Let Uver a Gender Links – Lor zot Stratezi e lor Lanbasad USA
23.03.2024
Kan Gender Links ekrir LALIT, fek-la, dimann nu dan LALIT aliyn enn-lor-trwa kandida fam dan prosenn eleksyon zeneral, kan anfet nu ti aliyn 46% dan dernye eleksyon, nu finn agase. Nu finn realize ki, antan ki lorganizasyon, zot paret ena inkapasite pu truv seki LALIT finn fer anterm nomb fam ki partisip dan politik, mem lor kestyon komye fam kandida. Pli grav, e pli inportan, nerport komye fwa nu explik zot an-longer dan seminar, zot pa rekonet ki nu ena rezerv, gran rezerv, nu mem ena kritik politik serye kont sa stratezi Gender Links ki viz pu gard tu yerarsi patriarkal minisyezman anplas, e fer enn-de fam dan elit grinp lesel dan sa bann yerarsi patriarkal, bann yerarsi ki reprezant dominasyon fam, e mem dominasyon zanfan e laplipar zom. Dapre nu, stratezi Gender Links li pa enn stratezi pu emansipasyon ubyin liberasyon fam. Li pu plito maske dominasyon patriarsi. Dan let la nu osi kritik Gender Links akoz li pran kas ar Lanbasad USA. Sa Leta la pe aktyelman kareman donn zarm Israel, tulezur, pu tuy fam dan Gaza, pu tuy fam, so zanfan, tu manb so fwaye. Zot pe pran kas ar enn USA ki finn servi so Veto trwa fwa dan UN pu permet Israel kontiyn fer fam mor defin su blokis Israel. Ena enn limit ar ki buro enn ONG pran kas.
Nu pe pibliye tradiksyon an Kreol, let uver a Gender Links pu ki nu inform piblik lor sa deba inportan lor ki stratezi marse pu emansipasyon fam, kote politik, e pu partaz ar tu dimunn kifer nu pa dakor ar Gender Links ki viz selman ogmant nomb fam, ubyin met enn kota, alinteryer enn yerarsi dominasyon . Nu pa mem dakor ki “lalit politik” li konsern selman atann-atann eleksyon zeneral, lerla poz kandida. Politik pli nob ki sa.
Let Uver a Gender Links,
Ser kamarad Gender Links,
Mersi pu let date 7 Mars 2024 ki ti adrese a kamarad Lindsey Collen kuma enn manb LALIT. Nu pe reponn atraver enn let uver parski li paret Gender Links pa sezi seki nu finn ekrir dan let nu finn avoye dan lepase ni sezi seki nu reprezantan finn dir dan reynon dan lekel Gender Links finn invit nu.
Li etranz ki zot avoy nu enn let pu dimann nu, dan LALIT, aliyn omwin enn kandida fam par sirkonskripsyon ou 33%, kan dan dernye eleksyon nu finn deza aliyn 46% kandida fam. Sa reket la paret inpe etranz e dekonekte depi realite.
Nu finn, deseni apre deseni, met omwin enn kandida lor trwa dan sirkonskripsyon depi lane 1982. LALIT finn, osi boner ki 1982, anfet aliyn 5 kandida fam dan enn ward pu eleksyon Minisipal dan Por Lwi. Eski zot kapav sezi sa?
Inkapasite pu u lorganizasyon asimil sa linformasyon lor LALIT, li sokan e li moralman inakseptab. Li paret ki Gender Links pa futi rekonet pratik politik LALIT pu nu rol avangardis lor partisipasyon fam dan politik, alor zot prefer pretann ki nu pa finn fer nanyen e pa finn dir nanyen lor sa kestyon la. Li paret par fason Gender Links pe azir ki zot ena zis “enn proze” ki pa vremem liye avek realite dan lekel mazorite fam dan Repiblik Moris pe viv.
A de repriz nu manb Lindsey Collen finn diskit sa kestyon la avek manb Gender Links dan evennman zot-mem ti organize, an 2005 ek 2018. Nu pa pu re-esplik nu argimantasyon. Zot kapav rafresi memwar organizasyonel par lir nu argiman lor
https://www.lalitmauritius.org/en/newsarticle/2089/women-in-politics-in-mauritius-by-lindsey-collen/
e lor
https://www.lalitmauritius.org/en/newsarticle/301/lindsey-collen-speaks-at-media-watch-meeting-on-women-in-politics/
Li paret kumadir, pu Gender Links, “politik” li inikman “elektoral”. Me, sa pa vre. E li paret Gender Links krwar ki “lapolitik” li konsern zis dimunn ki eli. Me, sa li pa vre, nonpli. Alors, nu oblize krwar ki, Gender Links pa kapav sezi lefet ki LALIT existe – ni sezi mem lefet ki nu finn deza met plis ki enn-tyer kandida fam, zot demand santral, e sa depi lontan.
Tu seki nu dir, ondire Gender Links nonpli kapav ni konpran, ni inklir dan zot analiz ou zot evalyasyon problem ki pe fer fas, antan ki fam.
Nu finn suvan donn argimantasyon detaye lor nu pozisyon ki NU PA kwar ki emansipasyon ek liberasyon fam pa kapav avans divan par sa kalite kota anterm sif la. Okontrer, kuma nu finn esplike dan lepase, sa kapav ena lefe opoze, setadir re-anforsi yerarsi patriarkal. Samem yerarsi, ki problem avek patriarsi. Me zot lorganizasyon paret inkapab pu anrezistre e inklir enn lot pwin-de-vi lemond ki seki zot deza ena, kot inegalite pu reyne siprem pu leternite.
Anplis, nu note ki, lor zot websayt, zot finn dir ki zot ena kuma “Partner Kle zot Proze”, Lanbasad Leta Zini. Lanbasad Leta Zini li direkteman responsab pu masakre fam dan Gaza dan Palestinn asterla-mem, dan seki Lakur Internasyonal Lazistis (ICJ) finn statye enn zenosid “plozib” e malgre sa, zot pe pran larzan ar zot? ICJ finn spesifikman met an gard- pei lor “konplisite dan zenosid”, ki, antan ki “konplis” osi konstitye krim zenosid. Leta Zini li Leta prinsipal ki responsab krim zenosid par konplisite. Li aster lamem pe arm, finans e furni proteksyon politik a Leta Israel ki pe perpetre sa zenosid la kont lepep Palestinyin. E ou pe pran larzan ar zot? Tandi ki Israel, kan Leta Zini pe kontinye arm li aster lamem, pe afam, fam Palestinyin ek zot zanfan, dimunn malad ek seki blese, seki aze ek infirm, e ou pe pran larzan avek zot, servi zot kuma bayer de fon?
Anplis, petet zot pa finn remarke, me Leta Zini pe okip ilegalman nu prop peyi, Repiblik Moris. Sa li pa zis lopinyon LALIT. Lakur Internasyonal Lazistis finn dir lalyans UK-USA pe fer kolonizasyon e lokipasyon kontini lor teritwar Moris, e ki li illegal e zot bizin arete. Zot bizin ale. Li oblize enn aksyon imoral pu tal lame ar enn okipan militer ou prop peyi, enn pwisans ki plozibman pe komet zenosid aster lamem dan Palestinn atraver so konplisite.
Alors, nu dimann zot:
1. Sutenir demokrasi alabaz atraver sindika pli for - ki ziska ler bayone par Lalwa Travay existan; e sutenir demokrasi alabaz atraver ranforsi lasosyasyon fam, fer zot pli for; e pu ranforsi lasosyasyon fam landrwa, ki depi so nesans ti politik pandan plizir deseni me ki gradyelman Leta finn koronp, par sey kontrol zot; e pu milite pu sanz lalwa ki permet lasosyasyon antreprener, ki zot bi se pu fer profi, ki finn vinn ranplas lasosyasyon ki “revandikatif”par natir, e pu milite pu zot revinn kuma zot ti ete avan; e pu gayn enn nuvo kad legal ki refiz aksepte anrezistreman lorganizasyon kominalo-sosyo-relizye avek Minister, pu ki li revinn enn lespas sekilye pu fam, kuma avan. Sanzman dan drwa sindike ek liberte lasosyasyon fam pu ed demokrasi buku.
2. Travay lor enn program fam lor tu size ki konsernn fam, kuma drwa ek suvrente alimanter, lozman, kontrol demokratik lor later tablisman; travay pu tu dimunn; lape ek laliberte; fermtir tu baz militer kuma lor Diego Garcia ki poliye losean; pu enn sistem lasante ki caring ek gratis inklir kontrol lor nu lekor; ledikasyon, inklir swin zanfan; drwa pu servi langaz maternel kuma medyum; liberte depi pestisid ek erbisid ki gro konpayni kannyer servi e ki gat later, e usi depi tu lezot form likid ek polisyon ki lindistri otelyer servi. Ala fason pu konbat patriarsi, oliye ki fam rod monte dan yerarsi pu rod enn plas lor lesel opreser ki met baryer kont tu sa demand ki nu finn liste.
3. Imedyatman renons a tu lof larzan depi Leta Zini, osi byin ki tu lof lezot kado kuma laburs ek vwayaz, formasyon ek lezot tantativ pu aste ou silans lor zot dominasyon lor nu peyi ek lor Palestinn. Bizin refiz aksepte “larzan disan” depi sa kalite surs la, asterla-mem! E met lor zot websayt enn fraz ki dir avek fierte: Nu dan Gender Links nu na pa pran larzan depi seki konplis ar zenosid ou seki pe okip ilegalman teritwar enn lot pei.
Salitasyon,
Rajni Lallah ek Cindy Clelie,
Pu LALIT,
15 Mars 2024
