Lamars Fam kont Zenosid Israel pe Perpetre
01.03.2024
Zordi Muvman Liberasyon Fam (MLF) ti kordinn enn “Lamars Fam pu Lape” dan sant Port Louis midi. Lamars ti kont zenosid ki Leta Israel pe fer kont lepep Palestinn e pu exprim solidarite avek lepep Palestinn an antye, e sirtu seki res Gaza. Bandrol ki ti lans lamars, dan lame Sadna Jumnoodoo, Veronique Topize ek Madoo Gungadin, ti lir “ FAM PE DIR: FREE PALESTINE” e par deryer, bandrol ki finn konklir manifestasyon, dan lame Firoza Dilmohamed ek Sudha Ramen, ti lir “Israel-USA: STOP ZENOSID!” Ti ena enn kozri byinveni par Lindsey Collen e enn diskur par Manb MLF ki finn al Palestinn de fwa (West-Bank ek Zerisalem Es) e osi enn fwa kot li finn sey al Gaza ar enn gran grup internasyonal, me Prezidan Mubarak Lezip ti anpes zot tu rantre.
Par santenn fam ti fer sa lamars dan sant lavil pu mark Zurne Internasyonal Fam ki pe vini, e pu dir non a zenosid ki Israel pe perpetre avek konplisite USA.
Ti ena enn delegasyon fam depi sindika kuma CTSP, ki osi dan Solidarite Morisyin avek Lepep Palestinn (SOMALP) kot MLF osi manb. Ti ena enn delegasyon fam depi Grup Refizye Chagos. Ti ena reprezantan depi Lel Fam parti politik swivan: Parti Travayist, MMM, PMSD, Lalit. Parmi ti ena trwa Ansyin Minis – Arianne Navarre, ki tuzur Depite, Aurore Perraud ek Jocelyne Minerve – ek Depite Stephanie Anquetil. Ti ena enn bon delegasyon fam dan “Fam Ape Zwenn”. Ti ena reprezantan lasosyasyon divers kuma Lasosyasyon Alzeimers, Consumers’ Action Group ek Grup Abaim, e lasosyasyon fam dan rezyon. Ti ena enn mesaz solidarite depi Rodrig, siyne par Stivelle Castel ek 7 lezot fam Rodrig.
Dimunn dan tu batiman Port Louis finn sorti lor trotwar pu solider avek lamars. Ena dimunn finn mem desann dan biro, vinn anbras manb muvman fam.
Pandan lamars, diferan manb MLF, sirtu Rajni Lallah, Begum Budulla, Anne-Marie Jolie, Kisna Kistnasamy, finn kriye slogan dan port-vwa dan enn “korl e risponns”. slogan popiler ti enn per slogan:
Korl lor portvwa: “Israel fer zenosid!”
Repons laful: “STOP! STOP! STOP!”
Korl lor portvwa: “Lamerik furni zarm!”
Repons laful: “STOP! STOP! STOP!”
Ti osi ena enn slogan ki liye lalit Palestinn avek lalit Chagos-Diego-Garcia:
Korl lor portvwa: “Ferm Baz!”
Repons laful: “DIEGO!”
Lezot slogan ti kont lokipasyon ek kont kolonizasyon, pur lape e pur seselefe. Ti ena osi enn lor “Led imaniter! – Bizin rante!”
Ala trak ki ti distribiye pandan lamars ki explik so bi:
“Zordi nu pe partisip dan enn WOMEN’S PEACE MARCH an solidarite ar Lepep Palestinn
pu mark Zurne Internasyonal Fam 2024.
“Nu pe swiv avek lorer lor rezo sosyal ek lezot medya manyer ki Leta Israel pe tuy Palestinyin dan Gaza: fam, zanfan, vye gran dimunn, malad dan lopital, seki li finn deza blese ar bom, tu.
Israel finn masakre plis ki 30,000 dimunn. E li finn kontiyne malgre zizman interimer ICJ (International Court of Justice).
“Larme Israel finn literalman lasas bann fami Palestinyin, obliz zot fwir zot lakaz, al rod refiz dan Lesid. Li viz pu expilse zot ver Dezer Sinai dan Lezip.
“Tusala vedir Israel, avek kudme so veritab patron, guvernman USA, kupab fer zenosid.
Leta Israel finn anserkle Gaza, ranferm Palestinyin laba dan enn leto, enn leta de-syez,
anpes manze rantre, kup dilo, anpes medsinn rantre, lerla larg bom 1,000 kilo lor tu: lor lakaz dimunn, lopital, karo legim, zurnalis ki temwayne, dokter ki donn swin, lekol, sime, CWA laba, sistem makalpayn, CEB laba.
“Ki revandikasyon nu Lamars zordi?
“Nu, fam dan muvman fam partu dan lemond, tut long nu listwar finn fer lamars kont lager, militarism, lokipasyon ek kolonizasyon. Nu dibut pu lape. Zordi, parey. Nu pe dibut kont zenosid.
“1. Nu kont zenosid ki Leta Israel pe fer kont Palestinyin. STOP ZENOSID TUTSWIT!
“2. Nu denons leta USA ek lezot Leta ki furni zarm, larzan, kuvertir diplomatik pu Israel. ARET KONPLIS!
“3. Nu sutenir ka zenosid ki Sid Afrik finn met divan ICJ kont Leta Israel. LETA MORIS BIZIN AL DEPOZE DIVAN ICJ, kuma li fek fer dan ka ICJ ki Palestinn finn mete akoz lokipasyon militer ilegal Israel depi 1967, e akoz kolonizasyon depi 1948, depi moman Britanik larg Palestinn depi so lanpir kolonyal. Palestinn zame pa ti dekolonize, gayn so lindepandans. Loksidan, atraver Israel, finn rekoloniz li, plito.
“4. Tusala pu dir Larme Israel bizin aret bombard Gaza. Seselefe imedya e san kondisyon! Israel avek kudme USA pa kapav kontiyn anprizonn dimunn Gaza, obliz zot fwir kut-bom depi zot lakaz, priv zot manze, kup zot dilo, detrir zot sistem lasante, lerla kontiyn larg bom lor zot. Li inimin. Li zenosid.
“5. Leta Israel bizin tutswit lev leta-de-syez lor Gaza, terminn so lokipasyon West-Bank inklir Jerusalem Les!
“6. Nu pe fer lamars zordi pu lape. Pu gayn lape, fode pena ni lokipasyon, ni kolonizasyon, ni apartheid ki enn krim kont limanite, ni leta de-syez, ni bombardman, ni Israel afam Palestinyin Gaza, kree dezast imaniter par expre.
“7. Kuma UK-USA finn servi lafors pu obliz Chagosyin abandonn sa but teritwar Moris ki UK finn kokin, Chagos inklir Diego Garcia, kumsamem ki USA-UK pe servi lafors pu sey obliz Palestinyin abandonn zot later pu Israel kokin. Kan Palestinyin reziste, Israel reponn par akseler so zenosid kont lepep Palestinyin ki kumanse an 1948 avek “Nakba”, ki vedir “gran katastrof”.
Dan trak la, ti ena trwa slogan:
STOP ZENOSID!
FREE PALESTINE!
SESELEFE TUTSWIT!
