Blog DE: Kimanyer Aret Zenosid Planifye par Leta Israel
11.11.2023
Spektak dezolasyon provoke par zenosid Israel arme-par-Lamerik layv lor TV pe kontinye ale mem kumadir enn kosmar. Kimanyer nu pu kapav dormi aswar kan Biden-Netanyahu finn asasinn somey? Masak tu sa ti baba, ti zanfan deza, par expre, finn tromatiz zot ek afam zot, pe ant nu tu nu lanwit, partu dan lemond. Ple bizar ek inabityel koze par blesir brile lor bann sirvivan, asterla kan pena okenn swin akoz bonbardman Israel inn detrir lopital, pe infekte ek pe gayn mutuk. Sa mank swin provoke, asontur, pe antrenn ankor lamor. Swin rutinn pu pasyan kanser ek dyaliz, maladi leker ek dyabet, tu finn kraze su bonbardman. Israel ek Lamerik pe usi tuy pasyan ordiner. Pe bizin fer loperasyon san anestezi. Israel-USA finn kup livrezon medikaman ek lekipman. Dan Gaza, sinkant fam pe akuse tulezur dan sa kondisyon lanfer provoke par bonbardman Israel. Pena swin lasante. Zanfan deza malnuri, asterla apre ki finn par expre priv zot de nuritir pandan dernye enn mwa, e furnitir dilo potab finn kupe par expre, e tu sa bann akt zenosider, asontur, pe provok dyare parmi zanfan e pe antrenn lamor akoz pena serom. Tu sa bann viktim segonder kriote Israel ek Lamerik, osi byin ki tu sa bann baba ek vye gran dimunn ki ankor antere anba dekonb zot prop lakaz kraze par bonbardman, zot tu pa finn konte dan sif ofisyel kantite mor.
Tusala reprezant enn zenosid.
E Prezidan Biden rezet enn sese-lefe? Eski li fu?
Alor, li dir Netanyahu: Kontinye u bonbardman infernal kont Palestinyin dan Gaza! Servi tu zarm nu pe furni u! Nu pu avoy ankor! Ankor 14 milyar dolar minisyon pe vini. Patron nu bann lizinn zarm pu angrese amezir lepep dan Gaza mor dan enn zenosid. Non a sese-lefe, Biden irle! Li fer so reprezantan met veto lor enn rezolisyon sese-lefe dan Konsey Sekirite Nasyon Zini. So reprezantan tusel finn donn fe-ver pu Israel al delavan avek ankor plis bonbardman zenosid. Vremem inkrwayab!
Dan Lasanble Zeneral Nasyon Zini, USA ek Israel inn grat-grate, inn kapav ramas ansam swa par menas uswa par aste 12 mizerab pei: de diktatir dan Lamerik Latinn; kat pei de-drwat lor 27 pei Lerop, ek sis leta zil Pasifik su menas, enn avek enn popilasyon 10,000. E samem tu. Samem kifer nu blam Israel ek Lamerik. Zot bann asasin. Zot pe provok enn deplasman forse enn milyon abitan Gaza. Zot aplati infrastriktir, inklir lopital, lekol, sime, dilo, ek furnitir kuran. Zot demoli lakaz dan West Bank. Zot kidnap Palestinyin, anprizonn zot dan prizon Israel. 6,000 Palestinyin West Bank inn ramase kuma otaz par Israel avek konplisite flagran Lamerik.
Kan Biden kumans pey enn pri politik pu so partisipasyon dan sa zenosid la, li pe kumans propoz enn nuvo form kriote: sa absirdite enn swadizan “poz imaniter”. Aret bonbardman enn-de plas pu kelke ertan pu les manze ek dilo rantre, e lerla kan dimunn finn manz enn buse manze ek bwar enn-de gorze dilo, rekumans re-bonbarde partu ankor. Netanyahu finn redi laliyn pandan enn semenn. Non li pa pu permet okenn poz imaniter. Li masakre ankor enn lot milye Palestinyin. Non, li dir. Non pa pu ena poz imaniter. Li teti ek menase. Li kontinye anprizonn Palestinyin dan Gaza, afam zot pu obliz zot kit Gaza, e lerla bonbard zot ek tu zot sivilizasyon. Li, avek bom Biden, pe kontinye bonbarde dan Lenor, li blam abitan Lenor Gaza akoz zot pe kontinye reste apre ki finn dir zot buze, e lerla bonbard zot dan Lesid sa ku la, kot limem finn fors zot deplase pu evit bonbardman. Laba, Netanyahu, avek sutyin Biden, finn anserkle zot, kumadir enn trupo zanimo, pe atann pu deport zot dan dezer Sinai dan enn dezyem Nakba, enn dezyem gran katastrof. So Minis Defans finn deza apel Palestinyin “bann zanimo imin”. “Nu pe lager kont bann zanimo imin, alor nu pe azir an konsekans,” li dir. Dan West Bank, antretan, Netanyahu – avek led Lamerik – pe arm bann kolon bandi, ki tuy bann Palestinyin, e li avoy zarm furni par Lamerik dan West Bank pu kidnap deplizanpli Palestinyin, apel sa pe “aret” zot. Dan Les Zerizalem, fami Palestinyin pe kontinye sibir arselman pu fors zot kit zot lakaz.
Lerla sanse Netanyahu konsede, dakor pu ena sa poz absoliman absird “4-ertan poz par zur dan Lenor Gaza”, anmemtan kontinye tuye lezot plas dan Gaza, avan rekumans masak zeneralize partu ankor. Ziska prosenn poz 4-ertan so landime. Ki pe arrive? Kimanyer nu kapav aret sa?
Anu kumanse par get kisannla pe opoz zenosid?
Premye, ena lepep Gaza ek Palestinn antye. Zot pe opoz, e finn tultan opoz li. Zot finn fer sa pu plis ki 75-an. Zot ero lepase finn leg nu eritaz sa lalit la. Lerla pei dan Lafrik finn repran sa flanbo lalit kont restan kolonizasyon Oksidantal. Lerla lemond antye kumans dibut ansam avek lepep Palestinyin.
Plizyer pei pe asterla kas lyin avek Israel. Nu ti fer lalist sa bann pei la, dan Blog ENN.
Dan enn deklarasyon dan Parlman Mardi, Minis Zafer etranzer Sid Afrik Naledi Pandor inn akiz Israel “pe masakre zanfan ek fam”. Li finn fer apel pu Lakur Kriminel Internasyonal [ICC - International Criminal Court] tir enn warant kont Netanyahu ek kont so bann sef larme. Avek rezon, li dimann pu ena enn sese-lefe imedya ek total.
E ankor, pa zis bann leta ki finn rapel zot anbasader, me dimunn dan zot sindika ek lorganizasyon, partu dan lemond, pe fer sulevman.
Finn ena imans lamars sak semenn dan Lond. Dan Latirki plis ki enn milyon dimunn ti manifeste. Ti ena enn imans manifestasyon divan enn baz NATO dan Latirki kan asistan Biden, Blinken ti aterir pu vinn “koz-koze”. Blinken finn sufer enn afron akoz li pa finn resi zwenn Prezidan. Dan Lindonezi, dan Mexik, dan Nuvel Zeland, dan Lostrali, dan Zapon, dan Sid Afrik, dan Lalibi, dan Zordani, dan Yemenn, dan Lespayn, e mem dan Lafrans kot manifestasyon anfaver Palestinn ilegal. Dan Lamerik finn ena plizyer gran manifestasyon dan diferan lavil.
Dan Gran Bretayn, plis ki 100 manb enn fron apel “Travayer pu enn Palestinn Lib” finn fer enn blokis divan konpayni fabrikan zarm Elbit Systems, dan Kent. Gran Bretayn limem, apre Lamerik, limem pli gran furniser zarm a Israel. Sa aksyon la li enn risponns a korl irzan par 30 sindika Palestinyin a organizasyon travayer dan lemond pu pran aksyon, inklir aksyon direk pu blok livrezon zarm ver larme Israel.
Dan Lamerik, 75 travayer ki sutenir Palestinn ti blok geyt lizinn Boeing dan St. Charles, Missouri.
Manifestan pro-Palestinn finn eskalad ek blok enn navir avek kargo zarm pu al Israel dan Lepor Oakland pre kot San Francisco dan Lamerik par sabot so lank. Zot dekrir zot mem kuma bann pro-Palestinyin pre-okipe, e ti ena usi prezans manifestan kominote Zwif parmi.
Enn manifestasyon dan Lamerik finn blok Lepor Tacoma dan Leta Washington pu blok ankor enn lot navir kite avek livrezon zarm ver Israel.
Dan enn lot manifestasyon gran anvergir, Jewish Voices for Peace, an sutyin pu enn sese-lefe imedya, ti organiz par santenn manifestan pu fer enn sit-inn dan orl prinsipal Gran Lagar Santral New York [New York Grand Central Station], enn imans rezo trafik transpor. Sa finn provok enn imans anbuteyaz sirkilasyon. Lapolis finn aret par santenn manifestan.
Ti ena enn imans sit-inn dan batiman Kongre Amerikin par dimunn kominote Zwif kont Leta Israel. Zot slogan “Napa lor nu nom” ek zot fer apel pu enn sese-lefe. Li ti telman gran ki finn ena plis ki 500 arestasyon.
Dan Kongre mem, kan Blinken pe temwayne lor kifer Lamerik pe bizin donn Israel ankor 14 milyar dolar “led” militer anplis ki sa lot 3 milyar dolar ki li donn Israel sak lane, ti ena enn manifestasyon. Manb Code Pink ek lezot lorganizasyon, ti asiz dan galri piblik zis deryer Blinken dan Kongre ek sak manifestan ti lev zot de lame penn an ruz, kumadir tase ar disan. Finn may Blinken an flagran deli. Li ti pe explike kifer bizin ankor plis bom, anmemtan ena sa zimaz tu sa lame tase-ruz-disan deryer li pe ant li. Aturderol, dan disiplinn, enn manifestan dibut ek kriye enn demand presi: “Aret bonbard Gaza”. Blinken, oblize aret koze akoz so lavwa nwaye. Azan sekirite finn tir manifestan la deor. Lerla Blinken rekumans koze. Lame tase avek ruz kuler disan deryer li. Enn lot manifestan kriye “Sese-lefe imedya!”. Blinken tike. Sekirite finn tir lot manifestan. E sa ale mem kumsa. Medea Benjamin, ki manb Lalit, Ragini Kistnasamy ek momem kone depi presedan aksyon sutyin a Palestinn ek evennman anti-baz, finn deklare a lapres apre sekirite finn sarye li deor ki bann manifestan finn temwayn buku sutyin depi staf dan Kongre.
Li ti ena rezon. Dan lespas enn-de zur, 100 Staf Kongre finn fer enn walkawt, zot dir ki mandan dan bann sirkonskripsyon pe reklam enn sese-lefe imedya.
Ziska travayer dan USAID (US Agency for International Development) finn siyn enn petisyon. 630 sinyater finn apel pu enn sese-lefe. Zot dir zot “alarme ek demoralize avek sa degre vyolasyon lalwa internasyonal; lalwa la pu sipoze protez popilasyon sivil, staf lasante ek media osi byin ki lekol, lopital ek plas kot dimunn priye”.
Enn top servis sivil dan Departman Deta, Josh Paul, finn demisyone, e li finn kalifye seki Israel pe fer “enn ka klasik zenosid”.
Manifestan finn penn “Ceasefire!” lor pyedestal Latur Efel kot lao ena pavyon Israel pe flote. Manifestan finn regrupe lor lil kot ena Stati Laliberte dan Lavil New York. Finn ena enn manifestasyon abor Peaceboat Zapone.
Tu sa seri aksyon ek manifestasyon azute ver met plis presyon lor guvernman, e ver aret sa zenosid la. Nu bizin kontinye mintenir presyon. Nu bizin kontribiye nu but.
Premye Minis Moris pankor reponn Lapel LALIT pu kup tu lyin diplomatik avek Leta Israel. Get nu Deklarasyon a Lapres lor lapel ki finn avoy Premye Minis.
Lindsey Collen
Pu LALIT, 10 Novam 2023
Tradiksyon: BK avek kudme AA
