Zenosid Blog 30 – Rebelyon dan CNN ek NY Times kont Lasansir Patron lor Zenosid perpetre par Leta Israel
06.02.2024
Kan nu pe ankor repran gradyelman depi linondasyon kot LALIT, latelye e biro GRNW – sink pye dilo andan batiman e sis pye dan lakwizinn ek lespas mesrum, avek so karpet labu plizyer pus lepeser inn kite kan nivo dilo inn bese – nu realize kuma Palestinyin dan Gaza pe tuzur fer fas a milye fwa pli pir, uswa plito buku buku plis pir. Preske tu zot lakaz ek zot latelye ek zot biro finn redwir an rwinn. Sime par divan zot finn buldoze. Lopital pre finn bonbarde. Lekol – mem kan ena refizye andan ladan - inn bonbarde e atake. E zot fami e zot kamarad otur de zot finn masakre, amezir zot e tu zot pros menase avek mor par lafin, laswaf, ek dezidratasyon, menase avek mor par maladi kapav prevenir ek kapav trete e par lepidemi. E mem Lakur ICJ finn ziz risk Israel pe perpetre enn zenosid kont Palestinyin “plozib” e “iminan”, e finn ordonn Israel pu dirzans permet e fasilit aprovizyonnman manze e furni proteksyon, ki Palestinyin pe truve arive divan zot lizye? Sez (16) pei Oksidantal ena bases e kriyote imin pu sispann zot kontribisyon a inik organism-led operasyonel dan Gaza, UNWRA, lor alegasyon supsonab depi Leta inkrimine, Israel, kont enn byin tipti nonb travayer UNWRA. Enn veritab skandal.
Israel pe selman kapav komet zenosid – ziska ler – akoz USA pe arm li, rul li, finans li, sutenir li e servi so Veto pu protez Israel e USA pe klerman konplis dan zenosid. Sa dapre so prop argiman, kan USA anonse li pe “bak Israel”. Pu sa mem rezon la USA pe bonbard plizyer sib dan Lirak ek dan Lasiri ek dan Yemenn, se akoz dan sa bann pei la ena lafors arme-“bak” par Liran. Alor nu bizin izol pa zis Israel, me USA, usi. E dan Loksidan, santenn milye dimunn pe defye zot prop Guvernman ki pe azir latet bese kuma chatwa USA , pe swiv USA mem dan aret aprovizyonnman manze a Palestinyin dan Gaza ki pe uvertman menase avek mor defin par ograde larme Israelyin. E sa finn site dan ICJ kuma prev plozib lintansyon pu perpetre zenosid.
E USA, e so bann chatwa leta Oksidantal, finn selman kapav vinn konplis dan zenosid kont lepep Palestinyin akoz kuvertir media sipozeman indepandan, asontur, finn akord zot. CNN li enn parmi pli pir. New York Times usi parey. San okenn reporter dan Gaza, e sanses ponn mansonz ek propagann Israelyin, staf dan tulede institisyon inn fer rebelyon. Dan CNN li lor enn seri form lasansir raporte dan lagazet Guardian zordi. Dan New York Times, rebelyon staf ti lor enn dosye baze lor alegasyon Israelyin konkokte lor “vyol an-band” osito Israel so invansyon lus lor “tibaba dekapite” ti finn demaske. NY Times inn deprogram so podkarst kotidyin swit a enn rebelyon intern. Dan CNN, staf finn akiz zot patron pe inpoz “fot profesyonel zurnalistik”. CNN interdi sitasyon ek film depi Hamas, li pena okenn reporter lor terin dan Gaza, e Stasyon CNN rabas propagann Israelyin lor oparler. CNN, BBC parey, finn azir dan enn fason degelas kan li finn transmet layv defans Israel dan ICJ, tandiki li pa finn transmet layv kan Sid Afrik inn prezant so ka divan ICJ. Ala kuma media sipozeman repite eriz zot kuma defanser zenosid layv Israelyin kont lepep Palestinyin.
Lindsey Collen, pu LALIT. Lindi 5 Fevriye 2024
Tradir par BK avek kudme AA
