ICJ Zize Ka Zenosid Kont Leta Israelyin Plozib, Apel pu Aret Zenosid
27.01.2024
Etan done zizman pli ot lakur Nasyon Zini zordi lor mezir dirzans pu aret zenosid Israel, nu dan LALIT fer apel a guvernman Moris pu tutswit sispann tu relasyon diplomatik ek komersyal avek Leta Israel. Ninport ki sutyin Leta Moris anver Leta Israel, riske fer Leta Moris, sa aplikab pu tu lezot leta, kupab konplisite dan zenosid, setadir vinn, parey kuma Israel, vyol so obligasyon legal su Treaty for the Prevention and Punishment of the Crime of Genocide[Trete pu Prevansyon e Pinisyon Krim Zenosid].
Sa linportans sa zizman la.
17 ziz, deside avek enn mazorite san-lapel*, ki Sid Afrik finn pruve li plozib pu dir Leta Israel pe komet ak zenosid e li bizin aret sa zenosid la. Ena enn ka prima facie kont Israel pu zenosid e li pu bizin riportbak dan enn mwa pu demontre li finn aret so tuye e so destriksyon.
ICJ – e so zizman li baynding lor Israel e sirtu lor tu Leta – finn fer apel Israel pu aret tuy Palestinyin, pu aret bles Palestinyin fizikman uswa mantalman, pu aret detrir zot mwayin sibzistans, e pu aret inpoz mezir kot antrav reprodiksyon. Ansom, pu aret sa zenosid la.
Kuma Minis Zafer Etranzer Sid Afrik finn dir li, pu aret tuy dimunn, detrir zot infrastriktir e zot reprodiksyon, u bizin aret bonbardman kont popilasyon. Ala seki Lakur inn done dan so zizman. Li pa posib pu enn lakur lazistis pu akord enn sese-lefe, enn mezir politik, par rapor a konbatan Hamas. Sa Lakur inn dir seki relevennt. Li finn dir aret zenosid!
Anplis, Lakur inn ordonn Israel pu rebatir infrastriktir pu asir manze, dilo, kuran, e servis lasante ek ledikasyon, dan Gaza. Sa usi vedir aret zenosid. E Israel pu bizin vinn donn enn rapor dan enn mwa.
Wi, Lakur inn donn Israel enn mwa pu vinn donn enn rapor formel kot li demontre li pe respekte tu sa bann mezir provizyonel la. Sid Afrik pu lerla donn so komanter.
Israel finn perdi net.
Israel tinn dimann Lakur ICJ pu rezet ka Sid Afrik akoz komkwa li “obsenn”. Lakur finn plito rezet demand Israel.
LALIT fer apel a Premye Minis Pravind Jugnauth pu tutswit pran enn stennd piblik pu respekte sa zizman provizyonel zordi Lakur Internasyonal ICJ e pu imedyatman azir pu izol Leta Israel ziska ki Israel aret sa zenosid e aret so lokipasyon Palestinn.
Tu kontra existan, uswa kontra pennding, ant institisyon leta Moris uswa konpayni sekter prive bizin kase, e pa renuvle ziska zenosid Israelyin, leta-desyez e lokipasyon arete. Nu usi apel Premye Minis pu kumans prosesis pu batir enn konsansis andan Linyon Afrikin pu tu pei Afrikin sutenir dekolonizasyon konplet Palestinn, lafin leta-desyez ek lafin lokipasyon, lafin Aparteid, e ful egalite pu tu dimunn ki viv laba. Leta Moris ti fer sa pu ka Moris divan ICJ kont Gran Bretayn so kolonizasyon persistan ek lokipasyon militer Chagos inklir Diego Garcia. E nu finn gayne – avek sutyin kontinan Afrikin antye dan nu kote.
LALIT zwenn avek tu dimunn dan lemond ki dibut ansam avek lepep Palestinn, dan Gaza e dan West Bank inklir Est Zerizalem. Ansam, nu pu gayne.
Travay divan nu li kler. Nu bizin travay pu fors USA, limem furniser zarm, donn kuvertir politik, abiz veto-UN, e tu lezot ko-konspirater dan zenosid Israelyin pu aret zot konplisite.
Israel inn fini deklare li pa pu respekte zizman, e li pu kontiyn asasinn Palestinyin.
Alor, bizin kontinye met presyon. Sa li konsern dimunn kuma umem ek nu. Nu bizin izol Israel.
Antuka, Israel inn gayn enn move koyne. Asterla, so bann Minis, so Prezidan, so bann sef larme ek lezot lider pu nepli kapav vwayaze al lot pei. Zot riske arestasyon dan tu pei siynater Trete Zenosid. Rapel kimanyer Vladimir Putin pa ti kapav vwayaze pu vinn Sid Afrik akoz Sid Afrik enn siynater Konvansyon Zenosid? Asterla, Netanyahu dan problem. Isaac Hertzog usi parey. E Zeneral Gallant. E tu lezot lider Israel.
Israel pu aret sa zenosid kan USA ek so bann swiver aret furni zarm ki pe alimant zenosid. Samem bizin fer.
Konsey Sekirite asterla bizin vot anfaver enn Rezolisyon pu enn sese-lefe, e USA pu bizin vot anfaver.
LALIT
Vandredi 26 Zanvye 2024 a 6:20 pm, Repiblik Moris
* Enn sel, Ziz Ugande inn vot kont tule sis Mezir Dirzans. Mem Ziz adok nome par Israel inn vot anfaver 2 mezir lor sa sis mezir irzans.
