Zenosid Blog 36 – Alegasyon Vyol e Propagann par Puvwar Lokipasyon

14.03.2024

Pramila Patten rant dan pyez Propagann Israelyin “vyolan-band”

Anu kumanse, etan nu omilye mark Zurne Internasyonal Fam ki’nn demare avek enn Lamars Fam pu Lape organize par MLF an solidarite avek lepep Palestinn, avek de seri lide pu gard antet kan nu get alegasyon vyol. Sa de seri lide form parti sa leritaz onn-going kree atraver lalit fam kont patriarsi.

1. Vyol ek Linsaz

Dan tu akizasyon vyol, ena de danze nu bizin tultan gard antet, kuma lexperyans muvman fam finn anseyn nu.

Premye danze se blam viktim, fors viktim gard silans ek fer viktim onte. Sa premye danze finn kumans adrese par muvman fam mondyal pandan dernye 5-6 an atraver travay remarkab muvman “me-too”. Fam dibut, vinn delavan, par limem, e dir “me-too”, “mwa osi” vedir “Mo nepli pu ni onte ni gard silans ni pran blam.”

Dezyem danze, sirtu dan sityasyon kot ena inegalite sosyal flagran, se vyol uswa mem rimer enn vyol sifi pu “zistifye” enn gang zom depi grup dominan swazir enn buk emiser pu blame, e pandi li. Samem apel “linsaz”. Li komet dan enn listeri par enn gang-linsaz zom sorti depi seksyon pwisan sosyete kont enn zom uswa kont zom dan sa seksyon inpwisan dan sa sosyete la. Dan USA zom dan gang-linsaz ti notwarman atas dra blan lor zot latet ek ti apel zotmem KKK. Israel finn azir kuma enn gang-linsaz dan so zenosid dan Gaza. Alor, zot byin bizin ena enn “exkiz”. Akizasyon “vyol an-band”, kan kontinye repet li e li ankor tuzur pa fonde lor okenn prev, li vinn zisteman sa kalite “exkiz” la. Alor, nu bizin gard sa danze la dan nu latet kan Leta Israelyin fer alegasyon “vyol an-band” par manb Hamas le 7 Oktob.

2. Vyolans Sexyel dan Lager

Dan tu lager, konfli arme, sirtu kan pe plozibleman komet zenosid, ena, anpremye, propagann konkokte, fabrike ek fane par perpetreter zenosid. Nu bizin rapel sa. Tultan. Nu bizin evit tom dan pyez sa kalite propagann la. Tultan.

Lefet perpetreter zenosid pu servi propagann li kiksoz nu tu kone pu arive. Li anmemtan lozik li pu kumsa, e li usi inevitab li kumsa. Puvwar lokipasyon, dan sa ka la li Israel, li forse pu, kanmem komye li absird, pu konkokte enn kit edifis “zistifikasyon” pu sa krim siprem li pe perpetye, setadir zenosid. Bi sa propagann la se pu “zistifye” sa “linsaz” lor enn lesel masif, uswa tuye pu vanzans se seki zenosid ete. Alor, ninport ki nyuz sorti depi enn Leta lokipasyon, dan sa ka la Israel, bizin investige anprofonder avan repet li an piblik. Bizin gard antet kontex okipan-okipe. Lexistans propagann Leta pu kuver krim Leta, kuma zenosid, li koni e bizin gard li antet.

Pa bizin dir li. Purtan, bann dimunn ki ti devet pli kone bliye sa laspe la konpletman. Tutfason, Israel, akoz li ena enn gran frer Amerikin avek puvwar linflians, li enn exsepsyon. Enn parmi sa bann dimunn la ki, dan seki kapav meyer posibilite, finn al tom dan pyez instale par propagann Israelyin se avoka Morisyin Pramila Patten.

Dan tu konfli arme, an partikilye, kot puvwar lokipasyon sirtu dan enn koloni-pepleman-par-kolon, ena enn lot eleman anplis vinn azute ansam ar propagann. Ena vyol ek vyolans sexyel, e li perpetre avek inpinite. Li ti, nu kapav dir, “enn regleman”. Me, li ti perpetre, atraver sa regleman la, par zom depi larme lokipasyon. Se zom avek puvwar, dan reyn patriarsi, zom kolon ki an permanans dominn lezot, inklir fam, e vyol li form parti dan sa dominasyon la. Fam dan West Bank inklir Les Zerizalem konn sa trebyin, mem si dan Gaza sa rezim partikilye lokipasyon, kot Israel finn inpoz enn leta-desyez lor Gaza pandan dernye 17-an, ti gard larme lokipasyon andeor kan konsantrasyon e kumsa finn epayrn zot depi sa fleo la. Alor, kan dimunn dir “dan tu konfli arme” ena vyol ek vyolans sexyel, ena enn postile ki akonpayn sa steymennt la: dan ka inegalite extrem, kuma kolonizasyon, vyol ek vyolans sexyel andemik li perpetre tipikman par puvwar lokipasyon. Dan sans invers ti pe ena vyol ek vyolans sexyel me, par definisyon mem vyol, li pa ti omniprezan, li pa ti repandi.

Kot ena lafors lokipasyon, sirtu dan enn koloni-par-kolon, ena usi enn pake prezidis fane lor zom lepep oprime la: zom parmi oprime rutinnman prozete kuma vyoler e zot reprezant enn danze pu fam dan popilasyon opreser. Kumsamem vyol vinn enn zarm propagann fasil pu larme Israelyin servi pu akiz zom “Hamas” 

Rapor Pramila Patten

E asterla les nu get “Rapor” prodir par avoka Morisyin, Pramila Patten, ki Reprezantan Spesyal Sekreter-Zeneral Nasyon Zini lor Vyolans Sexyel dan Konfli arme ki finn fek pibliye enn “Rapor Misyon” lor enn “vizit Ofisyel” dan Israel ek dan West Bank.

Apre plizyer semenn kot media dan Israel, USA ek UK, finn ale mem kont lorganizasyon mondyal fam akoz zot “pa finn denons” sipozeman “vyol an-band” par zom Hamas kont fam Israelyin, e, tutfason sa seri zistwar spesifik propaze konsernan sipoze “vyol an-band” finn demaske enn par enn, Pramila Patten finn pibliye enn “Rapor” ki konklir vagman kumsa: “Baze lor linformasyon kolekte par lekip misyon depi plizyer surs ek [sic] indepandan, ena baz rezonab pu kwar finn ena vyolans sexyel an lyin avek konfli arme pandan atak 7 Oktob dan plizyer landrwa tutlong periferi Gaza, inklir vyol ek vyol an-band, dan omwin 3 landrwa. Dan diferan landrwa kot ti ena atak 7 Oktob, lekip misyon finn konstate ti dekuver plizyer lekor konpletman tuni uswa demi-tuni depi lerin ziska anba– sirtu fam – avek zot lame atase e fiziye plizyer fwa, suvan dan latet. Mem si li prev indirek, enn tel patern kot dezabiy fam e atas viktim kapav indikasyon finn ena kit form vyolans sexyel.” Sa kalite afirmasyon la li tu sinpleman pa enn prev “vyol an-band” kuma alege par Israel. Li zis enn repetisyon klem fer par larme Israel ek lider politik.

Pramila Patten, dan Paragraf 25, dir so “Rapor” napa enn “investigasyon”. Li sertennman napa enn. Li pa kler, par kont, ki li exakteman sipoze ete. So Rapor sertennman pa, kuma limem admet, rezilta enn investigasyon.

Li azute, dan paragraf 78: “Etan so misyon pa ti enn misyon investigasyon, so lekip pa finn kolekte linformasyon e/uswa tir konklizyon lor alegasyon krim par kit grup arme spesifik.” Alor, rapor pa zis li pa ditu enn investigasyon, me li pa atribiye nanye a Hamas uswa lezot grup spesifik, nonpli.

So Rapor plito pa plis ki enn rezime enn seri alegasyon vag li ek so lekip finn kolekte depi puvwar lokipasyon pandan 33 renyon avek organism Leta Israelyin inklir militer ek servis sekre. Sa li sertennman pa akseptab. Kuma limem li dir li dan so Rapor, “bizin suliyne linformasyon kolekte par lekip misyon an gran parti sorti sirtu depi institisyon nasyonal Israelyin.”

So Rapor fer enn-de afirmasyon baze lor temwanyaz depi 34 individi temwin (17 zom, nu prezime zot pa viktim, e 17 fam) dan paragraf 58-62. Sa grup temwin la inklir, dapre Rapor la, sirvivan e temwin atak 7 Oktob, premye lekip pu intervenir lor terin, lekip lasante e furniser servis, manb rezidan deplase depi kibutz Nir Oz e enn seri diferan lorganizasyon sosyete sivil Israelyin ek reprezantan akademia. Pena okenn eleman sibstansyel, eleman solid dan Rapor la pu sutenir alegasyon “vyol an-band”. Anfet, Rapor admet sa, sa repete partu partu dan Rapor. Sa dan so faver. Olye sa, Rapor ranpli avek rezon kifer pena nanye de sibstansyel.

Par exanp, lor kestyon evidans forennzik? Etan temwin ti ena byin tigit pu ofer, ki exper forennzik ti ena pu dir. So Rapor, drolman, dir “Labsans evidans forennzik konple finn enn obstak pu so lekip misyon tir konklizyon forennzik definitif dan buku instans.” Ena long but so Rapor lor kifer pena okenn viktim uswa sirvivan uswa temwin pare pu temwayne uvertman uswa pu zis temwayne, e lor kifer pena evidans forennzik. Me lefet e, pena nanyin dan sa Rapor la, exsepte pu dir bizin ena enn investigasyon indepandan. Byin sir, samem ki bizin.

Li sokan, lerla, pu mem apel dokiman Pramila Patten enn “Rapor”. Li kareman temwanyaz indirek depi zom larme perpetreter zenosid, ki dezespere pu truv enn exkiz pu zenosid zot pe komet, e plito zistwar vag depi lezot, suvan baze lor truv fam tuni uswa demi-tuni. Sa li preokipan, me sertennman pa kapav servi sa kuma prev ki finn ena “vyol an-band” kuma enn swadizan stratezi Hamas, kuma Israel e laplipar media Oksidantal mintenir.

Tusala pu dir, bizin ena enn investigasyon indepandan. E, sa dan so faver, Pramila Patten fer apel pu ena exakteman sa kalite investigasyon la.

Malerezman, so “Rapor” finn zwe dan faver puvwar lokipasyon Israelyin ki telman dezespere pu gayn enn exkiz pu kuver so perpetrasyon zenosid. Mem si naryin, byin sir, pa kapav servi kom exkiz pu komet zenosid.

Mansonz finn fane par dimunn byin ot kuma Netanyahu limem, repran par Biden, Blinken e tu zot alye Oksidantal dan atrosite e mansonz grotesk lor tibaba dekapite (ki Prezidan Biden mansyone de fwa, enn fwa mem apre so bann Konseye finn warn li ki sa ti anfet inn invante), tibaba kwi dan fur (demaske kuma but but lekor dimunn apre Elikopter Israelyin Apache finn tir misil dife-lanfer lor loto), enn tibaba inn swadizan arase depi vant enn fam ansint (enn fabrikasyon total). Se kan sa seri mansonz inn finalman expoze lerla propagandist Israelyin finn aktivman revinn avek zot alegasyon “vyol an-band”. Lofansiv propagann ti dirize par New York Times avek so lartik titre “Irle san parol” ki finn asterla konpletman diskredite. Sa lagazet la finn depi sa aret so seri zistwar kotidyin lor la kuma li ti promet e zurnalist ki ti ekrir sa lartik la finn diskredite akoz so pozisyon extrem pro-Israel, mem pro-zenosid. Apre finn fini expoz otan propagann Israelyin (ek Amerikin) e apre finn fini demaske fabrikasyon tut-pyes ek mansonz, tu “Rapor” ti devet omwin rod plito bann fe konkre, olye repet ankor propagann vag ek mansonz.

Rapor Patten, lor la, totalman inyoran lor lefet larme Israelyin finn servi misil dife-lanfer ki finn tuy telman buku Israelyin (osi byin konbatan Hamas ek lezot konbatan)e samem lakoz sa gran nonb lekor karbonize mansyone dan Rapor la. Ti bizin mansyonn sa. Okontrer, Rapor la asime dife ti form parti dan atak Palestinyin kont Israel. Sa seki Israelyin pe akeyir li ti ule fer li krwar. E se samem ki paret dan so “non-investigasyon”.

Rapor la paret totalman inyoran lor lord provizyonel Lakur Internasyonal Lazistis kot dimann Israel aret so bann aksyon zenosid. Sa pa mem mansyone kuma enn kontex dan Rapor la. U ti pu atann sa ti pu omwin fer Pramila Patten retisan pu pran ninport ki linformasyon depi so surs Israelyin san enn warning pu dir so bann surs finn zize par ICJ pe plozibleman inplike dan zenosid.

Dan ka kas miray kan konsantrasyon Gaza le 7 Oktob, zom lepep su dominasyon, Palestinyin, finn akize de “vyol an-band” e agresyon sexyel kont fam Israelyin, kuma enn zarm deger planifye. Purtan, nu pena okenn indikasyon lor sa gran nonb viktim kot ena prev forennzik pu indik vyol. Anfet pena enn sel but evidans forennzik, depi okenn viktim, mor u vivan. E ziska ler savedir pena okenn evidans vyol an-band depi sirvivan vyol an-band e temwin kredib vyol an-band. Li osi sinp ki sa.

Ankor enn fwa, dan so faver, Pramila Patten admet leswivan: 

“Lekip sa misyon la finn usi ena pu fer fas chalennj spesifik dan kolekte e verifye linformasyon sirtu lor kestyon vyolans sexyel liye avek konfli arme. Chalennj prinsipal ti nonb limite ek akse limite a sirvivan/viktim vyolans sexyel, e a sirvivan ek temwin atak 7 Oktob. Kan lekip misyon la finn resi zwenn avek enn-de sirvivan e temwin sa atak la, li pa finn resi zwenn okenn sirvivan/viktim vyolans sexyel 7 Oktob malgre tu zefor konserte pu ankuraz zot pu vinn delavan.” Finn donn nu dan so plas kifer pena okenn evidans viktim vyolans sexyel. Rapor la kontinye, direk lor “Kimanyer inn fer Lekip misyon konpran ena enn ti nonb sirvivan su tretman spesyalize e ankor dan enn leta tromatize extrem. Azute lor la, deplasman intern depi plizyer abitasyon dan periferi Gaza ver lezot lokalite, deplasman intern e ver pei tyers osi byin deplwaman premye lekip intervenan depi larme pu repus latak, finn blok akse a linformasyon presi prezan lor sayt.”

Paragraf 10, kot li dir “labsans evidans forennzik detaye finn enn obstak pu lekip misyon tir konklizyon definitif dan buku sityasyon. Ankor enn fwa, nu okontrer gayn rezon kifer pena evidans forennzik, “sa konplikasyon li akoz evidans fane parmi diferan azans e lefet evidans pa organize, e lefet lexersis pu match individi avek foto ek video spesifik tuzur ankur.” Lerla ena ankor enn lot admisyon ki lir “Interpretasyon erone e pa fyab forennzik par sertin non-profesyonel usi finn poz enn chalennj.” Eski li pe fer alizyon ar invansyon/fabrikasyon delibere mansonz par masinnri propagann enn puvwar lokipasyon ki pe plozibleman komet zenosid? Si sa leka, febles dan sa kalite langaz la konpromet so Rapor, met so Rapor andut.

Pu return kot nu ti kumanse: Nu pa finn truv fam dan Israel dibut, kuma dan muvman “me-too”. Ena zistwar met dan piblik alimante par Israeli Defence Force, puse dan media atraver sa larme la so lebra propagann, e repran par Loksidan. Sa li diferan. E “Rapor” Pramila Patten fit dan sa dernye kategori la. Me, seki nu finn gayne li enn ka “linsaz” lor enn lesel masif par Israel lor lepep Palestinyin an zeneral e sirtu dan Gaza depi le 7 Oktob, enn letandi telman masif ki li finn zize kuma “plozib” zenosid par pli ot lakur Nasyon Zini, ICJ ki Pramila Patten pa mem mansyone e purtan li form parti dan samem sistem Nasyon Zini. 

Alegasyon “vyol an-band” pe fer kont zom dan sosyete su lokipasyon militer par koloni-kolon. Sa kalite demonizasyon zom dan klas pli anba e lepep oprime kuma “vyoler” li komin – kuma li ti ete pandan esklavaz, su rezim aparteid Sid Afrik, su kolonizasyon Alman kuma enn exkiz pu komet zenosid kont popilasyon Hereros ek Namakwa dan Namibi, e mem ziska fek la dan peryod post-esklavaz dan Lesid Profon Lamerik kont esklav lib par kolon blan. Vyol li enn krim notwar komet par zom avek puvwar lor fam zot vyole. Napa lekontrer.

Ansom pu dir muvman fam mondyal ek dan Moris, finn anseyn nu kimanyer pu mefye danze pu inpoz silans fam – e usi, anmemtan warn nu kont danze linsaz par gang ek Leta zenosider ki instrimantaliz vyol ek rimer vyol pu perpetre pinisyon kolektif, mem al ziska zenosid, kont enn lepep oprime. E, pu fer li posib pu perpetre sa pinisyon la, perpetreter depann buku lor fabrik ek fann, ek fer lezot propaz, propagann leta e propagann militer. Tu dimunn ki reflesi ena pu asire ki zot pa al fini par propaz propagann ki so bi se pu zistifye enn Leta ki pe komet zenosid. Pramila Patten pa finn asire pu li pa fer sa. Pli pir, li finn al fer exakteman sa.

Lindsey Collen pu LALIT. Lindi 11 Mars 2024

Tradiksyon: BK avek kudme AA