Zenosid Blog 20 – Enn Fam Temwin Kree Felir dan Ezemoni US-Israel
19.12.2023
Zordi nu pe ekrir lor puvwar enn sel temwin. Enn fam Israelyin.
“Ezemoni” Oksidantal li pwisan. Me, kuma tu ezemoni, li usi frazil. Ezemoni li bizin total pu li existe. Mem enn ti fraktir uswa mem enn laliyn-fraktir [fault-line an Angle] kapav kas li. Ariv enn pwin, ezemoni li anmemtan fraktire enn sel kut e so fraktir vinn inevitab. Dan sa bann moman la, sak aksyon sak dimunn kapav ena enn linportans kapital.
Kumadir pu pruv sa pwin lor ezemoni, nu remarke dan dernye sink zur, inntelijennsya Oksidantal meynnstrim, e mem Guvernman Oksidantal, finn kumans debule brit-brit ek kan pa pe atann, pu pran zot distans, trazikman tro tar, depi zenosid Israel pe komet kont lepep Palestinyin. Mem trwa guvernman, Lostrali, Kanada, Nuvel Zeland, enn lao pre kot Pol Nor e de lezot pre ar Pol Sid, finn fer enn zafer drol kan zot trwa finn siyn e rann piblik enn “steytmennt komin” an faver enn “sese-lefe sutenab”. Sa trwa pei la zot tule trwa form parti dan seki apel “Sink Lizye” rezo espyon Oksidantal [“Five Eyes” an Angle]. Kuma Siklop, sakenn ena zis enn lizye. Kuma Siklop zot vyolan, me zot pa tro intelizan. Pei sink-lizye zot azir avek enn konformite aveg, an zeneral anfaz ant zot sink, purtan sa trwa pei finn distans zot depi USA kan li finn inpoz so veto de fwa dan Konsey Sekirite Nasyon Zini e UK finn abstenir.
Lerla Rishi Sunak, asontur, degaze debule, pu fer apel pu enn “sese-lefe sutenab”, li usi. Kat lizye finn asterla pran zot distans depi sa enn gro lizye parmi sa sink la!
An similtane, tu bann akademik ek lider ONG depandan lor finansman USA, uswa sa bann ki depann lor bann leta pro-Israel kuma Lalmayn, inklir dan Moris, pe degaze pretann komkwa zot ti tultan pran pozisyon kont sa zenosid la. Sa li bon. Me enn mea culpa ti pu pli bon. Seki ankor meyer se zot konpran sa zenosid la e zot opoz li piblikman.
Manifestasyon alabaz pe kontinye pran lanpler dan lemond. Par exanp, Vandredi enn manifestasyon kordine par lorganizasyon Zwif, e zot bann alye, finn blok pon dan wit lavil Amerikin: Seattle, Los Angeles, Portland, Philadelphia, Washington DC, Atlanta, Minneapolis ek Chicago pu mark 8em zur Hanuka, enn festival kominote Zwif. Zot tu fer apel pu enn sese-lefe e sak parol konte dan sa moman krisyal listwar.
Par exanp, LALIT pe pibliye enn temwanyaz Mm Yasmin Porat, enn fam Israelyin temwin le 7 Oktob dan Kibutz De’eri. Si u al dan seksyon Documents lor websayt LALIT, u pu kapav konn exakteman seki finn arive sa zur la dapre enn temwin kredib. Sa enn temwin la avoy enn reyon lalimyer atraver sa “marenwar lager” ki sinon permet propagann Israelyin pu dominn laverite.
Yasmin Porat ti al dan Konser Reyv avek so partner, e ansam zot finn sove ziska Kibutz avwazinan. Li ena 44-an, li enn mama trwa zanfan. Li finn perdi so partner dan tir-krwaze kan IDF finalman ariv kot Kibutz Be’eri e kumans tire lor zom Hamas e lor zot prizonye san fer okenn distinksyon. Yasmin Porat ador al dan konser Reyv – so partner ek li ti sorti depi ase lwin pu vinn dan sann konser la.
Dosye nu finn re-pibliye lor nu websayt ti prepare par Electronic Intifada, enn lekip ki fer enn travay metodik pu konn laverite, kuma nu finn explike dan enn presedan blog. Onete sa temwin la e persistans sa kalite travay lekip Electronic Intifada pe fer, se samem ki kontribiye pu bann pei kapav pran pozisyon.
Li inportan pu lir dosye la akoz li klerman pa propagann. Intervyu la ti difize lor Radio Leta Israelyin, KAN. So temwaynaz li par enn sa kalite temwin avek enn fransiz exsepsyonel ki rapel klerman, dir laverite e donn so linpresyon onetman. So temwaynaz ti retire depi websayt KAN pu enn but letan, lerla apre intervyu inn re-pibliye par lezot ki ti rikord li, KAN inn remet li lor zot websayt – avek bann but adisyonel ki dan versyon presedan ti sansire. E nu pe pibliye Electronic Intifada so transkripsyon ek tradiksyon intervyu Yamin Porat.
Zenosid Lepep Palestinyin ki leta Israelyin ek Lamerik pe perpetye asterla mem, divan nu prop lizye, e ki sa pu afekte lemond antye pu bann zenerasyon fitir, depann lor mizle sa kalite temwanyaz depi enn temwin okiler. Me laverite pe sorti okler.
Dimunn dan lemond pa sipoze gayn sa kalite konpreansyon lor seki finn reelman arive le 7 Oktob. Nu tu sipoze res su lanpriz Amerikin-Israelyin komkwa Hamas parey kuma ISIS. Hamas, propagann US-Israel dir, viz pu vyol ek tuy tibaba e komet atrosite, kuma enn stratezi. Anfet, Hamas ti laba pu pran prizonye. Temwanyaz sa temwin konvinkan dan so onete, Yasmin Porat expoz propagann pu seki li ete.
Steytmennt sa enn temwin la lerla vinn enn sa tipti laliyn mins felir dan sa ezemoni ki USA lor rebor pu al perdi, kan li vinn enn gran fraktir ki fele uver e expoz tu bann mansonz.
Lindsey Collen pu LALIT, Dimans 17 Desam 2023
Tradiksyon par BK ede par AA
