Blog 3 – Apel anfaver Sese-Lefe depi labaz lor lasenn internasyonal
15.11.2023
Dimans 12 Novam mo ti pran laparol via Zoom dan enn Forum Solidarite Palestinn ki ti fer layv pandan evennman popiler Jozi Bukfer dan Johanesburg. Mo ti pran laparol kuma enn ekrivin e usi kuma manb Lalit, Mike van Graan ti koze antan ki ekrivin teat ek Jimi Matthews ti koz lor so expozisyon foto, “Lexistans dan Palestinn”. Mo pa anmezir, malerezman, pu raport lor seki lezot orater ek cher, Maria van Driel, inn koze, akoz mo koneksyon rezo ti pe kas-kase, alor tu seki mo kapav propoze se pu donn enn lide seki mo ti dir layv dan Johanesburg dan mo 5-minit introdiksyon pu demar forum ek mo espere dimunn laba inn resi truve ek tande. Teknolozi marse, me li ena so limit. Antuka, mo rapor kapav permet bann lekter okuran kuma pe ena plizyer evennman internasyonal onivo mondyal, parey kuma sa evennman organize par Khanya College organizater Jozi Bukfer, pe kontribiye zot but pu fors Israel aksepte enn SESE-LEFE pu met fin a sa zenosid li pe komet kont lepep Palestinyin. Mardi, enn lasosyasyon spesyalize dan lalwa konstitisyonel Lamerik finn loz enn ka dan Lakur Siprem Lamerik kont Biden ek bann top sef so Ladministrasyon lor enn akizasyon ki zot pe vyol lalwa internasyonal kan zot pa pe evre pu anpes zenosid, e zot pe usi vyol lalwa Lamerik kan pe servi fon piblik Lamerik pu permet leta-de-syez, bonbardman ek deplasman forse popilasyon dan Palestinn.
Pu rikord, ala seki mo finn dir Dimans, baze lor mo nots, ek but omilye seki mo ti note pu azute dan deba apre si lokazyon ti permet:
Parey kuma, dan kumansman kolonyalism Oksidantal, ti ena lokipasyon, zenosid, piyaz ek masak, alor dan so lafin amer plis ki 400-an apre, nu pe viv dan enn moman kot nu pe temwin sa mem kalite lokipasyon, zenosid, piyaz ek masak. Mo fer referans a lafin amer kolonizasyon Oksidantal dan form trwa lexanp ki liye nu tu ansam zordi. Enn, lafin Aparteid Sid Afrik. De, kumansman lafin lokipasyon militer UK-USA lor enn but Repiblik Moris, Diego Garcia ek totalite Chagos, kot finn ena derasinnman forse popilasyon ant 1965 ek 1973. E trwa, rezon nu pe reyni zordi pu adrese, tortir ek masak Palestinyin pandan intansifikasyon leta-de-syez Gaza par Israel, bonbardman ek afam so popilasyon pu mor defin, anmemtan kolonizasyon ek lokipasyon pe kontinye dan leres Palestinn. Sa trwa lalit ti liye ek ankor liye – par inperyalism Oksidantal, dan so dernye lagoni.
Tu sa krim kont limanite pe komet avek inpinite akoz sutyin total pei inperyalist Oksidantal – ziska, nu chalennj depi andan ek depi andeor, e ranvers balans defors. Lamerik literalman rul leta militer Israel. Li arm li. Li finans li. Li zistifye so karnaz inzistifyab.
Etan nu omilye Israel so bann krim kont limanite, enn syez Medyeval ziska lamor dan Gaza, IDF (larme Israel) inn fors deplasman plis ki enn milyon Palestinyin dan Gaza, pe bonbard lopital, lekol, lakaz fami antye, sime, lanbilans, tuy staf lasante ek tuy plis ki 100 staf Nasyon Zini, tuy 11,000 Palestinyin dan Gaza, preske lamwatye ladan zanfan, e tuy plis ki 175 Palestinyin dan West Bank (parmi 46 zanfan) depi 7 Oktob, rezime an enn mo “zenosid” – sa mo byin for finn deza servi par direkter ansarz drwa imin Nasyon Zini ki finn demisyone depi so post, Craig Mokhiber e avan sa par akademik Israelyin Raz Segal exper dan Olokost ek zenosid dan Liniversite Stockton dan Lamerik – etan done la kot nu ete zordi, nu bizin ena enn lapel inifye for anfaver enn SESE-LEFE imedya ek san kondisyon.
ARET bondardman. E aret li tutswit!
Manyer fer sa li diferan pu sakenn antrenu. U ena sifizaman presyon politik pu fer guvernman Sid Afrik rapel so anbasader depi Israel. Dan Moris, nu pankor resi fer sa. An 2009, nu ti resi. Samdi demi-milyon dimunn ti marse dan Lond, malgre Guvernman Britanik inn warn zot pu pa al delavan. Plis ki enn milyon ti partisip dan enn lamars semenn dernye dan Latirki. 120 pei inn vot anfaver enn sese-lefe dan Lasanble Zeneral Nasyon Zini. Israel inn gayn 13 mizerab pei pu opoz sese-lefe – Lamerik, kat guvernman de-drwat dan Lerop, de diktatir Lamerik Latinn ek 6 Lil Pasifik su menas, enn parmi ena enn popilasyon 10,000 abitan. Travayer dan lemond pe mobilize pu blok navir, lepor, geyt lizinn armaman. Sitinn par Jewish Voices for Peace dan stasyon New York Grand Central. Staf ki travay dan Kongre dan Lamerik finn fer walkout.
Alor, kifer bonbardman pe kontinye? Kimanyer kapav kontinye enn zenosid, mem kan nu tu dan lemond temwin? Mem kan nu pe proteste, dan lemond antye, kont sa zenosid la?
Repons kurt se Lamerik rul Israel. Alor, repons se Lamerik mem ki lakoz.
Li Joe Biden ki responsab.
Ek so Sekreter Deta patetik Blinken, so sef militer Austin.
Zotmem pe arm Israel, zotmem pe finans Israel, zotmem pe ankuraz Israel.
Zotmem rezon prinsipal.
Zot pe refiz aret furni zarm a Israel. Okontrer Lamerik pe furni ankor zarm. Zot pe ranpli imans profi dan pos patron konpayni prodikter zarm, zur sanglan apre zur sanglan, ti baba mor apre tibaba mor kuver ar disan. Amezir inkibater aret rule, akoz tandem USA-Israel finn kup kuran par expre, deles bann tibaba, parey kuma inkibater, pu mor.
USA-Israel pe defye lalwa internasyonal. Zot pe masakre layv lor TV.
Zot barikad popilasyon Gaza andan, lerla larg bom, avoy grenad, bril zot vivan. Granmer, ti baba, malad ek blese, seki reflesi, seki kontan badine, zuvriye skil ek peser, kutiryer ek travayer lizinn, avoka ek artist, planter, dokter ek ners, travayer telekom ek travayer transpor, asterla avek saret rise par burik pe transport seki bwate ek vye ek andikape ek infirm ek tibaba fek ne, e fam pre pu akuse, asize lor enn espes motri linz.
Lerla, si zot sirviv, larme Israel afam zot, plonz zot dan marenwar terifyan. E bonbard zot ankor plis. Si zot ariv lor bor Mediterane pu sove, sa ku la bonbard zot depi lamer. Ena 2 navir deger Amerikin, inn poste dan Mediterane pe dibut garanti pu Israel. Oka, zot dir, sityasyon vinn andeor kontrol. Tuy 11,000 Palestinyin, mama, papa, zanfan, granmer, pa koresponn a “andeor kontrol”? Bles ek anpit 30,000 sivil pandan zot pe okipe avek zot travay tulezur pa konsidere kuma andeor kontrol?
Sak aksyon nu fer, ena enn lefe lor sakenn nu Guvernman. Alor, nu bizin azir. Kabine gayn rapor lor tu nu aksyon atraver zot bann espyon. Nu bann Guvernman sansib kan nu fer akizasyon ki zot pa pe fer ase pu aret enn zenosid. Zot trakase. Sak aksyon nu fer li enn presyon lor parti politik dan sakenn nu pei.
Anmemtan, nu aksyon raporte par staf Lanbasad Amerikin dan nu pei a Departman Deta Blinken dan Lamerik, kot pe deza ena enn rebelyon kont li akoz li pe kosyonn krim kont limanite dan Gaza. Josh Paul, enn so top servis sivil, finn rann so demisyon piblik. Sa bann kab Anbasader Amerikin dan sakenn nu pei avoy a Blinken zot samem sa bann “kab” kuma fame “Kab Wikileaks”. Travayer Departman Deta met sak aksyon nu fer dan zot bann rapor, sak priz pozisyon nu pran, sak lartik politik nu ekrir. E zot, usi, ena parmi pe fer rebelyon kont Biden. Alor, fode pa nu su-estim porte sak aksyon nu fer.
Dan so kab Anbasader Amerikin dan Oman, divilge Dimans, li dir “nu pe move perdi dan batay lor plan diplomatik”
Ala nu lapel:
SESE-LEFE!
Lafin leta-de-syez!
Lafin Lokipasyon ek kolonizasyon!
Lafin Aparteid Leta Israel!
Drwa retur tu refizye Palestinyin!
Liber depi lamer Mediterane ziska Palestinn!
Liber tu otaz Palestinyin anprizone par Leta Israel! Plis ki 6,000, avek 2,000 zanfan parmi! Osi byin ki 239 otaz Israelyin.
Met blokis lor tu livrezon zarm a Israel! Anbargo total lor zarm!
Israel bizin pey ful reparasyon a Palestinn!
Met bann lider Israel antray divan Lakur Kriminel Internasyonal.
Tusala, ofiramezir nu pe amenn lalit, dan long term ek asterla, parey kuma dan Sid Afrik, pu ful demokrasi pu tu dimunn dan Israel-Palestinn ek egalite pu tu!
Viv internasyonalism!
Lindsey Collen
pu LALIT, 14 Novam
Tradiksyon: BK avek kudme AA
