LALIT Apel Premye Minis sutenir ka Sid Afrik divan Lakur ICJ kont Israel pu krim zenosid
21.02.2024
LALIT dir “Stop Zenosid!” “Izol Israel!”
LALIT re-iter so lapel a Premye Minis Pravin Jugnauth pu sutenir ka Sid Afrik finn mete divan Lakur Internasyonal Lazistis (ICJ) kont Israel pu vyolasyon lalwa internasyonal dapre Trete pu Prevansyon e Pinisyon Krim Zenosid. Zordi li ankor plis inportan pu sutenir aksyon legal Sid Afrik. Palestinyin dan Gaza pe sibir enn prosesis ki viz pu aneanti zot net.
Dirizan Israel finn uvertman menas aneanti Palestinyin dan Gaza. E li pe fer li.
Premye Minis Israel, Netanyahu finn donn direktiv so larme pu atak Rafah, lavil lor frontyer ar Lezip, kot li, Israel, finn servi lafors pu obliz Palestinyin Gaza ale pu evit bombardman. Alor, 1.5 milyon Palestinyin finn oblize al antase, al kwinse, al pyeze par Israel. Larme Israel pe rod pus zot dan dezer dan Lezip, Dezer Sinai. Lezip fini aliyn tenk pu bare, fini kumans konstrir miray pu anpes sa. E antretan, tusa fam, zanfan, malad, dimunn blese, refizye Palestinyin, vye dimunn kuma ti-baba, zot pena okenn plas pu ale. Israel pe priv zot manze, dilo, medikaman. E li pe larg bom lor zot, fer tenk fizye zot. Li kler ki aksyon militer Israel pe delibereman viz pu aneanti lepep Palestinyin ar bom, ar lafin, ar maladi. Li enn zenosid.
Li bon rapel ki Lakur ICJ antretan, le 26 Zanvye, finn rann enn zizman interimer, ki baynding lor Israel e osi lor tu Leta dan Nasyon Zini. Ladan li fer apel Israel, antrot, pu aret tuy Palestinyin, pu aret bles zot, e pu aret detrir zot mwayin sibzistans. Me Premye Minis Netanyahu e so Kabine Deger ankor pe defye lalwa internasyonal, ankor montre zot mepri pu tu linstans UN. Israel finn kareman refiz pran mezir ki bizin pu anpes enn zenosid Palestinyin. Larme Israel pe kontiyne tuy Palestinyin dan Gaza ek Wes Bank. Aksyon militer Israel pe nye drwa elemanter Palestinyin e sirtu pe detrir baz e posibilite materyel zot lexistans. Zot pe kontiyn bonbard e atak Gaza, e anmemtan pe antrav aprovizyonnman manze ek medikaman rant Gaza, livre dan Gaza. Depi ki ICJ inn rann sa zizman la tulezur larme Israel pe tuy 100-200 Palestinyin.
Israel pe azir kuma enn leta or-lalwa, enn leta bandi. Moris bizin donn so sutyin pu tu aksyon ki viz pu izol Israel politikman e osi ekonomikman. Li bon ki Premye Minis Moris finn pran pozisyon anfaver lepep Palestinyin dan Lasanble Linyon Afrikin sa semenn la. Me sityasyon finn agrave pu Palestinyin. Bizin donn ful sutyin ka Sid Afrik divan ICJ kont zenosid Israel. Pli ena pei ki ralye ar Sid Afrik pli Israel pu akile e izole.
Zordi enn lot ka kont Israel pe pase divan lakur ICJ. Palestinn pe expoz vyolans ek ilegalite Israel so lokipasyon militer, so politik Aparteid e so 76 an kolonizasyon teritwar Palestinn. Inpinite Israel bizin arete, so dirizan bizin reponn pu atrosite zot finn e pe komet kont Palestinyin. Li bon ki Guvernman finn deleg Reprezantan Moris Nasyon Zini, Jagdish Koonjul, pu pran laparol lor nom tu Morisyin anfaver Palestinn dan sa ka la.
Inn ler pu Guvernman Moris denons osi USA ek tu lezot leta ki konplis ar Israel. Zot osi bizin reponn divan Lakur. Lamerik li prinsipal furniser zarm e surs finansman Israel. Li fek re-servi so Veto dan Konsey Sekirite pu blok tantativ terminn Israel so zenosid kont lepep Palestinn.
Moris fode pa renuvle okenn kontra existan ar konpayni Israelyin. Bizin veye ki pena prodwi Israelyin lor marse. Bizin averti tu sipermarse pu napa met anvant prodwi Israel kuma manb SOMALP pe fer. Dan 2 diferan sipermarse Winners, manb SOMALP finn truv zoranz sorti Israel avann. Nu pe piblikman averti manejmennt Winners pu aret vann prodwi enn pei ki pe perpetre enn zenosid.
Inn ler pu Leta Moris propoz Linyon Afrikin, dabor, manb UN answit, ki sispann Israel depi Nasyon Zini. Pei lemond ti fer sa kalite sispansyon kont Sid Afrik Apartheid an 1974. Presedan tini.
Izol Israel! Stop Zenosid! Liber Palestinn!
Alain Ah Vee pu LALIT
21 Fevriye 2024
