Zenosid Blog 38 – Plan Zenosid USA-Israel? Kimanyer Opoz li!
18.04.2024
Sa fer enn mwa depi mo dernye blog zenosid. Parfwa mo nepli ena parol. E mo san parol kan Biden – ansam avek Sholz ek Sunak & Co – zot tu kontinye frwadman furni bom e organiz faminn fam ek zanfan Palestinyin dan Gaza, e pretann pa remarke exekisyon somer dokter menote Palestinyin ek pasyan lopital dan Gaza ni pa mem remark bonbardman mertriye Lanbasad Iran dan Damas. Mo san parol kan mo truv sa bann lider zom, prezante an kostim-kravat, ankor tuzur pe bak enn Netanyahu anplin pe kontinye derasinn Palestinyin depi zot later dan West Bank inklir Les Zerizalem, anmemtan nu pe temwayne kimanyer pe trangle Gaza amor.
Li depas tu parol.
Degre kolaps fasad “valer” Oksidantal asterla telman vast, telman kri-kri, li rann mwa san parol. A ki nu fer apel? Eski sa bann zombi la pe diriz Loksidan? Aster mo pe oblize get sa zenosid Israelyin, kuma enn dezyem rawnd pli larz sa kolaps “sivilizasyon” Alman, some sivilizasyon oksidantal alepok, kan Nazi ti gradyelman vinn opuvwar ek met an pratik zot zenosid. Alepok usi, buku ti res san parol. Evidans zenosid Nazi dan sa mem pei osome “sivilizasyon” oksidantal alepok obliz mwa pu truv evidans zenosid Israelyin-USA perpetre par seki osome totalite loksidan so swadizan “sivilizasyon” zordi.
Lide sa blog la se sink-sis parmi nu dan LALIT pran li lor nu pu prepar enn partaz regilye epdeyt lor zenosid pu ede “gid nu atraver sa marenwar”. Nu ti kone li pu long ek difisil, emosyonelman, sikolozikman, mem fizikman. Kan nu dir “gid nu atraver marenwar”, sa “nu” vedir numem, e usi nu tu aktivist pe moblize pu sey aret sa zenosid, amezir li pe deferle lor Palestinyin. E nu preske pa resi. Mo pa ti pe kapav ekrir blog pu preske enn mwa. Mo pa ti pe kapav ede pu gid nu dan marenwar. Nu finn, pandan sa mwa pase la, denons tu seki dan Moris finn akeyir Bennd US Navy dan zot lokal, mem kan sa mem USA pe arm ek zistifye Israel dan so zenosid. Nu finn denons rapor UN ki sutenir Israelyin par enn Morisyin, Pramila Patten. Nu, dan SOMALP ek Lalit,finn organiz e partisip dan Lamars sutyin Free Palestine Samdi dernye dan Rose Hill. Me, nu pa finn resi ekrir blog, sa blog ki so bi se pu permet nu kalme nu lemosyon, gard nu lespri fokes, e perfeksyonn nu aksyon.
Mo finn sorti depi mo leta san-parol par enn-de kiksoz.
Premye mo pe lir Ilan Pappé so listwar ekrir an 2007 The Ethnic Cleansing of Palestine ki Rajni Lallah finn komann aste pu LALIT. Mo finn gayn letan pu lir li akoz mo ti ena enn loperasyon miner mo ledo dan Lopital Jeetoo semenn dernye, lor enn poro bizar lor lezo zwintir zepol. (Swin lasante gratis ek iniversel Lopital Jeetoo ti, kom dabitid, fantastik) Travayer lopital tu ti byin pran swin, mem kan ena enn mank travayer. E mo finn fer de kamarad avek mem kalite biopsi, akoz nu finn ena pu travers mem prosedir ansam. E lerla dan lake Dispanser Bambous, mo finn gayn plis letan pu lir, e pu fer konesans lezot dan lake pu “pansman”). Paz apre paz briyan listwar Pappé, mo finn lir detay sibterfiz Israelyin ek Britanik pandan zenosid 1948 kont Palestinyin, e sa finn fer mwa realize kuma sa zenosid 1948 pe re-edite lor enn lesel vast, indistriyel, e mem dizital-elektronik. Li ti ase etranz. Li kumadir Pappé pe dekrir sibterfiz Israelyin ek Amerikin dan zenosid Gaza an 2023-24.Sa mem riz, sirveyans, sadism, arogans kolonyal, rasism kolon-setler, asasina anmas, dinamitaz lakaz dimunn, lafaminn orkestre, e lerla akapar-later. Sa mem kalite ansyin diskur, usi. Me, asterla, lor enn lesel masif. E asterla, pe anons leral “sivilizasyon” oksidantal. Sa finn return mo parol. Kapasite laparol inn revini. Mo finn kumans realize ki sa zenosid la li enn kontinyasyon, usi, de enn lot kiksoz. Li enn dezyem, enn rawnd elarzi reyn Nazi ki pa ti resi fane partu dan Loksidan dan bann lane 1930 ek 1940, e ti finn sibir enn defet atraver enn lalit arme masif sirtu depi larme USSR, me usi par larme UK ek USA.
Pu mwa, ena enn moman kan mo realize “zot”, setadir “pwisans Oksidantal”, tu ansam ladan. Zot tu ansam dan sa zenosid kont Palestinyin. E zot finn tultan ansam. Li pa zis Netanyahu ek so kamarad fasist Ben G’Virek Smotrich ki pe perpetre zenosid. Pa zis IDF, nonpli. Me usi Misye Joe Biden, Anthony Blinken, Olaf Scholz, Rishi Sunak e Mm Ursula von der Leyen. E fabrikan zarm deryer zot.
Prev, si nu bizin li, se avek ki lavites indesan sa bann lider la finn kup led a UNRWA. UNRWA se lorganizasyon depi lane 1948 finn moter, kapav dir pumon vital pu distribiye led a refizye Palestinyin depi Nakba sa mem lane la. Li sel lorganizasyon ki kapav anpes zenosid par lafaminn orkestre dan Gaza zordi. E sa bann pei la kup zot led sa mem moman ICJ pronons so zizman “zenosid plozib” kont Israel. Zot kup zot led anplas-anplas.*
Kimanyer kapav atann nu pu ariv demay ek konpran tusala? Li finn pran mwa enn mwa pu resi ariv demay ek konpran sa.
Mem zur ICJ – pli ot lakur dan lemond – ordonn Israel pu aret tuye, anpite e detrir mwayin sirvi Palestinyin, sa bann lider la kup tu zot led a inik lorganizasyon ki gard Palestinyin dan Gaza vivan? Eski zot fu? E zot fer sa, mem kan otan parmi sa bann lider la pe kontinye furni bom ek minisyon avek lekel pe fizikman desim popilasyon Palestinyin. Lerla zot larg balo manze depi parasit avyon lor latet popilasyon afame, tuy ena parmi.
Nu konpran Israel dezespere fas a zizman ICJ.
ICJ finn zize zot “plozibleman” kupab. Finn may zot an flagran-deli. E zot ena lintansyon konplet zenosid la. Alor, nu konpran, avek orer byin sir, ki zot pa ule dimunn dekuver tu detay dan zizman ICJ, pu lir zizman dan tu so detay, e lerla diskit li an profonder. Alor, nu konpran Netanyahu pe ena pu reflesi kimanyer pu sanz size vit-vit, e pu li, antretan, kontinye perpetre so zenosid atraver lezot mwayin. Kumsa nu konpran kimanyer mem zur zizman ICJ, Netanyahu inn redwir pu vinn avek enn akizasyon fuka, dezespere e konpletman devwal enn tantativ feb bonmarse kont UNRWA.
Sa, nu konpran. Li kupab. Li ule fer enn kover-ep, e kontinye avek so exaksyon.
Alor Netanyahu akiz enn duzenn, enn mizerab duzenn anplwaye UNRWA lor enn total 30,000 anplwaye – san enn su prev, pa mem enn sel prev – pu inplike dan inkirsyon dirize par Hamas depi prizon Gaza dan Israel le 7 Oktob. Netanyahu so sibterfiz fuka ti sifizan pu fer sa bann lider parfetman sindespri pei Oksidantal liste anba, san mem okenn konsiltasyon avek personn dan zot laparey leta, pu met an pratik enn desizyon totalman inposib pu fer kan u analiz li apre – inposib pu sinp rezon lanter birokratik: zot kup zot finansman a UNRWA deswit, kumsa anons faminn orkestre Palestinyin dan Gaza. Zot finn fer sa dan lespas kelke ertan, uswa dan sertin ka dan nek de-trwa zur. Sa li enn prosedir ki pran enn kinzenn si pran enn fast-trak, si swiv enn prosedir dirzans. Me sak enn lider finn individyelman pran sa desizyon lor zot prop latet.
Lalist Pei ek nom lider individyel finn partisip dan aksyon premedite pu komet zenosid:
Batch NIMERO ENN:
Lamerik, United States of America (USA) – Joe Biden
Laswis -- Viola Amherd
UK – Rishi Sunak
Laoland -- Mark Rutte
Litali – Georgia Meloni
Lotris -- Alexander Van der Bellen
Nuvel Zeland -- Christopher Luxon
Rumani-- Klaus Iohannis
Estoni -- Alar Karis
Tu pei mansyone lao pe kontinye mintenir sispansyon zot kontribisyon a UNRWA (data ziska11 Avril 2024**).
Batch NIMERO De:
Pei liste anba zot usi ti galupe kup zot kontribisyon a enn vites indesan.
Parkont, zot finn plitar apre re-kumans vers zot kontribisyon. Me… Me zot finn selman fer sa, kan Nicaragua le 1 Mars inn kumans purswit kont Lalmayn dan ICJ pu konplisite pu komet zenosid, sa usi kategorize kuma enn form zenosid su Konvansyon.
Lalmayn – Olaf Scholz (apre parsyelman retablir kontribisyon pu sov so lapo).
Linyon Lerop – Ursula von der Leyen (apre parsyelman retabli, Lalmayn pli gran leta manb)
Laswed - Ulf Kristersson(apre retablir kontribisyon, manb Linyon Lerop)
Zapon- Fumio Kishida(apre retablir kontribisyon)
Lafrans – Emmanuel Macron(apre retablir kontribisyon, manb Linyon Lerop)
Kanada – Justin Trudeau(apre retablir kontribisyon)
Lostrali – Anthony Albanese (apre retablir kontribisyon)
Finland --(alepok) Sauli Niinistö (apre retablir kontribisyon, manb Linyon Lerop)
Island -- Guðni Thorlacius Jóhannesson(apre retablir kontribisyon, masivman integre dan Lerop.)
Li inposib pu enn pei, san konte 17 pei, pu kordinn sa. Li inposib pu pran desizyon kolektivman, pu ratifye li, e pu organiz pu sispann zot kontribisyon a UNRWA osi vit e an konsertasyon, amwin li ti premedite. Si li ti premedite, sa ule dir tu sa lider la ek zot Leta pe konsyaman partisip dan zenosid. Enn fwa ICJ kumans expoz zenosid dan ka Sid Afrik, zot similtaneman kup zot finansman pu alimant Gaza, sa pu permet zenosid kontinye. Ena pei parmi, apre finn sanz zot pozisyon kan dezyem ka mete dan ICJ, kot Nicaragua loz ka kont Lalmayn, fer zot rapel “konplisite avek zenosid” dan realite konstitye “zenosid” dapre “Trete pu Prevansyon e Pinisyon Krim Zenosid”, enn trete byin kurt byin vo lapenn lir.***
Alor, li finn byin difisil pu realiz degre puritir instale dan “sivilizasyon” Oksidantal. Me, li kumsa. Nu bizin fer fas lefet sa realite la.
E seki pe redonn nu nu lavwa asterla, se partu dan lemond lepep pe azir. Pa zis atraver lamars, atraver manifestasyon, e atraver eleksyon. Wi, pa zis George Galloway depi Workers’ Party dan UK, finn infliz enn bate-bef a kandida Labour ek kandida Konservater dan enn resan eleksyon parsyel. Me asterla, partu dan lemond lepep pe blok sime ek pon, pe organiz sabotaz ekonomik dan pei ki sutenir Israel so zenosid. Dan USA le 15 Avril manifestan finn blok Pon Golden Gate dan San Francisco e finn usi blok lotorut Erport Internasyonal O-Hare dan Chicago, e ti usi blok Pon Brooklyn dan New York. Dan Seattle, ti blok lotorut ver erport. E lefet Lindi finn ena manifestasyon dan Illinois, California, New York e Oregon. Bi sa “manifestasyon A-15” ti pu inform lepep dan Lamerik lor Zenosid dan Gaza, Palestinn. Li finn evidaman marse.
Nu bizin fer tann nu lavwa. Isi, Guvernman bizin sutenir ka Sid Afrik kont Israel so zenosid. Leta Moris bizin kup tu relasyon avek Israel. Moris bizin pran ledevan, amenn Linyon Afrikin dan so totalite pu dibut kont Israel. Kont USA ek tu zot bann alye aswafe-lager. Li irzan. Amezir Netanyahu vinn dezespere, li pu antrenn USA dan enn atak kont Liran, ki pe sutenir lepep Palestinn. Bann lanze buku tro ot. Bizin kontrol Israel ek so baking USA, bizin kontrol zot.
UN ena pu truv enn sime pu deklar enn “No Fly Zonn”, e truv fason pu inpoz sa. Pei kuma Lasinn ek Sid Afrik pu bizin ofer mwayin pu inpoz li. Sinon, zenosid pu zis kontinye.
E nu bizin regayn nu lavwa, e pu sarye sa demand la. Nu ena pu mobilize. Kuma nu pe deza sey fer.
Lindsey Collen, pu LALIT. 16 Avril 2024
Tradiksyon: BK avek kudme AA
* Dan nu dernye blog 20 Mars [So tradiksyon pibliye le 22 Mars]nu ti ekrir le swivan “Li ti deza lus kan, sa moman Israel anons so akizasyon bidon kont UNRWA, USA anplas anplas tutswit kup so finansman a UNRWA. Biden pa ti bizin mem pran letan pu dimann Blinken. Blinken pa finn gayn letan pu dimann Austen. Biden nek kup USA so kontribisyon a UNRWA. Nek enn sel ku kumsa. Wadire sa ti finn fini deside byin avan. E USA finn ramas 17 lezot pei inbesil, wadire li finn deza amar zot ar sa atraver kit form SOFA (State of Armed Forces Agreement konkokte par USA pu sa kalite sityasyon la), pu kup zot finansman literalman dan lespas kelke ertan. Zot, usi, pa finn pran mem enn fraksyon enn segonn pu diskit li. Sa pa finn pas dan zot lespri si sa pu kapav vinn sa but evidans ki pu kulut zot serkey kan zot pu niye zot “konplisite avek zenosid”. Sakenn parmi sa bann Leta sibaltern finn azir avek enn rapidite vites zekler ki napa posib dan langrenaz birokrasi leta. Zot kup finansman tutswit anplas anplas. San mem enn su prev.”
** https://unwatch.org
*** Just google “genocide treaty pdf”
