Manifestasyon apel FREE PALESTINE MARCH pe vini Samdi le 13 Avril
31.03.2024
Solidarite Morisyin Ar Lepep Palestinn, fron komin kot LALIT enn lorganizasyon manb, pe organiz enn FREE PALESTINE MARCH, enn lamars pasifik e sekilye. Li pu Samdi 13 Avril 1:00 er Rose-Hill. Li pu demare ar enn rasanbleman kot Stad, deryer Bazar Rose-Hill, e lamars pu zis dan sant Rose-Hill. SOMALP fini notifye lapolis lor lamars. Si u interese vini, ubyin u lorganizasyon anvi zwenn dan lamars, zis kontakte nu. Kapav ekrir lalitmail@intnet.muubyin sonn Alain lor 5 932 9002.
Lamars la finn vinn pli inportan ki zame. Asterla, ena enn zizman provizwar ICJ kont Israel. Ena osi enn rezolisyon Konsey Sekirite Nasyon Zini pu enn sese-lefe. Anplis, ena osi Rapor “Anatomi enn Zenosid” par Raporter Francesca Albanese ki finn sumet Konsey Drwa Imin UN. Me, ziska ler Israel pe persiste ar so bombardman, ar so politik inpoz lafaminn, ar so zenosid. Lamerik li pe persiste, li osi, furni zarm pu zenosid, furni larzan e furni baking politik pu Israel so lokipasyon militer ilegal. Sak aksyon, kuma nu lamars, li pez dan balans eski ena ase pwa pu fors Israel ek Leta Zini aret sa barbari la. U prezans inportan. Partu dan lemond dimunn kuma nu pe dibut pu Palestinn.
Nu lamars li baze lor Platform swivan:
1 Aret zenosid tutswit! Guvernman bizin sutenir Sid Afrik so ka ICJ kont Israel pu zenosid.
2 Nu bizin intansifye kanpayn Boykot, Dezinvestisman, Sanksyon (BDS) kont Israel. Fode ena enn anbargo mondyal ki blok tu zarm ver Israel. Zero zarm Amerikin, Angle, Alman pu Israel, ni larzan, ni baking politik. Guvernman Moris bizin kas lyin ekonomik ar Israel.
3 Met fin Aparteid Israelyin! Aparteid vedir diskriminasyon kont Palestinyin.
4 Met fin 56an lokipasyon militer Israel dan West Bank, inkli Zerizalem Est – enn pozisyon ki guvernman Morisyin finn deza pran kare-kare divan ICJ – e met fin leta-de-syez lor Gaza ki pe dire depi 17an.
5 Ferm baz militer Amerikano-Britanik dan Diego!
6 Nu pei bizin sispann relasyon diplomatik avek Israel deswit! Si sa arive partu, li pu fer sese-lefe vinn irzan e neseser, e sov lavi buku zanfan Palestinyin, fam ek tu dimunn ki pe viv dan Gaza.
Manb fondater SOMALP inklir MLC, CTSPP, All Workers’ Federation, FPBOU, Confederation of General Trade unions, Idrice Goomany Treatment Centre, Consumer Advocacy Platform, Chagos Refugees Group, MLF, LALIT e manb individi inklir Ansyin Prezidan Repiblik Cassam Uteem ek Ansyin Atorne Jeneral Jean-Claude Bibi.
