Zenosid Blog 29 – Amezir Foli Israelyin pe Pli Expoze Konplisite USA pe Konfirme ankor Plis
03.02.2024
Dan LALIT, enn mo koleg ti dimann mwa si mo pu drafte sa blog la kuma enn but aksyon integre dan nu aksyon kolektif onn-going kont sa zenosid perpetre par Israel lor lepep Palestinyin.
Bi sete pu usi ed nu gard nu lisid pandan sa derulman atros, veritableman atros, kot nu pe swiv enn zenosid an-layv, anmemtan nu pe sey fer tu seki dan nu puvwar pu aret li – e kone li pu pran letan, kone “letan” ule dir kontinye ankor masak zanfan Palestinyin, dimunn andikape, fam avek tibaba e seki vye par larme Israelyin, “letan” vedir larme Israelyin kontinye “farus” Palestinyin dan Gaza dan enn plizanpli tipti but lespas dan Gaza pre kot Dezer Sinai dan Lezip, ankor plis fors zot pu sove kan Israel finn inpoz faminn e lepidemi lor zot, “letan” ule dir eradik tu tras kiltir Palestinyin – kiltir vwazinaz, lasante, liniversite ek kolez, uswa galri-dar ek zu pu zanfan vizite, mize, bazar, lafwar, lotel dite, bulanzri, moske ek lekol, mem simityer – dan sa vize zenosider pu napa kit okenn par kot Palestinyin pu kapav returne.
Alor, anparti rol nu blog se enn terapi kolektiv, ziska e apre inn aret sa zenosid la. Nu pa kapav deturn nu regar depi sa orer Leta Israel pe perpetye. Nu ena pu konfront li, expoz li e opoz li.
Nu finn fer gin dan sa lalit kont “letan”. Lakur Internasyonal Lazistis ICJ finn konstate ki Sid Afrik ti ena rezon e li enn aksyon apropriye kan li finn loz enn ka zenosid kont Israel. Lakur finn statye li “plozib” ki Israel pe komet zenosid, mem avan ekut ka la, e ena irzans pu li emet ekivalan enn Writ, enn Writ exekitwar ki rant anviger tutswit, pu aret Israel tuy Palestinyin, bles zot, detrir zot infrastriktir e aret antrav reprodiksyon zot sosyete. Writ la usi ordonn Israel pu pini “insitasyon pu komet zenosid”, apre Lakur finn nom zot lider par zot nom dan so ruling: Netanyahu, Herzhog, Gallant. Lakur finn usi met buku lanfaz lor “konplisite” avek zenosid, kumadir inn emet enn Warning Klas I kont USA e kont so bann rezim maryonet dan Loksidan. E enn Lakur USA dan enn zizman yer finn zize li “plozib” ki Israel pe komet zenosid, e Lexekitif guvernman USA bizin examinn anprofonder so sutyin inkondisyonel a Israel. Sa zot bann gin. Bann Gin imans.
Gin egalman inportan se tu sa manifestasyon, blok pon, travayer dok refiz anbark zarm pu Israel, e sutyin masif anfaver enn sese-lefe – 67% anfaver, mem dan USA, kot ena propagann pro-Israel plis extrem lor so bann stasyon TV, stasyon media inkriste avek Biden e tu seki dan lextrem drwat zot zot ankor plis pro-Israel, si enn tel soz posib.
Me, amezir letan pase, Israel finn tuy u bles plis ki 100,000 Palestinyin dan sa dernye 3 mwa zenosid Israelyin. Israel finn antretan redwir tu kartye vivab anrwinn.
E sa foli nu pe ena pu temwayne pe kontinye mem.
Dan enn Blog avan sann la, Blog 28, nu finn ekrir lor Pantomim Orer Israelyin ki Biden e Konpayni pe kontinye finanse mem apre ruling ICJ – pey asasin Israelyin degize kuma travayer lasante debark dan enn lopital dan West Bank pu asasinn enn zenn pasyan paralize depi lerin ziska anba kan li pe dormi dan lili lopital, ansam avek lezot zenn ki usi ti pe dormi; Solda Israelyin antas enn konnteyner ranpli avek plizyer duzenn kadav zot finn kokin, kadav aneta dekonpozisyon avanse ek san ena zot nom, ni kapav idantifye zot, e asterla pe return zot lekor dan Gaza; larme Israelyin finn bann lizye plizyer duzenn zom Palestinyin, atas zot lame deryer ledo e abiy zot dan linz mortyer, fors zot pu asize uswa azenu u akrupi anba dan bann pozisyon intenab; 16 pei Loksidan, avek Biden antet, sispann zot led a UNRWA zis kumsa, UNRWA li sel lorganizasyon kapab pu ed Palestinyin muran, e mem si sa li klerman an flagran defyans a Zizman ICJ, e sa li an repons baze lor nanye apart mansonz notwar Israelyin; enn-tyer Kabine Netanyahu pe danse ek sante dan enn “Konferans” makab avek enn milye dimunn prezan ki ti fer dan Zerizalem pu planifye kot sa dan Gaza – avek map zean tu – zot ena lintansyon konstrir diferan koloni setelmennt Israelyin enn fwa fini konplet zenosid kont Palestinyin. Eski sa foli la, si nu zis get li, pa pu fer nu usi vinn fu? Kuma li posib Loksidan pey pu sa kalite fasism, arm sa bann fasist, finans enn zenosid, e ankor tuzur pretann zot ena enn grander moral siperyer? Sa pe anfin fini.
E purtan foli Israelyin pe kontinye. Biden & Co. pe kontinye sutenir li.
Enn lalis dernye evennman makab. Nu dimann lekter pu zoz evennman resan par zot orer zenosider.
Apre larme Israelyin inn retir li depi Nor Gaza, kot lekol Khalifa bin Zayed dan Beit Lahia, inn dekuver lekor 30 zom Palestinyin, lizye bande, lame atase deryer ledo, e aparaman finn exekite avek sanfrwa. Lotorite Gaza finn dimann enn lanket internasyonal. Sa indik ankor prev – si ankor prev neseser – krim deger e zenosid. Ki ete sa?
Al Jazeera finn pibliye enn video 54-segonn, fam ek zanfan Palestinyin epwize resanble enn senn biblik kot enn larme pe fors zot pu sove kite depi zot later natal, anmemtan lor enn oparler revoltan, solda Israelyin pe insilte zot amezir zot pe pas kot enn chekpoynt, insilte lider Hamas, pe sey zet blam lor dirizan Hamas pu sa zenosid solda larme Israelyin zotmem pe perpetye: “A Abu Khaled sef tu larme Arab, nu kras lor u, laont lor u. Get seki u finn fer kont u lepep. Gete Sinwar, gete Abu Al Abed, gete Abu Al Waleed Khaled Meshaal. Eski zot finn amenn zot kostim dray-klining zordi. Ey, Abu Al Waleed? Eski u finn pran u kostim pu u paret zoli? Alim u TV apre u finn dezene dan lotel e get u lepep. Get u lepep Abu Al Waleed ek Abu Al Abed. Wi, kontinye marse, kontinye. Fam ek zanfan selman.” Kriyote Israelyin pena limit. Sikoz Israelyin pena limit. Kilpabilite Israelyin pena limit.
Konplisite USA pena limit.
Anbasader USA dan Nasyon Zini Linda Thomas-Greenfield pretann ki Lord mezir dirzans ICJ koresponn a konviksyon so delegasyon komkwa Israel ena drwa defann li. Byin sir, ruling dirzans ICJ pa koresponn a okenn de konviksyon so delegasyon, e byin sir li pena drwa pu defann limem.
Lord ICJ pena sa ladan ditu. Sel referans a “self-defence” inn fer par Israel, e sa, an plizyer lokazyon. Steytmennt Mm. Thomas-Greenfield enn mansonz. ICJ konn trebyin ki deza ena enn zizman ICJ lor Miray Aparteid Israel kot statye etan done Israel enn “puvwar lokipasyon” li pena “drwa” a self-defense. Pu sa rezon la Biden e Blinken e Austen pe tultan ale mem lor komkwa “Israel ena drwa pu defann limem”, presizeman akoz li pena drwa. Enn puvwar lokipasyon pa kapav ena sa drwa la fas a enn Leta ki li pe okipe militerman. Li pu ridikil, absird, fu.
Me, pu anpes propagann USA e Israel tuf laverite, les nu reprodwir totalite instriksyon ICJ inn donn Leta Israel, ki ICJ finn rapel Israel zot bann instriksyon baynding. Zis pu rapel Mm. Thomas-Greenfield.
“1. Leta Israel pu, an konformite avek so obligasyon su Konvansyon lor Prevansyon ek Pinisyon Krim Zenosid, an seki konsern Palestinyin dan Gaza, pu pran tu mezir dan so puvwar pu anpes komet ninport ki aksyon ki stipile dan Lartik II sa Konvansyon la, an partikilye:
“(a) tuy manb enn grup;
“(b) bles gravman fizikman uswa sikolozikman manb enn grup;
“(c) delibereman infliz lor sa grup la kondisyon lexistans kalkile pu amenn so destriksyon antye u an parti; e
“(d) inpoz mezir kot antrav nesans parmi grup la
“Leta Israel pu asire avek lefe imedya ki so larme pa komet okenn aksyon kuma finn dekrir dan pwin nimero 1 lao.”
Israel finn kontinye tuy Palestinyin par plis ki 100 par zur, finn kontinye bles fizikman ek sikolozikman par milye tulezur si pa par milyon, e pe delibereman kontinye infliz kondisyon lexistans kalkile pu amenn destriksyon fizik antye uswa an parti lepep Palestinyin. Enn-tyer Kabine Israelyin pe mem plann pu koloniz Gaza, e zot mem ena enn map lor miray pu montre kuma pu fer sa exakteman enn fwa fini konplet eliminasyon fizik.
“2. Leta Israel pu pran tu mezir dan so puvwar pu prevenir e pini tu insitasyon direk e piblik pu komet zenosid par rapor a manb popilasyon Palestinyin dan Lanklav Gaza”
Insitasyon a zenosid finn kontinye, avek sante ek danse dan Konferans Zerizalem, osi byin ki bann aksyon zenosid.
“3. Leta Israel pu tutswit pran mezir efikas pu permet furni dirzans servis debaz e led imaniter pu adres kondisyon de-vi defavorab Palestinyin ena pu fer fas dan Lanklav Gaza”
Israel finn lans enn atak vanzans kont Nasyon Zini, zur apre zizman ICJ, pli ot Lakur Nasyon Zini. Israel finn lans enn seri alegasyon kont enn-de staf UNRWA, organism Nasyon Zini responsab pu “furni dirzans servis debaz e led imaniter” kuma mansyone par ICJ. Pa zis sa. USA ek kinz lot pei finn sispann zot kontribisyon dan UNRWA lor baz sa bann alegasyon kont enn ti infim proporsyon anplwaye UNRWA inplike dan atak Hamas le 7 Oktob. Sa li enn konplisite kriminel avek Israel zenosider par sa bann pei la. Kimanyer nu ariv demay e konpran tusala? Sa pe arive anmemtan kot USA ek so bann alye pa pe sispann furnitir zarm, larzan e proteksyon Israel mem kan inn truve ki li plozib ki Israel, kuma enn leta antye, finn komet zenosid. Kan enn-tyer Kabine Israelyin anplis pe danse-sante otur enn map avek nuvo Gaza-kolonize-par-Israel, USA pe kontinye pey bil enn plozib zenosid.
“4. Leta Israel bizin aktivman pran tu mezir efikas pu anpes destriksyon e asir prezervasyon prev an lyin avek alegasyon aksyon kont manb popilasyon Palestinyin dan Lanklav Gaza kuma stipile dan Lartik II ek III Konvansyon lor Prevansyon ek Pinisyon Krim Zenosid.”
Israel pe kontinye sible e tuy zurnalist pu demoli lezot prev.
“5. Leta Israel bizin sumet enn rapor a Lakur lor tu bann mezir li finn pran pu met an pratik sa Lord Lakur la dan enn dele enn mwa apartir dat sa Lord Lakur.”
Tusala dan zizman ICJ. Zizman li sertennman pa, kuma Anbasader USA dan Nasyon Zini Linda Thomas-Greenfield pe klem, korobore avek konviksyon USA komkwa Israel ena drwa pu defann li. Sa li kareman fu. Mem kan Madam la azute “Israel bizin respekte Lalwa Internasyonal Imaniter” kan li pe defann li. Lefet e, e li pa kapav pretann sa pa existe, Lakur finn statye ki Israel pe plozibleman komet zenosid. Ki u ena pu dir lor la, Mm. Thomas-Greenfield? Abe ki u ena pu dir kan u pei pe arm e sutir Israel dan sa plozib zenosid la?
Lindsey Collen, pu LALIT. Vandredi 2 Fevriye 2024
Tradir par BK avek kudme AA
