Zenosid Blog 35 – USA + Israel Atros – Nepli Siportab, Nepli Siportab Mem
25.02.2024
Yer swar, mo vire turne dan lili avek zimaz grave lor kuma USA ek Israel pe afam zanfan Gaza amor. Mo pa kapav anpes mwa vizyonn zimaz Biden ek Netanyahu, avek sanfrwa, pe masakre fami Palestinyin antye avek bom mortel large avek lintansyon kriminel. E tutolong, mo pe gayn kosmar Zenosid-Joe ek so exekisyoner Netanyahu pe literalman lasas-atrup popilasyon Gaza, komsidire zot trupo zanimo, dan Lesid lanklav Gaza, pe prepare pu expilse zot dan Dezer Sinai dan Lezip – kuma zot plan orizinal konzwin ti ete.
Zordi gramatin, kan mo finn leve, sa bann zimaz la pe kontinye turmant mwa. Alor, mo sorti dan ti lapli e al balye ek ramas trwa gro desbinn ranpli avek fey tonbe apre siklonn Eleanor, pu sey sorti depi sa kosmar reel tu et imin avek inpe sansibilite pe traverse. Li marse pu enn moman me byin vit sa kriote imin, depravasyon moral USA ek Israel revinn ant mwa ankor. Mo pa finn resi fini lartik lor lezot size inportan, suvan lor size liye, kuma: deba kot ICJM kot mo ti koze lor asasina Kaya par lapolis e exaksyon kominal par diferan but dan leta kont fami inosan; lor kimanyer Premye Minis Sunak telefonn Premye Minis Jugnauth sa mem zur Moris pe pran laparol divan ICJ lor Palestinn; pledwari oral byin prepare par Jagdish Koonjul e avoka Pierre Klein lor nom Leta Moris kot zot fer paralel avek persistans kolonizasyon ek lokipasyon Moris par UK-USA, zizman dan ka Moris, e aplik sa avek Israel ek USA-UK zot persistans kolonizasyon ek lokipasyon Palestinn. Mo ekrir lamwatye lartik, e lerla mo ante par sa zenosid pe deferle dan LINSTAN PREZAN la. Sa LINSTAN-PREZAN la sibmerz mwa. E seki pli pir se nu tu, inklir mwa, ti kone sa pu perpetre par USA-Israel, kuma li pe perpetre asterla la. Kuma sa bann zom la pu sort ladan apre? Sa, usi, turmant mwa. Enn lavenir posib avek ankor plis inpinite.
Depi nu Zenosid Blog kumanse, lor so dezyem zur mem, u kapav al cheke – nu ti prevenir USA-Israelyin zot bi militer ek politik se sa expilsyon forse Palestinyin dan Dezer Sinai. Bi sete, e tuzur e, pu tuy, paraliz, mitil, amenn destriksyon ek larwinn e lerla expilse leres. Sa bi la. Pu met li kri-kri. Biden ek Blinken ek Netanyahu ansam finn planifye sa. Zot finn konsevwar li. Asterla zot pe met li an exekisyon.
Lekip sink-sis parmi nu ki prepar sa blog la konn sa, finn ekrir li, e nu pa parmi dimunn pli informe lor sa bul later la. Okontrer, Biden ek Sunak tret Morisyin, inklir Chagosyin, kuma zanimo uswa idyo, pa dimunn informe. Zot misye konn-tu, plann-tu, e exekit-tu. E zot viz pu ena inpinite eternel? Get kriminel deger Bush ek Blair. Eski zot ferme dan prizon? Non, zot pe fer vantar partu lor zot rol dan listwar. Zurnalist Julian Assange, enn ero nu lepok, kikenn ki finn rann piblik fim ek kab lor krim deger Bush ek Blair, li, li dan prizon. Asterla mem, ena menas deportasyon depi prizon UK a USA lor li kot posib li fer fas santans penndemor kont li. Sa malgre enn vot masif Zur St Valantin dan parlman Lostrali pu liber li e return li dan Lostrali kot li sipoze ete. Li pe viv sa lanfer la, pandan zenosid USA-Israelyin pe angluti otan lavi.
Tutfason, nu finn sanses warn lor veritab bi militer Biden ek Netanyahu: Pu tuye, mitile-paralize, raz tu kiltir e plantasyon, aplati Gaza, e lerla expilse otan dimunn ki posib depi laba.
Asterla, linn vinn kler pu tu dimunn.
Asterla, IMF, pe mem vinn prepar – sanpider, kri-kri – finansman Lezip pu permet li pran refizye. Dan so pres brifing yer, IMF dir: “Konsernan kestyon lor presyon linpak potansyel depi refizye Gaza, seki nu pe truve dan Lezip ena nesesite pu ena enn program led konplet pu Lezip. Nu pe travay an etrwat kolaborasyon avek lotorite Ezipsyin e zot partner pu asire Lezip pa mank finansman neseser e usi pu asire ki program la anmezir, u kone, [sic] pu asir stabilite makro-ekonomik ek finansye dan Lezip.” Alor Lezip “ek so bann partner” nu prezime pu dedwann USA ek Israel kan moman expilsyon vini? Si nu, lepep lemond pa resi aret sa expilsyon la, purswiv okriminel Netanyahu ek Biden, e pran swin Palestinyin viktim sa foli zenosider la.
Kriote lintansyon USA + Israel pu afam fami Palestinyin, bonbardman sistematik intansif rezyon antye, e lasas Palestinyin andeor zot pei, li nepli siportab, nepli siportab mem. Ankor pir. Li enn repetisyon olokost 1948, kan par santenn milye Palestinyin ti forse pu abandonn zot lakaz dan Palestinn. Manb Kabine Deger Israelyin e Minis Lagrikiltir Avi Dichter ti piblikman menas sa, enn dezyem Nakba uswa olokost, an Novam. “Asterla nu pe deklans Nakba Gaza,” li deklare kuma vantar. Tu sa zimaz inpinite USA + Israel, enn kote e anmemtan sa pledwari oral byin fisle avek argiman konvinkan, solid ek for par 50 pei ek trwa lorganizasyon pei rezyonal dan ka ICJ lor kolonizasyon ek lokipasyon ilegal Israel paret kuma dan enn rev, pe arive dan enn lemond paralel.
Vizaz Blinken ek Biden, parey kuma personaz fiksyon Dorian Gray res elegan ek suriyan kan zot paret lor TV, tandi ki zot portre, kasyet dan larmwar, puri, pe vinn bann mons ki zot inn devini. Nu bizin expoz zot. Tandi ki Netanyahu li, dan lavi reel li ena enn vizaz vremem dyabolik, pe apiy so kanpayn lafaminn provoke, kanpayn tuye, mitilasyon, destriksyon, ek so kanpayn lasas-trake, anparti pu li personelman akros ek puvwar pu, asontur, evit li al ferme dan prizon lor sarz koripsyon. An verite, Netanyahu li lake dyab ki asterla pe komann lisyin zenosider, Biden.
Mem parol ase for pena pu exprim seki nu pe temwin. Temwayn enn zenosid li nepli siportab, nepli siportab mem. Alor, nu fer apel a tu dimunn. Dibut. Fer tann u lavwa. Fer u lorganizasyon pran pozisyon. Avoy u pozisyon a Premye Minis. E fam, vinn zwenn dan Lamars Fam pu Lape Vandredi 1 Mars midi. Li kumanse e fini enn ertan apre Zardin Konpayni.
Lindsey Collen for LALIT. Samdi 24 Fevriye 2024
Tradiksyon: BK avek kudme AA
