Mesaz Lespwar depi Kamarad dan Lamerik lor kestyon Palestinn
01.01.2024
LALIT ule partaz enn pwin-devi depi Lamerik ar nu lekter zordi. Nu tu kone ki sa zenosid ki Leta Israel pe inflize lor Palestinyin zordi, li pa Israel tusel. Non. Li enn joynt-venncher ant Israel ek USA. USA osi kupab, sinon plis kupab. Sa vedir lepep sa 2 pei la ena enn gran rol pu anpes zot Guvernman kontiyne ar sa zenosid la. Lepep Israelyin telman sibir lavaz-servo, telman mal-informe, telman abitye ek enn kalite koze-piblik ki dezimaniz Palestinyin, ki, mem si nu dan ladmirasyon bann grup lape ki lev lavwa kont zot Guvernman, nu pa kapav depann zis lor zot. Alor, lepep Amerikin ena enn pli gran rol ankor.
Akoz sa, zordi LALIT pe pibliye an versyon Kreol enn let depi kamarad dan Lamerik dan enn lasosyasyon anti-lager apel “Code Pink”, enn tit ki sikann mezir represif ki Leta Zini ti kumans inpoz lor so lepep, sirtu dan so “lager kont terer” kot ti ena diferan degre danze, kuma warning siklonn isi, “Code Orange” ek “Code Red”, etc! Mesaz sa lorganizasyon la li kumans par sit seki kamarad dan Gaza pe dir “Bizin res lor koltar,” setadir “Bizin res mobilize”. Kuraz dimunn Gaza li kuma enn reyon soley pu nu tu, zot dir, enn reyon soley ki ekler sa limanite an-komin ki nu tu partaze. Li enn reyon soley ki leta Israel pe teyn ar so zenosid san pitye kont lepep Palestinn.
Ki nu kapav fer? Code Pink dimande. Seki inportan pu Palestinyin se ki nu kontinye gard laflam lespwar.
Ala 10 zafer ki deza alimant sa laflam lespwar pu nu kontinye lalit pu lape ek lazistis an 2024:
1. Palestinyin, zot mem ki pe Liber Nu Tu:Li enn inspirasyon san-fin kan nu temwayn kuraz tu sa fami Palestinyin ki pe fer fas lorer tulezur, lorer ki depas nu limazinasyon, kan zot sibir sa lokipasyon militer Leta Israel, enn lokipasyon ki finn vinn enn zenosid. Sak Palestinyin viv avek konesans ki sak moman li viv li riske so dernye moman lor later. Laplipar dant nu ti pu zet lekor. Landirans Palestinyin li inkrwayab. Sakenn so sakrifis pu so prosen, li kuma enn far pu nu tu, enn far ki prozet lalimyer lespwar pu tu dimunn partu dan lemond ki pe leve kont linzistis. Israel finn asasinn zurnalist Palestinyin, dokter Palestinyin. Me, zurnalis ek dokter ki tuzur la finn persiste, malgre sa, e sa kuraz la, li sakuy nu depi dan nu leta-despri kotidyin, kan nu amenn nu lavi kumsi-ryin-ete, kan anfet ena enn zenosid pe deferle. Par zot persistans, zot expoz laverite orib lor lokipasyon vyolan Palestinn. E zot osi montre nu ki laliberte li existe andan dan nu rezistans. Deza. E se nu tu, pa zis Palestinyin, ki bizin liber nu depi lasenn enn sistem kapitalist baze lor sipremasism blan, moralman bankrut net.
2. Fode 24/7 Kriye Demand partu lor Bul Later pu enn Seselefe:Rali ek lamars, aksyon imans tu kalite, finn kas rikord dan gran lavil dan lemond antye. Deza. Dan Washington DC 300,000 dimunn ti desann dan lari pu Palestinn. Kumsa, zot temwayne ki zot pe dibut ar Palestinn. Depi bonbardman Israel ti kumanse plis ki 2 mwa desela, tulezur ena manifestasyon, lamars, rali, aksyon ki revandik seselefe. Laliyn telefonn pu sonn depite dan Lamerik, tu bloke telman ena korl pu seselefe. CODEPINK finn rant dan kulwar Kongre ansam ar rabin, dokter, profeser, mama, avoka, e sa, depi premye zur. Nu finn fer sit-inn, alonze-inn, lagrev lafin, e plis. Nu finn mem reysi konfront an-personn Gran Sef Jaz Zenosid Joe Biden pa enn fwa, me de fwa, sa lane la.
3. Zanfan pe Debruye: Preske sak moman pandan 2023, zenn finn pran ladireksyon, montre zot lene ki zot pa pu aksepte nerporte-kwa. Plis ki 140 manb stazye ek zenn staf ki travay dan Kongre, setadir Parlman laba – ki finn pran ledevan dan enn fason briyan – finn ekrir enn let uver akiz Kongre siprim e innyor lavwa imans mazorite mandan ki pe fer apel pu enn seselefe permanan dan Gaza. “Li zenosid,” zot dir dan zot let. “Ena enn kasir ant seki piblik Amerikin ule e seki zot reprezantan pe fer.” Pareyman, buku buku etidyan kolez ek liniversite partu dan pei pe met presyon pu ki seki otur dezot aret konplis ar zenosid ki Israel pe perpetre. E zot kontiyn lev zot lavwa malgre menas sirveyans, sispansyon, expilsyon depi plas kot zot etidye.
4. Zurnalism tradisyonel an-deklin kan aktivis Dizital vinn Nuvo Medya pu Nyuz:Kan nuvel tradisyonel – lagazet, radyo, RV – vinn port-parol zenosid, li pa etonan zot perdi lekter ek odyomat. Dernye sondaz Pew truve ki enn-tyer zenn adilt gayn zot nuvel atraver TikTok, kot hashtag pro-Palestinn finn monte fles. Sondaz pruve ki platform prefere parmi zenn li pa zis pu nyuz, me osi pu exprim solidarite global. Dapre blog ofisyel TikTok, sa tandans parey atraver tu lezot platform osi. Instagram dir 5.7M pos finn tag #FreePalestine kont 214K total pos ar tag #standwithIsrael. Pareyman, data piblik Facebook dir 11M total pos ar tag #FreePalestine kont 278K total pos ar tag #standwithIsrael.
5. Muvman BDS pa zis pa finn mor me li an Plin Form:Nu tu pe selebre ki magazin sportif Alman PUMA, apre nu kanpayn, nepli pu renuvle so kontra ar Lasosyasyon Futborl Israel (IFA), ki ena lekip ki baze dan setelmennt ki selman pu dimunn kominote Zwif dan WesBenk okipe e ki kont lalwa internasyonal. Gras-a sa viktwar boykot, nu pli determine ankor pu kontiyne fer disterbenns dan “biznes-as-yuzyel”. Nu pu fer sa par obliz seki konplis, e seki donn kudme dan zenosid, e seki sutenir apartheid, rann kont. Kumsa tu Palestinyin pu kapav viv dan lape, lazistis, egalite.
6. Liye Diferan Lalit dan enn gran muvman pu lape ki veritableman trans-nasyonal:Kolektif Feminis Palestinyin finn fer enn apel pu uvertman kritik “feminism kolonyal” e pu inifye feminis partu dan lemond kont Zionism. Sa pe deklans enn vag lalyans pu amenn dimunn ansam dan zot lalit an-komin kont dezimanizasyon Palestinyin, e pu dibut pu lape ek lazistis dan Palestinn. Ena sindika pe fer apel pu seselefe. Ena Lasosyasyon Lokater dan Los Angeles ek Muvman Zenes Palestinyin ki pe liye deplasman dan Los Angeles par “jenntrifikeyshenn” ek zenosid dan Palestinn. Ena Black Lives Matter-LA ek lorganizasyon dan Palestinn ki pe zwenn ansam. Ena muvman kominote indizenn ek LGBT ki pe liye zot prop lalit ar lalit Palestinyin. Tu bann kwazyon ant diferan lalit pe grene, sirtu amizir nu aprann puvwar kolektif ki nu detenir, puvwar pu liber nu depi lopresyon.
7. Muvman pu Lazistis Klima pe Finalman fer lyin ant zot lalit ek lalit pu lape!Nu travay politik ki viz edik nu prop muvman lor inter-koneksyon profon ant militarism ek sanzman klima finalman pe port so frwi. Lane 2023 lane pli so, nu lalit finn amenn enn rol krisyal dan infliyans COP28 pu lans enn deklarasyon pyonye ki integre klima ek polisi imanist, liye klima ar konfli, pu premye fwa. Kuma AlJazeera dir, deba dan COP28 lor sa size la kapav ogmant konsyans lor lefe profon ki lager ena lor klima, sirtu dan Lesid Global, ki deza pey lepo kase dezas klima.
8. Bruyar Lager otur Ikrenn pe kumans vinn pli Klerseme:USA finn deza larg $110 milyar dan lager Ikrenn. Lerla, Biden truv sa pa ase. An Oktob li vinn dimann Kongre larg ankor $106 milyar pu kontiyn finans lager Ikrenn e Israel, e anmemtan mont plis miray lor frontyer ar Lamexik. Mem si mazorite Amerikin ti sutenir finansman pu lager Ikrenn dan kumansman, pandan lane 2023, deplizanpli dimunn finn kumans truv sa finansman la “tro buku”. Anfet 60% krwar bizin limit depans lager, dapre sondaz Gallup resan.
9. Linite global pe Monte dan enn Lemond pli Miltipolar:Dan Lafrik Delwes, pei pe fu militer Franse deor, tir langaz Franse kuma langaz dominan, e ena pei ki pe reysi fer lalyans pu fer fas explwatasyon kolonyal. Dan Mwayin Oryan, diplomasi Lasinn finn fasilit lyin diplomatik ant Iran ek Saudi Arabia, e BRICS finn expann, azut nuvo manb. Asterla li reprezant enn gran porsyon lekonomi global. Deba dan BRICS finn kumanse pu enn deviz an-komin, e pu enn deviz Lamerik Latinn an-komin pu ranplas dolar US. Tusala ede pu Sid Global batir enn kad pu travay kont linfliyans nefast USA ek Lerop.
10. Lamerik Latinn Ranforsi so Pozisyon kuma Zonn Depe: Malgre tu kalite defi, Lamerik Lasinn finn amerze kuma enn far lespwar pu lape. Li finn reafirm so kapasite rezud konfli san interferans inperyalist. Pa zis Venezuela ek Giyann finn zwenn otur enn mem latab pu premye fwa pu diskit dispit lor teritwar Essequibo, me finn osi ena purparle pu lape ant Kolonbi ek grup gerila FARC ki pu petet rezud sa long lalit arme dan pei. E, apre detansyon ilegal dan USA pu 1,286 akoz li finn sey evit sanksyon Amerikin kont so pei, diplomat Venezuela Alex Saab finn large. Sa li gras-a puvwar diplomasi, puvwar laparol, puvwar negosyasyon.
Komanter LALIT
Seki nu kontan ar sa 10 pwin la, se li ule dir dan Lamerik pena zis Biden ek Trump. Pena zis patron armaman ek depite dan pos AIPAC (American Israeli Political Action Campaign) ki defann “konplex militaro-indistriyel” ek lezot patron. Ena enn gran lamas dimunn – dan sindika, lasosyasyon fam, lasosyasyon tu kalite, zenn, aktivis militan sosyalis – ki pe opoz politik e Biden e Trump. E, partu dan seki bann la apel “Sid Global” ena enn lopozisyon kont sa restan kolonizasyon, ki zordi inperyalism oksidantal.
Lor sa not la, BANANE!
