Zenosid Blog 40 – Servi “Tayming” anmemtan Sutenir Zenosid Netanyahu ek IDF zot Aksyon Gerye
21.04.2024
Ena fwa u res perplex. Amezir nu pe temwin kimanyer Israel pe kontinye tuye, kontiyne so masak, so lafaminn orkestre popilasyon Gaza, nu bizin expoz tu kalite tipti trik Israel ek USA. Sirtu bann trik USA, ki asterla limem prinsipal koz kifer zenosid kont Palestinn pe kontinye. Alor anu get sa bann trik lor “tayming” ki Biden ek Netanyahu servi.
Nu finn truv kimanyer Israel finn tayme so afirmasyon san okenn fondman, li finn konkokte pu paraliz UNRWA, samem lorganizasyon responsab pu nuri Palestinyin afame dan Gaza, mem kan lafaminn pe anpire. Kan zizman ICJ kont Israel pu “zenosid plozib” prononse le 26 Zanvye, kan latansyon lemond brake lor Israel pe perpetre zenosid, Israel tutswit, mem zur, anons so alegasyon invante kont UNRWA.
Kumsa zizman arogan Biden pu deklar ka Sid Afrik kont Israel komkwa li “pena fondman”, e Israel kupab pli gran krim parmi krim, zame pa reelman expoze dan senn TV ek lagazet Oksidantal, kuma CNN ek BBC, kuma The New York Times ek Washington Post. Israel plozibleman kupab de zenosid. Biden definitivman enn vre kon kan li vinn dir komkwa ka kont Israel “pena fondman”. Mem ziz Amerikin lor panel ziz ICJ finn truv aksyon Israel kuma “zenosid plozib” ek finn ordonn IDF pu aret tuy ek anpit zanfan e aret detrir mwayin sirvi dan Gaza. Alor zizman Biden komkwa ka la “pena fondman” ti e tuzur res enn veritab konnri. E kan u koz konnri lor zenosid se enn konplisite dan zenosid. Alor, ena de kupab, Netanyahu ek Biden. USA kup so kontribisyon a UNRWA, ankor pli pir, fer zenosid ankor plis anpire. Me, nuvel media antretan ena enn pretext bankal pu sanz size, olye koz lor zenosid par Israel, plito koz lor eski Israel so alegasyon fos, bonmarse, skandale kont enn poyne travayer UNRWA fonde uswa pa fonde. Biden zame pa finn dir mansonz Israelyin “pena fondman”, mem kan an realite mansonz Israel vremem pena okenn fondman. Biden dir ka zenosid “pena fondman” mem si sa 15 ziz dir li “plozib”, exak lekontrer de “pena fondman”. “Plozib” vedir ena, anfet, enn ka prima facie. “Pena fondman” ule dir pena. Alor Biden li swa enn inbesil uswa li enn perpetreter zenosid. Swazire.
E zordi gramatin, kan mo leve mo tande Biden finn, ankor enn fwa, 13 banane apre li finn dir li pu dakor byinto, finn abes li an piblik par met so veto kont Rezolisyon Konsey Sekirite pu rekonet “leta Palestinn”. Li mem sa bug ki dan parol sorti depi so labus li dir li sutenir enn solisyon 2-leta. Alor, ankor enn fwa, eski li enn inbesil uswa enn perpetreter zenosid? So aksyon, kuma lor sa veto la, ankor enn fwa, amenn sutyin pu Israel, mem si Israel pe komet “zenosid plozib”. Israel kont solisyon 2-leta me Biden, Israel so bayer defon No. 1, anfaver. Alor, Biden so aksyon sutenir Israel. Pa zis sa, me USA tayme so lanons avek Israel so atak li ti pe menase kont Liran pu deturn latansyon depi USA so prop laont piblik divan Konsey Nasyon Zini. Ankor enn fwa, Biden pe fektivman kontribiye atraver so aksyon veto, antretan, pu kontinye zenosid. Biden refiz rekonet “leta Palestinn”, lefet li finn refize samem rasinn konfli. Li enn rasinn kolonyal. Palestinyin ki viv dan totalite Palestinn finn, e ankor tuzur,refizye dan zot prop pei par enn proze setler (koloni-peple-par-kolon), kolonyal, Zionist. Biden donk refiz rekonet enn leta Palestinn, servi so veto e sa defakto vinn dezavwe so sutyin pu enn solisyon 2-leta.
Lerla, kan may li an flagran deli, li sanz size. Li fer Israel al bonbard Isfahan zis de-trwa ertan apre so veto dan Nasyon Zini.
E li ek Israel fer sa o-risk pu deklans enn lager mondyal.
E lepep Palestinn truv leta Israelyin pe anpyet ankor plis lor zot later dan West Bank, pran Palestinyin par milye kuma otaz, zis trap zot ek ferm zot dan prizon Israelyin san mem enn ka lakur uswa mem enn sarz. Media Oksidantal pa mem apel zot “otaz”. E dan Gaza, popilasyon Palestinyin trete kumadir zot pa bann imin ditu. Tusala pe derule kan lepep lemond pe gete. E samem kifer mem lepep dan Lamerik kont sa zenosid la. Zot pe defye lider Demokrat ek Lider Repiblikin ek totalite media USA.
Eski Biden pe komet enn swisid politik? Uswa eski lemond pe baskil dan fasism, mem kan nu tu pe temwin?
Tu repoz lor nu tu.
Mem kan nu pe okipe avek nu lavi tulezur. Nu dan Ragoo Lane e sakenn dant nu dan landrwa kot nu ete.
Lindsey Collen pu LALIT. Vandredi 19 Avril 2024
Tradiksyon: BK avek kudme AA
