Blog 11 – Reyd Pinitif Kolonyal e enn Rebelyon dan Mezon Blans
30.11.2023
Prezidan Biden pe ena pu fer fas ar enn rebelyon andan Mezon Blans. Wi, so prop staf dan Mezon Blans pe leve kont Biden akoz li pe kontinye persiste donn sutyin a zenosid Bibi Netanyahu. Inpe tar. E sa pa sifi pu sanz ase pu kapav anpes ankor zenosid … pa purlemoman. Me, enn rebelyon? Inpansab?
Enn-de zur desela, le 26 Novam, mem Washington Post, enn zurnal ki rul pu Biden inpe parey kuma TASS rul pu Putin, raport sa. So staf inn warning Biden, par exanp, pu pa inklir koze lor sa sipoze “tibaba dekapite” dan so brifing lapres akoz li pa enn linformasyon kinn verifye, uswa pli presizeman li ti enn rimer IDF, ankor pli pir li ti enn fabrikasyon tukur. Mem bann lotorite Israelyin inn met aryer, inn retrakte sa. Biden inn avoy so staf promne. Li finn al delavan e li finn koz lor “tibaba dekapite”. Pa zis sa, mem apre kan finn dekuver sa li ti kareman enn invansyon, Biden re-fer sa mem akizasyon enn dezyem fwa. Lor prinsip, nu kapav selman sipoze, Biden pe bizin alimant utraz ek listeri demas pu kontinye batir e mintenir sutyin pu sa zenosid ankur ki li pe finanse e arme.
Anfet, ala laverite: lagazet Haaretz finn pibliye lalis konplet tu viktim Israelyin dan inkirsyon dirize par Hamas dan Israel le 7 Oktob. Dapre sif ofisyel Israelyin, nonb mor finn diminye depi 1,400 a 1,200 e asterla li 1,147. Ladan ena 300 solda, aster li paret li kapav plis. Alor sa vedir otur 800 lamor sivil. Li enn sif byin ot.
Ena enn sel tibaba lor lalist. Li apel Millie Cohen. Li ti ena 10 mwa ek li finn mor par bal Hamas dan tir-krwaze kan larme Israelyin ti lans enn kont-atak pu deray inkirsyon Hamas. Pena okenn klem komkwa tibaba la ti dekapite.
Anfet, nu bizin kumans etidye an detay sa propagann Israelyin.
Osito bann lotorite Israelyin inn retrakte sa mansonz “40 tibaba dekapite”, enn mansonz responsab pu kree enn listeri demas dan lemond Oksidantal kot dimunn pankor ariv kone lor tu mansonz san vergoyn leta Israel deseni apre deseni, lanturaz otur IDF inn sorti enn lot zistwar alternatif pu enn-de zur lor enn tibaba Israelyin inn swadizan “brile dan fur”. Telman orib ki li pu alimant ankor plis sa listeri demas atraver lemond Oksidantal. Finalman, sa ti enn sak plastik transparan avek but-but lekor adilt apre enn dife, asterla li pe paret li rezilta lansman enn misil dife-lanfer depi elikopter IDF dan enn kont-atak. Foto loto, lakaz ek lekor karbonize finn retire depi lor bann sayt IDF parski zot resanblans telman evidan avek bann foto klasik viktim misil dife-lanfer tire apartir Elikopter Apache furni par Lamerik. Zot finn vize ek fizye tu san fer distinksyon pu zot repus sa inkirsyon la – tuy militan Hamas, tuy tu otaz ansam ar zot, e lezot Israelyin dan leparaz. Haaretz raporte ki IDF ti usi “oblize” pu tire depi dan ler lor zot prop baz militer prinsipal kot Erez Crossing. Buku zom Hamas ek Israelyin finn tuye par IDF – depi fiziyad elikopter, depi tenk e depi infantri.Sa li form parti “direktiv Hannibal” setadir kan ena otaz Israelyin, solda IDF kapav fizye zot si zot truv parmi dan band ki pe pran zot kuma otaz.
Me, les nu revinn lor sa mansonz propagann Israelyin propaze par Lamerik pu zistifye zenosid Israel-Lamerik, e plas li dan kontex kolonyal – pu permet dimunn konpran sa prosesis orib, e lerla, ansam, nu kapav azir pu aret sa zenosid la.
Sa depandans lor mansonz grotesk ti byin kuran dan bann koloni ki vinn peple ar kolon. Li finn servi dan zenosid Alman kont lepep Herero e lepep Nam dan Namibi ena plis ki san banane desela. Li finn pran 100 banane pu Leta Alman kumans dimann exkiz. Li finn servi dan zenosid Alman kont popilasyon Zwif ek popilasyon Roma ena 80 banane desela. Asterla, inpe plis ki 100 banane apre, leta Alman pe partisip dan so trwazyem zenosid – so exportasyon zarm a Israel finn miltipliye par 10 depi le 7 Oktob.
E atraver lemond kolonyal, pandan bann syek, barbari kolonizasyon oksidantal ti inklir seki Britanik ti apel “reyd pinitif”, ki ti forseman an reaksyon swa a kit kalite krim orib izole kont enn kolon uswa kit krim invante net. Li byin suvan tom ant lede setadir baze lor enn rimer enn ka vyolans grav, pandan enn lalit arme zistifye reel kont lokipasyon militer enn sosyete antye. Lalit arme par seki oprime, dan lepok kolonyal, “ti ena” pu dekrir par puvwar opreser kuma tom andeor sa sfer “konportman kriminel ordiner” ki kapav regle dan lakur. Li “bizin” prezante kuma enn utraz komet par “bann barbar” ki telman orib e kont enn viktim “sivilize” telman inosan, ki li nesesit exterminasyon biblik kuma pinisyon final e absoli, e nonpa kit prosesis zidisyer. Sa pratik reyd pinitif li enn karakteristik kolonizasyon.
Bibi-ek-Biden finn, pandan 6 semenn, perpetre dan Gaza e ena lintansyon kontinye si nu pa resi aret zot apre sa trev tanporer insutenab, enn reyd pinitif a propilsyon-nikleer. Li enn pinisyon kolonyal. Dan enn lepok kot nu finn sipoze fini anter kolonizasyon. E sa bizin arete.
Zot finn trangle lepep Palestinn ki viv dan Gaza atraver zot “leta-desyez militer total”, e lerla finn bonbarde depi lao, bonbarde depi nuvo tenk done-par-USA e depi navir dan Mediterane, ziska masakre plis ki 15,000 sivil, ankor kelke milye ankor kuver anba dekonb batiman eklate par IDF e gran mazorite parmi sivil masakre se zanfan, fam e seki aze e seki andikape.
Se tu sa sivil masakre ki veritab dimunn dekapite, so bann zanfan ek tu leres. Zot lamor pa rimer sa. Nu finn temwayne layv lor TV kuma bom IDF inn masakre zot.
IDF inn fors deplasman plis ki enn milyon popilasyon depi zot lakaz dan parti Nor Gaza, e inn fer zot marse ver lesid, kumsidire pe prepare pu expilse, avek leres popilasyon Gaza dan Dezer Sinay dan Lezip. Rezonans biblik. Kuma promes dan Netanyahu so steytmennt zenosider.
Kumsa Israel gayn later pu kolonize, Gaza, ek gayn so resurs, Gaza so lamer-ris-ar-gaz-natirel pu lekel fini siyn kontra avek konpayni depi Lamerik, Gran Bretayn ek Litali. Parey kuma piyaz kolonizasyon Oksidantal avan.
Me, IDF finn return ankor pli lwin dan listwar barbari oksidantal. Dan Mwayenn-Az. Li finn kup furnitir dilo, manze, elektrisite ek karbiran lakuzinn atraver enn leta-desyez. Eski u kapav mazinn enn Leta azir pu kup manze ek dilo popilasyon? An 2023? Par expre?
Zot finn al ankor pli lwin.
IDF par expre inn bonbard lopital ek lekol, batiman Nasyon Zini, legliz, moske ek batiman servis sivil, pu fer Gaza vinn inabitab pu enn long-long peryod letan. E nu tuzur pankor ariv aret zot pu pa rekumans sa barbari la apre lafin sa sese-lefe tanporer la?
Sa sese-lefe li kareman pa sifi. Li bizin permanan. Bom non.
Nu bizin aret kolonizasyon Israel. Nu bizin aret Israel so inpinite e so bann mansonz. Nu bizin fini ar leta-desyez Israelyin. Nu bizin fini ar rasism Israelyin e Aparteid. Nu bizin fini ar zenosid.
Replik Israel fas a inkirsyon 7 Oktob li telman enn risponns barbarik ki li pa etonan pe ena enn rebelyon par zenn staf dan Mezon Blans. Mo espere ansyin staf usi pu fer rebelyon kont sa kalite zenosid kolonyal, kriyel e inimin baze lor nanye apart rasism puvwar opreser e alimante par sa mem kalite propagann isterik ki ti servi pu zistifye syek-apre-syek “reyd pinitif” lor popilasyon dorizinn partu dan lemond. E lerla ipokrit dan sivilizasyon-Oksidantal depi laba dir: “Kifer Tyer Mond pa dibut ar Israel?” Repons la se: “persepsyon kisannla exakteman barbar” pe sanze – parmi lepep atraver lemond, mem a linteryer pei inperyalist oksidantal.
Nom ti servi dan lepok kolonyal dir tu: “enn reyd pinitif”. Sa ti enn expresyon militer formel. Seki sokan, inkrwayab se sa anakronism Lamerik ek Israel kan zordi zot pe ankor perpetye sa kalite reyd pinitif.
Bann reziman Britanik antye ti pe gayn lord pu al “detrir enn vilaz”, amenn rezilta tu piyaz, e gayn enn bonis pu finn partisip dan enn “reyd pinitif”. Enn reyd pinitif ti enn ripost kont enn grup enn lepep kolonize depi Vilaz X ki finn, dizon, tuy enn kolon avek enn fles anpwazone, uswa kokin enn bef depi enn kolon pu enn dezyem fwa, uswa inn vyol enn kolon fam. Uswa zot kapav zis rimer ki finn tuy bann kolon, uswa kokin uswa vyole, Uswa enn amalgam. Sa bann tel reyd pinitif puvwar kolonyal ti byin komin dan Lostrali parmi lepep Aborizenn, dan Lamerik ek Kanada kont lepep Premye Nasyon, partu atraver Lafrik ek Lind, Lamerik e pei Arab inklir Palestinn Pre-1948.
Lafin kolonizasyon ti oredi amenn lafin “reyd pinitif”.
Me listwar finn kit sa anakronism enn koloni-kolon(setler):Israel. So kolonizasyon-kolon pankor fini– Israel pe ankor kontinye ziska sa minit la – ni li pa finn met fin a so barbari atros, inklir pinisyon kolektif atraver “reyd pinitif”.
Mardi swar dan West Bank, larme Israel inn tuy enn ti garson. Tulezur depi le 7 Oktob pe infliz enn “pinisyon kolektif” ek “reyd pinitif”kont Palestinyin: pe fer arestasyon brit-brit, pe tuy Palestinyin ankor plis ki avan ki ti deza enn to atros, kraz lakaz dimunn ki swa enn so fami akize uswa san okenn rezon, buku plis de seki li ti ete avan, ek inn kumans priv seki dan prizon de manze ek dilo kuma enn pinisyon, depi le 7 Oktob. Kolon gayn proteksyon IDF pu tuy Palestinyin, fer zot kite sove, kokin zot later.
Lagazet Washington Post, lagazet sifon ble Biden, dan sa mem lartik la, dir: “ ‘Biden finn, an prive, savonn Bibi lor kestyon vyolans kolon ek viktim sivil an prive’, enn surs [Mezon Blans]. dir”
Sanse Biden an sekre ena enn laliyn ard kont sa mem zenosid ki limem pe finanse. Nu pa kwar sa ditu.
Ase avek so mansonz kolonyal.
Lindsey Collen
Pu LALIT, Merkredi 29 Novam 2023
Tradiksyon: BK avek kudme AA
