Aret Israel so Zenosid e Liber Palestinn: Lamars Fam pu Lape – Vandredi 1 Mars midi
14.02.2024
LALIT pe invit so manb fam e tu fam ki ule pran pozisyon kont zenosid e ansam ar lepep Palestinn, u kontakte MLF pu donn kudme organiz sa lamars fam pu lape la. Li pu le 1 March midi Port Louis. Randevu Zardin Konpayni. Manyer ede se pu invit enn manb MLF vinn fer enn reynion avek 4-5 fam ek tifi, e kumsa prepare pu lamars la.
Ala kominike MLF:
KOMINIKE DEPRES MLF
“Lamars Fam pu Lape e pu Sutenir Palestinyin”
Muvman Liberasyon Fam finn pran linisyativ organiz enn “Lamars Fam pu Lape” pu tu fam-de-konsyans kapav dibute, pran pozisyon piblik kont masak ki Leta Israel pe inflize lor lepep Palestinyin, sirtu dan Gaza. Nu pe osi montre sutyin ar lepep Palestinn, e sutenir ka Sid Afrik inn mete kont Israel pu zenosid divan Lakur ICJ.
Randevu:
Vandredi 1 Mars
MIDI
Zardin Konpayni
La Chausée, Port Louis.
Lamars pu dan sant Port Louis. Nu pe viz terminn lamars e separe 1.00 pm.
Pu premye fwa dan listwar limanite, nu pe temwayn enn zenosid dan moman ki li pe arive. Larme Leta Israel pe tuy fam ek zanfan, vye grandimunn, ti-baba lor inkibater, dimunn deza blese dan lopital, seki malad, infirm, pe viv avek enn disabiliti, fam ki pe akuse. Li finn ariv ler pu nu, fam, dibute, pran enn stenn.
Dayer, “Trete pu Prevansyon e Pinisyon Krim Zenosid” donn nu enn devwar pran pozisyon pu anpes zenosid – antan ki pei, e osi antan ki lepep Morisyin.
Anmemtan, atraver nu lamars fam, nu pe sutenir Palestinyin dan Gaza ki menase zordi-mem ar exterminasyon.
Lakur internasyonal pli ot dan lemond, International Court of Justice (ICJ), ki tu Morisyin kone parski laba ki pei Moris ti ranport laviktwar kont lalyans UK-USA lor kestyon Diego Garcia ek Chagos. ICJ finn donn so ruling provizwar: wi, Sid Afrik ena rezon, efektivman ena enn Prima Facie Case kont Leta Israel pu zenosid.
Lakur dir Israel bizin aret tuy Palestinyin. Me, Israel pe persiste, tuye, masakre mem. Inn ariv pre 30,000 dimunn ki li finn tuye. Lakur dir Israel bizin aret “bles” Palestinyin, ki li kote fizik, ki li kote lasante mantal. Me, sa osi Israel pe persiste bles dimunn. Inn ariv pre 70,000 dimunn. E Israel pe kontiyne anpit lame ek lipye, fam, zanfan, tu dimunn. Kree sikatris sikolozik inimazinab. Lakur dir Israel oblize fasilit aprovizyonnman manze, dilo, tu servis esansyel, me Israel pe kontiyn, par expre, afam Palestinyin. Leta Israel pe fer ki trez zanfan Palestinyin dan Gaza mor defin sak zur ki traverse. Sa, e anplis zanfan ki mor anba bom Israel ki tom direk lor zot latet.
Pei pwisan kuma USA pe kontiyn furni zarm pu Israel perpetre sa masak la. USA pe persiste done-mem larzan pu finans sa zenosid kont Palestinyin la. USA pe asire-mem kuvertir diplomatik pu Israel so zenosid kriyel ek inimin.
Alor, a lokazyon Zurne Internasyonal Fam, zordi MLF pe anons nu apel formel pu sa “Women’s Peace March” le 1 Mars dan Port Louis. (Nu pe fer li enn semenn avan Zurne Internasyonal parski le 8 Mars anfet tom zur Mahashivratri.) Nu finn fini kontakte plizir grup fam avan, pandan preparasyon pu sa invitasyon la.
Rajni Lallah (5 253 4378), Ragini Kistnasamy, Anne-Marie Joly, Firoza Dilmohamed,
Lindsey Collen (5 781 6256), Sadna Jumnoodoo, Cindy Clelie,
Veronique Topize, Begum Budullah, Sudha Ramen.
lor nom Muvman Liberasyon Fam, 13 Fevriye, 2024.
