Palestinn Blog 4 – Lor buldozer militer detrir sime kuma enn pinisyon kolektif
16.11.2023
Enn-de semenn desela, CWA ti pe fer gro travo lor Allée Tamarin dan Bambous, samem sime ki relye nu Ragoo Lane avek leres lemond. U pe sirman dimann umem abe, ki sa ena pu fer avek Blog Gaza? Kontinye lir.
Dan ka CWA so travo sime, li pu enn koz valab: pu retir nu furnitir dilo depi zonn ruz kuma lekter pu rapel kuma kan ti ena 2 lokdawn Kovid, nu ti pe bizin sorti lor sime avek mask pu konekte tiyo depi travayer zot usi avek zot mask lor kamyon dilo CWA pu ranpli nu barik, tenk ek tu lezot resipyan ki ena pu ramas dilo. Nu espere apre sa travo la nu pu sorti depi sa sityasyon kot apenn gayn dilo pu al ver enn furnitir dilo 24/7 kuma ti promet nu. Alor, lafuy dan Allée Tamarin ti pu enn bonn koz.
Me nu tu finn ena pu fer fas sa dezagreman mem kan ena enn transe byin anord 18-pus larzer ek 4- a 5-pye fonder dan lekel enn travayer kapav dibut ladan omilye Allée Tamarin. Nu tu dan sa kartye la ti byin anbarase. Lefet u pa kone ki parti sime pu ena trafik wannwe dan gramatin uswa dan tanto. E u ti ena pu fer enn gran detur. Lor la u ena pu atann pu gayn akse a sa sime la, pandan enn brek kan travayer ki pe mark sime ek travayer pe fer lafuy kapav les u pas enn travayer stop-go.Tapaz kontinyel dan nu lakaz, kan graynder pe mark sime ek lerla exkavater fuye, ti terib. E lapusyer pandan travo ti kuver partu. U pa kapav truv soley. E enn zur, nu pa ti mem kapav sorti depi Ragoo Lane ditu. Tiyo existan ti kase pandan sa travo sime ek sa kartye la antye ti inonde, inklir sa gro transe omilye. Alor, nu pa ti pe kapav sorti depi Ragoo lane. E dilo pa ti kule ditu. E dimunn ti bizin fer laranzman spesyal avek sofer mini-bis ki return zanfan lakaz depi lekol. Pu al zwenn zot omilye sa travo lor sime. Ena finn bizin kennsel sorti pu al dispanser uswa lopital. Dimunn dan sez rulant, uswa avek enn ti problem laans uswa sevi uswa zenu, pa ti kapav debruye pu sorti depi Ragoo Lane. Dimunn ti bizin pran dilo prete. Li pa ti fasil. Pu enn zur. Mo redir, sa zis pu enn zur. Zis pu 24 ertan. Li ti pu enn pli meyer koz. Kriz la ti enn aksidan, enn erer.
Zordi, lor Al Jazeera, sel stasyon TV vo lapenn gete, e li ena reporter lor terin, e li anpes u fer laraz kraz u laparey TV dan lakaz telman propagann pro-zenosid lor lezot stasyon TV intolerab, nu truv IDF (Israeli Defense Force – Larme Leta Israel)servi buldozer militer par expre fuy sime dan West Bank pu detrir infrastriktir dilo, elektrisite, koneksyon ek sime la limem.
IDF perpetye sa parti enn zenosid onn-going dan West Bank ena fwa dan gran lizur uswa ena fwa anplin dan lanwit, parski zot kone tu latansyon brake enn lot plas. Anfet nu pe get lot plas, lizye rive lor zimaz zenosid dan lot parti Palestinn apel Gaza. Nu lizye larme. E nu gayn difikilte pu tir nu lizye depi zimaz lor kimanyer pe tuy tu sa ti baba fek ne amezir inkibater pe teyn akoz par expre inn kup kuran. Kimanyer nu kapav tir nu lizye depi sufrans tu sa fami dan Gaza forse pu res andan pandan plis ki enn mwa ek pe truv mor tutfason su enn bom? Uswa lezot fami kan zot pe sove pu sap zot lavi lor enn saret tire par enn burik, truv lamor kan zot pe sove, detutfason? Uswa lezot, kan zot pe reste. Tromatize pu lavi. Ena lezot nu truve pe sove pu al dan sa parti ki deza sirpeple, deza pena manze, lesid Gaza dan langwas ek dan insertitid. Antretan, dan West Bank IDF par expre fuy sime, les zot kumsa mem san reparasyon. Laport lakaz dimunn bloke avek debri ek pa kapav uver.
Ragoo Lane bloke pu enn zur ek sa pu enn bon rezon fer mwa gayn enn lide seki fami Palestinyin ena pu fer fas tulezur dan West Bank – avek tantativ larme Israel pu fors zot kit zot lakaz sove. IDF zis buldoz sime antye, avek so tiyo dilo tu, tusala kuma enn vanzans Leta Israel ek pinisyon kolektif. E kan abitan repar domaz, IDF revini ek re-buldoze ankor plis. IDF vinn e pers ti tru depi andeor miray enn lakaz fami enn vye pansyoner, pu mezir lepeser miray lakaz la. Sa ule dir dan enn-de zur IDF, aster ki li kone komye dinamit pu bizin pu exploz lakaz fami sa pansyoner, pu vini e pu eklat lakaz la. Les enn imans tru dan leker ek lespri tut enn fami, enn sime antye, enn vilaz antye, enn pep antye. Sa li sa lot parti sa zenosid la. Sa li onn-going, nu kapav dir, enn zenosid perle, kont Palestinyin depi 1948. E sel zafer lemond – setadir nu tu leres– finn resi fer se fer Nasyon Zini ki anfet finn met dibut sa dezord kolonyal an 1947, pu donn enn swin palyatif a enn popilasyon Palestinn [tufe par lokipasyon militer Israel] atraver bann organism Nasyon Zini ki pena ase finansman. Asterla, dan Gaza, sa bann organism Nasyon Zini enn-par-enn pe bizin ferme inklir lopital WHO, lekol, aprovizyonnman led alimanter dan Gaza, akot de tyer popilasyon deza refizye depi presedan epizod sa zenosid onn-going la. Nasyon Zini finn perdi 102 staf su bonbardman Israel.
Dan LALIT, ek dan SOMALP, nu pe fer nu tipti but. Nu finn fer enn veye. Nu finn siyn enn Deklarasyon Komin. Nu finn partisip dan enn Forum. Nu finn avoy lartik pu pibliye dan Lapres, me okenn lartik pa finn pibliye. Nu finn fer lapel a Jugnauth pu omwin fer enn kontribisyon miner kuma sispann relasyon diplomatik, parey ti sispann relasyon avek rezon an 2009. Nu konpran realite Palestinn ek Gaza pli byin ki lezot akoz de nu manb finn volonter pu al donn kudme Palestinyin – ant 2004 ek 2009 – konfront sa mem IDF la, Larme Leta Israel. Alain Ah Vee ti partisip dan trwa-semenn Lamars Solidarite Palestinn tutlong miray Aparteid, depi Jenin ziska Jerusalem an 2004. Li finn rakonte kuma li ete dan Palestinn su lokipasyon militer IDF. Ragini Kistnasamy finn al res dan vilaz Hares dan West Bank, dan enn lekip “fam internasyonal” pu zis veye, intervenir kan zanfan Palestinyin menase avek arestasyon par IDF uswa arselman lor chekpoynt. Li finn ekrir enn liv, Dayeri Palestinn. U kapav gayn enn kopi. E li ti sey, dan enn imans aksyon internasyonal, pu al dan Gaza an 2009. Li pa ti resi. Mubharak Lezip ti alepok kontrol Krosing Rafah. Li ti dan premye manifestasyon lor Tahir Square enn-an avan gran-gran manifestasyon ki pu zet Mubharak depi puvwar. Nu finn aprann depi sa, usi. Nu dir tusala pa pu vant numem. Me pu dir sakenn parmi nu ena enn responsabilite moral ek politik pu anpes zenosid. Konvansyon Zenosid 1949 anfet donn nu sa responsabilite pu ANPES zenosid. Nu kapav selman azir atraver nu Leta, setadir zordi atraver Pravind Jugnauth. Nu finn fer lapel pu li sispann relasyon diplomatik, kuma enn presyon minimam kont Leta Israel ki pe perpetye zenosid divan nu lizye kan nu ena responsabilite pu anpes zenosid. Etidye sa bann mo inn swazire pu nom sa Trete la. Li apel Konvansyon Pu Prevansyon ek Pinisyon Krim Zenosid. Nu kapav fer apel pu Israel ek Lamerik pey reparasyon a lepep Palestinyin apre. Anu, dabor, pran nu responsabilite moral, politik ek legal, ek kontribiye pu anpes sa zenosid la kontinye atraver enn lapel a Jugnauth pu sispann relasyon diplomatik avek Israel kumsa nu azut nu lavwa pu enn SESE-LEFE tutswit. Pran pozisyon umem. Organize pu fer lorganizasyon kot u manb pu pran pozisyon. Fer Guvernman kone li izole – nu tu pe dimann pu sispann relasyon diplomatik kuma enn mwayin pu azut presyon pu enn sese-lefe. Sak aksyon konte. Lamerik pe ena tirbilans intern, mem ziska andan stafrum Kongre, e parmi fonksyoner dan Departman Deta. Zot kone, atraver zot informater dan lanbasad Lamerik, kan enn dantnu azir! Alor, azir! Buku staf deza ule raport ki pe ena tel aksyon. Apre, pu bizin obliz Israel pu pey reparasyon. Me les nu get seki pli irzan avan, enn sese-lefe dan Gaza, e lafin lokipasyon militer dan West Bank.
Lindsey Collen
pu LALIT, Merkredi 15 Novam 2023
Tradiksyon: BK avek kudme AA
