Zenosid Blog 16 – Lor Leta Israelyin Dezabiy Zom Tuni lerla Parad Zot
13.12.2023
Sak fwa nu panse krim deger komet par Leta Israelyin finn tus bafon – barikad enn popilasyon antye dan enn syez medyeval, kondann fami pu mor defin, bonbard zanfan depi lezer, lamer ek later, sible ek lerla detrir lopital apre lopital, tuy zurnalist, tuy staf Nasyon Zini ek travayer lopital par expre ek par duzenn - lerla zot al fer kitsoz moralman ankor pli pir. Semenn dernye, IDF ti parad zom Palestinyin ki zot finn pran kuma prizonye anpiblik – vye ek zenn, fit ek klerman frazil - tu dezabiye preske tuni, e lerla filme zot. Eski bann lider Israelyin finn perdi latet? Kuma eski zot kapav fer enn zafer osi kriyel e inimin? Eski zot pa realize sa reponn kuma eko kolonyalism? Lor Nazism dan sa kalite krim? Nu tu kone sa kalite tretman kriyel ek inimin li konstitye enn krim deger.
Parmi zom imilye kumsa finn idantifye enn zurnalist, enn butikye, enn ferblantye byin koni ek enn metdekol. Finn filme sa bann zom la premye kan inn fors zot pu akrupi lor rebor trotwar, lerla kan zot anliyn an ranze omilye sime, azenu, lerla truv zot lame atase ek lizye bande dan kamyon parade atraver Gaza City, e lerla, pran zot, literalman kidnape e kondir zot dan Israel. Fim la montre apepre enn 50-enn zom lizye bande, lame dan menot deryer ledo, e pe azenu lor enn but lespas buldoze. Tu sa bann zom la ti pe anfet refizye depi bonbardman Israelyin dan enn lokal Nasyon Zini, zot ti finn deza forse kit zot lakaz pu vinn dan enn ankor pli tipti kan konsantrasyon par IDF. Ena plizyer rapor kredib lor ka tortir, pwayne bann zom blese avek menot, zom ek garson inn gayn kut vole dilo fre lor zot, e buku parmi ti gayn bate e ti les zot san bwar u manze.
E purtan Lider Lamerik Joe Biden e Kongre USA pe kontinye peye pu tusala?
Lamerik pe pey lefre dan de fason. Premye, zot pey bil pu totalite arsitektir tortir ek zenosid kont lepep Palestinyin anterm ardwer militer e lamone led an dolar. Dezyem, Biden peye anterm so popilarite kuma prezidan. Biden so lakot popilarite inn telman tonbe ziska li finn ariv pli anba kandida Repiblikin Nicki Haley, sandir pli ba ki sa klunn danzere Donald Trump. E lanpir Amerikin antye inn diskredite fas a leve bukliye kont atrosite Israelyin. Kan reprezantan Amerikin dan UN lev so lame pu inpoz so veto kont enn sinp “sese-lefe imaniter” ki ti pe viz pu ena brek a sa masak Israelyin fami Palestinyin, li pe lev so lame pu lafin sa tigit repitasyon USA ti ankor kapav ena dan lemond. Tu Lamerik so krim lepase – kuma larg bom atomik USA lor Hiroshima ek Nagasaki, kuma bonbardman zenosider bril lavil Dresden ek lavil Tokyo, kuma tuy sivil dan Lirak, Lalibi, Afganistann ek Lasiri – tusala finn revinn dan nu memwar, kan Netanyahu servi zot kuma referans pu zistifye zenosid so prop leta lor lepep Palestinn. Barbari “Sivilizasyon Oksidantal” pe expoze.
E lerla, kan nu kwar leta Israelyin inn tus bafon, li al fer kitsoz pli pir.
Li filme zom – tuzur tuni apart zot boxer lor zot – sipoze pe depoz zot zarm. Alor, sa imilyasyon piblik zom Palestinyin, zot san linz e filme zot, kontinye. E ki IDF kwar nu, lepep dan lemond, nu ete? Idyo? Kimanyer bann zom tuni, zom arete ankor ena zot fizi ar zot? Li pa fer sans. Ki sa ule dir? Exsepte Leta Israel finn anfet expoz sa fasism orib, avek tu so orer alabaz.
Azute lor la finalman al dekuver tusala ti enn fabrikasyon monte butanbut, enn but fim trike – parey kuma dernye but fim trike demaske par BBC, kot IDF ti pe montre enn-de zurnalist li finn swazire swadizan prev prezans zarm anba Lopital Al Shifa. Dan fim la, ti ena enn mont lor lebra enn solda IDF kot afis enn ler ki ti avan ler kan sa vizit organize pu sa lekip zurnalist la ti efektivman ena lye. Dan sa nuvo seri fos klip video, ena enn priz kot enn vye misye pe tini enn revolver dan so lame gos ek enn fizi dan so lame drwat, e dan lot priz revolver ti sanze e vinn so lame drwat ek fizi dan so lame gos. Sa vremem montre nu sa lafin puri sa proze kolonizasyon Oksidantal puri dan tu so barbari anakronik, zordi.
Guvernman Moris bizin tutswit sispann tu relasyon diplomatik avek Israel, e kennsel tu kontra avek konpayni Israelyin pu travo dilo dan Rodrig uswa elektrisite uswa proze prizon dan Lil Moris. Inn ler pu kup tu lyin posib avek enn Leta ki pe komet zenosid. Lamerik, etan li furniser zarm, sutyin diplomatik, e larzan a Leta Israelyin ki pe komet zenosid divan nu lizye, li usi bizin pare pu li sibir izolasyon.
Lepep dan lemond antye – dan zot sindika, parti politik, lasosyasyon – pe expoz ek opoz zenosid Israelyin lor lepep Palestinyin. Nu bizin kontinye fer sa, e fors sakenn nu guvernman partu pu azir. Sa depann lor expoz masinn propagann Israelyin, ki media Oksidantal masivman reperkite. Prosenn blog pu sey expoz sa masinnri propagann la.
Lindsey Collen,
pu LALIT Mardi 12 Desam 2023
Tradiksyon: BK ede par AA
