Zenosid Blog 33 –Limanite So Meyer ek So Pir
17.02.2024
Nu pe viv dan enn lepok zenosid. Dan sa peryod la nu temwin, malgre nu ti a prefer pa truv li kumsa, seki meyer dan limanite. Me nu usi pe temwin limanite so pli pir. Dan LALIT, nu diskit sa laspe personel zenosid: kimanyer li dir pu nu tu ena pu temwin, anmemtan seki meyer ek seki pir dan limanite. E pu kontinye viv nu lavi, antretan.
Nu koz lor kimanyer nu truv zenn-om sitan dus dan Gaza pe sap zanfan depi dekonb apre enn bom Israelyin finn detrir zot blok flat. Pe fuy dekonb avek zot lame mem.Uswa enn zenn-om Palestinyin pe sarye, avek telman prekosyon, enn tibaba muran ki finn blese kut bom Israelyin, dan lopital mem kan lopital, li, asontur pe bonbarde. Nu truv enn doktores galupe sorti deor pu al sers enn pasyan blese, pandan pe ena enn fiziyad-snayper Israelyin dan lantre Lopital Nasser. Nu truv staf lopital organize pu met pasyan lor sivyer e lerla servi enn lakord pu ris zot ver laport lopital, pu evit snayper tuy travayer lasante dan lantre lopital. Nu finn truv enn madam fiziye kan li pe sorti depi andan Legliz kot li ti pe refizye, kan li pe al twalet. Nu finn truv enn travayer zu sorti pu al donn manze zanimo su so sarz apre bonbardman Zu Gaza, riske so lavi. Nu truv enn zurnalist pe travay pu expoz laverite seki pe pase dan Gaza pu lemond antye truve, mem kan larme Israelyin pe lasas so fami, so koleg ek so vwazin pu “farus” zot ver Rafah dan Lesid Gaza, e lerla tuy zot kanmem. Nu truv dimunn pe partaz zot lakaz, zot latant, zot manze avek zot vwazin mem kan pe afam zot par expre pu zot mor defin. Nu truv zot pe reziste kan pe fors zot al dan Dezer Sinai dan Lezip. Zot kone, parey kuma finn arive an 1948, zot pu nepli kapav re-returne. Samem kifer ena 6 milyon Palestinyin refizye dan lemond. Nu truv kuraz e nu truv kimanyer sakenn pe pran swin dimunn akote zot. Nu temwin bonte fas a britalite. Nu truv konpasyon fas a kriote.Nu truv dimunn pe partaz so lakaz, uswa mem partaz so latant, fas a lokipasyon militer lor totalite zot later. Nu truv seki meyer dan limanite.
E nu pe oblize, dan sa mem moman la, temwin limanite so pli pir.
Leta Israelyin organiz so larme solda pu bom inosan, pu kup kuran inkibater kot ena zanfan prematire e lerla kuver dan enn fason grotesk atraver filme kimanyer zot pe fer donasyon inkibater. Anfet pa ti mem enn mank inkibater, zis kuran pa ti ena akoz larme Israelyin inn kupe. Nu truv solda pibliye zot krim onnlayn, glorifye zot bann aksyon zenosid. Nu truv Leta Israel tuy enn adolesan, lerla avoy de veikil larme pu blok pasaz lanbilans, enn divan lanbilans so kapo e lot veikil larme blok li depi par deryer, pu les zanfan seyne amor avek emorazi. E sa li pa nuvo. Nu finn truve kuma Leta Israelyin difiz sante zenosider kot fer zenn zanfan sante, dimann exterminasyon. Nu finn temwin kimanyer Leta Israelyin konfiske lekor dimunn mor e anprizonn zot kadav. Sa usi napa nuvo. Sa ti pe arive depi bann lane 1960 vini mem. Nu finn truv Leta Israelyin aret enn zanfan trwa-an, pu fors enn adilt rann lekor lapolis. Sa ti sink-an desela. Nu finn temwin kuma IDF dinamit dimunn so lakaz par expre. Sa ti pe arive avan Hamas ti mem existe. Li so polisi, li politik Leta Israel. Leta Israelyin finn devlop tusala an enn lar makab. Li osi vye ki Leta Israel. Sa ti arive depi byin avan Hamas ti mem existe. Nu finn truv lopital sible ek detrir dan Gaza. Sa, usi, napa nuvo. Nu finn temwin kuma larme Israelyin fizye travayer lopital. Ki nu pa finn truve? Nu finn tann larme Israelyin difiz lor oparler koze pu ridikiliz vye bolfam ek tibaba kan zot dan lamars lamor ver Rafah. Tu nu finn truve. Ziska nu truv ankor pli pir.
Imin kapav osi merveye. Zot reziste, zot partaze, zot kree nuvo fason pu ed e permet tu lezot sirviv.
E purtan imin, kan gradyelman anbrigade dan enn Leta fasist, kan li benefisye inpinite par seki pwisan - isi nu pe fer referans an partikilye a Leta USA pwisan kot li finn, parfwa tusel dibut ansam ar leta Israel dan Konsey Sekirite Nasyon Zini – zot vinn bann perpetrater orib kriote inimazinab. Zot, et imin, vinn deprave. Ena, seki ti kapav vinn zenn-om dus e fam kuraze, vinn sa mertriye insansib, ki tuy ti baba dan lebra, sit Labib pu ankuraz sa, tuy vye dimunn, dimunn malad e pasyan blese, ki detrir lakaz konstrir par fami deza refizye depi 1948, fer zot vinn refizye ankor enn fwa. Enn solda Israelyin vant limem lor kimanyer pandan “Gran Lamars Retur” pasifik Palestinyin dan Gaza kumanse an 2018, li finn gayn “42 Zenu dan Enn Zur”. Solda Israelyin ti gayn lord pu par expre vize, blese pu paraliz manifestan pasifik Palestinyin – buku parmi ti selman pe dibut la pasifikman. Me asterla, avek kudme manifestasyon e ka lakur, lagrev doker, lamars, nu tu pe aprann laverite lor sa nuvo form kolonizasyon Palestinn depi 1948, e lokipasyon militer Palestinn depi 1967.
E, laverite, kan li expoze, pu amenn lafin sa kriote, sa opresyon, sa lokipasyon militer imoral ek ilegal, sa aparteid Israel finn inpoze par lafors kri-kri sa kolonizasyon ki finn deza denonse kuma zenosider lontan lontan desela. Laverite, kan li sorti, ed nu pu vinn parey kuma Palestinyin kuraze, atansyone, zenere, kot zot finn montre nu seki ena de meyer dan nu natir kuma imin. Alor, anu kontiyne proteste.
Nu fer apel a fam pu partisip dan “Lamars Fam pu Lape” Vandredi 1 Mars dan Port Louis. Anu demontre seki meyer dan nu limanite atraver nu konpasyon, nu solidarite avek lepep Palestinyin. Palestinyin finn montre nu sime kuma pu vremem et seki meyer dan Limanite.
Lindsey Collen pu LALIT. Vandredi 16 Fevriye 2024
Tradir par BK avek kudme AA
