Blog 14 – Lor zanfan dan lepok Zenosid
04.12.2023
Nu finn ena lasans gayn 55 mm lapli pandan lanwit dan Ragoo Lane, e lerla ankor inpe inn tonbe Dimans gramatin. Alor mo pa pu bizin mo per larozwar ki mo ti fek pas komann. Sa li bon akoz mem si ferblantye Bambous inn dir “zot pu pare Samdi”, ki enn tipe pli presi ki seki abityel “zot pu pare lot semenn”, mo pa finn al pran zot. Sirman, mo dute li pa pu ankor pare. Me, pa fer nanye, akoz nu pe gayn buku lapli.
Etan, tutfason, mo lakaz zordi gramatin, ant de vole lapli, Ram ek mwa inn al kas enn gro mang Dofine, ver fonse deor e oranz klatan andan e li ena enn textir pa tro diferan depi enn pom e ena gu absoliman divinn. Antretan, enn dan nu de tutu, “Down” inn aprann pu dibut lor de lapat deryer pu li resi ariv kas mang Mezon Ruz depi enn-de brans anba ki finn raporte sa lane la. “Lock” manz mang mir, me li pa usi antuzyas pu lasas enn depi lor pye.
E lerla Ram ek mwa, ant de vole lapli, degaze desann enn imans friyapin pu bwi e manze avek vinnday zordi swar. E enn frisiter mir pu azut dan nu tidezene dime.
E zis apre sa santiman, “get sa, ki mervey later kapav ofer nu, limanite”, mo rapel – zenosid sorti dan mo lespri zis pu enn timama – Samdi swar lor Al Jazeera mo finn truv de zanti misye Palestinyin ki zot travay se plant manze, okip zot e lerla ofer zot a popilasyon Gaza pu zot sibzistans. Zot pe dibut e montre tiyo dilo finn bonbarde, par expre bonbard tiyo dilo irigasyon. Zot dibut pe plede ar lesyel lao, “Eski sa tiyo dilo samem ‘terorist’ Israel pe promet pu aneantir?” “Eski asterla dimunn pu oblize bwar dilo, non-trete, dilo irigasyon?”
Wi, leta Israelyin pe kontinye so zenosid kolonyal. Mem si isi nu gayn byinfe lapli. Mem si isi nu pe kas Mang Ver Du, ena enn Sime zis lao Ragoo Lane apel mem nom. Asterla, zenosid pe pran form destriksyon total prosenn rekolt dan Gaza. Byinsir, Leta Israelyin kolonyal so zenosid li posib avek zarm “Made in USA” [Fabrike dan USA]. Eliminn irigasyon pu plantasyon manze, anmemtan bonbard ek kup tu manze inporte, e mem fyuel pu desalinasyon dilo pu bwar. Tulezur mo sey konpran tu seki nu pe temwayne avek nu prop lizye? Ki kalite Leta sa ete? E kifer USA pe kontinye arm li? Mo pa konpran. Eski mo pe vinn fu pu kwar sa pe arive? Lor la, ankor enn fwa erfors Israelyin inn rekumans tuy tibaba fek ne, e tipti zanfan, zanfan ek fam ansint, vye misye ek infirm ansam avek seki fit ek an bonn sante, e mem tu zot zanimo, e Zu Gaza antye, kan IDF pe tuye partu.
Enn lot video klip lor lekran TV Dimans gramatin vinn dan mo latet. Ena apepre sis tipti garson – de parmi zot, pa plis ki 8-an, pe petriy enn tipe lafarinn avek dilo dan enn tinnpot avek enn but metal servi kuma enn zuti, e lerla kwi dan form enn chapati lor enn but metal ki pe balanse lor enn ti dife zot finn debruye pu alime, zot tusel dan enn lemond otur zot kuver avek debri bonbardman partu. Sa se Gaza. De pli gran garson pe partaz enn tipti chapati avek kat lezot pli tipti garson, zot kapav ena kat-an. Ase pu kas u leker.
E lerla, enn manb LALIT – ki lavantaz kan u dan enn parti politik – atir mo latansyon lor enn zafer mo pa ti kone. Ena enn intox bizar bann tipti zanfan pe derule ansemoman dan Israel. Pe fer tipti zanfan sant sante anfaver zenosid. Zot video klip ti mem lor chanel TV Leta Israel, KAN, ziska li finn lev enn tole e finn bizin retir li, dimwin depi Chanel Guvernmantal KAN. Wi, finn anseyn zanfan Israelyin, deplase depi enn Kibutz pre kot Gaza, pu sant enn sante apel, enn parmi pli pir nom kriyel, “The Friendship Song 2023” [Sante Lamitye 2023]. So parol pe apel pu aneantir Palestinyin ki viv dan Gaza. Tusala finn fakt-chek par EuroNews. Ala enn-de parol sa sante ki pe fer bann tipti tifi sante:
“Dan enn an,
“pa pu ena nanye laba,
“e san risk nu pu return kot nu
“Dan enn an
“nu pu aneantir zot tu
“e lerla nu pu returne pu prepar nu karo pu plante”
Dimunn responsab pu sa balad zenosider ena kum nom “Civil Front”. Mo sipoze “friendship” [lamitye] e fron “sivil” ena diferan sinifikasyon zordi dan Leta Israelyin kan ena fasist extrem-drwat dan Guvernman – mem si zot pa form parti dan Kabine Lager – pe byin aktif pu komet zenosid.
Me, eski sa sante la enn insidan izole?
Non. Lagazet meynstrim The Times of Israel, ti met so gro tit de semenn desela kumsa “Hip-hop lim deger inn vinn nimero enn dan Israel”. Sa dezyem sante li usi apel pu enn zenosid kont Palestinyin, apel zot “garson Amalek”, ki ule dir bizin eliminn zot ziska dernye zom, fam, zanfan ek zanimo domestik. Li fer apel a militer Israelyin pu “tuy terorist” e sante manevre pu nom kuma sib trwa selebrite, remarke tule trwa fam kuma suvan sa ete kan ena enn lasas-o-sorsyer, trwa fam ki pandan dezane, finn pran pozisyon avek lepep Palestinyin: Bella Hadid [model seleb desandan Palestinyin], Dua Lipa [enn santer Albanyin] e Mia Khalifa [aktris Libane e personalite TV] – komsidire enn warning seki pe atann zot si zot sutenir Palestinyin.
Sa referans a “Amalek” ti servi par Netanyahu limem, kan li uvertman exprim lintansyon pu komet zenosid, kan li lans zenosid perpetre par Leta Israel. Li bizin fer li kler a Joe Biden ki so lintansyon ete. So bann parol repet zot dan parol sa sante militarist e zenosider. E sante la klase “Nimero Enn” dan “HitParad”.
Tusa zot akonpaynman makab zenosid Leta Israel.
Anka u pe dimann umem ki ete sa koze “Amalek” ete, ala enn pli pir sitasyon depi Labib, kot Bondye sipoze donn instriksyon a Samuel pu dir Saul li bizin aneanti popilasyon Amalek: “Aster ale ek pini [popilasyon] Amalek, e pa eparyn personn, tuy zom ek fam, ti zanfan ek tibaba, bef ek muton, samo ek burik.” (Received Version of the Holy Bible: Samuel 1:15:3). “detrir tu” tu seki zot ena e “exekit” zot tu, mem tibaba ki ankor bwar dile mama. Mem zot zanimo domestik. Sandut bondye inn inklir kup pye mang ek pye friyapin dan so fraz “detrir tu seki zot ena”.
Zistwar Labib kontinye, si u ule get li, e zistwar anpire amezir kontinye, lor kimanyer Saul ti dan lerer pu permet sov enn-de muton! Onom disyel!
Kot limanite pe ale, si nu pa kapav aret Leta Israel fer sa? E kifer USA pe tuzur kontinye finans e arm Leta Israel pu fer sa?
Lindsey Collen
Pu LALIT, Dimans 3 Desam 2023
Tradiksyon BK avek kudme AA
