Zenosid Blog 18 – Analiz Kurt depi Jewish Voices for Peace
16.12.2023
Dan mo dernye blog, mo ti sigzere u kapav interese pu swiv Electronic Intifada anime par Ali Abunimah ek so lekip, pu ede konpran konfli Israel-Palestinn. Kan popilasyon Gaza ek West Bank pe sufer enn onn-going zenosid, minimem nu kapav fer se nu bizin sey gayn enn konpreansyon profon pu nu kapav kriye STOP! Zordi pu mem rezon mo ti rekomann Electronic Intifada, mo pe rekomann Jewish Voices for Peace. Li, usi, li instriktif, avek konpasyon e fasil lir.
Get anba enn lexanp enn analiz sofistike lor kitsoz fuka prononse par Prezidan Biden resaman dan so defans kifer USA pe sutenir zenosid par Israel. Sa insanite la devwal absirdite onn-going sa bann argiman pro-Zionist ki finn persiste pandan enn syek. Get anba JVP so komanter integral:
“Mardi, Prezidan Biden reiter enn so bann defans favori enn politik indefandab: arm enn leta ki pe komet zenosid. Pandan selebrasyon Hanukkah [Fet Zwif] dan Mezon Blans, li deklare ‘si pena Israel, pena enn sel Zwif dan lemond ki pu an sekirite.’
“Li kitsoz sokan pu enn bug alatet enn pei kot ena 7.6 milyon dimunn kominote Zwif, dezyem pli gran popilasyon Zwif dan lemond.
“Mem si sa steytmennt ti vre, nu rezet tu nosyon sekirite baze lor masak ek deplasman Palestinyin. Me, li usi konpletman fos; anfet, sa retorik la met Palestinyin ek Zwif dan plis danze.
“Pu prezidan USA deklare se selman lexistans enn lot pei ki gard dimunn kominote Zwif an sekirite inplik ki sa set milyon dimunn Kominote Zwif ki viv dan Lamerik pa kot zot isi, e pa kapav espere zot guvernman pu asire zot viv an sekirite.
“Sa se antisemitism: invok sa lide dimunn kominote Zwif pa vremem apartenir, diskredit plas kot nu finn batir nu lavi dan diaspora pandan milener. E se kumsamem ki explwat antisemitism, e servi dimunn dan kominote Zwif kuma otaz politik – kan enn prezidan USA an-exersis invok lafreyer Zwif ek tromatism pu defann lefet li pe furni zarm enn leta ki pe komet zenosid, tusala pu fer avans azanda inperyalism Amerikin .
“Dan sa mem moman, nu pe temwayn enn nuvo “McCarthyism” pe derule an tan reel, enn kanpayn amene lor nom pu “konbat antisemitism” — me ki pu fer dimunn dan kominote Zwif mwins an sekirite …”
Jewish Voices for Peace spesyalize dan sa zar analiz kurt, presi liye avek nuvel dan aktyalite.
Lindsey Collen, pu LALIT, Zedi 14 Desam 2023
Tradir par BK avek kudme AA
