Zenosid Blog 28 – Foli Israel ansam avek Responsabilite USA Expoze divan Lizye Lemond Antye
01.02.2024
Kisannla ti pu panse 12 Minis Israelyin e 15 depite Knesset (Parlman Israelyin) ti pu sante ek danse ansam, dan enn Konferans dan Zerizalem, kot zot pe dimann Israel pu demar inplantasyon setelmennt kolonyal dan larwinn dekonb zenosid Gaza? An piblik? Zis apre Zizman ICJ? Divan lizye lemond antye? Enn konportman konpletman fuka. Mo pa ti ule kwar seki mo lizye ti pe truve. E purtan nu tu finn truv sa. Enn dans makab sorti direk depi enn deskripsyon Joseph Conrad kot kolonizasyon inn vinn konpletman fu. E li pa zis manb fasist Knesset, Ben G’vir ek Bezalel Smotrich, ki ti pe sante ek sote-pile me ti ena usi manb Parti Likud Netanyahu, antu enn-tyer so Kabine ti prezan ladan. E lerla, mem sa, sa spektak grotesk akapar-later zenosider par Leta Israelyin pa fer USA ek UK tutswit sispann zot led militer a Larme Israelyin ki pe perpetre sa zenosid la? Non. Zot sinpleman “konserne” par sa.
An kontras, pu rann sa spektak absird ankor pli pir, ankor pli fuka, kan Leta Israelyin notwar dan koz manti fer enn sinp alegasyon komkwa 12 anplwaye UNRWA, UNWRA anplway enn total 30,000 staf e 13,000 parmi ladan travay dan Gaza, ti inplike dan inkirsyon Hamas le 7 Oktob dan Israel, sa tutswit fer USA ek UK sispann zot kontribisyon a UNRWA. Anfet UNRWA li sel lorganizasyon ki kapav inplemant zizman baynding ICJ ki ordonn led imaniter pu rant dan Gaza san okenn blokaz par Israel. Ala kuma USA ek UK azir pu anpes “prevansyon zenosid”. Sa apel konplisite dan zenosid. Sa zot kone kuma pu fer. Me, zot napa kone kuma pu anpes enn zenosid kuma sa spektak absird par Leta Israelyin dan sa Konferans demansyel dan Zerizalem. USA ek UK, e sa usi li fu, pretann pa konn tre byin kuma Israel pe servi so bann trik abityel. Li fer sa akizasyon kont UNRWA mem mem zur ICJ donn so zizman kont Israel ki pe plozibleman komet zenosid. Israel pe sinpleman inplemant zenosid par lezot mwayin kuma tuy, eliminn UNRWA, sel institisyon kapab pu atenye masak anmas Palestinyin par Israel atraver afam zot, provok maladi ek lepidemi kan larme Israelyin fors fami Palestinyin dan bann “atrupman” sirpeple, tuy zot par ipotermi dan latant frazil fas a divan glasyal, lapli glasyal kan zot finn fini detrir tu lopital par bonbardman devastater e redwir lopital an rwinn. Alor, pu rezime, USA ek UK kapav mobiliz zot birokrasi pu sispann peyman zot kontribisyon ki kapav sov Palestinyin (lor baz zis alegasyon Israelyin dan enn moman etranzman supsonab) konsern enn tipti-tipti proporsyon totalite anplwaye UNRWA, me narnye seki Leta Israelyin fer pa amenn zot pu sispann zot furnitir zarm, zot finansman, e zot kuvertir diplomatik, mem si enn-tyer Kabine Israelyin inn inplike dan enn dans zenosider deliran pu koloniz Gaza ki finn deza redwir a enn leta dekonb zenosider? Eski nu pu truv enn lot veto UN pu kuver zenosid, e permet li kontinye perpetre zenosid?
E antretan, enn lot konportman ankor pli bizar par Leta Israelyin finn expoze divan lemond. Israelyin finn avoy enn lot zot konnteyner sele avek kadav Palestinyin ki zot ti kokin ek zot pe returne. Zot konfiske lekor, inklir zanfan, par plizyer duzenn – ena lekor finn detere, kokin depi simityer, lezot lekor inn kokin depi kot IDF inn bonbarde – e gard lekor ziska li finn dekonpoze e nepli kapav idantifye lekor. Lerla zot vini ek return lekor kokin dekonpoze dan sak kadav ble. Eski u kapav mazinn enn konportman pli makab ki sa? Li depas zenosid, e li finn rant dan domenn kriyote sikotik, barbari deranze?
USA e UK tuzur pankor sispann furnitir zot zarm ek zot larzan.
E pa fini.
Leta Israelyin so azisman fuka, ankor enn fwa dan dernye enn de zur, finn demontre degre so kriyote e degre so barbari. Asterla li finn rant dan spektak makab zot listeri zenosider. IDF finn donn lord popilasyon Gaza pu kit Khan Younis (laba kot inisyalman IDF ti fors zot pu ale).E kan zot pe sove par fami angrup, kuma finn ordonn zot, pu al ankor plis Lesid ver Rafah, IDF tir tu zenn zom (uswa pa tro-vye), anprizonn zot tu, dezabiy zot, bann zot lizye, atas zot lame deryer zot ledo, e abiy, ankor fuka net, ar plastik blan seki resanble sa kuler blan ki servi pu anvlop lekor 27,000 Palestinyin fini masakre par IDF. Kuma enn menas seki pe atann zot. Li enn provokasyon.
Eski Leta Israel inn perdi latet konpletman?
Ki Biden dir lor sa operata par sa Leta Israelyin deraye? Ki Sunak pe dir? Eski li pe aret furni so zarm e so larzan a Israel?
Egalman bizar e extreman fuka, se sa spektak grotesk par yunit spesyal IDF degize kuma dokter ek ners Palestinyin, tu finn kapte lor kamera, pe rant dan enn lopital dan West Bank su lokipasyon Israelyin e finn asasinn avek sanfrwa enn pasyan lor so lili lopital. Fiziye pasyan la, fer piskari ar so disan lor miray deryer li. Konverti enn plas keyring a pa kone ki ete. E asasinn de lezot dimunn ansam ar sa pasyan la. Tusala finn kapav kapte lor kamera sirveyans e finn montre a lemond antye.
Ki Biden ena pu dir lor la? Ki Sunak, li ena pu dir lor la? Eski zot finn sispann zot finansman Israel?
Nivo foli pe propaze. Kan Nancy Pelosi, ansyin Spiyker Demokrat dan House of Representatives, laba dan Lamerik, konfronte pre kot so lakaz par manifestan Pro-Palestinyin kont sa kalite foli, kot zot ti pe sinpleman korl pu enn sese-lefe, ki Nancy Pelosi ena pu reponn zot? “Return Lasinn!” Alor, li usi li finn perdi latet.
Dan enn sertenn fason, sa pa etonan. Li, enn mama e enn gramer, finn get tu sa spektak pantomim: Minis Kabine Israelyin partisip dan konferans fuka kot zot pe danse dan enn frenezi patriarkal pu al koloniz Gaza, alor ki li, Nancy Pelosi ek so Parti finans ek arm zot; sispansyon fuka kontribisyon a UNRWA, sel lorganizasyon existan ki kitfwa kapav aret kontinye sa masak zanfan ek mama, gramer, granper, mem kan li antan ki enn manb dan lidership Parti Demokrat, pe kontinye furni finans pu IDF kontinye so foli masak; IDF so foli return lekor dekonpoze dan enn konnteyner bato, ki li donn sibsid pu fer sa avek larzan tax dan Lamerik; sa degizman fuka bann asasin kuma personel medikal pe komet asasina avek zarm li pe furni.
Kuma Gerard Manley Hopkins met li, “Pli-pli pir ki sa pena.”
Kan USA ek UK pu retir depi ladan? Apretu, responsab se USA ek UK.
Biden admet so kilpabilite yer. Kan dimann li, a sa moman presi la, si li tenir Liran responsab lamor trwa solda Amerikin lor enn baz Amerikin dan Zordani, li reponn “Mo tenir zot [Liran] responsab, akoz zot furni armaman a dimunn ki finn komet sa” (ABC News video). Abe, si nu aplik Biden so prop rezonnman ar limem, sa ule dir li, Biden, limem responsab sa zenosid Israelyin kont popilasyon Palestinyin, e li usi responsab pu tu sa deriv flagran konpletman fuka ki pe prozete par tu sa seri spektak pantomim orib ki pe defile lor nu TV e lekran kompyuter. Li, apretu, “furni armaman a seki pe komet sa”, pu sit so prop parol. Kimanyer li kapav dormi byin aswar?
Li apenn krwayab seki pe arive amezir lanpir USA-UKpe expoze, onivo mondyal, me akumanse sirtu depi kitfwa so plas pli pir lor planet: Leta Israelyin ki lanpir USA-UK finanse, arme e sutenir li kan li pe perpetre zenosid kont lepep Palestinn.
Lindsey Collen, pu LALIT. Merkredi 31 Zanvye 2024
Tradir par BK avek kudme AA
