Zenosid Blog 21 – Lintansyon Israel li enn Solisyon Final
21.12.2023
De zoli, gro lisyin nwar res lor sime dan Ragoo Lane – zot met finn demenaze dan enn flat parla, inn kit zot – gayn zot manze e byin gate par tu rezidan dan Ragoo Lane. Zot telman bann lisyin fezer, telman sir ki zot apartenir a Ragoo Lane ki zot alonze omilye sime e zot pa buze pu les loto pase, mem si u tronpe. Ena fwa u bizin desann depi u loto pu plede avek zot pu buze depi omilye sime. Tutfason, zot ti preske gayn maye dan file kamyon ramas-lisyin semenn dernye. Savedir zot ti riske al fini exekite dan prizon lisyin. Enn “solisyon final” pu enn Leta ki truv lisyin kuma enn problem. Rezman, enn vwazin ti truv danze pe aprose, e li finn resi fer zot tulede sorti depi lor sime zis atan, e inn fer zot al lwin pu pa truv zot. Sinon zot ti pu viktim sa kalite “solisyon final” ki menas zanimo. Momem personelman mo finn sov trwa lisyin depi enn tel sor– sak enn sovtaz si rakonte li enn long zistwar. Sa term“solisyon final” li enn “efemism makab” ti servi par bann Nazi pu dekrir kan lamor, kot ti met dimunn kominote Zwif, Jipsi e lezot kot ti delibereman exterminn zot dan sa zenosid Leta Alman avek konplisite lezot Leta – kuma Lafrans, Lapoloyn, Lotris. Sa term “efemism makab” ti servi par Anne Boyer, redakter respekte New York Times Magazine dan so resan let demisyon pu proteste kont konteni pro-Israelyin dan magazinn ki ti anplway li.
Li ti ena rezon. Nu zorey finn fatige tann bann efemism makab kalkile pu maske zenosid Israelyin, uswa pu maske sa solisyon final la. Bann pei Oksidantal e media ki sutenir Israel inpoz sa. Mem asterla, sa term “sese-lefe” ki nu finn bizin servi, li enn efemism makab. Nu pe anfet ule dir “Aret sa zenosid”.
Zordi, nu ti ule reprodwir enn extre depi enn reportaz Chris Hedges date le 4 Novam, kot li expoz prev lor sa muvman politik fasist ki finn pran rasinn dan Israel ki finn pran puvwar e pe, anfet, al delavan avek enn “solisyon final” kont Palestinyin. Dan so text, li ekrir, “Li enn grav erer pu refiz pran oserye sa bann lapel glas-u-disan kot prekoniz enn eradikasyon total e netwayaz etnik Palestinyin. Sa retorik la li pa iperbolik, li pa enn exazerasyon. Li enn preskripsyon literal.” Chris Hedges enn zurnalist poze e informe. Klerman li kontan bann zanfan dan Gaza. Li ti ekrir pu New York Times pandan 15 banane e li finn gayn pri Pulitzer. Li usi enn paster Presbiteryin. U kapav ekut so kozri kler e emuvan le 8 Desam lor enn video si u kopi-kol sa linnk la: https://www.youtube.com/watch?v=ly6lfhOxTe0
Le 4 Novam li ekrir:
“Mo finn kuver nesans fasism dan Israel. Mo finn fer reportaz lor extremist Meir Kahane, ki ti interdi pu poz kandida e so Parti Kach ti deklare ilegal an 1994 e ti deklare kuma enn lorganizasyon terorist par Israel ek USA. Mo finn swiv bann rali politik organize par Benjamin Netanyahu, ki resevwar imans finansman depi Amerikin extrem-drwat, kan li ti poz kandida kont Yitzhak Rabin. Alepok, Rabin ti pe negosye enn lakor lape avek Palestinyin. Siporterz Netanyahu ti sant ‘Mor a Rabin’. Zot finn bril enn efizi Rabin abiye dan liniform Nazi. Netanyahu ti mars divan dan enn fos lanterman pu Rabin.
“Premye Minis Rabin ti asasine le 4 Novam 1995 par enn fanatik Zwif. Vev Rabin, Lehea, ti blam Netanyahu ek so bann siporterz pu asasina so mari.
“Netanyahu, premye minis an 1996 pu premye fwa, finn pas tu so karyer politik dan nuri extremism kominalist Zwif, inklir Avigdor Lieberman, Gideon Sa’ar, Naftali Bennett, e Ayelet Shaked. Netanyahu so papa, Benzion – ti travay kuma enn asistan ar pyoner Zionist Vladimir Jabotinsky, limem Benito Mussolini ti denome kuma ‘enn bon fasist’. Zionist Jabotinsky ti enn lider Parti Herut e so parti ti kareman fer apel pu dimunn kominote Zwif sezi tu later Palestinn istorik. Buku parmi manb fondater Parti Herut ti organiz atak terorist pandan lager 1948 ki etablir leta Israel. Albert Einstein, Hannah Arendt, Sidney Hook ek lezot intelektyel kominote Zwif, dekrir Parti Herut dan enn steytmennt pibliye dan The New York Times kuma enn ‘parti politik ki dan so lorganizasyon, so metod, so filozofi politik e so program sosyal resanble buku bann parti Nazi e parti Fasist.’ [Not tradiksyon: Let Einstein ek lezot ti paret dan The New York Times le 3 Desam 1948]
“Finn tultan ena enn tandans fasist kominal Zwif alinteryer proze Zionist. Asterla sa tandans la finn pran kontrol leta Israelyin.
“ ‘Lagos nepli kapav mat ar sa iltra-nasyonalism toxik ki pe evolye isi,’ Zeev Sternhell, enn sirvivan Olokost e enn lotorite siprem lor fasism dan Israel, ti averti an 2018, ‘se sa mem kalite tandans Eropein ki finn preske eradik enn mazorite dimunn kominote Zwif.’ Sternhell azute, ‘[nu] pe pa selman truv enn fasism Israelyin agrandisan me enn rasism resanble Nazism dan so staz nesan.’
“Desizyon pu eradik Gaza finn lontan enn rev Israel so bann kripto-fasist, zeritye muvman Kahane. Sa kuran politik extremist kominal Zwif, ki form parti dan guvernman koalisyon opuvwar, zot pe orkestre sa zenosid dan Gaza, kot par santenn Palestinyin pe mor tulezur. Zot defann ikonografi, sinbol e langaz zot fasism lokal. Idantite Zwif ek Nasyonalism Zwif se versyon Zionist disan ek later dan fasism. Dan sa ideolozi extremist la, swadizan sipremasi Zwif li sanktifye par bondye, parey kuma masak Palestinyin, ki Netanyahu finn konpare arvek Amonit Biblik, enn lepep masakre par Israelit. Lennmi – byin suvan truve kominalman, kuma Mizilman – zot kareman programe pu exterminasyon etan done zot vi par sa bann extremis la kuma dimunn su-imin ki inkarn lemal. Vyolans ek menas vyolans, dapre zot, se sel form kominikasyon tu seki andeor sa serk mazik nasyonalist konpran. Dapre zot, plizyer milyon dimunn Mizilman e Kretyin, inklir seki ena sitwayennte Israelyin, bizin elimine.
“Enn dokiman 10-paz sorti Minis Israelyin Ranseynman date 13 Oktob 2023 rekomann transfer forse e permanan 2.3 milyon Palestinyin dan Band Gaza ziska Peninsil Sinai dan Lezip.
“Li enn grav erer pu refiz pran oserye sa bann lapel glas-u-disan kot prekoniz enn eradikasyon total e netwayaz etnik Palestinyin. Sa retorik la li pa iperbolik. Li enn preskripsyon literal. Netanyahu dan enn twit, finn retir twit la apre, dekrir batay avek Hamas kuma enn ‘batay ant zanfan lalimyer ek zanfan teneb, ant limanite ek lalwa lazeng.’
“Sa kuran politik fanatik nasyonalist Zwif, etan li opuvwar, li finn fini kumans so versyon solisyon final a problem Palestinyin.” Lerla, Chris Hedges donn bann sif lor aneantisman Gaza anterm komye tonn bom finn large e pursantaz lakaz inn detrir. “Zot pena okenn lintansyon pu devye, pa mem par Washington.”
“ ‘Li ti evidan pu bann ofisyel Amerikin ki lider Israelyin kwar nonb masif mor e blese sivil li enn pri akseptab dan zot kanpayn militer,’ reportaz dan The New York Times ekrir.
“ ‘Dan konversasyon prive avek zot omolog Amerikin, ofisyel Israelyin fer referans lor kimanyer USA ek lezot pei alye ti servi bom devastater dan Lalmayn ek Zapon dan Dezyem Ger Mondyal – inklir larg 2 bom atomik lor Hiroshima e Nagasaki — pu sey mat sa bann pei la’ lartik dan New York Times kontinye.
“Obzektif se enn Israel prop, devide depi Palestinyin kontaminan. Gaza pu vinn enn dezer. Palestinyin dan Gaza swa pu tuye uswa forse dan kan refizye lor frontyer Lezip. Redanpsyon Mesyanik pu kumanse enn fwa finn expilse tu Palestinyin. Sa kuran extremist Zwif la fer apel pu demoli Moske Al Aqsa – trwazyem lye plis sakre pu popilasyon Mizilman, batir lor rwinn Dezyem Tanp relizyon Zwif, ki ti detrir dan lane 70 CE par larme Romin. Pu ranplas moske la par enn “Trwazyem” tanp relizyon Zwif, enn tel muv pu anbraz lemond Mizilman. West Bank, ki bann fanatik apel ‘Zide e Samari’ pu formelman anexe par Israel. Israel, guverne par lalwa relizye inpoze par bann parti iltra-ortodox Shas ek Tora Inifye Zidaism, pu vinn enn leta integrist kuma Liran.
“Li selman enn pa ver enn kontrol total Israelyin lor later Palestinyin. Israel so bann koloni ilegal setelmennt kominote Zwif, so bann zonn interdi kontrole par militer, so bann lotorut separe e instalasyon militer, tusala finn akapar plis 60% later West Bank, finn fer lavil ek vilaz Palestinyin vinn bann geto anklave. Ena plis ki 65 lalwa ki fer diskriminasyon direk u indirek kont sitwayin Palestinyin dan Israel e kont seki viv dan teritwar okipe. Kanpayn masak aveg kont Palestinyin dan West Bank – buku sa masak la fer par milis bandi kominalist Zwif – ansam avek demolisyon lakaz ek lekol, e anexasyon seki reste depi later Palestinyin, tusala pu exploze.” Chris Hedges lerla donn sif, depi inkirsyon Hamas le 7 Oktob, lor nonb Palestinyin tuye e arete, imilye e pran kuma prizonye dan West Bank par larme Israel e par kolon ilegal.
“Israel, anmemtan, pe vir kont bann “tret Zwif” ki refiz ader ar sa vizyon fuka zot dirizan Fasist e ki denons vyolans orib leta. Lennmi klasik fasism – zurnalist, aktivist drwa imin, intelektyel, artist, feminist, Liberal, omosexyel ek pasifist – pe deza sible. Zidisyer, dapre plan propoze par Netanyahu, pu netralize. Deba piblik pu deperi. Sosyete sivil e leta-de-drwa pu nepli existe. Seki taxe de “delwayal” pu deporte.
“Fasist pa respekte valer lavi imin. Imin, mem dan zot prop kan, kapav dispoze pu konstrir zot itopi fuka.” Chris Hedges ti ekrir sa avan Israeli Defense Force ti exekit 3 otaz Israelyin, enn parmi zot trwa ti pe tini enn pavyon blan. Apre sa li dekrir kimanyer IDF inn tuy Israelyin le 7 Oktob, nu finn deza ekrir lor la dan bann blog presedan, kot sirman invok doktrinn Hanibal lor lekel nu finn koze dan enn blog avan.
Li terminn so exselan lartik avek parol alarman, “Gaza li kumansman. Prosenn pu West Bank.”
“Israelyin ki pe tap lame lor kosmar Palestinyin pu byin vit ena pu sibir zot prop kosmar.”
Dan LALIT, nu kapav dir parey pu lemond. Nu tu pu kuma lisyin dane, pyeze dan file bann seki infliz solisyon final lor nu. Si nu permet Leta Israel – avek USA an konivans avek so bann vale dan Lerop ek bann koloni peple-par-kolon– kontinye sa “solisyon final”, tret Palestinyin kuma kamyon ramas-lisyin tret lisyin eran, san zot bizin ena pu rann kont dan sa seri prosekisyon internasyonal, san zot bizin ena pu pey reparasyon a Palestinyin, lemond antye pu ase vit ena pu sibir enn kosmar numem, usi. Lider Israelyin premye ti apel Palestinyin “zanimo imin”, lerla prosed avek sa zenosid kont zot.
Nu bizin kontinye presyon lor Pravind Jugnauth pu kup relasyon diplomatik avek Israel, kuma enn aksyon, e pu anil ek interdi tu kontra avek konpayni Israelyin kumanse avek CEB e CWA. Li irzan. Bizin pran enn stenn kler.
Lindsey Collen, pu LALIT. Mardi 19 Desam 2023
Tradir par BK avek kudme AA
