Zenosid Blog 24- Leta Israel- so Lintansyon komet Zenosid

31.12.2023

Trete Zenosid ena buku zafer spesyal ar li. So nom mem dir u ki premye zafer spesyal, exkiz mwa pu met tu let kapital pu sa mo ki relevennt la : “Trete pu PREVANSYON ek Pinisyon pu Krim Zenosid”. Li vedir u pena pu atann enn Lakur zize si kitsoz zenosid avan uver u labus pu pran pozisyon. U azir pu anpes enn zenosid, U azir dabor, avan ki ninport ki ka lakur kumanse.

Lerla, si neseser, ena enn ka lakur apre pu sa parti lor pinisyon dan Trete, si truv enn enn leta kupab. Si nu atann Lakur, abe li pu tro tar pu ANPES zenosid la ziska ki enn panel ziz syeze, reflesi e zize.

Donk, par definisyon, tusa bann ki zwe bure, pa pran pozisyon kuma zurnalis mamluk medya meynstrim pa zis zot deklar tro legalist tansyon sanse anpyet lor terin ziz avan zot kapav dir si leta Israel pe, ubyin pa pe, komet zenosid, zot- mem zot potansyelman responsab krim pu napa anpes zenosid. U pa gayn drwa pled ki u pe atann enn ziz pu pran u desizyon. Sa la li kitsoz spesyal ar Trete la. Li konfer nu tu responsabilite pu ANPES zenosid, pa zis pu asire ki seki akize e truv kupab pini apre.

Dezyem ek trwazyem zafer spesyal ar Trete Zenosid la seki ena de krim adisyonel liye ki mansyone: INSITASYON pu fer zenosid, KONPLISITE ar zenosid. Tusa vedir li pa zis seki Israelyin ki finn perpetre krim ki kondanab e bizin anpes zot, dimunn kuma Netanyahu, so Minis Ladefans Gallant ek Prezidan Herzog, ki manb LALIT finn fini raporte ar Lakur Kriminel Internasyonal (ICC).

Li osi dimunn kuma Joe Biden ek so bann swiver ki pa zis pa’nn reysi anpes zenosid me ki finn propaz mansonz ki insit zenosid – kuma sa swadizan “bann ti-baba dekapite”, enn swadizan ti-baba “roti dan enn fur”, swadizan “vyol an-mas”, sipoze “dimunn inn brile vivan”, kan li anfet dife bom Israelyin depi elikopter Apach ki finn griy zot tu vivan, enn fetis sipoze finn “arase depi vant so mama”, tusala finn kree sa listeri demas ki’nn vinn exkiz pu zenosid- ki zot tu, pu bizin purswiv zot pu INSITASYON pu komet zenosid. Ena kantite prev lor zot propagasyon sa bann rimer ek mansonz, samem kalite prosede notwar ki servi dan invazyon kolonyal, exekisyon ek zenosid notwar.

E ki zafer ki kapav pli koresponn a KONPLISITE ki furni, e lerla re-furni zarm, armaman, finansman pu zarm, ofer konsey militer, avan e mem pandan zenosid la? La, pena zis Biden, me osi Sunak, ena osi Scholtz ki konplis. E Biden so bann swiver ki reprezant Lamerik dan Nasyon Zini konplis, zot usi, par abiz ankor e ankor veto Nasyon Zini, pu ki, delibereman, permet zenosid kontiyne. E isi, li orib pu note ki prosekiter Karim Khan, ki osi rapid pu azir kont Larisi pu krim deger e pu emet enn manda-dare kont Putin, refiz azir kont Israel mem kan li kontiyne tuye an konformite ar so lintansyon. Imazine si li, prosekiter ICC ti tom su sa kritik ki li ti fayir pu anpes, ti mem konplis zenosid? So Konseye Spesyal lor Prevansyon Zenosid, Alice Wairimu Nderitu ti bizin tutswit demisyone pu so inaksyon. Lir byin ki so rol ete: “Konseye Spesyal lor Prevansyon Zenosid”. Ki li'nn fer? Otan ki nu kone, nanye.

E sa amenn nu lor katriyem ek dernye laspe spesyal sa Trete Zenosid: bizin ena LINTANSYON. An zeneral, dan lezot ka, li difisil pu pruv lintansyon.

Si zame ninport kisannla dan Moris ankor ezite pu servi sa mo “zenosid”e olye sa, persiste ar “lager”, nu pu donn enn lalist pu prev lintansyon. Nu fer lapel, an partikilye, byinsir a parti politik, mem si zot tu finn deza pran pozisyon anfaver Palestinn, pu kontiyne travay ver izol Israel net, setadir kup lyin diplomatik ar Israel, e kennsel tu kontra, kuma CEB ek dan CWA Rodrig ek tu lezot ki nu pa okuran, ar konpayni Israelyin, e pu anzeneral izol Israel. MSM ek so alye, antan ki guvernman, bizin al pli lwin, parski zot dan guvernman. Guvernman finn anonse li pu dibut pu Palestinn e li pu temwayne oralman dan Lakur Internasyonal La hay anfaver Palestinn an Fevriye 2024. Byin bon. Me li bizin pran lidership dan Lafrik, ansam ar Sid Afrik, Mali, Nizer, Lalzeri, Dibuti, Chad, Komor, Somali, Lalibi, Sudan, Moritani ek Tinizi, ki deza pena relasyon uswa finn sispann relasyon ar Israel, e pu kas lyin ek terminn tu kontra ar konpayni Israelyin. Me, nu osi fer lapel a lezot dan Moris - tu sindika, tu lasosyasyon, tu sef relizye, ek tu klib, tu individi- pu pran pozisyon, an piblik. 

Lerla nu kapav truve kisannla dan Moris ankor dibut ar seki pe komet zenosid. Rapel, kan pe koz “prevansyon zenosid”, gard silans vedir konplisite.

Nu pe transmet sa Blog la, kuma enn atachmennt pu enn Let Uver nu pe avoy bann koleg parti politik ek lezot lorganizasyon ki nu panse bizin dibut e konte parmi dan sa lelan pu izol Israel, ek osi Leta Zini. Dan Moris buku lorganizasyon, anplis tu manb SOMALP, finn pran pozisyon: Immedia dan so lansman liv anyel Ebenn, CTSP dan enn gran konferans depres Rose Hill, osi byin ki FTUCWMS, FTUCS ek FPSSOU. “Together for Palestine”dan so forum Bell Village, ATD Quart Monde alokazyon so evennman Caudan, LPT pandan so Kolok Oktob GRNW, lasosyasyon Alzheimer dan so fet lafin lane ant manb ek zot fami dan Belle-Rose, MLF dan so rasanbleman lafin lane, “Friends of Al Aqsa”dan so forum Minisipalite Port Louis, federasyon MLC, FPBOU, ek depi Rodrig, RGEA, RPIAWU ek RWF. Anu fer sa lalist la vinn ankor pli long. E individi ankor kapav, byinsir, siyn Deklarasyon Komin lor nu websayt, kuma plizir duzenn fini fer.

Nu bizin aret sa zenosid la.

Israel pe tuy sivil Palestinyin par mwayin intansyonel swivan:

- Bonbardman depi avyon.

- Bonbardman depi dronn.

- Bonbardman depi lamer.

- Tir kut kanon depi tenk.

- Tir snayperz.

- Par lafaminn.

- Par enn long syez ek blokis total, kot priv dimunn manze, dilo, medikaman neseser pu viv.

- Par detrir aprovizyonnman dilo, ki antrenn risk lamor ar dezidratasyon.

- Par detrir sistem siwrej, ki antrenn risk lamor ar maladi.

- Par fors dimunn deplase par milyon dan bann landrwa sirpeple, san okenn amenazman siwrej, dilo uswa pu lasante, seki lerla provok lamor par maladi

- Bonbardman lopital, seki lerla amenn dimunn mor akoz swin lasante insifizan, infeksyon ek neglizans medikal.

- Bonbardman furnitir elektrisite, seki provok lamor ti-baba kan zot inkibater aret travay, ek adilt lor dyaliz.

- Bonbardman infrastriktir ki permet enn ‘pep’ existe antan ki enn sosyete - bombardman lekol, Sant Nasyon Zini, Sant pu refizye, simityer, moske, sime ek lari neseser pu sirkile, legliz, galri lar ek mize. Leta Israel finn mem koz lamor zanimo dan zu, normalman enn plas rekonfor pu ti zanfan.

Tusala li “zenosid” dan langaz Kreol ordiner. Alor, nu bizin apel li par so nom. Tulezur nu temwayn li.

Akoz sa nu dan LALIT nu blam pa zis bann dirizan Israelyin pu zenosid, me osi Leta Zini ek so bann alye Eropein, osi byin ki lapres Eropein. 

Ala prev, depi enn resers manb LALIT Kisna Kistnasamy, lor sertin bann deklarasyon Israelyin lor LINTANSYON komet zenosid, osi byin ki lor Israel ek lezot Leta ek mem medya lor konplisite pu komet zenosid ek lezot leta zot konplisite ar zenosid.

Donk, ala kifer nu, dan LALIT, apel seki pe derule “zenosid” pa “enn lager”.

Lindsey Collen pu LALIT

Eleman resers

Seki trwa premye seksyon “ Trete lor PREVANSYON ek Pinisyon Krim Zenosid” dir:

Lartik I

Bann parti dan kontra konfirme ki zenosid, ki li komet lepok lape uswa lepok lager, li enn krim su lalwa internasyonal ki zot pran langazman pu ANPESE e pu infliz pinisyon pu sa krim-la.

Lartik II

Dan Konvansyon aktyel, zenosid vedir ninport ki akt swivan ki finn komet avek LINTANSYON pu detrir, dan so totalite u an parti, enn grup nasyonal, etnik, rasyal uswa relizye, antan ki tel:

(a) Tuy manb sa grup la;

(b) Provok ditor fizik serye uswa ditor mantal manb grup la;

(c) Infliz kondisyon de-vi kalkile pu antrenn so destriksyon total u an parti delibereman lor grup la;

(d) Inpoz mezir ki viz pu anpes nesans alinteryer grup la;

(e) Transfer par fors zanfan enn grup dan enn lot grup.

Lartik III

Bann ak swivan pu sibir pinisyon

(a) ZENOSID;

(b) Konplo pu komet zenosid;

(c) INSITASYON direk uswa piblik pu komet zenosid;

(d) Tantativ pu komet zenosid;

(e) KONPLISITE avek zenosid. (Let kapital depi nu)

Ala inpe deklarasyon depi dimunn ki ena lotorite formel pu komande: dirizan Israelyin, Minis dan kabine deger, ek ofisye sinyor larme, ki, depi 7 Oktob finn exprim enn “lintansyon pu detrir” Palestinyin “antan ki tel”, pu servi langaz Konvansyon Nasyon Zini lor Prevansyon ek Pinisyon Krim Zenosid. Dernye deklarasyon par enn ansyin Zeneral inflian, koni pu et enn “intelektyel”.

1. Prezidan Israel Isaac Herzog finn insinye ki bann sivil dan Gaza zot enn sib lezitim: “Li enn nasyon antye ki responsab. Li pa vre, sa retorik lor sivil pa ti okuran, pa ti inplike, li absoliman fos.”(13 Oktob)

2. Premye Minis Israel Benjamin Netanyahu dan so pwin depres ofisyel sit enn referans biblik depi Amalek: “U bizin rapel seki nu liv sakre Labib dir lor seki Amalek finn fer u. Nu rapel. E nu pe lager.” Verse ki li pe fer referans, 1 Samuel 15:3, deklare, “ Ale, al kraz Amalek, detrir net tu seki zot ena, e napa eparyn zot; e tuy tu, zom ek fam, zanfan ek tibaba, bef ek muton, samo ek burik.” (27 Oktob)

3. Minis Ladefans Israel Yoav Gallant: “ Mo finn donn lord pu ena enn syez total lor Band Gaza. Pa pu ena ni elektrisite, ni manze, ni karbiran, partu ferme,” Gallant dir. E, alaswit enn evalyasyon Komandman IDF Lesid dan Beersheba … “ Nu pe lager kont bann zanimo imin e nu pe azir an konsekans.” Li finn osi menas “ pu bonbard seki pe donn led pu Gaza.” (9 Oktob)

4. Portparol IDF Amiral Daniel Agari, “finn fer ave efreyan ki ‘par milye tonn minisyon’ fini deza large lor sa tipti band later la, li azute ki ‘anmemtan ki fer enn lekilib ant presizyon avek letandi domaz, asterla, nu pe konsantre lor seki koz maximem domaz.” The Guardian 10 Oktob, versyon amande 5 Desam.

5. Ex-Sef Konsey Sekirite Nasyonal Israel Mazor Zeneral Giora Eiland finn dir dan enn lartik titre “Anu pa les nu intimide par lemond” ki lepidemi kapav ed Israel. “ Onivo internasyonal zot pe averti nu kont enn grav dezas imaniter ek lepidemi sever. Nu pa bizin per pu evit sa. Apre tu, lepidemi grav dan Lesid Gaza pu rapros nu ar laviktwar.” Eiland finn dir sa dan enn lartik pibliye an Ebre dan Yedioth Ahronoth, e Gideon Levy finn denons li pu sa dan lagazet Israelyin Haaretz.

Pu gayn enn apersi kler lor kifer nu bizin apel enn zenosid enn zenosid, nu invit u pu lir “Statement of Scholars in Holocaust and Genocide Studies”. Li ti kordine par akademik ne-dan-Israel Raz Segal, Profesor Agreze ‘Letid Holokarst ek Zenosid’ ek ‘Profeser konpetan dan letid Zenosid Modern' Liniversite Stockton. Li vo lapenn google versyon kurt deklarasyon 9 Desam. Nek ena pu tip “Statement of Scholars in Holocaust and Genocide Studies” pu gayn li.

Dan enn deklarasyon divan Nasyon Zini Prof. Raz Segal finn dir ki Israel inn demontre lintansyon zenosider dapre trwa lartik ki definir zenosid dan konvansyon:

(a) “tuy manb grup la”

(b) “fer ditor fizik uswa mantal grav”; ek

(c) “delibereman infliz lor grup la kondisyon de-vi kalkile pu amenn destriksyon fizik total u an parti”

Li dir: “ Mezir pu met ‘syez total’ azute ar deplasman forse plis ki 1.8 milyon lor 2.3 milyon Palestinyin dan Gaza, ek risk lepidemi maladi infektye, exzaserb par peniri egi manze, dilo potab, karbiran ek medikaman, ranpli kondisyon neseser ki definir dan Konvansyon”. Li kontiyne, “ Tandi ki deplasman – uswa ‘netwayaz etnik’- pa ti an li-mem enn ak zenosid, istorikman li finn figire dan prosesis zenosider pu pus dimunn non-dezire dan bann zonn deziyne - ki evantyelman finn eskalade ziska zenosid. Ant 1939 ziska 1942 bann Nazi finn experimant diferan sema deplasman forse bann Zwif avan ariv ziska ‘solisyon final kestyon Zwif’. M.Segal finn azute ki deklarasyon Israel lor deportasyon Palestinyin dan Gaza ver dezer Sinai li ti osi alarman parski dezer finn servi dan listwar kuma zarm zenosid, ki les bann popilasyon antye mor ar lafin ek ar dezidratasyon. (Dan enn deklarasyon 12 Desam Nasyon Zini. U kapav google li par tip “Chair Summary 2023 Gaza panel on responsibility to prevent genocide”.)

Komet enn zenosid

Bann lartik lor zenosid definir su Lartik 6 Stati Rom ICC ek dan Lartik II Konvansyon lor Prevansyon ek Pinisyon Krim Zenosid. Anu get bann fe lor seki guvernman ek militer Israel finn komet ziska ler.

“ (a) Tuy manb grup la” 

Leta Israel finn tuy 21,110 dimunn. Depi 7 Oktob ziska 26 Desam 21,110 dimunn asasine par Israel dan Gaza. Parmi, 70% fam ek zanfan (Minister Lasante Gaza).

* Leta Israel finn tuy 310 dokter Palestinyin. Zot dimunn ki ti kapav sov lavi. (Minister Lasante Gaza).

* 82 zurnalis Palestinyin ek travayer medya finn tuye, prinsipalman par latak avyon, depi 7 Oktob dan Gaza. (Sindika Zurnalis Palestinyin). Sa nomb ot-la inportan akoz se zurnalis ki pe akimil prev kont IDF ki fer ki IDF tuy zot answit.

* 4,037 etidyan ek 209 staf dan ledikasyon finn tuye dan Gaza (Minister Ledikasyon).

* Omwin 20 manb Defans Sivil finn tuye depi kumansman ostilite (Defans sivil Palestinyin)

* Antonio Gutteres dir 153 staf Nasyon Zini finn tuye dan Gaza.

Tusala montre pa zis LINTANSYON, me osi realite zenosid.

Lartik II (b) Konvansyon lor Prevansyon ek Pinisyon Krim Zenosid

(b) “ fer ditor fizik uswa mantal grav a manb grup la”;

* Leta Israel finn fer ditor grav 55,243 dimunn. Sa ti ant 7 Oktob ek 26 Desam dan Gaza. Bonbardman konstan dan kontex enn leta desyez fer ditor mantal grav tule 2.3 milyon dimunn dan Gaza.

* Leta Israel finn fer ditor fizik grav plis ki 7,259 etidyan ek 619 profeser dan Gaza depi 7 Oktob.

* Dapre WHO, depi le 22 Desam, 9 lor 36 lopital Gaza fonksyone parsyelman. Pena okenn ki fonksyone dan Lenor, rezyon Gaza kot ti ena plis konsantrasyon popilasyon. WHO deklare le 23 Desam ki rezyon lenor Gaza pena okenn lopital ki fonksyone akoz mank karbiran, staf ek medikaman. Sa bann lopital dan Lesid ki ankor fonksyone, ena pu diyl ar 3 fwa zot kapasite, tandi ki zot fer fas mank terib aprovizyonnman debaz karbiran ek staf. Dapre MOH dan Gaza, to lokipasyon finn atenn 206% dan departman pasyan ospitalize ek 250% dan ICU. Tusala fer ditor fizik ek mantal grav.

Tusala, osi montre pa zis, LINTANSYON, me osi realite zenosid.

Lartik II (c) Konvansyon lor Prevansyon ek Pinisyon Krim Zenosid

Deplasman

(c) “delibereman infliz lor grup la kondisyon de-vi kalkile pu antrenn destriksyon fizik total , uswa an parti”

Deplasman dimunn, ansam ar asasina, mitilasyon ek destriksyon infrastriktir, vedir “delibereman infliz lor grup la kondisyon de-vi kalkile pu antrenn destriksyon fizik total , uswa an parti”.

Deplasman finn lor enn lesel masif. Dapre Nasyon Zini so UNRWA, zot estime 1.9 milyon dimunn dan Gaza, u pre 85% popilasyon, finn sibir deplasman intern (IDP - Internally Displaced Persons). Li inklir dimunn ki finn deplase buku fwa, etan done bann fami finn oblize buze plizir fwa pu rod refiz. Zenosid la finn dire telman lontan, ki trwa kar popilasyon Gaza ti deza refizye, swa depi zenosid Nakba 1948 u depi lager 1967, kan zot ti deplase par fors. Zordi, mank manze, mank item sirvi debaz ek mank lizyenn, pe agrav kondisyon de-vi bann IDP ki deza enn dezast, anplifye problem mantal ek ogmant propagasyon maladi. Tusala menas destriksyon fizik sosyete Gaza ek ekivo klerman a zenosid.

Bann ak krim kont limanite ki guvernman ek militer Israel finn komet li definir su 

Lartik 7 Stati Rom ICC inklir:

Lartik 7(a)

(a) Asasina

* Get (a) pli lao

Su Lartik 7(b) Stati Rom ICC 

(b) Exterminasyon

* Get (b) pli lao

Su Lartik 7 (c) Stati Rom ICC

(d) Deportasyon uswa transfer forse popilasyon;

* Get(c) pli lao

Bann krim deger guvernman ek militer Israel finn komet kuma definir su Lartik 8 Stati Rom ICC inklir:

(a) Vyolasyon grav Konvansyon Zenev 12 Ut 1949, setadir, ninport ki ak swivan kont dimunn uswa propriyete proteze su provizyon relevennt Konvansyon Zenev (“sivil”, inklir spesifikman “seki malad ek blese”, “zurnalis” ek “ travayer lasante” ek osi “obzektif sivil”) .”

* Get (c) pli lao

E Prof. Raz Segal finn azute, dan so deklarasyon Nasyon Zini, ki deklarasyon Israel lor deportasyon Palestinyin dan Gaza ziska dezer Sinai dan Lezip li ti osi partikilyerman alarman parski dezer finn servi dan listwar kuma zarm zenosid, ki les bann popilasyon antye mor ar lafin ek ar dezidratasyon.

INSITASYON pu komet zenosid, enn krim separe su lartik 3 Konvansyon Zenosid

Prof. Segal finn osi note ki depi 7 Oktob finn ena ‘insitasyon a zenosid’, enn krim separe su Lartik 3 Konvansyon Zenosid. Sa ti, ant-ot, dan medya Israelyin, medya sosyal, politik ek lezot lespas piblik. Diskur Israelyin promuvwar sa nosyon ki “pena okenn sivil inosan dan Gaza”, “zanfan Palestinyin teroris”, ek larme Israel bizin “bril Gaza ziska nanye pa reste”, “aplati Gaza”. Kan pran sa ansam ar deklarasyon dirizan Israelyin, li reprezant konfirmasyon kler “lintansyon”- ki normalman eleman prev pli difisil pu gayne.

Get pli lao. Ek osi sitasyon anba:

* Nissim Vaturi, Spiker Adzwin Knesset ek manb Konsey lezislatif so Komite Zafer Etranzer ek Sekirite, ti fer apel swivan lor so kont X medya sosyal le 17 Novam: “ Tusa preokipasyon ar eski ena uswa pena internet dan Gaza montre ki nu pa finn aprann nanye. Nu tro imin. Bril Gaza aster, pa mwins!” Li azute, “ Napa les karbiran rantre, napa les dilo rantre ziska bann otaz return kot zot!”

*Eliyahu, enn manb Itamar Ben Gvir depi parti lextrem drwat Otzma Yehudit (Puvwar Zwif) anrepons a enn kestyon dan enn intervyu radyo Kol Berama le 4 Novam: “Eski seki u pe atann se dime gramatin nu pu larg ekivalan enn bom nikleer lor Gaza an-antye, aplati zot, aplati tu dimunn laba ....?” Eliyahu reponn: “Sa li enn mwayin. Dezyem mwayin se pu mazine ki zafer inportan pu zot, ki pu fer zot per, ki pu antrav zot ... Zot pa per lamor.” 

KONPLISITE dan Zenosid

Lamerik furni Israel armaman. Li depans par milyar dolar pu arm zenosid. Lamerik osi servi ek abiz so veto dan Nasyon Zini. Li osi donn Israel lotorizasyon- anterm politik- pu fer seki li anvi, mem zenosid.

Li Lamerik, sirtu, ki kupab konplisite dan zenosid. Get Dokiman Legal ki Sant pu Drwa Konstitisyonel finn pibliye lor Israel so Krim Zenosid Lepep Palestinyin ki pe deplwaye ek Lamerik so esek pu prevenir kont sa, e so konplisite dan zenosid. Ala enn sitasyon dan konklizyon sa dokiman ki ti fer dan enn moman (18 Oktob) kan Israel ti’nn tuy 3,000 dimunn, pankor ariv 21,000:

“Lamerik finn dan lobligasyon, apartir ki li aprann ena risk grav enn zenosid lepep Palestinyin, pu exers so linfliyans lor Israel pu anpes krim la. Non selman Lamerik pa pe respekte so obligasyon pu anpes ki perpetre enn zenosid, me ena argiman valab ek kredib pu montre ki aksyon Lamerik ki viz pu favoriz loperasyon militer Israel, izolman ek kanpayn kont popilasyon Palestinyin dan Gaza, atenn staz konplisite. Lamerik - ek sitwayin Amerikin, inkli eselon ki monte ziska ran Prezidan - kapav truv zot responsab pu zot rol dan favoriz zenosid”. Nek ena pu Google “Israel’s unfolding crime of genocide” pu get Dokiman la antye.

INSITASYON pu zenosid

Pa zis sef deta partu dan Lwes, ek zot sef servis sivil, me tu lagazet, rezo radyo ek TV dan Israel ek dan Lwes ki finn difiz bann mansonz ek rimer ki Lotorite Israelyin ek lezot, finn avanse lor krim orib ki Hamas sipoze finn komet - dekapitasyon, vyol demas, masak tibaba - sarye responsabilite pu krim insitasyon pu komet zenosid.

LALIT fer enn lapel pu avoy nu ninport ki lezot lexanp “lintansyon”, “konplisite” uswa “insitasyon” pu komet zenosid ki u kapav dekuver dan seki u lir u tande. 

Lindsey Collen, pu LALIT 28 Desam

Tradir par AA avek kudme RL