezo sosyo, met blam lor etidyan ki zot anti-semit, sispansyon ziska arestasyon, servi vyolans atraver matrak, teaser kont etidyan, menas anprizonman, met “sarz felony”, permet manifestan pro-Israelyin lor kanpis pu vinn atak etidyan ki dan encampment, servi bal kaotsu ek menas fer apel a larme militer. Zot dir ki tu zelev ki pe proteste pe fer “trespass”. Muvman mobilizasyon etidyan denons sa repons la kuma enn distraksyon depi zot demand. Zot denons sa lamonte ofansiv represif ki viz pu fer zot res trankil, ki viz pu anpes zot manifeste ek anpes zot fer zot lavwa tande. Zot pe dimande ziska ki pwin pu anpes zot dir non a perpetrasyon zenosid, a ki pwin pu reprim muvman solidarite avek lepep Palestinn.
Avek arestasyon arbitrer plis ki 2500 etidyan liniversite atraver USA, lalit muvman etidyan pe plis radikalize kont inperyalist Amerikin ki pe furni zarm leta Israel pu komet zenosid kont lepep Palestinn.
Cindy Clelie
Pu LALIT
Anu get taym-layn enn pli gran vag aktivism etidyan Amerikin ek Franse apre protestasyson anti-rasis an 2020, muvman anti-lager Vietnam, ek Me 68. Nu pu gete ki aksyon etidyan pe amene an 2024, kuma ladministrasyon ek Leta Polisye pe reazir kont politizasyon ek radikalizasyon muvman etidyan. .
13 Avril-Liniversite Washington dan St Louis, Missouri, etidyan pro-Palestinyin kumans enn sit-in pu proteste lor kanpis. Enn duzenn dimunn arete [ rapor KSDK]..
17 Avril- Zelev Liniversite Columbia finn met dibut enn “enkanpman” lor zot kanpis dan Manatan mem zur ki prezidan liniversite finn dir kongre Amerikin li pu protez etidyan Zwif depi kriz moral antisemit.
18-Avril-plis ki 100 protestater pro-Palestinyin finn arete dan liniversite Columbia apre ki prezidan liniversite, Minouche Shafik, finn dimann lapolis New York pu netway encampement.
21-Avril-Etidyan Kolez Emerson dan Boston, Massachusetts kumans encampment dan lale piblik kanpis....
22-Avril-Lapolis aret par santenn dimunn dan manifestasyon Pro Palestinyin dan Liniversite Yale dan Connecticut (parti lesid Lamerik) ek apre ki Liniversite Columbia finn kansel klas an reaksyon a encampement.
* California State Polytechnic Institute, Humboldt dan Arcata, Kaliforni, etidyan okip Siemens Orl.
*Liniversite New York, manifestan Pro-Palestinian met dibut enn encampment dan plaza liniversite. Ofisye aret 150 manifestan.
*Liniversite Indiana Bloomington dan Indiana, etidyan Pro-Palestinian kumans manifestasyon
23 Avril-Liniversite Minnesota dan Minneapolis, Minnesota, etidyan kumans manifestasyon Pro-Palestinyin ek met dibut encampment. Lapolis aret 9 etidyan mem zur.
*Liniversite Ohio State dan Columbus, Ohio, manifestan Pro-Palestinyin kumans enn manifestasyon ek met latant dan kanpis lekol [ rapor The Columbus Dispatch] Sa lanwit la, lapolis kumans arestayson.
24-Avril- Liniversite Texas, Austin, manifestan pro-Palestinyin kumans planifye enn encampment apre enn manifestasyon lor kanpis. Mem zur lapolis anti-emet charj kont protestater pro-Palestinyin dan Liniversite Texas, dan Austin 57 dimunn arete lor sarz trespass kriminel. Lafors ki finn servi depi lotorite li san presedan ek ena mem kalite represyon lor lezot kanpis. Me tu sarz tonbe kont manifestan pu mank koz-probab [ rapor Austin American-Statesman ],
*Liniversite Sid Kaliforni dan Los Angeles, manifestan pro-Palestinyin gaynn enn klash avek lapolis: ek plis ki 90 dimunn arete.
25-Avril-
*Mike Johnson spiker Lasam Reprezantan Amerikin dekrir kanpis Columbia kuma andeor kontrol ek dimann apel lafors rezerv militer pu ramenn lord.
*Plis ki 100 Etidyan Kolez Emerson dan Boston arete par Lapolis
*56 protestater liniversite Bloomington dan Indiana arete parski zot finn met latant lor kanpis [rapor WRTV]
*Liniversite George Washington dan Washington, DC, etidyan met encampment pro-Palestinyin. Plis ki 250 dimunn-inklir etidyan depi diferan lekol finn zwenn encampment. Pa finn ena okenn arestasyon me owin enn manifestan finn eskorte andeor kanpis par lapolis kanpis, se seki enn reprezantan finn deklare a NBC Washington.
*Liniversite Emory dan Atlanta, Georgia, protestater pro-Palestinyin kumans met dibut enn encampment [raporFox 5 Atlanta]. Lapolis apre sa finn aret enn-duzenn dimunn, 20 ladan etidyan.
* Liniversite Northeastern dan Boston, Massachusetts, protestater pro-Palestinyin kumans manifestasyon [rapor CBS News].
*Liniversite California, Los Angeles (UCLA) kumans enn protestasyon lokipasyon pu proteste kont investisman ladministrasyon liniversite dan Israel. Enn lokipasyon ki etidyan finn apel Palestinn Solidarite Encampment. Encampment la finn atake a diferan repriz par kont-manifestan ki finn amenn klash.
26 Avril-
*Kanpis Auraria dan Denver, Colorado, protestater pro-Palestinyin kumans manifestasyon lor kanpis ki finn amenn diferan ekipman pu akeyir diferan liniveriste dan mem landrwa, Ofisye aret 44 dimunn an koneksyon avek manifestasyon [ rapor KDVR]
*Liniversite State University dan Tempe, Arizona, plizir etidyan ek manb depi piblik met dibut encampment [rapor 12News]. Ofisye aret 72 dimunn mem zur ek so landime. Laplipar ki finn detemir pa afilye avek liniversite.
*Liniversite Nor Kaliforni dan Chapel Hill, protestater pro-Palestinyin kumans manifestasyon lor kanpis.
* Virginia Tech dan Blacksburg, Virginia, protestater pro-Palestinyin met dibut enn encampment.
27 Avril:
* Nomb dimunn arete depas 1000 lor kanpis kan administrater liniversite apel lapolis pu kas encampment depi liniversite Massachusetts (sid-wes Lamerik) ziska Arizona (sid-est).
*Liniversite Northeastern dan Boston, Massachusetts, ofisye Leta aret 98 dimunn inklir 29 zelev ek 6 dimunn ki travayer liniversite [rapor CBS News]
* Liniversite Washington dan St Louis, Missouri, etidyan fer enn lot manifestasyon ek encampment. Ofisye lapolis aret otur 80 dimunn dan sa manifestasyon la, inklir prezidan kandida Green Party Jill Stein [rapor KSDK].
28 Avril-
* Liniversite Kaliforni, Los Angeles (UCLA), protestater pro-Palestinyin rant dan enn klash manifestan pro-Israel apre ki enn grup lobi Israelo Amerikin finn fer enn kont-manifestasyon pre kot encampment protestater pro-Palestinyin.
*Prezidan Emerson College Boston Jay Bernhardt dir ki lekol pa pu pran aksyon disipliner kont zelev ki finn arete [Rapor depi MassLive]
*Virginia Tech dan Blacksburg, Virginia, ofisye lapolis aret plis ki 80 dimunn ki ti inplike dan manifestasyon [raporThe Washington Post] 53 parmi deteni zot etidyan.
29 Avril-
* Fakilte Liniversite Kaliforni (UCLA) organiz enn walkout an solidarite a manifestan. Enn grup 60 kont manifestan sey rant dan encampement ki amenn a enn gro klash. Sekirite ek Ofisye UC anti emet intervenir. Lotorite UCLA deklare ki protestasyon encampment li illegal.
*Liniversite Columbia kumans sispann etidyan aktivis pro-Palestinyin dan encampment.
*Liniversite Minesota dan Minneapolis, protestan eriz enn lot encampment. Lapolis donn lord etidyan pu disperse. [rapor Fox 9]
* Liniversite Texas, Austin, 100 dimunn adisyonel arete an koneksyon a encampment pro-Palestinyin
*Liniversite Tulane dan Nuvo Orlean, Louisiana, pro-Palestinyin kumans proteste lor kanpis. 6 dimunn inklir enn etidyan finn arete.
*Liniversite Virginia Commonwealth dan Richmond, Virginia, etidyan pro-Palestinyin met dibut encampment, so mem tanto, plizir etidyan finn arete par lapolis anti emet ]rapor WRIC]
*City College Harlem, ladireksyon liniversite avoy enn imel menas ek donn lord etidyan kit kanpis akoz zot direncampment met an danze sekirite dimunn lor kanpis ek desid pu ferm labank alimanter pu fer muvman la vinn inpopiler. Malgre menas, lasanble zeneral etidyan vot masivman pu reste ek kontinye encampment ek denons represyon lapolis kuma vre danze.
*Etidyan CUNY Gaza solidarite encampement met delavan 5 demand; de-investisman depi tu konpani konplis ki pe finans kolonizasyon settler ki pe fer zenosid dan Palestinn, boykot esanz akademik avek Israel, dimann drwa retur Palestinyin e liberasyon nasyonal, demilitarize tu kanpis ek fini lyen avek CIA, NYPD e ROTC ek re-met kur gratis ek meyer kondisyon travayer pu staf ek fakilte. Lasanble travayer CUNY vot ek endors 5 demand.
*Liniversite Wisconsin dan Madison, Wisconsin, apre 2 zur manifestasyon, 12 dimunn arete, lapolis deloz encampment kot libreri [rapor ABC News ]
*Liniversite Johns Hopkins dan Baltimore, Maryland, manifestasyon kumanse kan 100 dimunn, parmi etidyan met dibut encampment. Ladministrasyon liniversite dir zot pu permet etidyan kontinye manifeste me pa ant 8er aswar a 10er gramatin. Me Hopkins Justice Collective dir zot pa dakor avek sa kondisyon la [rapor CBS News] Manifestan kanpe lor kanpis so lanwit. Ladministrasyon menas disiplinn akademik ek dir ki trespass li ilegal.
* Lafrans, divan Liniversite Sorbonn, lapolis evakye manifestan
30 Avril
*Etidyan Liniversite Brown dakor pu tir latant an retur ki ena vot depi trustee liniversite pu de-investis depi konpani ki sutenir Israel, ki mark premye form negosyasyon depi muvman protestasyon.
* Sanseslye UCLA Gene Block fer enn lanons ki zot pe ogmant prezans sekirite lor kanpis, tir baryer ki finn mete par manifestan encampment ek pu ena aksyon disipliner, sispansyon ek ekpilsyon etidyan pu zelev, staf ek fakilte ki dan sa aksyon la.
*Protestan Pro Israelyin atak protestan UCLA-Kan-Solidarite-Gaza.
*Liniversite Politeknik Kaliforni, 4 etidyan-zurnalis blese. Lapolis aret par duzenn dimunn dan encampment, zot tir protestater pro-Palestinyin depi batiman ki okipe.
* Liniversite Nor Kaliforni dan Chapel Hill, lapolis aret enn 30tenn manifestan [rapor Axios Raleigh]
* Dan lanwit, par santenn lapolis gayn lord intervenir lor kanpis CUNY e Columbia, servi represyon e aret par 100tenn etidyan ek profeser.
*Liniversite Ohio, lapolis aret 40 dimunn konekte a manifestasyon lor kanpis -depi ler lamwatye dimunn ki finn arete ti afilye a liniversite.
* Dan liniversite California State Polytechnic, lapolis aret apepre 35 dimunn apre ki manifestan pro-Palestinyin finn barikad zot dan biro Dean.
*Liniversite Kaliforni, Los Angeles, atak lor enn encampment lor kanpis aswar ki dekrir kuma enn “assault ki menas lavi”. Ladministrasyon finn kansel klas akoz par vyolans par Royce Quad.
*Dan City College New York, New York City, plis ki 170 manifestan arete lor kanpis aswar dapre NYPD.
30 Avril
Lafrans etidiyan Sciences Po Toulouse finn rasanble apre lapel lorganizasyon lekol Le Souffle et Révolte Décoloniale pu denons zenosid dan Palestinn ek revandik ki aret partenarya ant Syans Po ek liniveriste Israelyen.
1 Me –
* Lor kanpis Liniversite Columbia, New York City, boner gramatin, enn grup pro-Israelyin sorti andeor kanpis, sarye pavyon Israelyin ek atak latant ek etidyan protestan pro-Palestinyin avek baton, ros, feray, tir fe-artifis15 dimunn blese, 1 hospitalize. Etidyan ki pe azir kuma zurnalis pu Daily Bruin dir finn sible zot ek bat zot. Temwin dir ki lapolis Los Angeles finn intervenir 4er tan pli tar, dir disperse sinon pu ena arestasyon a plis ki 1000 dimunn ki finn antur encampment an solidarite. Lapolis finn aret par duzenn manifestan pro-Palestinyin ki ti pe okip batiman akademik ek tir encampment protestasyon. 109 manifestan finn arete par lapolis. Enn koalisyon profeser liniversite forme pu sutenir etidyan ki pe proteste ek kondann intervansyon lapolis lor kanpis.
* Zur Fet Travay, 300 travayer sindike Liniversite CUNY (City University) dan New York an lyen avek sindika staf profesyonel Kongre (PSC-CUNY, AFT Local 2334), fer enn lasanble zeneral ek desid pu zwenn muvman etidyan pu Palestinn par aret travay pu konturnn interdiksyon drwa lagrev dan sekter piblik akoz lalwa Taylor. Zot fer apel pu lezot seksyon sindika zwenn zot ek organiz lagrev pu protez etidyan ki pe sibir represyon.
2 Me
*Liniversite California, Los Angeles (UCLA), mwins ki 24er apre ki encampment finn atake par anti manifestan pro-Israelyin ek ki laplis finn dimann etidyan pro-Palestinyin disperse, enn 200 etidyan finn kontinye okip kanpis. Ver 1er30 gramatin lapolis LAPD finn rant dan encampment me ti ena pli buku manifestan encampment ek laplis finn bizin bat retret. Apre 1er-tan lapolis California Highway Patrol avek ekipman anti-emet finn fer konfrontasyon avek etidyan . Lapolis finn avoy enn grenad asurdisan, antur encampement depi 4 kote ek kumans kas latant. Zot finn aret e menot 132 manifestan avek menot-zip, inklir omwin enn profeser . Ena temwin ki dir lapolis finn tir bal-kaotsu lor manifestan. police .
-Prezidan Joe Biden finn deklare apre sa ki kontestasyon zame bizin amenn dezord, san li fer okenn mansion lor latak vyolan ki protestater pro-Palestinyin finn sibir.
*Dan Lafrans etidyan Lyon 2, Lyon 3, l’ENS e Sciences Po okip ek organiz lasanble zeneral dan anfiteat Pacaut dan Sciences Po Lyon kont zenosid dan Gaza, kont lavant zarm a leta colonial Israel. 6 etidyan dan Komite Palestinn finn kumans enn lagrev lafin. Ver 10er aswar par dizenn CRS rantre, matrak ek met zelev deor. Plizir anseynyan ek personel adminstratif denons represyon. Mem zur divan liniversite Sorbonn preske 300 etidyan finn zwenn pu met dibut enn 20tenn latant. 1er tan pli tar 100 lapolis finn met zot deor.
-Kanpis Jourdan Lekol Normal siperyer (ENS) finn bloke par etidyan .
3 Me
*Etidyan Sciences Po Paris ekpilse par lapolis. Plizir lorganizasyon etidyan kuma Poing Levé et l’union étudiante, finn fer lapel ansam avek komite etidyan pu Palestinn a enn rasanbleman 2er tanto pu sutenir Pep Palestinyin malgre represyon intans par lapolis ek ladministrasyon anver etidyan ki finn mobiliz par 100tenn etidyan dan Place du Panthéon pu egziz lafin zenosid dan Gaza.
*Mobilizasyon depi Lazistis Kolektif Solidarite Palestinn Encampment, liniversite Johns Hopkins, Etidyan ki pe proteste par “encampment dan parti lenor Lamerik” finn avoy 3 demand ladministrasyon Liniversite PIIAC-( Konsey Investisman Lintere Piblik), pu dimann “sispann investisman” depi tu konpani ki ena lyen avek Leta Israel inklir depi konpani armaman Lockheed Martin ek General Dynamics. Kaitlin Newman , “demilitarize” par kas so relasyon finansye avek Departman Defans Amerikin ek “rann piblik” tu relasyon finansye ki ena avek Leta Israel imedyatman akoz kriz imaniter dan Gaza ki pe komet par lager Israel kont Hamas.
5 Me
* Liniversite Southern California, Los Angeles, lapolis finn detrir encampment pro-Palestinyin, swit a revolt ek arestasyon dimans dan diferan liniversite dan plizir landrwa dan Lamerik [Reuters]. Samem zur la ti ena seromini gradyasyon.
6 Me
* Sindika ki reprezant par milye travayer staf ek fakilte liniversite dan plizir rezyon Let Zini, inklir UChicago,finn pibliye enn deklarasyon zordi ki kondann itilizasyon vyolans polisyer ek aksyon disipliner par ladministrasyon kont etidyan ek travayer ki pe proteste pasifikman kont koneksyon iniversiter avek Israel ek zenosid dan Gaza pu reprim liberte ekpresyon ek protestasyon. We stand in solidarity with all of the students, graduate workers, faculty, and staff exercising their rights to free speech and
*Liniversite UCLA, finn ena enn lapel pu enn sit-in dan Moore Orl, UCPD finn detenir ek aret protestan pro-Palestinyin dan parking ek detrir encampment. .
* UChicago United for Palestine (UCUP) met dibut encampment.
Etidyan finn usi proteste, met dibut encampment dan diferan liniversite swivan [Lagazet donn sa lalis 27 kot finn ena swa manifestasyon uswa encampment].
- Yale University
- Michigan State University
- University of Mary Washington
- Massachusetts Institute of Technology
- University of South Carolina
- the Fashion Institute of Technology
- University of Illinois Urbana-Champaign
- Florida State University
- University of Connecticut
- The New School
- Harvard University
- Brown University
- University of Delaware
- Northwestern University
- Cornell University
- University of Pennsylvania
- Stanford University
- City College of New York
- Indiana University
- University of Rochester
- Rice University
- Swarthmore University
- University of North Carolina
- University of New Mexico Albuquerque
- University of Georgia
- Princeton University
- Tufts University.
- 7-Me-2024 Oxford ek Cambridge finn usi rantre [sky news]
Lezot Surs inklir::
https://www.independent.co.uk/news/world/americas/campus-protests-gaza-palestine-columbia-ucla-b2538140.html, www.revolutionpermanente.fr; France 24, .Portside.org
