Zenosid Blog 39 – Depi Ragoo Lane avek lamur
20.04.2024
Nu pe truv sa sinema spektak Biden, Sunak ek Macron avek, an remork zot vale monarsi aprivwaze Zordani ek Larabi Saudit ki aste armaman depi sa bann pei la, zot tu pe marye-pike ansam dan enn lalyans malsin pu sutenir leta zenosider Israel. Sa pe arive, amezir Israel pe reser leto so syez lor Gaza, amezir Israel pe kontinye bonbarde, tuye ek afam popilasyon Palestinn, pe tuy zanfan e/u zot mama ek granmer, redwir zot lanturaz anrwinn kuma Dante dekrir dan so liv Inferno, e sa mem amezir IDF pe aste 40,000 latant kumadir li pe prepare pu enn lofansiv pu anvayir andan Rafah, kot ena plis ki enn milyon refizye Palestinyin pe sey sirviv, deza dan bann latant, pe atann zot desimasyon anonse, mem kan nu pe temwin sa vilin sinema avek enn kriote inkonpreansib, sovazri Oksidantal e barbari Amerikin an layv, nu prop lavi – u lavi, mo lavi – pe ena pu kontinye. Amezir nu pe proteste, fer lamars, lev nu lavwa. Nu pe asiste avek orer kimanyer Leta Alman avoy so bann gunnda sir-arme, pu fizikman ferm enn Konferans Palestinn dan Berlin, asa moman kot enn sirvivan Nakba 86-an enn Salman Abu Sitta ti pe pran laparol. Leta Alman finn kareman interdi sa evennman la, enn evennman kot fer lyin avek lepep Zwif ek lepep Palestinyin dan enn ket pu lazistis ek lape, e ti pu ena kom orater dimunn usi koni ki ansyin Minis Finans Grek. Leta Alman finn interdi evennman la net apre, pa mem kapav fer li par Zoom. Alor, li pa satisfe avek zenosid kont Herero dan Namibi, ni zenosid kont dimunn kominote Zwif ek Jipsi dan Lalmayn ek Lapoloyn, sa mem Leta Alman an konivans avek e pe kolabore dan sa zenosid lepep Palestinyin.
E, nu pran kuraz depi lepep Palestinn, e lepep Lamerik ki finn blok bann pon fizikman avek zot lekor, pu met presyon ekonomik lor zot klas posedan andeor-zot-kontrol-demokratik, uswa depi travayer Google ki finn manifeste lor zot sayt travay kont zot patron pu zot konplisite avek zenosid Israel, e artist ek konservater expozisyon stennd Israelyin dan Byenal Veniz ki finn gard zot sheterz ferme, ek finn met enn notis ki dir: “Artist ek konservater kyosk Israelyin pu uver zot expozisyon kan ena enn sese-lefe ek kan ena enn lakor pu larg bann otaz.”
E, antretan, nu lavi kontinye. Dan Ragoo Lane, enn zenn vwazin 17-an – nu partaz enn fennsing deryer nu lakaz – fer letur lot kote dan Ragoo Lane e inform mwa ki nu lisyin, Lock ek Down, finn atak enn sat, li pa kone kisannla so sat, pandan lanwit. E sat finn blese me li ankor vivan dan nu kote fennsing. Alor, mo fer de lisyin kupab al dan lakur par divan, e ansam mo zenn vwazin ek mwa al pu sekur sat la. Li ti bizin enn veteriner, sa zenn-om la. Li dimann mwa enn but latwal pu protez so lebra depi grif sat, e gayn konfyans sat blese e examinn li pu gete kot ena blesir. Lerla li fabrik dan enn fason byin profesyonel de sipor tanporer pu de lapat ki paret inn kase, e li met medsinn ble ki li ti amene ar li lor de mark tru ledan lor so vant. Mo pans tu sa fami dan Gaza avek zot sat tromatize. Enn misye ki finn perdi tu manb so fami, return dan debri so lakaz, mont enn latant, e res ladan avek so sat. Uswa Yousef Khalid Saeed Naji, sa ti garson dan Deir al-Balah, kan li return dan dezolasyon so lakaz anrwinn, truv so sat, pran li e dir kimanyer li kontan.
Mo finn al kriye tu vwazin dan Ragoo Lane ki mo finn resi zwenn lakaz, dimann zot si zot pu vinn gete si zot kapav rekonet sat blese la. Vwazin finn vini me personn pa konn sat la. Enn vwazin inn amenn mwa enn petsay depi so zardin pu kwi tanto. E mo finn donn enn lot vwazin enn sak guyav sagu depi nu pye ki Kisna ti garde pu li dan frizider. Me, konsernan sat, nu tuzur pankor kone kisannla so sat sa. Nu ti pe panse kitfwa li enn sat maron ki pena met e gayn inpe manze isi laba?Alor, sa zenn vwazin ek mwa nu pa ti kone ki pu fer. Nu tom dakor li pu gard ek okip sat kot li dan so lasam ziska so landime – li finn pran sat la dan enn panye plastik ki mo finn resi gayne kot mwa – pu gete si li resi sirviv ziska so landime, lerla ansam nu pu amenn li pu get enn veteriner.Alor, so landime mo al lor baraz par deryer pu gayn nuvel, e li dir mwa li finn retruv sat la so met – enn fami res dan Larut Vaudagne – ki finn repran zot sat depi li ek setadir depi mwa usi. Sat la enn mama ki ena de ti mimi pu nuri lakaz, li dir. Enn zistwar zwaye, dan lepok zenosid.
E antretan mo finn ankuraz sa zenn-om etan li somer, pu pran size biolozi O-level, pa pu enn sertifika – me pu lamur li ena pu zanimo – e anmemtan rod enn travay – mem enn ti travay – avek enn ONG ki okip zanimo.
Lindsey Collen pu LALIT. Zedi 18 Avril 2024
Tradiksyon: BK avek kudme AA
