Zenosid Blog 31 – Amezir USA Insit Zenosid par Israel
08.02.2024
Israel aster pe deklans masak debride ankor pli pir kont Palestinyin dan Gaza. Mem si trez zanfan Palestinyin finn mor avek malnitrisyon sever akoz Israel so leta-desyez lor Gaza, Biden pe tuzur mintenir so ful baking kuma “bayer defon” Israel. Sa mem li pe vinn pli difisil pu nu, nu partu dan lemond, amezir nu pe swiv sa masak par Israel, pu debruye avek “lavi normal”. Enn sansasyon angwas pez lur lor nu lestoma. Mazine si nu ti pe, anse moman, viv dan Gaza City dan Lenor, uswa dan Khan Younis dan Sant uswa pre ar Rafah plis dan Lesid, olye dan Ragoo Lane dan Bambous kuma nu, uswa kot sa u reste. Amezir nu pe tann sa burdonnman angwasan dronn ki presed masak Israeli-USA par bom, nu kumans santi sa duler kranp lafin inflize kont nu ek kont nu zanfan par lafaminn inpoze par sa lalyans terer USA-Israel.
Konparezon Palestinyin avek sa brav sulevman pandan enn-mwa kominote Zwif Geto Warsaw kont lafors lokipasyon Nazi an 1943 pe vinn deplizanpli kler sak zur. Kan ekrivin Masha Gessen, tifi sirvivan olokost, ti premye fwa fer sa konparezon la dan so lartik dan New Yorker le 15 Desam, li ti pe truv divan. Li fer nu realize kuma li pa etonan kifer propagandist pro-Israelyin finn travay pandan dezane pu rann sa konparezon la ilegal akoz zot ti kone sa ti pu finalman vinn evidan, atraver inpoz enn definisyon anti-semitism ki uver sime pu Israel azir kumsa avek inpinite. Zwe USA-Israel inn ferme asterla. Me zenosid kont Palestinyin pe akselere.
Israeli Defense Force finn literalman “atrup” Palestinyin, ki Minis Defans Israelyin Yoav Gallant notwarman finn apel “zanimo imin”, depi antye Gaza ver enn tipti but later dezolan lor frontyer pre kot dezer Ezipsyin Sinai, anserkle dan sa miniskil “Geto Warsaw” alinteryer sa “Geto Warsaw” Gaza. Guvernman Israelyin pe kontinye ordonn Palestinyin pu deplase ver landrwa “an sekirite”, ankor deplizanpli pli pre ar sa but later grander enn muswar, anmemtan pe sanses kontinye bonbard zot tuzur. Lord evakyasyon Israel konsern de-tyer Gaza, dapre Nasyon Zini. Ki li ete, si li pa zenosid?
Li enn extrem kriyote masiv premedite zame pa finn truve andirek layv lor video.
E antretan, larme Israel pe blok manze pu rant dan Gaza. Lel drwat fasist Israelyin pe fizikman blok kamyon aprovizyonnman manze. Alor asterla, tu abitan Gaza pe viv pli pir lexperyans, parey kuma sa bann fami kominote Zwif dan Warsaw ek dan kan konsantrasyon finn sibir: duler lafin atros konstan. E asterla shelter frazil kot IDF finn fors zot ale pe anvahir par divan glasyal e lapli liver. Pena twalet. Dilo mizer. Kumsa pe provok maladi pu delibereman propaze. Zenosid par Israel pe asterla anplifye.
E ki Biden fer? Li apez Netanyahu. Parey kuma Premye Minis UK Neville Chamberlain, dan bann lane 1930, ti apez Hitler. Sa, usi, li enn konparezon nu bizin fer isi. Li efreyan.
Ankor pli pir. Ki USA pe osi fer, pandan IDF pe blok kamyon nuritir, e milis fasist blok kamyon? USA blok so finansman pu organism Nasyon Zini, sel organism lor bul later ki kapav alez sufrans Palestinyin perpetre par Israel. Sa organism ti met dibut par Nasyon Zini parski setenn Rezolisyon Nasyon Zini ti kree Israel ki asontur fer milis Israelyin fors par milyon Palestinyin pu deplase, e kite sove kuma refizye. UNRWA ena enn devwar istorik sakre anver refizye Palestinyin. Les nu etidye depre sa blokaz larzan Amerikin a UNRWA. Landime finn ena zizman pli ot Lakur Nasyon Zini ICJ, Israel anons so alegasyon kont enn duzenn anplwaye UNWRA san donn okenn prev, e USA tutswit kup so finansman a UNRWA? Sa ekivo a konplisite avek zenosid. Divan lizye lemond antye.
E kisannla ti introdir Lalwa dan Kongre Amerikin pu fer Trete Zenosid Nasyon Zini vinn baynding dan USA? Alor ki Trete Nasyon Zini ti vote an 1948, USA finn siyne nek an 1988. Joe Biden limem ti introdir lalwa. Kuma enn Senater, li finn lans sa Bil la an personn an 1987. Zenosid Joe anpersonn. Pa kapav vinn pled inyorans.
ICJ finn dimann Israel pu aret tuy sivil. Pans zanfan, tibaba dan lebra, granmer, fam ansint ki Israel pe ankor bonbarde mem apre sa zizman baynding ICJ. ICJ finn dimann Israel pu aret bles ti zanfan, dimunn andikape e pasyan blese. U mazine ki sa ule dir kan Israel kontinye bonbard e pilonn lopital ek lakaz dimunn. ICJ finn dimann Israel pu aret detrir infrastriktir lor lekel lavi depann dan Gaza. Israel kareman inyor ICJ, pli ot lakur Nasyon Zini. Okontrer li desene, landime zur apre zizman Lakur, kont Nasyon Zini antye. Israel sibitman vinn akiz enn duzenn staf UNRWA pu zot inplikasyon dan inkirsyon Hamas trwa mwa desela, dan enn tantativ anfantin pu deturn latansyon kont Zizman baynding Nasyon Zini e pu tir so vanzans kont Nasyon Zini pu so zizman ICJ. Tusala pu Israel ankor plis perpetre zenosid. E USA pe ale mem, anfonse ankor, e ankor dan so konplisite. Kan sa pu arete? Anu kontinye kanpayn pu fer Pravind Jugnauth sutenir ka Sid Afrik dan UN e sumet so sutyin an-ekri, kuma so Guvernman finn deza fini fer pu sa lot ka divan ICJ kont koloni ilegal Israelyin dan Palestinn Okipe.
Lindsey Collen pu LALIT, Merkredi 7 Fevriye 2024
Tradir par BK avek kudme AA
