Zenosid Blog 6 – Biden Fonse Lizye Ferme dan Zenosid
18.11.2023
Dan enn repons a kestyon enn zurnalist CBS, Prezidan Joe Biden de fwa finn admet zenosid par Netanyahu kont Palestinyin. Li dir, kan li fer referans laso larme Israel pu debark dan Lopital Al Shifa, “sa enn diferan zistwar de seki mo ti pe kwar pe arive avan, enn bonbardman aveg.” Seki inportan dan sa fraz la se admisyon ki ti ena “bonbardman aveg” “pe arive”, inklir probableman lor bann lopital, “avan”
“Bonbardman aveg”, efektivman, Misye Biden, li enn krim deger. Aster u pe admet li. Kumsidire nu bizin ankor prev. “Sa li pa enn [fer remark lor lartik “enn”] bonbardman sistematik intansif. Sann la li diferan. Zot pe travers andan sa bann tinel la, zot pe rant andan lopital.”
Etidyan deza pe sarye pankart kot pe apel li “Zenosid Joe”, enn nom ki pu kol ar li, reste kuma sa sante omniprezan dan lepok Lager Vietnam “Hey! Hey! LBJ! Komye zanfan u finn tuye zordi?” inn reste. Laverite inn sort deor.
Avan sa, Biden finn ankor enn fwa admet zenosid dan so repons a zurnalist CBS.
Li dir, “Ala kuma sityasyon ete: U divan enn sityasyon kot enn premye krim deger inn komet par Hamas kan li ena so kartye zeneral, so larme kasyet dan subasman enn lopital. E sa li enn fe. Ala seki inn arive.” Pu kumanse, Biden dir “enn premye krim inn komet par Hamas”. Mo “premye” vedir ena plizyer lezot krim deger swiv apre. Uswa omwin enn ki swiv premye la. Alor, li enn admisyon ki Israel inn komet krim deger.
Dezyeman, anu etidye sa byin mem. Seki li pe dir se li, Biden, panse, si Hamas inn komet enn “premye” krim deger, sa reprezant enn defans pu Netanyahu ek Biden pu komet lezot krim deger a enn lot nivo ek dan ninport ki proporsyon, petet mem ziska zenosid. Sa li absird. E, tutfason, Hamas li zis enn parti politik eli pu pran puvwar e pe sey rul enn “non-leta” ki finn su leta-de-syez par puvwar lokipasyon kolonyal pandan 17-an. Alor, Hamas dan kit fason komet enn “premye” krim deger? Relman? Ki leta-de-syez par Israel ete? Ki so lokipasyon ete? Ki expilsyon Palestinyin depi zot later ete? Finn ena 75-an seri “premye” krim deger kont lepep Palestinyin. E Biden lerla panse reyd dirize par Hamas le 7 Oktob kot zot finn fer bres dan 24 plas dan Israel so miray inpenetrab ek met KO defans elektronik Israel, teroriz popilasyon sivil pandan 2 zur, tuy sivil, pran 240 prizonye-deger, kit fason zistifye – pa enn lanket lor krim deger – me enn Leta arme – arme an okirans par Lamerik – komet zenosid kont totalite popilasyon Gaza? Li panse reyd Hamas zistifye destriksyon lopital Palestinyin enn par enn pu fer Gaza nepli abitab apre “tu sa krim deger ki swiv” termine ek milyon popilasyon ki Israel inn deplase akoz inn bonbard plas kot zot reste, pu ule returne. Sa admet buku lor aksyon disproporsyone kriminel.
Trwazyem dan sa but la, Biden dir Hamas ena “zot kartye zeneral, zot larme kasyet anba lopital”. Li azute. “E sa li enn fakt.” Li pa prezant okenn prev pu sa sanse “fakt” la. Seki Biden dir li enn fakt. Tutfason, li parey kuma sa komedyin Palestinyin prezant li dan so limur nwar, si ena enn terorist anba Empire State Building, li pu enn exkiz pu bonbard li. IDF ziskaler pa finn prezant okenn prev apart enn koleksyon ridikil pistole fizi. Ziska asterla, IDF pe kontinye dir ena enn lantre a bann tinel “pre ar lopital”. Li pu enn chalennj pu ninport kisannla truv kit plas dan Gaza ki pa “pre” avek lantre enn tinel. IDF dir li finn dekuver lekor enn otaz dan lopital – u dimann umem si sa bann prev mizerab uswa ninport ki lezot zafer imazinab, eski kapav vinn zistifye bonbardman ek reyd vyolan larme lokipasyon lor bann lopital.
Biden finn usi koz, lor reyd dan lopital ki finn dire pandan 2 zur asterla, “Israel pa finn rantre avek enn gran larme solda, pa finn fer reyd avek fraka, pa finn buskil tu. Zot finn rantre ek zot solda finn rantre avek zot zarm uswa fizi. Finn dir – dir- les mwa vinn pli presi. [Interesan kot li pe pran prekosyon pu swazir so bann mo!] Nu finn diskit lor kimanyer zot pu bizin azir avek buku prekosyon. U truv u divan enn sityasyon kot u kone ena enn gran nonb terorist Hamas.”Ki li pe rabase? Misye Biden, nu finn truv IDF so prop film kot pe montre kimanyer solda pe arsel pasyan alite, pasyan alite oblize res dan koridor lopital. Imazinn si u ti-zanfan ti pe alonze laba dan sa lopital la, Misye Biden, blese lor enn trole dan enn koridor, kan so lakaz inn bonbarde e finn amenn li lopital, kot asterla larme lokipasyon finn fer enn reyd. Eski sa pa terorism, Misye Anpati? U anpati pa vo gran soz apart enn mantalite kolonyal personifye. U montre anpati inikman a puvwar lokipasyon. Kumsidire umem puvwar lokipasyon, detutfason seki u anfet ete. Lepep Palestinyin pa dimunn pu u, Misye Biden. U reaksyon a sufrans lepep Palestinyin li enn reaksyon rasist. Sa li enn fe. U pa mem ena santiman pu sa bann tibaba fek-ne la. Ni u pa mem pran enn su traka pu dimann umem abe kot sa bann ti baba zot pov mama kapav ete.
M. Biden lerla dir kitsoz telman trublan ki li fer u gayn frison.
Pu plizyer zur, tu dimunn ki reflesi lor planet finn swiv lertan-apre-lertan-atros kimanyer inkibater lopital Al Shifa pu bann tibaba ne prematire, laba vid. Zot bann inkibater an parfet-eta. Zot pa pe fonksyone akoz pena lesans pu rul zenerater pu prodwir kuran neseser pu alimant zot pu zot rule. Ni nepli ena oxizenn pu ed bann tipti pu respire dan inkibater, apre ki larme Israel inn bonbard inite lopital ki prodwir oxizenn. Ala seki Joe Biden dir: larme Israel pe “usi amenn inkibater[andan lopital]”. IDF pe “amenn inkibater[andan lopital].”
Me deza ena inkibater dan lopital, Joe. Inkibater mor, Joe.
Sa Prezidan Lamerik kareman dibut laba ek rakont zistwar lor IDF pe “usi amenn inkibater”. Sa sanse pu montre komye li ker pu tibaba Palestinyin ek zot pov mama. Li kareman pe koz manti, e li rakont so mansonz san zenn, san tike, kumsa.
Li ankor tuzur pe furni zarm ek larzan pu komet krim deger ek zenosid.
Lindsey Collen
Pu LALIT, Vandredi 17 Novam 2023
Tradiksyon: BK avek kudme AA
NOT: Tradiksyon Extre depi transkript White House 16 Novam avek tit “Remark par Prezidan Biden dan enn Konferans Depres, Woodside,CA[Kaliforni].
Enn zurnalist CBS dimann enn kestyon “lor reyd IDF dan Lopital Al-Shifa Hospital, kan li pe sey blok ek tir manb Hamas depi laba. Sa semenn la, u [M. Prezidan] inn usi dir nu bizin protez lopital. Alor, kan u konpar target avek nonb sivil andan lopital la, eski loperasyon ankur zistifye? Ala Biden so repons inn- toto:
“Prezidan: Bon, get sa, anpasan nu finn diskit sa. Nu pa kapav les sa al andeor kontrol. Ala kuma sityasyon ete: U divan enn sityasyon kot enn premye krim deger inn komet par Hamas kan li ena so kartye zeneral, so larme kasyet dan subasman enn lopital. E sa li enn fe. Ala seki inn arive.
“Israel pa finn debark avek enn larme solda, zot pa finn bonbarde, pa finn buskile brit-brit. Zot finn rantre ek zot solda finn rantre avek zot zarm uswa fizi. Finn dir – dir – les mo presize. Nu finn diskite lor nesesite pu zot rantre avek buku prekosyon. U truv u divan enn sityasyon kot u kone ki ena enn gran nonb terorist Hamas. Hamas finn deza dir piblikman ki zot ena enn plan pu atak Israel ankor parey kuma zot finn fer avan, kot zot ti kup latet bann tibaba pu brile – bril fam ek zanfan vivan.
“E alor, lide ki zot pu zis arete e zot pa pu fer nanyin li pa realist. Sa li pa enn bonbardman intansif sistematik lor enn zonn. Sannla li diferan. Zot pe travers andan sa bann tinel la, zot pe rant andan lopital.
“E si u remarke, mo — mo inpe preokipe zordi. Mo dimann exkiz, mo pa finn truv tu seki pe pase. Mem seki mo finn truve, eski — mo pankor fer verifye— mo finn dimann mo lekip pu reponn sa kestyon la. Me seki pe arive se zot pe amenn inkibater andan. Zot pe amenn lezot — lezot zafer pu ed dimunn dan lopital, e zot finn donn bann dokter e — inn inform mwa — dokter ek ners ek staf lokazyon pu evakye depi kot ena danze. Alor, sa li diferan depi seki mo panse ti pe arive presedaman, enn bonbardman zeneralize.”
