Palestinn Blog 7 –Mansonz Leta Israel pu Maske Zenosid
20.11.2023
Israel, kuma enn Leta, finn tro lontan benefisye depi inpinite ki Bibi Netanyahu abitye koz manti. Asterla li pe koz manti dan enn manyer flagran. Pa fer nanye, li panse, Biden ek Blinken pe sutenir mwa. Zot zarm pe sutenir mwa. Mo kapav koz tu manti ki mo ule.
Me, mansonz inn kumans grene. Israel asterla expoze. Li pe perpetye zenosid kont lepep Palestinn layv. Bizin aret sa. SESE-LEFE TUTSWIT!
Argiman Israelyin se li kapav tuy otan Palestinyin ki li ule akoz Hamas inn tuy 1,400 Israelyin. Ariv enn sif ron kan IDF pe kont lekor, me “les tonbe”. Asterla, larme Israelyin pe vinn dir, non, Hamas pa finn tuy 1,400 Israelyin. Zot finn tuy 1,200. Zor dir, leres 200 lekor se bann zom Hamas. (Kote Israelyin afirme zot finn tuy enn lot 1,500 sa zur la). Alor, kisannla finn tire pu tuy 200 dimunn ki finalman inn dekuver zot bann zom Hamas? Probableman, larme Israel. E si zot pa konn fer diferans, komye parmi sa 1,200 Israelyin mor finn anfet tuye par larme Israelyin dan so kont-atak otur le 7 Oktob? Kapav devinn enn lot kelke santenn. Samdi, lagazet meynstrim Israelyin Haaretz inn konfirm enn lot posibilite alarman: “Investigasyon Israelyin devwale li probab elikopter militer Israelyin responsab pu fiziyad inpe Israelyin dan konser-reyv.”Dimunn mitraye avek armaman lur depi enn elikopter militer pu anfet mitile.
Me, ninport ki sif la ete, li pa, ni li pa kapav enn exkiz pu larme Israel komet zenosid. Li pa enn exkiz pu tir vanzans kont fam ek zanfan, dimunn dan lopital ek dan lekol Nasyon Zini. Ni pa kapav zistifye masak 12,000 sivil. Ni pa kapav zistifye deplasman forse masif popilasyon. Ni pa kapav zistifye leta-de-syez, ni bonbardman, ni politik delibere pu afam popilasyon Gaza. Kuma kapav?
Mo pa konn pu lezot dimunn, me kan mo get Al Jazeera ek kan mo get zantiyes sa bann misye dan Gaza kan zot pe okip zanfan blese ek gramer muran dan Gaza, mo tuse par zot tandres. Mo emosyone par zot limanite, zot dinite dan sa moman veritab sufrans extrem. Zot enn inspirasyon.
Zot aksyon ek zot swin a seki pe sufer, defye propagann Israelyin.
Lexanp dinite Palestinyin dan zot sufrans fer lemond antye reklam enn sese-lefe. Zis sikopat ek sosyopat lemond ki kontinye bonbarde ek furni bom. Zot finn perdi tu respe.
Propagann fane par Israel ek Lamerik pe plizanpli devwale pu mansonz ki anfet zot ete.
Mansonz
Dan lopital Al Shifa, amezir lekor Palestinyin malad, blese pe anpile, mansonz Israel usi pe anpile.
Asterla, mem BBC pe expoz mansonz Israel. Ross Atkins, dan enn exselan reportaz, dir Israel finn prezant enn desin tinel anba lopital ki sipoze montre enn kartye zeneral Hamas me san okenn prev. Atkins montre enn klip video IDF sipozeman inn filme kan zurnalist BBC ek Fox News ti prezan dan lopital ansam avek IDF, kan pe filme. Me mont lor lebra solda IDF dan video klip montre ler ki anfet kelke ertan avan vizit organize pu zurnalist ankastre. BBC usi note ki video IDF ti poste, retire ek lerla re-poste dan enn form modifye. Azute lor la, masinn MRI zot finn truve dan sekans film IDF montre enn sel fizi ki finn swadizan truve in situ laba, me enn fizi inn vinn de fizi kan li ariv dan sekans BBC, ki ti sipoze pe transmet similtane. Israel montre ankor fizi ki finn dekuver me li pa kler kot zot sorti. IDF afirme ki zot film inn pran dan “enn sel priz san interipsyon”. Me Ross Atkins demontre enn manipilasyon evidan. IDF dan okenn fason pa demontre seki li pe afirme, setadir ena “enn sant komandman operasyonel pu Hamas”, ki Biden dir li kone sa vre. Lamerik finn antretan retrograd li kuma enn “pwin-komandman-kontrol”. Israel ek Lamerik bizin invant sa “prev” la pu ki bonbardman lopital ek evakyasyon lopital par larme lor terin pa konsidere kuma enn krim deger. Li enn krim deger pu atak enn lopital. Israel move kalite bizin sa prev la pu zistifye so atrosite dan sa lopital la. Alor, li invant bann mansonz.
Dimunn pa kwar zot mansonz
E malgre seki Bibi Netanyahu, Biden ek Blinken kapav rabase, enn milye avoka finn loz enn ka dan Lakur Kriminel Internasyonal [ICC – International Criminal Court] kont leta Israel so zenosid kont lepep Palestinyin. Avoka Gilles Devers pe liyd dan sa ka la e Guvernman Belzik finn ofer pu kontribiye fon pu ICC fer investigasyon. Zot dimann enn sese-lefe, antretan. Aret sa zenosid!
Malgre seki Bibi, Biden ek Blinken deblatere, par milye dimunn kominote Zwif finn organiz manifestasyon partu atraver Lamerik pu dir “pa lor nu nom”. Sa li telman brav, telman kuraze, telman devwe, depi dimunn Amerikin ordiner. Par santenn finn arete kan zot pe fer sitinn dan stasyon trin ek dan Kongre. Zot dimann enn sese-lefe tutswit! Aret sa zenosid!
Malgre seki zot lider fer – furni zarm ek minisyon a IDF pu komet zenosid – manifestan pro-Palestinyin dan Lostrali inn anpes navir kargo Israelyin pu rant dan dok Sidne, ek dan dok Melburn. Zot finn swiv travayer dok dan Barselonn dan Lespayn ki finn aret anbark ek debark tu materyel militer ki pe al Israel, parey kuma zot koleg travayer dan Zenoa, dan Litali. Zot dimann sese-lefe. Aret sa zenosid!
Malgre menas Minis Interyer UK lisansye Suella Braverman (enn lexanp klatan diaspora Moris) kont manifestan dan UK, li pa finn resi aret 600,000 dimunn Samdi davan desann dan lari Lond avek pavyon Palestinn ek sant “depi larivyer ziska lamer Palestinn pu libere”, enn lapel pwaynan anfaver lape pu tu dimunn dan Palestinn ek Israel. Ni li pa finn resi aret manifestan pu ferm enn lizinn zarm dan Kent ki furni IDF. Zot dimann sese-lefe. Aret sa zenosid!
Kan enn redakter lapres Britanik retrete so ti-zanfan depi Lostrali inn vinn vizite, li finn dimann pu zot al get enn match futborl Celtic layv lor terin, kumsa zot pu tann an personn zot siporterz sante anker pu Palestinyin. U kapav ekut li asterla lor nu websayt ek paz fb, dan enn post Dimans. Zot pe dimann sese-lefe.
Nu usi, parey. Sese-lefe Tutswit! Aret sa zenosid!
Lindsey Collen
pu LALIT. Dimans 19 Novam 2023
Tradiksyon: BK avek kudme AA
